Pengulih ti nadai besekat

Era moden kemaya hari tu udah ngayanka penyampat penerang mindah  ba tungkup langit. Iya mega tau disemaka laju baka peluru leka bangkang, deras ari upas kesulai tandang. Pengelaju sereta peneras penerang ti dianjung sereta diterima  nya endang nadai kala ditaga sida aki ini kitai kelia tau nyadi.Nadai kala dalam peragam ati sida berita ti nyadi ba menua bukai ulih datai nuju kitai dalam sekejap mata aja, semina nengah chara sekali klik ba ujung tunjuk munyi ku jaku orang kemaya hari tu.

Pengeregas teknologi pemadah kemaya hari tu endang balat ngalitka ati mensia ke semampai enda kala puas ati enggau pemansang ke dikulihka sida nya. Taun ti deka datai, satelit baru deka dilancharka dikena ngulihka kaul Internet ngambika ulih datai ngagai tempat ti pengabis jauh sema jaku ai pan bedau datai dia.

Taja pan baka nya, asil pemansang tu ke bendar mega nempa pengirau ati ba sekeda raban pemikir. Pengirau ati sida mungkur aspek selangkuh tubuh, intelektual, emosional enggau spiritual mensia nya empu. Uji kitai ngupaska pekara tu enggau lenak agi.

Keterubah iya ari sukut perengka guna kaul sosial. Perengka guna kaul sosial tau nyadi perugu senyata dikena raban ke ngembuan sekeda agenda dikena sida bejalaika modus operandi sida awakka enda ditemu orang.

Publisiti ulih nyadi enggau jampat baka kilat ngelambai remang. Iya mega ulih ngangkatka populariti sesebengkah isu dalam timpuh awak ti kurang ari sejam. Taja pan kekadang publisiti nya siti ari pekara ti bula tauka pekara ti enda beguna.

Kitai patut nemu enti sema tiap iku mensia diasuh bediri aba baruh lampu panggau sida tentu ngembuan agenda sekalika nya agenda diri empu tauka agenda ari jari orang ke tinggi agi ari sida. Nadai salah ngembuan agenda laban dalam pengidup kitai endang patut bisi agenda kelimpah ari ngembuan misyen enggau visyen kediri empu. Semina utai ti patut dikingatka kitai nya enti kitai ba baruh, anang majak nyadi pemerati aja tauka tukang sukung ke nadai ulih nisih diri empu. Sidi tauka pansik lalu bechakap ngena tanya ti kritikal nyentuk ke diri empu nya puas ati.

Kedua nya ari sukut pengulih. Pengulih pengabis besai dalam kaul pemadah nya nyadi ba raban nembiak redak.  Pekara tu tau bendar ngeruga ati laban sida ke bujang enggau dara kemaya hari tu enda tentu rindu ngelanchamka minda awakka ulih bepikir ba tikas ke tinggi. Isu ke datai ba sida baka siti ransang ti ngelentik urat refleksyen lalu ngujungka timbal balas spontan sida nadai tentu nguna pikir ti panjai sereta matang. Nadai analisis digaga.

Ambika chunto,bisi sekeda ari bala sida nya jampat amat latah kelebih agi enti bekaul enggau pengarap. Pekara ti bisi kaul enggau pengarap nyau nyadi panggau alai sida bejaika orang bukai ngena jaku ti kasar. Kebuah pia, laban ku sida deka ngetanka penemu sereta pengarap sida enggaika runding raban sida tepawah enggau utai ti enda manah. Enti nitih, pengarap nya patut nyadi baka batu ansah dikena ngenajamka minda orang ke arapka sesebengkah pengarap nya. Pengarap mega patut meransang pemansang sereta ngerembaika penemu. Nya mih kebuah ari jeman dulu kelia nyentuk ke sehari tu, pengarap endang semampai mai mensia berunding sereta meratika sesebengkah pekara nya enggau chara ti rentang. Dipelabaka nadai sesebengkah pengarap ba dunya tu mai orang iya ngaga penyai.

Nya kebuah besenutuk enggau nya, kitai dipinta ukai semina nyadi aya senurut ke enda berani mansutka penemu. Anang masung diri enggau reti fizikal ti semina ditimpai ari sukut mata kasar aja. Dunya tu kenu ku sekeda orang nyau datai ba pengujung hari. Enda nemu mih pengamat pekara tu. Tang taja pia, nya mih kebuah kitai patut seruran bejimat mih laban dunya kemaya hari tu enda ngemudah formula matematik baka satu tambah satu nyadi dua. Kitai enda tau enda mega semampai bejimat lebuh meratika sesebengkah pekara lalu enda mudah arapka utai ti dibacha kitai nya.

Kebuah pia, laban kepengujung iya, semengat ti rurus sereta beradat agi ulih dibida ari roh ti hipokrit sereta changka; munyi ku sempama jaku tuai, benih ti manah enti labuh ke tasik sigi nyadi pulau. Nya alai, sama-sama mih kitai ngarapka diri nyadi benih ke manah.