Unit 3 Raban Jaku Pengawa

3.1   Pun Jaku

Jaku pengawa dikena nyebut pengawa tauka utai ti nyadi baikka nya dikereja ngagai utai bukai tauka nyadi ba diri empu. Lebuh dikena ngaga rambai jaku, jaku pengawa tu nyadika pugu rambai jaku pengawa.  Jaku pengawa tau dibagi ngagai dua bengkah, iya nya jaku pengawa transitif  enggau jaku pengawa intransitif  baka ti ditunjukka dalam grafik di baruh tu: 

	jaku pengawa transitif
jaku pengawa
	jaku pengawa intransitif

Grafik tu nunjukka bengkah jaku pengawa

3.2   Jaku Pengawa Transitif

Jaku pengawa transitif nya jaku pengawa ti mesti  ditangkan  jaku nama ti nyadi objek ke penyambut iya.

Chunto:

1.   Mayau nya makai tulang.

2.   Johan muji pemanah kasut baru Rawing.

3.   Reni manduk asi ngena periuk karan.

4.   Amad nyipak bol nuju tiang gol.

5.   Pengajar Bong meresa bup nembiak iya.

Ba ayat di atas, leka jaku makai, muji, manduk, nyipak enggau meresa  nya dikumbai jaku pengawa transitif lalu tulang, pemanah, asi, bol, enggau bup nya objek ti kena kereja.

3.3    Jaku Pengawa Intransitif

Leka jaku intransitif tu diinjau ari jaku English, intransitive.  Jaku pengawa intransitif nya raban jaku ti dikena nyebut hal ti nyadi ngagai diri orang ti bejaku tauka dikena nyebut gaya kereja. Ia nadai nerima objek terus tang tau diimbai rentayan jaku penerang ti nyadi ke penembu ba ayat nya. Leman jaku pengawa intransitif nya baka ti dipandangka ngena grafik tu:

	jaku bepenembu
jaku pengawa intransitif
	jaku nadai  bepenembu

                                                       

Grafik tu nunjukka bengkah jaku pengawa intransitif

3.3.1  Jaku Pengawa Intransitif Bepenembu

Chunto: 

6.   Ah Beng diau di Sematan.

7.   Igata udah belinsur gerai.

8.   Orang tesat nya belangkau serudu ngena daun.

9.   Ambie nyadi Pengulu di Simunjan.

3.3.2  Jaku Pengawa Intransitif Nadai Bepenembu

Chunto:

10. Iya tuchum.

11. Anak mit nya tinduk.

12. Gambang nyau bejalai.

13. Sida udah pulai.

14. Bala pengabang benung begari.

3.4   Atur Ngaga Jaku Pengawa

Jaku pengawa  dibagi ngagai empat bengkah tukuh baka ti dirintaika di baruh tu:

         (i)         Jaku pengawa tunggal

(ii)        Jaku pengawa tumbuh

(iii)       Jaku pengawa turu

(iv)       Jaku pengawa betandu

3.4.1  Jaku Pengawa Tunggal

Jaku pengawa tunggal nya leka jaku pengawa ti nadai nerima penambah.

Chunto:

15. Iya diau di rumah.

16. Jane pulai ke Sibu.

17. Burung terebai tinggi.

18. Jacob ada di Sri Aman.

19. Temuai nya bedau datai.

3.4.2  Jaku Pengawa Tumbuh

Jaku pengawa tumbuh nya jaku pengawa ti nyadi ari proses meri penambah ngagai urat jaku. Urat jaku nya ukai semina ari raban jaku pengawa tang tau mega berasal ari raban jaku bukai baka jaku nama tauka jaku adjektif.  Leka jaku penambah tau ditambah ba pun, ba ujung, ngepit urat jaku tauka nyelit ba urat jaku.

3.4.2.1  Penambah pun

Sekeda ari penambah pun jaku ti ulih kena ngaga jaku pengawa nya baka:

Penambah  b-,be-, bel-, ber-, beke-, bete-

Penambah  di-, dipe-, diper-

Penambah  em-

Penambah  en-, eng-

Penambah  me-

Penambah  ng-, nge-

Penambah  te-

Chunto:

Penambah	Urat Jaku	Jaku Pengawa Tumbuh
b-	ulih umai	bulih bumai
be-	bini dandung chara main	bebini bedandung bechara bemain
bel-	ajar	belajar
ber-	ubat imbai asai asal	berubat berimbai berasai berasal
beke-	berai	bekeberai
Bete-	garing giu gama kaung	betegaring betegiu betegama betekaung
di-	aru bai chubit dinga engkah	diaru dibai dichubit didinga diengkah
dipe-	rindang	diperindang
diper-	antu	diperantu
em-	pakap pekak pikap pelekang	empakap empekak empikap empelekang
eng-	kasak kanjung	engkasak engkanjung
en-	tupang tali	entupang entali
m-	bukut perau pelandai pengap	mukut merau melandai mengap
me-	rinsa liur lilup	merinsa meliur melilup
n-	duduk tampun tambai	nuduk nampun nambai
ng-	dinga arau ibun garu kirai ubah	ninga ngarau ngibun ngaru ngirai ngubah
nge-	rebut ribat rua lipat	ngerebut ngeribat ngerua ngelipat
te-	bai chabut kinsit terap	tebai techabut tekinsit teterap
ny-	chekak chelak japai jenguk salai sebut	nyekak nyelak nyapai nyenguk nyalai nyebut

3.4.2.2  Penambah ujung

Penambah ujung jaku pengawa dalam jaku Iban nya semina penambah -ka aja. Penambah –ka tu patut ditulis besambung.

Chunto:

20. Angkatka kutak nya ngagai mua pintu.

21. Sida menyadi berebutka keresa lama sida sebilik.

22. Iya melika anak iya selipar.

23. Kemaya kita mulaika diri?

24. Orang dagang udah nikika rega barang.

Penambah kepit

Penambah kepit tu dikena ngepit urat jaku.

Chunto:

Penambah	Urat Jaku	Jaku pengawa tumbuh
be…ka	anti bai charik dagang entaruh	beantika bebaika becharikka bedagangka beentaruhka
di…ka	gali imbai kemeran lalai	digalika diimbaika dikemeranka dilalaika
dike…ka	deka malu jaku	dikedekaka dikemaluka dikejakuka
dipe...ka	laba jalai rebut	dipelabaka dipejalaika diperebutka
em...ka	pelekang pelesut	empelekangka empelesutka
eng...ka	kabit kebut	engkabitka engkebutka
ke…ka	lari sayau malu laku	kelarika kesayauka kemaluka kelakuka
me…ka	belakang letu rinsa	melakangka meletuka merinsaka
ng…ka	engkah angkai untung imbai	ngengkahka ngangkaika nguntungka ngimbaika
ny...ka	sebaka selamat selikap selingkut	nyemakaka nyelamatka nyelikapka nyelingkutka
pe…ka	jantil lapik belanja lalu	pejantilka pelapikka pelanjaka pelaluka
te…ka	lengka gama juluk san dinga peda	telengkaka tegamaka tejulukka tesanka tedingaka tepedaka

3.5   Jaku Pengawa Turu

Jaku pengawa turu nya jaku pengawa ti digaga ari dua morfem meali-ali tauka lebih.

Chunto:

ambi ulih

taban lari

tunggang lupung

tukar ganti

randau ruai

3.6   Jaku Pengawa Betandu

Jaku pengawa betandu dalam jaku Iban tau dibagi ngagai dua bansa ia nya jaku pengawa betandu penuh enggau jaku pengawa betandu sebagi.

3.6.1  Jaku Pengawa Betandu Penuh

Chunto:

25. Iya ngilik-ngilik perau.

26. Jang michit-michit pala.

27. Aki ngaru-ngaru kaki.

28. Kera ngusak-ngusak dan kara.

29. Baur ginti nyin benyut-benyut.

3.6.2  Jaku Pengawa Betandu Sebagi

Chunto:

30. Sida bebai-bai deka nurun ke pasar.

31. Kami telunga-lunga lebuh deka nurun kereja.

32. Buah nya dibagi-bagi kami sebuat.

33. Apai Dom beberap-berap  enggau bala anak iya.

34.  Iya ngijap-ngijapka mata.