Kes ngayahka
pangan diri tauka buli enggau ulah ke ganas ti bisi nyadi sereta diayanka media
massa kemaya hari tu ukai isu ti baru. Taja pan penyampau kes ti diripot nya
bisi nurun baka ti dipadahka Opis Menteri Pelajar tang sesebengkah pengawa ti
drastik patut bendar diatur dikena ngemaduka ulah ti baka tu. Nya mih kebuah,
pekara ti baka tu begunaka saup sereta sukung raban apai indai, kaunselor
profesional, pakar psikologi enggau gerempung bukai.
Ulah ngayah
pangan bisi nyadi bedau lama ti udah ke alai siku nembiak sekula dipejal bala
pangan iya ngerat dilah diri empu. Ulah ti ganas baka tu endang enda ulih
diterima nama agi enti iya nyadi ba nembiak sekula ke agi biak umur baka sida
tu. Sida ke ditemu salah endang patut bendar ditinggang ukum disiplin lalu
diberi kaunseling. Pengawa ti nyadi baka tu balat bendar ngirauka ati lalu iya tentu
nyadika tanggung pengawa sida ti patut mutarka penanggul tu.
Nitihka ripot
polis, nembiak sekula ti maruk diri enggau pengawa ti salah nya bisi 0.9 persin
ari indeks kriminal menua. Opis Menteri Pelajar mega madahka raban nembiak ti
bisi maruk diri enggau penanggul disiplin nya kurang ari dua persin ari
penyampau peranak menua kitai. Taja pan penyampau tu dipeda mit tang pekara tu
patut bendar ditimpai enggau serius. Hal disiplin di sekula baka kes teruan,
salah ulah, enchuri enggau belaya semua ngujungka ulah ti ganas lalu tau ngasuh
orang bukai pedis tauka bakal. Nya alai sida ti bekuasa ba sekula enda ulih
nejuka pekara tu.
Kes ngayah
pangan diri ba sekula enggau penanggul disiplin ti bukai patut bendar diputarka
enggau segemitan dikena nentuka pengelemi atur sekula dikemanahka agi sereta
langkah rapat ti engkeman dipejalaika kepala pengajar enggau pengajar disiplin
nengah SOP (Standard Operating Procedure)
ti udah diteritka.
Utai ti ngirauka
kitai iya nya budaya ganas udah majak nyadi-senyadi ba institusyen pelajar
kitai kemaya hari tu. Kitai ngarapka ba dunya realiti kemaya hari tu bala anak
sereta uchu ambu kitai enda bangat disuap enggau pekara ti udu ngasuh sida
ganas. Ulah ti jai, bedendam, ngeransu pangan diri nyau nyadi pekara selama ti diayan
dalam filem kelebih agi ba televisyen. Nambahka nya, nembiak dipandangka enggau
ulah ti sama mega nengah Internet. Ulah ti baka tu suah bendar dititihka bala
nembiak. Indah cherita kartun kemaya hari tu mega mupuk ngayanka cherita ti
bisi adegan ganas.
Pengawa ti
ngayanka elemen ganas patut bendar dipansik enggau silik enti kitai amat-amat
deka mutar penanggul kriminal ke ganas ti marit raban nembiak kemaya hari tu.
Enti penanggul disiplin bisi nyadi di sekula, kitai patut mutarka penanggul nya
ari pun sereta ngiga chara ti engkeman dikena mutarka penanggul nya. Kitai enda
ulih semampai nyungkal isu ti seruran nyadi ba sekula. Semua sida ti bisi
tanggung pengawa patut begaut mutarka pekara nya kelebih agi enti bisi
penanggul disiplin ti serius nyadi ba dini-dini endur sekula. Semua raban ukai
semina sida sekula aja tang nyengkaum apai indai, polis enggau mensia mayuh
patut sama-sama besaup mutarka penanggul disiplin nembiak.
Raban sekula
patut berundingka langkah ti engkeman dikena neritka disiplin nembiak.
Besenutuk enggau nya mega, raban polis patut suah agi nemuai ke sekula ngambika
sida ulih berinteraksyen enggau bala nembiak sereta mega bala pengajar. Chara
tu ulih nyeliah sida nembiak sekula ari tepejuh enggau aktiviti samseng sereta
pengawa salah ti bukai.
Kelimpah ari
neritka disiplin, ukum ti setipak enggau penyalah patut diletak ba sida ti bisi
ditemu salah nya. Kaunseling ti profesional mega patut diberi ngagai bala
nembiak. Kaunselor sekula patut diasuh enggau masuk sesebengkah latih ti seriran
enggau pekara tu ngambika sida ulih mutarka penanggul nembiak sida ti bisi
diparit enggau kes jenayah.
Tiada ulasan:
Catat Ulasan