Tiga kategori nembiak sekula

Panyun Jaku

Sida ke udah lepas peresa Sijil Pelajaran Malaysia (SPM) enggau Sijil Tinggi Persekolahan Malaysia (STPM) 2015 apin lama ti udah baru udah bulih pemutus peresa dalam kandang tiga minggu tu tadi lalu diatu benung kiruh merambuka pekara ti deka digaga jemah ila.

Ngagai sida ke bulih pemutus peresa ti lati, perambu nampung pelajar ba institut pelajar tinggi (IPT) ba dalam tauka luar nengeri udah nyadi agenda ti pengabis dulu diperundingka sida. Ngagai sida ke bulih pemutus peresa ti jelan pemanah, mega ngarapka ulih diterima nampung pelajar, lalu ngagai iya ke kurang lati dipelabaka benung tusah ati ngerundingka utai ti deka nyadi jemah ila. Tang munyi ku Pensyarah Kanan Jabatan Pendidikan Kaunselor dan Penyeliaan, Fakulti Pengajian Pendidikan Universiti Putra Malaysia (UPM) Dr Noor Syamilah Zakaria madahka pemutus peresa SPM tauka STPM nya ukai penentu besai pemujur siku-siku nembiak sekula laban mayuh agi penguji bukai ti patut ditapi sida jemah ila, indah enda baka belayan padi lebat bebuah; tiap utai ti nyadi nya tentu bisi tuju enggau kebuah.

Batang Kenang

Mayuh nembiak enggau bala apai indai semina meda IPT nya tuju ti kepenudi dikena ngemansangka diri. Ba penemu sida, kiraka nadai agi lebih ari nya. Tang kemaya hari tu mayuh leman bidang alai milih dikena nyapai pemujur dalam pengidup, munyi ku orang; enti deka alah enda tang enti enggai iya ke bisi nya pan dikumbai nadai. Nya alai, mentaliti ti baka tu patut bendar diubah laban pemutus peresa sekalika nya lati tauka enda ukai penentu pemujur siku-siku nembiak. Mayuh agi penanggul ti deka ditapi sida maya nya ila.

Kemaya hari tu pekara ti deka dipilih nyau majak mayuh semayuh lalu ukai semina bepelasar ba pemutus peresa aja. Senario kemaya hari tu udah berubah ketegal mayuh macham peluang ada bisi sengenda ba mua sida. Entara deka tauka enggai aja.

Enti diperatika ari sukut rama sereta nitihka pansik bisi tiga kategori nembiak sekula sereta peluang ti ulih ditempa sida.

Kategori keterubah nya nembiak ti lati dalam pelajar sereta ngembuan mayuh leman pengelebih. Nembiak dalam kategori tu suah agi nadai ngembuan sebarang penanggul nampung pelajar sereta tulihka sekulasip. Bidang pelajar pilih sida mega balat agi nuju ngagai pengawa profesional baka doktor, injinir enggau ti bukai. Mayuh ari raban tu milih IPT menua tasik tauka IPT dalam menua tu empu ke bisi atur masuk ti terit. Ari perati mega, nembiak dalam kategori tu nadai kelalu betapi enggau penanggul kritikal alai sida dipilih nampung pelajar semadi mih ketegal faktor bukai baka salah milih bidang, nadai ngembuan pengerindu ba kus ti dipilih enggau faktor bukai. Sida ke dalam kategori tu dianggarka ngari 10 persin ari semua nembiak ke ngambi peresa SPM tauka STPM.

Lalu kategori kedua nya nembiak ke tulihka pemutus peresa ti jelan pengelati. Penyampau dalam raban tu mayuh ari semua kategori. Raban tu mih dikira majoriti iya nya nyau deka 70 persin lalu sida tu mih ti mayuh amat tama ke IPT.

Taja pia, IPT enda ulih ngambi semua sida tu laban tempat ti bisi disediaka nya enda mayuh enti dibanding enggau penyampau tubuh sida tu. Tu ke ngujungka raban tu dikira dalam kategori kritikal. Sida mesti diiring diembing enggaika tesalah pilih kus maya merambu pekara ungkup ke jemah ila. Bisi mayuh alai milih kelimpah ari ke nampung pelajar ba IPT. Bisi mega ari sida tu ke ngembuan pengulih ti badas tang bedau ulih dikira lati. Tang ketegal sekeda faktor baka endur ke enda chukup ba IPT dikelapungka enggau sistem meritokrasi di universiti perintah (UP) ngasuh bala sida tu balat bendar besemekih enggau pangan diri. Taja pan pia, enti sema enda ulih tama ke universiti, nya ukai pengujung pengidup laban sida agi bisi mayuh peluang milih ti bukai.

Sekeda ari tu nyengkaum nampung pelajar ba universiti prebet, masuk pom enam, nyambung pelajar ba tikas diploma, asasi, matrikulasi tauka enggau masuk kus profesional. Kategori sida tu benasit manah laban sida ngembuan mayuh palan alai milih. Sida mesti pandai ngerebut peluang tu. Enggau pengulih sereta pemutus peresa ti dikemisika, sida ke bendar nadai ngembuan penanggul ti besai alai sida merambuka pekara jemah ila. Enda ibuh mih kelalu sinu enti sema enda bulih masuk UP tauka ke menua tasik, tang patut pandai ngatur perambu diri.

Nangkanka tu iya nya nembiak ba kategori ti ketiga. Sida tu masuk raban ti enda lati. Nitihka pansik, sida tu patut terus milih tama ngagai bidang pengelandik. Mayuh bendar palan pengelatih pengelandik ti bisi disediaka baik nya ari agensi perintah tauka ari kolej prebet. Tu ulih nyeliah sida tebensara ari pelajar. Sekeda kus tu ulih dipinta ari Kolej Komuniti, Institut Kemahiran Belia Negara (IKBN), GiatMara, Institut Kemahiran MARA sereta mayuh agi institut perintah enggau prebet ti bisi nerima pengiktirafan Kelayakan Kemahiran Malaysia, Opis Menteri Penguasa Pengereja Pengawa. Institut pengelandik tu mayuh mantu ngadaka orang ti ngembuan pengelandik gawa. Sida mega laku amat sereta jampat bulih kereja sepengudah tembu kus.

Nembiak dalam kategori tu patut begaut  ngerebut peluang laban dalam era ekonomi global kemaya hari tu fokus balat agi ngagai pengereja pengawa ti bisi pengelandik. Taja pan nadai tulihka pemutus akademik ti manah memelan ukai reti nya sida enda mujur dalam pengidup tauka lalu enda bulih peluang kereja. Iya ti patut bisi ba diri empu nya pengingin ati diri. Nya alai, pemutus penemu ti milih terus masuk bekereja patut pilih ti kepenudi ngagai raban sida tu.

Sigi amat bisi sida ke mutus ati deka bekereja laban ngasaika diri udah nadai agi peluang nampung pelajar. Endang enda salah terus gawa tang ke manah agi sikap mih diri empu dulu enggau pugu pengelandik taja pan semina ngambi kus timpuh pandak. Dalam dunya bekereja ti kompetitif amat kemaya hari tu, pengelebih  ti mimit nya pan tau mai pemujur.

Penutup Kenang

Nya alai, raban nembiak kelebih agi nembiak Dayak patut bendar berandau enggau apai indai, kaunselor tauka ngiga senaka-naka iya pemayuh penerang sebedau ngaga  pemutus penemu senentang nasit diri jemah ila. Giga enggau bebendar penerang sentang pekara ti deka dipilih bepelasar ba pengerindu, pengulih enggau iya ti engkeman enggau diri empu. Pilih enggau manah-manah bidang ti deka dipasuk sereta gawa enggau bebendar ngambika ulih nyapai tuju ti dikedeka ati.