Makai enggau diri sebilik ukai enggau telefon

Kenang aku sekali tu bisi ngait enggau kaul kitai sebilik.  Kenang tu belalauka runding enggau jaku ti kala dipansutka Pope Francis bedau lama ti udah.  Pekara ti disebut iya nya manah amat dipekunsika enggau bala kitai sebuat ngambika nyadi teladan enggau chuan dalam pengawa ngerapitka kaul diri sebilik.

Pemansang teknologi kemaya hari tu udah jauh bendar nguingka runding enggau pengawa kitai mensia. Siti ari teknologi nya telefon. Ari telefon ke semina diengkah rumah diatu udah ulih dibinching kitai kin kitu. Ari ke semina kena bepadah sereta bekangau pangan diri, telefon diatu nyau ulih dikena bemain sereta bepedaka cherita ba video. Tu ngujungka kitai balat bendar layap sereta bangat bepanggai ba telefon sampai ke mija makai.

Ba penemu Pope Francis, mija makai nya kunci alai ngerapitka kaul entara diri sebilik, tang ku iya kemaya hari tu pengerapit kaul entara diri sebilik nya tau puntan baka menasan jalai jelu ketegal kelalu bepanggai ba teknologi. Diri sebilik ke enda kala beserumpu makai, nadai kala bejaku maya betunga mua ba mija tang semina meda televisyen tauka smartfon nya ukai agi dikira diri sebilik. Nitihka penemu Pope Francis, nembiak ke kelalu nunga komputer tauka telefon lalu enda mendingka jaku pangan diri nya ukai agi dikira diri sebilik tang dikumbai iya orang pinchin.

Dalam diri sebilik kitai belajar pasal pengerapit kaul entara pangan diri. Tu ditarakka apai indai kitai kenyau ari mit. Kitai sama-sama bekunsi pengerindu, pengelantang enggau berekat ke bisi diterima kitai. Nya alai, siti ari kelai ti nyata senentang pengerapit kaul entara diri sebilik ulih dipeda maya beserumpu makai ba mija tauka maya duduk ba geladak baik nya di kedai tauka di rumah.

Makai beserumpu maya makai lemai, bekunsika pemakai enggau peneleba sehari nya tanda imej ti fundamental senentang pengerapit kaul enggau solidariti diri sebilik. Kitai sebilik ukai semina bekunsika pemakai tang mega pengasih, pengerindu sereta penyinu ti bisi nuntung kitai sebilik sehari nya.

Beserumpu nya udah nyadi penyuran dikena nyukat tikas kualiti kaul entara diri sebilik. Kebuah pia, laban maya ba diri sebilik semua utai ti nyadi baik nya utai ke enda ngena, tauka enda manah maya begulai makai nya mih iya pansut.

Munyi ku Pope Francis, orang kristian endang bisi pengawa ti nyemetak (special vocation) idup dalam penyerakup. Kelai tu nyata dipeda maya Jesus empu segulai makai enggau bala pangan iya sereta mantaika perintah Tuhan nyadika bankuet pengelantang. Dalam konteks maya makai tu mega iya mantai ngagai anak murid iya sentang testamen spiritual iya.

Sama mega enggau kitai sebilik, maya makai nya mih endang alai kitai berandau pasal pekara ti udah nyadi sehari nya. Kitai sama-sama bekunsika berita pengelantang enggau berita penyinu ti bisi nyadi ba diri sebilik. Peneleba baka tu nyadi teladan pengerindu ti universal laban iya mega ngajar kitai mendingka utai ke diguna orang bukai.

Tang utai ke nyadi kemaya hari tu udah jauh bendar berubah. Makai beserumpu ke nyadi simbol penyerakup entara diri sebilik udah kurang bendar dikemeran bala apai indai enggau anak sida kemaya hari tu. Bisi sekeda nya amat dipeda sama-sama makai ba kedai tang nadai tentu bejaku enggau pangan diri laban kiruh besautka telefon. Pemakai ke dinah pan bisi enda abis diempa ngujungka pemakai nya pulai ke rua laban bisi mensia bukai di luar din ke enda chukup pemakai.

Nya alai, kitai ke apai indai patut terit nangkan bala anak sentang pemesai guna makai beserumpu sereta ngelengka enda lama pengawa ti bepegaika telefon lebuh makai beserumpu.