Dilema Bisi Orang Kampar, Orang Datai Orang Sangkai

Panyun jaku

Kenang tu nadai kaul enggau orang Kampar di Perak. Tu pekara ngenang pasal orang datai. Enti munya sida tu dikumbai orang kampar, orang datai orang sangkai. Nya jaku dikena Iban nitah orang ke datai lalu gawa sereta diau ba sesebengkah menua baka menua kitai, Malaysia. Agi munya jaku tu dikena nyebut orang ari menua bukai tauka ari batang ai siti ke lalu diau ba endur baru, nyaruk orang empu menua. Bisi mega sekeda nya bedampa sebelah nya dia lalu bisi mega suah enggau orang empu bilik ke endur nyaruk gawa bumai betaun.

Kelimpah ari nya, bisi mega orang tu udah beberapa taun diau ba sesebengkah endur mulaika diri ke menua diri empu tang bisi sekeda nya lalu ngentapka diri empu enggau orang ke empu menua nya. Orang ke baka tu ukai dikumbai orang ti datai pindah lalu ukai mega orang ke nyenggala dibai pindah kia. Nya kebuah lebuh iya udah lama diau dia kelama-lama iya mega mupuk diterima orang ke endang empu menua. Pekara tu nyadi ari ketegal iya tu tadi ulih ngimpun pemanah ulah diri nya alai nadai kebuah ti besai alai orang empu menua ngenggaika iya tauka muru iya pansut ari menua sida.

Enti diperatika ari genturung pendiau bala Iban kelia dia kitai kala ninga orang tuai bejaku maya sida bepilihka tuai bisi besebutka jaku munyi tu, ‘kena amai ga sanu nya dipilih nyadi tuai laban iya endang orang asal menua tu, tiris pantis orang ke berumpang agang berumpang batang orang menua tu. Iya ukai orang datai, orang sangkai, orang layar, orang kampar.’

Batang kenang

Kenyau ari 53 taun menua kitai udah merdeka, orang ke dulu munya nya ke datai pindah ke menua tu dikumbai orang kampar (migran) tang diatu sida nya udah enda patut agi dikumbai ngampar agi seagi-agi sida nya udah nyadi peranak menua Malaysia laban sida mega udah ngambu Malaysia tu menua sida sereta taluk ke perintah enggau menua tu.

Tang taja pia, isu bekaul enggau orang ke datai ngampar, datai sangkai ke menua kitai nya majak nyadi senyadi kemaya hari tu. Bisi nya datai enggau pemendar lalu bisi nya datai belalai tauka datai enda beradat munyi ku jaku orang kemaya hari tu. Iban munya ngumbai raban sida tu kampar nempaya; iya nya orang ke diau sementara empayaka diri enggau nadai pemendar tau diau dia.  Sida tu ke seruran dikenangika perintah enggau rayat menua tu empu. Ketegal sida, kitai ke rayat menua tu napi mayuh macham pekara ti enda tentu manah tang enti diperatika ari sukut global ukai kitai di Malaysia aja ti napi pekara tu. Tu udah nyadi isu global.

Orang ba Amerika Syarikat pan mega balat dituntung pekara tu laban mayuh bendar orang ari menua Amerika Selatan enggau menua-menua bukai ngampar nempaya ke menua tu. Baka nya mega menua-menua di Europe. Sida ke ari Afrika enggau kediatu nya ketegal perang ba Timur Tengah dia mayuh bendar orang ari Syria tama bebala mayuh ke sebelah menua di Europe. Nya mih ti nyadi dilema perintah enggau rayat orang empu menua. Orang ke datai belalai ngagai sesebengkah menua nya datai kia laban ti deka ngulihka pengelantang enggau penyenang. Sida deka ngulihka pengawa ti menyana, bulih duit ringgit ba menua ti dituju sida nya. Suah agi sida tu nuju menua ti kaya agi ari menua sida empu. Enti ukai ketegal tusah dini mih sida deka pindah ke menua bukai munyi ku sempama jaku tuai; ujan mas ba menua orang, ujan batu ba menua diri empu. Nyamai agi mih idup ba menua diri. Perintah enggau rayat endang semampai irau ati enti nyau mayuh orang datai belalai, ngampar nempaya ke menua orang. Besai bendar empas iya ngagai perintah enggau peranak menua.

Baka nya mih kitai di Malaysia endang semampai nangika penatai bala sida tu. Tang taja pia, nagang sida gawa di Malaysia tu ukai utai ti enda ulih dikerejaka perintah menua. Kuasa neritka adat enggau undang-undang endang bisi ba sida iya. Sida semina begunaka chara ti sistematik dikena mutarka pekara tu. Besenutuk enggau tu mega diperatika rayat Malaysia ngembuan ati begedi tang agi rindu mega ke sida ti ngampar tu. Taja pan mayuh ari kitai begedi ke sida ke datai kitu bisi mega bala kitai mega rindu ke penatai sida. Katika enda baka nya, laban menua kitai endang beguna bendar ke tulang urat sida tu dikena nyukung ngemansangka mayuh leman industri kitai.

Nya kebuah utai ke baru nyadi empai lama udah balat bendar ngasuh ati bala rayat Malaysia nyida; iya nya lebuh sida ba Putrajaya merambu deka ngemendarka 1.5 juta orang Bangladesh tama ke menua kitai. Tang lebuh perintah matak pulai penemu ti deka ngambi sida tu bisi mega sekeda rayat Malaysia, iya nya seraban pengaji pengawa ke enda tentu lantang ati enggau pemutus penemu tu. 

Orang Malaysia empu kenu ku perintah ke meransang sereta ngasuh sida tu ngereja pengawa kasar ke dikumbai sida kemaya hari tu 3D iya nya dirty, dangerous enggau difficult. Tu pengawa ti enggai digaga bala kitai peranak menua Malaysia tang ba awak ke sama kitai mega ngenggaika penatai orang kampar tu. Kitai berasai enda lantang enti sida bisi ngelinggi kitai laban ke bendar sosial enggau budaya sida tu enda sama enggau enggi kitai.

Nya alai lebuh perintah madahka diri deka nyain sempekat pemereti ati (MoU) enggau perintah Bangladesh ngambi 1.5 juta Bangladesh berenggat-renggat dalam timpuh tiga taun tu ila chukup ngasuh ati rayat Malaysia enda lantang.  Pekara pasal orang kampar tu endang suah dipejuraika ari kedai kupi, ba laman media sosial datai ba Parlimen. Pengawa ti besainka MoU nya kiraka udah datai ba tikas klimaks ti udah ditemu mensia mayuh. Munyi ke udah disebut, mensia mayuh endang enda lantang ati enggau penatai sida tu. Berita ke madah orang Bangladesh deka datai bebala mayuh nya balat bendar disakal perintah. Penyampau ti dipadahka perintah nya kenu ku sida nyengkaum sida Bangladesh ti udah ngerijista diri gawa ditu lalu sida ke bukai nya ukai reti iya datai ke Malaysia jemah ila. Penemu nya agi ngasuh mensia mayuh tetap enda puas ati. Ukai semua peranak Malaysia pechaya ke penerang ti baka tu laban ku sida sapa mih enda nemu embawang nya tebal umbang, empit nya tebal kulit. 

Nya alai dikena ngeyelapka ati mensia mayuh, mandal menteri besai udah nya madahka pengawa ke ngambi sida tu deka diketuka dulu. Dikena mutarka penanggul enda chukup pengereja pengawa, iya meransang raban pengaji pengawa ngaji orang menua tu empu. Iya madahka pengawa ke ngetu ngambi pengereja pengawa ari luar nya semina sementara aja semadi  ngantika penyampau ti tetap ke deka diguna ba genap bengkah industri ba menua tu. Taja pan pemutus penemu perintah tu dipeda agi kalik-kalik iya dikiraka udah engkeman digaga naka kediatu. Udah datai maya ti patut alai perintah ngerundingka penyampau guna-tulang ba mayuh bengkah sektor di menua tu kelebih agi maya ekonomi ti kusut baka kediatu. Sigi patut bendar sida ba Putrajaya mendingka penemu raban stakeholder kelebih agi rayat selama ke balat ngasaika pemayuh orang kampar ke gawa ba menua tu.

Taja pia utai ti balat mebaka runding kitai mayuh nya lebuh raban orang dagang ke keterubah suba enda setuju enggau penemu perintah ke deka ngambi pengereja pengawa orang Bangladesh jampat berubah runding, tak enda mukai-mukai mejah pemutus penemu perintah ke deka ngetuka sementara ngambi sida nya.

Rayat Malaysia mayuh nya endang ngandalka pemutus penemu ti deka ngetuka sementara penatai orang kampar gawa ba menua kitai. Kebuah pia, laban utai ti deka dipeda mensia mayuh nya pengereja pengawa ti ngembuan pengelandik sereta pemandai ti chukup. Pengereja pengawa ti profesional tu ke balat agi digunaka laban sida ulih mai pengelandik sida nya ke menua Malaysia.

Malaysia ba renggat kediatu begunaka pengereja pengawa ti spesifik. Iya lain agi hal ari Singapore laban menua Singapore tu hab ti bekaul enggau mata duit tauka finance. Nya alai menua Singapore endang sepa jaga ulih narit mayuh raban profesional gawa kia. Tang menua kitai agi bepelasar ba komoditi sereta nyadi palan ngaga pengawa berat (manufacturing centre). Nya kebuah kitai begunaka raban pengereja pengawa ti bebida pengelandik. Besenutuk enggau nya mega, patut bisi runding ti setimbang entara pengawa ti kelalu bepanggai ba orang datai laban mayuh ari sida tu orang ke nadai pengelandik sereta buta urup. Nya balat bendar mai pangka ti negatif ngagai menua Malaysia. Ba kes orang Bangladesh tu, kitai mega baka ke udah besedia ngasuh raban indu sida mega datai ke menua tu.

Pekara ti kepenudi ti mai empas ngagai kitai nya nyangka pengawa orang kampar ke datai kitu lalu ngentapka diri sereta berengkah beruang bilik. Pekara tu udah mayuh amat nyadi. Kitai dipelabaka gaga nerima sida laban ulih ngaji sida enggau gaji ti mit tang anang enda ingat pekara tu mega dikelapung enggau empas ari sukut duit ringgit kelebih agi ba bidang pengerai enggau pelajar sekula laban tu ngujungka penanggul ngagai raban pemayar chukai. Sida pemayar chukai ke napi bayar rega nyediaka pengerai enggau pelajar sekula laban duit chukai ke diabayar sida mih dikena perintah ngatur sereta bejalaika pengawa pengerai enggau pelajar.

Uji peratika statistik menua kitai kemaya hari tu. Penyampau batang tubuh peranak menua kitai diatu nya 30 juta lalu ari nya 20 juta nya pengereja pengawa ti berumur entara 15-64 lalu nitihka ripot semina 14 juta aja ke diambi gawa. Dipelabaka sida ke bukai kira-kira lima ngagai enam juta sida nya agi besekula, nadai gawa tauka enda tulihka pengawa tauka enda diambi gawa. Dipelabaka mega, mayuh sida ke bukai udah badu gawa kelebih agi sida ke udah lunggar umur baka sida ke lebih ari 50 taun laban sida mega deka ngasaika pinchin gawa tumu.

Nitihka statistik December taun nyin kemari, menua Malaysia bisi 2.1 juta pengereja pengawa ari menua luar ti datai kitu nitihka adat enggau undang-undang menua tu. Lalu bisi 1.7 juta orang kampar ti bukai nya bekereja ditu nya datai enda beradat. Ari kedua-dua nya semua tu kira-kira bisi 3.8 juta iku orang kampar, orang datai , orang sangkai. Tu enda nyengkaum raban orang kampar ke datai ngampar nempaya di Sabah.

Demografi etnik belalauka pengawa ngitung tubuh taun 2010 madahka orang Melayu (50%), China (22.6%), etnik Bumiputera ukai Melayu (11.8%) enggau India (6.7%). Sida ke ukai peranak menua nya 8.2%. Reti nya, orang luar kelebih agi sida ke ukai peranak menua udah mayuh agi ari bansa India menua tu empu. Dipelabaka aku, kitai Malaysia tentu enggai disemaka baka Dubai. Di Dubai, pengereja pengawa ari menua luar nya mayuh agi ari orang empu menua.

Nya kebuah mandal menteri besai udah meri jaku tangkan madahka menua kitai patut badu kelalu bepanggai ba pekereja pengawa ari menua luar enti kitai deka nagang penatai orang kampar bekereja di Malaysia. Tang utai tu lawit bendar diperatika. Ari sukut dagang ungkus ngaji pengereja pengawa ari menua luar nya baruh.

Tang penanggul orang Malaysia empu ke bedau besedia gawa ba bidang 3D (dirty, dangerous and difficult jobs) enti dibanding enggau orang kampar. Sida ke ngampar tu nadai milih pengawa. Tambah mega pengaji pengawa enda sanggup mayar gaji  minimum ngagai orang empu menua laban sida mega ngira untung besai sereta deka dipeda ulih besemekih enggau pangan diri enti sida ngaji orang kampar.

Nya kebuah nembiak redak patut dilalau enda milih kereja sereta enda ngembuan runding ke madah pengawa ti nadai glamer nya kurang agi status sosial ari pengawa bukai. Utai ti patut dikira nya asal sida bekereja sereta bulih gaji enggau chara ti rurus. Kemaya hari tu ba menua kitai mayuh bendar sida ke udah begraduat ari palan pelajar tinggi tang nadai ngembuan sebarang pengawa. Sida tu mih ke patut ngambi peluang  ari ke nadai peluang bukai ke manah agi ari tu. Ba menua Barat, sida ke bekuli tauka pekereja kolar biru nya digaji nitihka jam kereja sereta mesti diberi tips. Tips tu ke terus masuk ke kuchik ambika chunto bala sida ke gawa nyadi penempara.

Tang enti ditimpai ari diatu nyentuk ke jemah ila, Malaysia endang patut ngembuan perambu timpuh panjai dikena nempa sereta ngaga pelasar penemu enggau operasyen benilai tambah ba semua sektor. Ambika banding, insentif ti besai patut diberi ngagai raban penempa barang ngambika sida ulih nguna injin ari ti kelalu bepanggai ba pengereja pengawa ti nadai pengelandik.

Penutup kenang

Ba penemu aku, pengawa ti deka ngetu ngambi orang kampar ngereja pengawa nya ukai batang penemu ti engkeman. Kitai ke bendar patut ngiga jalai ti sistematik ngaturka pengidup sida ke udah lama ngentap diri ditu sereta berundingka chara tagang ti engkeman ke patut dipejalaika kitai lebuh ngaturka bala sida. Ingat jaku tuai, baka belayan padi lebat bebuah, tiap utai ke nyadi tentu bisi tuju enggau kebuah.