MINGGU tu minggu ti
kiruh amat ba pengidup sekeda raban nembiak, apai indai enggau pengajar. Kebuah
pia, laban pemutus peresa Sijil Tinggi Pelajaran Malaysia (STPM) enggau Sijil
Pelajaran Malaysia (SPM) ditabur ngagai mensia mayuh. Kedua-dua peresa tu besai
amat guna ngagai 500,000 iku nembiak ti udah besekula sepengelama entara 11
ngagai 13 taun.
Enti diperatika maya
tu endang mayuh macham pengerawang ati raban nembiak, apai indai enggau bala
pengajar kelebih agi maya pemutus peresa tu dibantaika ba mua mayuh. Ngagai
nembiak ke bulih pemutus peresa ti lati tentu sida engkechit tinggi seraya
neritikka ai mata gaga. Seraban agi nya nyangka dipeda nyabak sesedan laban
sinu ke diri enda tulihka pemutus peresa ti manah. Taja pia, entara gaga enggau
sinu tu mesti bisi mega raban nembiak enggau apai indai ke enda gagau ke
pemutus peresa SPM enggau STPM tu.
Beduduk ari tiga
bansa pengerawang ati nya dia perintah udah bebendar amat nguji enggau naka
ulih nyediaka semua perengka-guna ngambika bala nembiak ulih nampung pengidup
sida ngagai iya ke jauh agi. Naka pengerugi enti sida enda ngerebut peluang ti
bisi tu. Kitai sama bela nemu menua kitai Malaysia dalam timpuh empat taun da
agi dipelabaka nyapai juluk ati nyadi sebuah menua maju nengah Tinjau Pemansang
2020.
Ngagai bala nembiak
ti lati ba tikas STPM, sida ulih terus bepeluang nampung pelajar sida ngagai
tikas degree ba mayuh leman bidang pelajar ti dikerinduka sida ba universiti
perintah ke bisi ba menua tu. Baka nya mega nembiak SPM, sida bisi peluang
nampung pelajar sida ngagai tikas asasi, matrikulasyen enggau diploma sebedau
sida nampung pelajar ngagai tikas degree. Enti nembiak nya lati amat sereta
apai indai sida orang ke bisi utai, sida ulih nampung pelajar sida ke menua
tasik.
Ngelama ke udah
diperatika, bala kitai di menua tu baik nya nembiak, apai indai enggau sekula
endang obses ngagai pemutus peresa ti lati. Anang tekenyit kita ninga enti bisi
sekula beprestasi tinggi ba menua kitai tu sanggup ngangau nembiak ke bulih 9A
ke atas aja niki ke panggau nerima slip pemutus peresa sida.
Bah katika nasit
sida nembiak ke enda berapa lati? Tubuh sida tu mega nyampau pemayuh. Tang
kitai enda patut nangika sida tu. Sida mega enda patut irau. Menua kitai ngembuan
mayuh institut pelajar tinggi prebet, kolej vokasional, institut pengelandik
enggau kolej komuniti. Tu mih palan ke ulih alai sida nampung pelajar sida asal
semua sida tu bisi pengerindu deka belajar.
Menua kitai Malaysia
ukai semina begunaka orang ke pandai ba mayuh bengkah bidang ke pedis dikereja
tang mega nyengkaum sida ke landik ti sanggup ngereja mayuh macham pengawa
tusah, kamah enggau iya ke tau nganu (3D- Dirty,
Dangerous & Difficult). Pengawa 3D tu mega ulih dibayar gaji tinggi.
Nya alai, berengkah
ari sehari tu aram kitai sama-sama bepikir ba tikas tinggi, berunding di luar
kutak. Enti ngelama tu kitai suah berunding ngena chara selama dipelabaka diatu
kitai patut ngubah runding ngagai tikas tinggi. Genap pekara ti deka dikereja
nya tentu bisi chara ti nyelai ti ulih mai penguntung. Nya alai bala nembiak ke
baru udah nerima pemutus peresa STPM tauka SPM patut bepikir ngena runding
tikas tinggi senentang pejalai pengidup sida. Nadai utai dalam dunya tu
ulih nagang kitai ari bepikir ba tikas tinggi dikena nentuka pejalai pengidup
kitai jemah ila. Nya alai enti kitai ulih bepikir tikas tinggi sereta mujur, kitai tentu
ulih nyadi aset menua tu jemah ila.
Tiada ulasan:
Catat Ulasan