Unit 8 Rambai Jaku Adjektif

8.1  Pun Jaku

Rambai jaku adjektif (RJA) bepunka leka jaku adjektif. Rambai jaku adjektif tau digaga ari siti leka jaku tauka lebih. Pekara ti deka dipejuraika nya pasal guna rambai jaku adjektif ti nyadi predikat, elemen penerang sereta elemen penerang dalam predikat.

(i)   Rambai jaku adjektif nyadi predikat

Subjek (RJN)	Predikat (RJA)
1.   Buah pisang nya 2.   Bulan malam tu 3.   Sungai Batang Rajang 4.   Mayau kami 5.   Kebun getah kami	mansau ripu. terang bendar. pemadu panjai. kurus. jauh amat.

(ii)  Rambai jaku adjektif nyadi elemen penerang               

Subjek (RJN)	Predikat (RJN)
	Rambai Jaku Nama	Penerang
6.   Migang 7.   Kubung nya 8.   Orang tuai nya 9.   Manuk pansuh 10. Bujang Senang               nya	nembiak bansa jelu orang pemakai baya	pandai. siga. landik bejaku. asal Iban. ganas.

8.2   Tukuh Rambai Jaku Adjektif: Elemen Pengisi Rambai  

        Jaku Adjektif

Rambai jaku adjektif digaga ari siti leka jaku tauka rentayan leka jaku ti ngundan jaku adjektif baka jaku bantu enggau jaku penguat. Jaku bantu enggau jaku penguat nya tau dulu tauka dudi ari jaku adjektif.

Chunto:

Jaku Bantu	Penguat	Jaku Adjektif	Penguat
- udah agi bedau - - -	kelalu kelalu - - - kelalu -	manchal tuai muda mansau mit keruh besai	- - amat - amat - amat

Tukuh rambai jaku adjektif  bisi dua bengkah, iya nya:

(i)           tukuh siti leka jaku

(ii)          tukuh dua leka jaku

8.2.1  Tukuh Siti Leka Jaku

Chunto:

11. Bala polis nya bagas.

12. Jelu pelanduk  pintar.

13. Bilik lawang nya puang.

14. Asi nya agi angat.

15. Bulan malam tu terang.

8.2.2   Tukuh Dua Leka Jaku

Tukuh rambai jaku adjektif ti baka tu bisi dua bengkah, iya nya:

(i)         tukuh jaku adjektif + jaku adjektif

(ii)        tukuh jaku adjektif + jaku nama

(i)         Tukuh jaku adjektif + jaku adjektif

Tukuh rambai jaku adjektif dalam raban tu bisi dua bengkah, iya nya:

(a)       Dua leka jaku adjektif  ti nyau deka sebaka reti

(b)       Dua leka jaku adjektif ti belaban reti

(c)       Dua leka jaku adjektif meri reti berima

(a)        Dua leka jaku adjektif ti nyau deka sebaka reti

manis ngeli

kelia menya

basah memusu

badas memelan

laju kekebas

mansau chechinang

lunchik juring

(b)       Dua leka jaku adjektif ti belaban reti

chelap angat  

tuai biak

miskin kaya

masam manis

siang malam

jarang pisit

(c)        Dua leka jaku adjektif meri reti berima

segala ina

penat katat

pait pitan

singka siai

besai rerakam

lemak lelui

sakit lengit

                                   

(ii)  Tukuh jaku adjektif + jaku nama

Rambai jaku adjektif ba raban tu bisi dua  bengkah, iya nya:

Rambai jaku adjektif nerangka utai sebaka gaya

      Rambai jaku adjektif ti meri reti besilup

(a)        Rambai jaku adjektif nerangka utai sebaka gaya

gadung daun

mansau engkerebai

biru tarum

kuning lensat

chelum arang

(b)        Rambai jaku adjektif ti meri reti besilup

berat dagu

pandak jaku

besai ati

mayuh mulut

ulau manuk

suntuk penemu          

8.3   Jaku Penguat

Jaku penguat nya leka jaku ti meri penerang lebih ngagai jaku adjektif. Penuduk jaku penguat dalam rambai jaku adjektif tau ba mua, di belakang enggau meali-ali.

16. Jani nya kelalu gemu.

17. Rumah nya pemadu besai.

18. Nembiak nya nelap amat.

19. Igam sakit raya amai.

20. Chabi padi sigi pedas.

8.4    Jaku Bantu dalam Rambai Jaku Adjektif

Jaku adjektif mega ulih sukung ngena jaku bantu. Chunto:

21. Semua anak iya udah besai.

22. Sayuk jagung nya nyau tuai.

23. Semua tuai rumah patut lurus ati.

24. Hari nyau deka tawas.

25. Anak ukui nya agi mit amat.

8.5   Tusun Rambai Jaku Adjektif dalam Ayat

Penuduk rambai jaku adjektif dalam ayat selama nya baka tu:

(i)         nangkan subjek nyadi predikat

(ii)        nangkan rambai jaku nama nyadi penerang

8.5.1    Rambai Jaku Adjektif nyadi Predikat

Ayat tusun selama.

Subjek	Predikat
26.  Pekayan indu dara nya 27.  Lauk nya 28.  Anak mayau nya 29.  Nembiak nya 30.  Mua iya 31.  Palu iya	ipak bendar. tabar amai. mit bendar. rajin udu. puchat raya. kaya amat.

Ayat tusun tunsang

Predikat	Subjek
32.  Ipak bendar 33.  Tabar amai 34.  Mit bendar 35.  Rajin udu 36   Puchat raya 37   Kaya amat	pekayan indu dara nya. lauk nya. anak mayau nya. nembiak nya. mua iya. palu iya.

8.5.2    Rambai Jaku Adjektif nyadi Penerang Jaku Nama

Rambai Jaku Nama
Jaku Nama	Jaku Adjektif
Baju penemu emas buah rian buah lensat	baru lama tuchi lunak mansau

8.6   Elemen Penerang dalam Rambai Jaku Adjektif

Dalam rambai jaku adjektif, elemen penerang suah dikena nangkan jaku adjektif.

Chunto:

Subjek	Predikat
	Rambai Jaku Adjektif	Penerang
38.  Pengajar nya 39.  Bilik kitai 40.  Patung iya 41.  Tayar nya 42.  Buah chiku	selalu kiruh patut  beresi pedis kempis manis ngeli	enggau kereja iya. ngambika kitai bepengerai. enggau ngenyit. enggau nadai temu kebuah. asai ke digulai gula.

Ari sukut reti, penerang jaku adjektif tau diperatika nitihka raban ti baka tu:

8.6.1  Penerang Chara

43.  Pemedis patung iya gerai kediri.

44.  Anak kayu nya layu enggau nadai temu kebuah.

45.  Kerak asi rendam nya lemi enggau jampat bendar.

8.6.2    Penerang Banding

46.  Buah lumuk mansau manis asai madu.

47.  Asi nya luchak baka bubur.

48.  Ai urat kayu meretaya pait asai empedu.

8.6.3    Penerang Hal tauka Pekara

49.  Minggang endang pandai dalam mayuh mata pelajar.

50.  Orang ba rumah panjai nya agi  miskin magang.

51. Tuai Rumah kami kiruh bendar ngansak kami serumah nyaga  

      pemeresi.

8.6.4    Penerang Tuju

52. Deriba bas ekspres patut bejimat-jimat ngambika  penumpang berasai likun.

53.  Bilik komputer patut chelap ngambika komputer enda jampat rusak.

54.  Penemu bantu patut mayuh enti kitai deka nyadi penulis mujur.

8.6.5    Penerang Penyuah

55.  Indu nya selalu merampau lebuh ninga lagu berentak kerunchung.

56.  Igat jarang-jarang laun pulai kereja.

57.  Iya suah suntuk belanja.

8.6.6    Penerang Ngagai

58.  Iya lelengau amat ke sida sebilik.

59.  Kitai patut ibuh ke pangan diri ti ditinggang penusah.

60.  Indu nya kasih bendar ke bala anak iya.

8.6.7    Penerang Kebuah

61.  Ai kipi nya tabar laban kurang gula.

62.  Daun pisang nya layu ketegal didaing api.

63.  Duku nya tumpul ketegal lama enda diansah.

8.6.8    Penerang Maya

64.  Aya Sudin regas lebuh agi biak menya.

65.  Langit mesiring  kuning maya lemai hari.

66.  Bala engkatak richah lebuh hari ujan.

8.6.9    Penerang Endur

67.  Buah pisang nya dulu mansau muak ke pun tandan iya.

68.  Lubang gua nya sempit ba mua penama iya.

69.  Buah nanas masam muak ke ujung buah iya.

8.7       Rambai Jaku enggau Ayat Komplemen

Rambai jaku adjektif ti nyadi predikat tau ditangkan ayat komplemen awakka nyadi ayat turu.

Chunto:

70.  Orang mayuh pechaya pasal pengamat berita nya udah ditemu   

 orang.

71.  Bala nembiak gaga pasal pemanah pemutus peresa sida

 ngemuaska ati.

72.  Iya ngesal pasal penyilap pengawa ti udah dikereja iya mai

 pengerugi.

8.8       Simpul Runding

Ari jurai pasal mayuh macham chara nusun rambai jaku adjektif nya tadi, dia kitai ulih ngaga simpul penemu pasal tukuh rambai jaku adjektif baka ti dirintaika nangkan tu:

(i)         Jaku bantu + jaku adjektif

                  agi kuat

                  selalu rugi

                  udah besai

                  suah laun

(ii)        Jaku penguat + jaku adjektif

                  amat nemu

                  pemadu besai

                  lebih badas

                 

      (iii)       Jaku bantu + jaku penguat + jaku adjektif

                  agi kelalu tumu

                  empai balat sakit

                  deka amat pandai

                  bedau chukup tuai

      (iv)      Jaku adjektif + jaku penguat

                  manah bendar

                  tinggi amat

                  suah bendar

                  landik amai

                  nelap udu

      (v)       Jaku bantu + jaku adjektif + jaku penguat

                  nyau laun bendar

                  udah angat amat

                  bedau mansau iga

                  udah beresi amai

(vi)       Jaku penguat + jaku adjektif + jaku penguat

                  amat sigat bendar

                  udu kemerah amat

                  balat rindu amat

(vii)      Jaku penguat + jaku adjektif + jaku penerang

            amat masam muak ke ujung ia

            udu juring  puting ia

            amat bajik ari menyadi iya

(viii)     Jaku penguat + jaku adjektif + ayat komplemen

            amat pechaya pasal iya udah pulai ke menua

            sigi ibuh pasal sida ngereja pengawa baka nya

(ix)       Jaku adjektif + jaku penguat + ayat komplemen

            ibuh amat pasal sida nyaga pemeresi rumah panjai

            arap bendar pasal pengelikun menua kitai manah

            angkun bendar pasal cherita lama patut dipansik

(x)       Jaku bantu + jaku adjektif + jaku adjektif

        meruan chelum lis

        agi chelap dadam

        deka senang lantang

        nyau singkung belung