Kuing tuju udah PT3

Pemuka Kenang

Nembiak pom tiga baru udah tembu peresa Pentaksiran Tingkatan 3 (PT3). Tentu bala sida nya diatu asai ke diau ba baruh punggu, kesal ati sereta benung niap hari nganti pemutus peresa nya pansut. Taja pan PT3 dikiraka enda sama berat baka peresa Sijil Pelajaran Malaysia (SPM) tang guna iya lebuh nentuka kuing tuju nembiak tetap bisi.

Peresa nya dikira berat mega laban iya ulih merambu daya idup nembiak jemah ila ngambika sida enda salah langgur lebuh milih arus bansa pelajar ti deka dipilih. Nembiak patut milih pekara ti betul sepengudah bulih pemutus peresa PT3 ngambika sida enda nesal ngapa tauka betapi enggau konflik bukai udah nya indah enda baka sempama udah tepantup baru nengkadah. Pemutus PT3 ulih nyadika malin  lebuh ngemunka runding pelajar baik nya deka nampung pelajar ba arus premier, arus pengelandik tauka perambu bukai. PT3 endang tetap nyadi platform nyukat pengulih nembiak dalam arus pelajar premier.

Batang Kenang

Milih arus pelajar nya pekara ti patut diperatika amat-amat dikena nentuka nembiak nya enda jelungan ngapa lebuh milih arus pelajar laban nangika sida salah pilih. Pemutus nitihka arus pelajar ke dikedeka tebal agi bepanggai ba pemutus PT3 baiknya lati tauka enda. Perambu ti salah ukai semina ngerugika sida jemah ila tang ngasuh sida dirinan enggau mayuh leman konflik sekalika nya enggau apai indai, sekula tauka diri empu.

Nya mih kebuah, sida patut meratika PT3 nya baka andau ti nyadi penyambung dikena merambu daya idup sida jemah ila. Taja pan baka nya, perambu enda ulih digaga sengapa kada. Sida patut minta lalau ari orang ke patut baka kaunselor di sekula, apai indai lalu iya ti beguna amat nya pengerindu diri empu senentang arus pelajar ti deka dipilih bepelasar ba pemutus peresa.

Nitihka fasiliti pelajar ti udah disediaka perintah bisi beberapa bengkah arus pelajar ke ulih dipilih nembiak ungkup sida PT3. Sida tau masuk arus pelajar sains tauka sastera ba sekula premier,  ngambi pelajar ti bepelasarka pengelandik ba Kolej Vokasional (KV), nuntut di Sekolah Menengah Teknik (SMT) tauka ngagai institut pematih bukai baka Kolej Komuniti tauka GiatMara.

Nembiak ti deka masuk arus pelajar sains tulin mesti bulih pemutus peresa ti lati ba subjek Sains, Matematik enggau English. Kebuah pia, laban dalam arus pelajar Sains Tulin nya bisi mata pelajar baka Fizik, Kimia enggau Biologi sereta Matematik ti enda tau enda diambi sida. Nya alai, nembiak ke deka masuk arus pelajar tu mesti tulihka pemutus PT3 ti lati. Raban nembiak ti milih arus pelajar tu bisi prospek ti manah nampung pelajar sida ngagai institut pelajar tinggi (IPT) lebuh sida milih kus profesional enggau syarat pemutus SPM sida mega mesti lati.

Sida ke masuk arus pelajar Sastera, Commerce enggau Accounting mega bisi peluang nampung pelajar ngagai IPT dalam bidang ekonomi, humanities enggau ti bukai. Sida ke bulih pemutus peresa ti jelan pemanah tang enda ulih masuk arus pelajar Sains, agi ulih masuk ngagai arus pelajar Sastera,  Commerce enggau Accounting mega bisi prospek nampung pelajar ngagai IPT. Iya ti beguna amat nya sida mesti bulih pemutus peresa ti lati dalam SPM lalu tu nyengkaum subjek teras ti nyadi kayu penyukat kelebih agi lebuh milih nembiak ke IPT. Subjek tu baka mata pelajar Bahasa Melayu, English, Matematik, Sejarah dan beberapa iti subjek ti bukai. Arus pelajar tu balat nentuka pengawa ngemasuka nembiak ke IPT kelebih agi ngagai universiti perintah. Nya ngujungka pekara tu nyadi udu kompetitif.

Nembiak ke deka nampung pelajar sida ke KV dilalau meretika dulu objektif kolej tu ditumbuhka. KV nya institut ti nyediaka raban pengereja pengawa ngambika terus tama ngagai industri pengereja pengawa sepengudah tamat belajar ba KV. Nya mih kebuah, modul belajar enggau ngajar (P&P) balat agi betukuhka praktikal ari teori. Arus pelajar KV engkeman agi ungkup nembiak ke dekaka P&P ti betukuhka pengelandik sereta ulih masuk ngagai dunya kereja enggau jampat. Nembiak KV enda ibuh ngambi SPM, tang sida diasuh ngambi SVM sereta nampung terus pelajar sida ngagai tikas diploma sepengelama empat taun tiga bulan.

Taja pia, KV bebida ari SMT. Nembiak ba SMT nitihka arus pelajar premier iya nya sida mega ditetapka ngambi peresa SPM lalu besenutuk enggau nya mega ngembuan bidang ti nyemetak baka injineering tauka sains betanam betupi. Taja baka nya, nembiak SMT enda ngambi mata pelajar Biologi laban bidang ti diambi sida lebih ngagai injineering.

Ba kes nembiak ke udah nadai pengerindu belajar tauka enda mujur tulihka pemutus ti manah ulih milih belajar ba Kolej Komuniti tauka Pusat GiatMara ke balat agi meri perati ngagai pengelandik. Masuk palan ti baka tu nya meri siti pengelebih laban nembiak deka dilatih sereta disikap enggau mayuh macham pengelandik. Lebuh tembu belajar, sida deka diberi setipikit lalu ulih nampung pelajar sida ngagai tikas ti nangkan nya tauka terus bekereja.

Ngagai nembiak ke datai ari ruang bilik ti bisi agi penatai pemisi ulih terus nampungka pelajar sida ke menua tasik enggau syarat ngambi peresa ti udah ditetapka ba menua nya.

Penutup Kenang

Kemaya hari tu peluang belajar semampai disediaka perintah. Nembiak bisi kuasa milih asal iya mai penguntung sereta beguna ungkup sida jemah ila. Nya alai anang muai jam, pilih bepelasarka pengerindu enggau juluk ati diri empu. Enda milih pemutus PT3 nya lati tauka enda, peluang endang seruran bisi; indah enda munyi ku jaku enti deka alah enda enti enggai bisi tau mih nadai. Juluk ati mesti nemban sereta engkeman enggau pengulih diri nangika kitai disemaka baka sempama arang abis, besi enda bepijar.