PERMATA pintar palan alai nembiak genius

Pemuka Kenang

Sistem pelajar di Malaysia dikemataka Opis Pelajar Malaysia (KPM). Sistem pelajar tu bisi disediaka perintah tauka perebet ke suah mega dikumbai sekula ngati kediri. Ari tu tumbuh mayuh bengkah sekula. Tu nyengkaum sekolah kebangsaan, sekolah jenis kebangsaan, sekula misyen, sekula premier, sekula agama, sekula berasrama penuh, sekula kluster, Maktab Rendah Sains Mara (MRSM) sekula beprestasi tinggi, sekula pendidikan khas, sekula sukan, sekula seni, sekula amanah, sekula bestari, sekula wawasan, sekula teknik enggau kolej vokasional. Genap buah sekula ke udah dirintai ditu endang bisi tuju sereta objektif iya empu dikena napi mayuh bengkah potensi nembiak. Siti agi sekula nyangka kala didinga nama ketegal ke jelai berita tang nyentuk ke sehari tu enda tentu mayuh artikel ti bisi ngupass sereta bekenangka sekula tu. Sekula ti deka dikenang sekali tu nya Sekula Permata Pintar.

Batang Kenang

DIBERI peluang nyambung pelajar ba universiti tebilang dunya baka Universiti Cambridge, United Kingdom enggau Universiti Boston, Amerika Syarikat maya umur baru manggai 15 taun nyangka semina dalam mimpi aja kelebih ba nembiak sekondari ke belajar di sekula biasa tauka sekula selama. Taja pia, pekara nya ukai utai ke enda ulih dikereja ba nembiak pintar ti dipilih ari serata menua Malaysia nengah sistem belajar aba Pusat PERMATApintar Negara (PERMATApintar), Universiti Kebangsaan Malaysia (UKM). Bebida enggau sistem pelajar sekondari selama, mata pelajar baka robotik, kriptologi, bioteknologi, astrofizik, sains penerbai, palan nyidi kes jenayah, belajarka penyakit, probaliliti enggau teori bemain, matematik ungkup dunya enggau singka miga sereta enggau subjek fizik tambah nya entara mata pelajar ti bisi diajar ba PERMATApintar. 

Ngiga nembiak pintar tauka genius ukai pekara ti mudah dikereja. Pansik menua Barat ngayanka abis kurang iya, bisi siku nembiak ke bisi penau sereta pintar bagi genap 10,000 iku nembiak. Aba menua kitai, bisi kira-kira 3.5 juta nembiak ke berumur entara semilan ngagai 15 taun. Nitihka teori dianggarka kira-kira 350,000 iku nembiak bisi penau sereta pintar di menua tu. 

Sistem pelajar formal naka kediatu ulih napi peminta guna pelajar mayuh bengkah nembiak sekula, tang iya ukai reti nya ulih napi guna pelajar sida ke pintar. Tu ngujungka bisi sekeda nembiak nya enda tulihka pemutus peresa ti lati dalam peresa sekula. Bisi nya lalu ngujungka sekeda ari sida tu lalu mutuska diri deka badu besekula.

Ditumbuhka kenyau ari taun 2009, Program PERMATApintar datai ari tuduh penemu bini Menteri Besai, Datin Seri Rosmah Mansor. Program tu dikemansangka enggau kerejasama Universiti Kebangsaan Malaysia. Universiti tu diberi mandat ngemansang, bejalai sereta ngemata pejalai program ti dipenyadika dalam taun 2009. Pengarah program tu iya nya Prof Datuk Dr Noriah Mohd Ishak. 

Palan PERMATApintar™ Negara UKM bisi empat pugu program iya nya Program Pencarian dan Pengurusan Bakat, Program Perkhemahan Cuti Sekolah (PPCS), Kolej PERMATApintar™  Negara enggau Program ASASIpintar (Program Pra-Universiti).

Program tu bepun enggau Program Perkhemahan Cuti Sekolah (PPCS) tauka program kem kemisi sekula. Dalam taun 2008, raban sida pengarah program tu bisi ngusung genturung pendiau mensia mayuh enggau menua pesisir di serata menua Malaysia begigaka nembiak ti genius. Tembu nya, sida lalu nempa sistem tisih nengah chara tiga renggat dikena milih nembiak ti pintar amat. Tisih tu dipejalaika nengah chara online sereta mega nengah peresa ti disediaka ba endur ti udah ditetapka sida. 

Nitihka pansik, individu ke pintar tauka genius nya entara 32 ngagai 58 persin lalu sida tu pintar ketegal genetik tauka purih. Lebih nya datai ketegal rampa alai diau nyengkaum pemakai enggau pelajar sida. Nyau deka semua menua ke berimbai enggau Malaysia endang udah lama bisi sekula ungkup nembiak pintar. Ambika banding di Thailand bisi Sekula Mahidol Wittayanusorn, Thailand, ungkup nembiak ke pintar sains enggau matematik. Sekula tu ditumbuh belalauka kerejasama enggau Universiti Mahidol. Sekula tu udah dikena kenyau ari 25 taun ke udah. Di Vietnam bisi 32 buah sekula pintar, nyengkaum Sekula Tinggi VNU-HCM ke ditumbuhka engggau kerejasama Vietnam National University. Sekula tu berengkah dibuka dalam taun 1996. 

Ketegal sekula bansa tu ti keterubah iya ditumbuh sereta digaga ba menua tu, dia Dr Noriah empu sanggup ngenjuk diri empu nampung pelajar dalam bidang Diploma Lanjutan Perguruan di Universiti New South Wales dalam taun 2010 dikena iya belajarka chara ngelatih sereta ngajar nembiak pintar. Pemulai iya ari menua tasik iya empu lalu enggau ngelatih pengajar sekula nya.

Penguji ti ditapi maya berengkah numbuhka sekula pintar tu iya nya maya sida nempa kurikulum ti baru ke bedau kala bisi ba menua tu. Nya alai, pansik bisi dipejalaika ngagai kurikulum pelajar dunya ke endang udah bisi. Tu nyengkaum Cambridge ICGSE, International Baccalaureate (IB), Advance Placement Amerika Syarikat, Sijil Pelajaran Malaysia (SPM) enggau National Gifted School di Singapore. 

Ba sekula tu, nembiak dibantaika proses belajar chara global. Tu nyengkaum enggau masuk pekit sereta enggau woksyop ba menua luar. Nitihka penemu sida ke bejalaika program tu, sida sigi deka ngasuh mensia mayuh nemu pasal nembiak ke pintar nya ukai nembiak ke lati sereta bulih semua A dalam subjek ti diambi sida. Nembiak ti  pintar tu balat agi landik mereti sereta nemu ngaga analisis sesebengkah subjek. 

Nyau deka 50 persin ari nembiak ba palan tu anak orang ari menua pesisir sereta datai ari ruang bilik ke miskin sereta ngembuan penatai pemisi ti baruh. Ba palan tu bisi nembiak pintar ari Bario enggau Lubok Antu, Sarawak. Nitihka rekod sida, bisi siku nembiak ke dibelika sida tiket  bilun sereta meri apai indai iya duit belanja laban ke enda ulih nganjung anak seduai ke padang bilun. Nembiak nya lebuh iya terubah datai di sekula tu semina beselipar jipun tang diatu iya udah mujur nampung pelajar iya ke menua tasik. 

 

Bisi siku agi nembiak ari Tawau ke alai indai iya keterubah enda nerima peminta ti ngasuh anak iya masuk sekula tu laban ke suntuk duit. Tang udah nya iya ngemendarka anak iya nampung pelajar sepengudah ke bisi orang ti mantu iya mayar tambang bas ke pasar Tawau besereta enggau tiket bilun ke Kuala Lumpur. 

Apai indai kelebih agi sida ke ba menua pesisir enda mudah nulak ari ngemendarka anak sida nampung pelajar laban sida mega nemu reti besekula nya ulih ngeluarka sida sebilik ari ditangkup penyeranta. 

Ba sekula tu mega bisi nembiak autisme genius. Diatu iya benung nganti deka masuk UKM ba bidang program Ijazah Sarjana Muda Sains Politik. Naka kediatu, bisi 366 nembiak ti udah mujur nembuka pelajar sida ba PERMATApintar. Sida nya diatu benung belajar ba institut pelajar tinggi baik nya di dalam tauka di menua tasik lebuh umur sida agi biak. Ungkus belanja siku-siku nembiak nya kira-kira RM45,000 setaun lalu apai indai semina mayar RM1,500. Ungkup nembiak ke endang suntuk nya bisi nerima sekulasip ari Yayasan Permata.

Penutup Kenang

Kemaya hari tu Palan PERMATApintar™ Negara UKM tu mih kengka pusat pengelati ti bisi di Malaysia  ke ngembuan tanggung pengawa begigaka nembiak ti pintar sereta bepenau ari serata menua tu lalu meri sida peluang ngerembaika potensi enggau penau sida. Pengawa tu patut bendar dipejalaika laban nembiak tu mih aset menua kitai ke balat berega. Enti kitai enda mujur tetemuka nembiak ke bansa tu dia menua kitai nyangka nadai ngembuan pengereja pengawa ti balat  berega baik nya ketegal sida tu anyut ari arus pelajar baka buah apung balu ti udah tingkil ari tandan lalu beranyut ke ulu ke ili nitihka bai ai tauka sida tu udah belelang ke menua tasik ti ulih meri sida mayuh macham penguntung sereta peluang belajar ti manah agi ari ke di menua tu.