Dikelala buah ari langgu, Dikelala basa ari penyiru, Dikelala bansa ari jaku

ISU jaku nyau majak ranchak dipejuraika kelebih agi ba era teknologi penerang enggau komunikasyen ti makin pisit nyadi kemaya hari tu.

Jaku tau dikumbai nyawa tauka semengat ngagai sesebengkah bansa enda ngira nya jaku Iban tauka jaku bansa bukai. Jakunya sebagi ari roh bansa. Iya mega nyerminka sejarah, pemanah ulah, etika enggau etiket bansa dalam sesebengkah  sivilisasyen tauka pemansang bansa.

Peninggi tikas pemansang sesebengkah bansa kelebih agi ari sukut penau enggau pengulih intelek ulih dipeda ari jaku ke dikena sida. Jaku ke tebilang dikena di dunya baka jaku English ngembuan mayuh leman vokabulari ti diinjau aida ari mayuh bengkah bansa jaku.

Ba artikel kesekali tu aku bechuanka jaku Melayu ke udah diangkatka nyadi jaku bansa tauka jaku nasional ba menua kitai, Malaysia. Nya alai, baka nya mega enti kitai meratika jaku Melayu bebanding enggau jaku English ke udah disebut diatas. Jaku Melayu mega nengah proses asimilasyen leka jaku ari pupu raban bansa bukai baka ari jaku seperugan enggau jaku nya baka ari perugan Pulau-pulau Melayu lalu ditambahka leka jaku ari Barat enggau Timur, Arab, Parsi, Portugis, English, China enggau India diambi nengah kaul diplomatik, dagang sereta pengarap.

Elemen nginjau, ngambu enggau nyali jaku udah balat bendar ngayaka jaku Melayu. Hal tu ke ngasuh jaku nya dinamik, idup lalu terus mansang. Tang taja baka nya, bisi sekeda individu sanggup ‘ngemaruhka’ jaku ketegal sesebengkah tuju tauka agenda kediri empu.

Kemaya hari tu genap maya kitai balat digerau enggau guna jaku slanga ti rari ari chara nyebut enggau jalai jaku ti standard. Jaku ti baka tu seruran dikena raban pengguna media sosial. Empai lama tu tadi kitai ampit ninga jaku ke enda manah didinga bisi dikena di Parlimen. Leka jaku  ‘kepala bapak’ enggau jaku kamah, ambika banding enda patut disebut ba dalam balai aum ke chukup basa baka balai parlimen nya bisi dikena bala Raban Parlimen. Leka jaku kasar enggau kamah ti tepambur ari mulut Raban Parlimen nya balat ngemaluka kitai rayat selama. Episod ‘sinu’ nya ulih dipeda rayat Malaysia nyengkaum nembiak sekula ke patut bendar  dibantaika enggau chunto sereta teladan ti manah.

Raban politik ti dipilih rayat nyadika tuai megai sereta ngiring menua patut bendar ngembuan ulah ti badas dikena nentuka sida ke rebak dudi nya ila nyadi aset menua kitai. Katika sida tau tak enda nemu malu lebuh ulah sida ulih dipeda bala kaban anak tauka uchu diri empu? Anang ngadaika adat basa diri empu ketegal ke deka ngayanka pengering diri laban iya nadai mai penguntung ngagai sapa-sapa.

Sebedau tu, bisi sekeda raban ke mantaika pengering sereta sanggup ngaga demonstrasyen lebuh Attorney General, Tommy Thomas bejaku ngena jaku English. Pengawa Menteri Wang, Lim Guan Eng ngeluarka karang berita dalam jaku Mandarin mega balat dipetalatka mensia mayuh. Tang lebuh jaku jai enggau kamah bisi dikena ba dalam Balai Parlimen sereta dipeda genap iku rayat nengah channel televisyen enggau YouTube, raban ke ngeringka diri tu tadi lalu nadai nibas seleka beras.

Diatu udah nyata amat kitai agi dikungkung enggau ulah sereta penanggul ke semina sayau ngagai jaku diri empu aja. Jaku Melayu sempema orang ke minta sedekah ba menua diri, minta dikasih, disukung enggau disakang belama-lama.Kitai ke rayat enda tentu ulih ngarapka raban politik ngangkatka jaku ke endang nyadi lanting aki ini kitai.

Taja pia, ari kontroversi ke nyadi ba dalam Balai Parlimen nya dia kitai patut muji pengawa ke digaga Suruhanjaya Komunikasi enggau Multimedia (SKMM) laban sida lalu ngeluar sereta bejadika malin ‘Jaku Tagang Dikena’ tauka Panduan Bahasa Terlarang apin lama ti udah. Sekeda leka jaku ti suah dikena bala jaguh siber enggau warrior papan kekunchi ba dunya siber dikena mejah munsuh politik sida bisi dirintaika ba dalam malin nya. Tu nyengkaum leka jaku Maha Firaun ti dikena bejaika Menteri Besai, Tun Dr. Mahathir Mohamad, DAPig dikena bejaika DAP, Umnongok dikena ngelese UMNO enggau Pascai dikena ngemale parti Pas. Malin nya disediaka SKMM sereta nerima sukung ari Dewan Bahasa dan Pustaka, Lembaga Penapis Filem, Forum Kandu­ngan Komunikasi dan Multimedia Malaysia sereta Commercial Radio Malaysia. Pemutus penemu nya digaga sepengudah ngadang sereta nemu pemesai reti  pemanah jaku lalu pengawa ke deka digaga dikena ngangkat isi program dalam media penabur.

Sanding penemu industri nya diarapka ulih nambahka pemereti raban ke gawa ba media penabur lebuh sida nyemakaka reti sereta ngeditka jaku ti bisi kaul enggau lebas jaku ke enda tau dikena kelebih agi baka jaku jai, jaku kasar enggau kamah.

Nya alai lebuh kitai sama-sama nyingkang mansang  nengah arung pemansang teknologi, kitai mesti sama-sama patut nyaga jaku bansa kitai ngambika iya enda sebah laban ujan serata enda retai laban panas kebuah pia, jaku orang tuai menya madahka dikelala buah ari langgu, dikelala basa ari penyiru lalu dikelala bansa ari jaku.