Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Selasa, 11 September 2018

Ngajar Sistem Jaku Jaku Iban: Prinsip enggau Teknik Tusun Kesebelas


TEKNIK NGENA KEREBAN BANTU NGAJAR

Siti penanggul ti suah bendar nyadi maya ngajar jaku ba bilik kelas iya nya sekeda pengajar enda tentu landik ngena kereban bantu ngajar. Taja pan kereban ti dipilih nya bekualiti tinggi tang kereban nya enda mai empas ti dikedekaka ati ketegal pengajar nya enda nemu teknik ti betul lebuh bekenaka kereban bantu ngajar nya.

Nangkan tu penerang ngupaska teknik ngena sekeda ari kereban bantu ngajar.

Sebengkah ari kereban bantu ngajar ti suah bendar bisi ba bilik kelas iya nya papan tulis (gadung tauka burak). Papan tulis tu laban ke udah teleba dipeda suah bendar dikemaruhka raban pengajar baka kereban ke enda tauka kurang diguna.

Papan tulis baka mega kereban bukai beguna enti iya dikena enggau manah. Tang enti diperatika ari chara rama, guna papan tulis tu maya ngajar jaku enda tentu ngemuaska ati sereta kurang semitan. Mayuh pengajar jaku enda nemu teknik ti pengabis badas ngena papan tulis. Sida enda merambu chara ti pengabis manah ngena ruang ke serekat nya ba atas papan tulis. Ruang ba atas papan tulis enda dibagi enggau patut. Empas ari tu ngujungka kereban ba papan tulis nya enda berurun, enda kemas lalu kadang-kadang tau nyaruka nembiak. Sekeda pengajar enda landik nulis ba papan tulis. Tulis sida dipeda kelalu mit tauka besai lalu enda rurus. Sida mega enda nemu ngena chok tauka pen marker ti mayuh chura kelimpah ari chok burak tauka pen marker chelum. Chok tauka pen marker bechura bukai ulih mantu meri fokus ti nyemetak ngagai sekeda pekara lalu tulis mega dipeda kemas. Tu tentu ulih narit ati bala nembiak iya.

Siku pengajar Jaku Iban ti landik ulih ngena papan tulis dikena nya ngenataika sesebengkah topik tauka subtopik jalai jaku nitihka rurun singkang ti betul ngagai bala nembiak iya. Iya ulih ngerembaika pekara nya nengah chara induktif (ari ke meri chunto-chunto ngagai generalisasyen) tauka deduktif (ari generalisasyen ke chunto-chunto). Pengajar mesti nerang ba papan tulis enggau belubah sereta berurun, mimit-mimit dulu lalu ari siti peringkat ngagai siti peringkat.

Iya mesti nyeliahka diri ari nulis kelalu mayuh isi sekali ngujungka nyau nadai meri perati ngagai nembiak iya; tauka rindang bejaku seraya ke nulis ba papan tulis lalu enda mai bala nembiak iya ngambi bagi ti aktif dalam pelajar nya. Ke bendar, iya ulih minta nembiak meri chunto tauka ngasuh nembiak iya nulis chunto-chunto ba papan tulis. Pengajar udah nya lalu ngariska leka jaku tauka rambai jaku ti beguna nya ngena chok taka pen marker bechura kuning tauka chura bukai.

Berebak enggau nya mega, pengajar mesti ngena papan gulung dikena iya meri not ti panjai tauka peresa pengabas kelas. Not tauka peresa nya mesti disediaka dulu enggau terang sereta kemas. Baka mega ba papan tulis, tulis ba papan gulung mesti dipeda enda kelalu mit tauka besai ari sukut saiz iya lalu enda ditusun enggau padat. Chok tauka pen marker ke lalin-lain chura patut dikena.

Ba hal bekenaka gambar (nyengkaum gambar foto) enggau gambar dero maya pelajar jalai jaku, dia pengajar Jaku Iban patut meri perati ngagai chara mantaika gambar nya ngagai nembiak iya. Pengajar mesti nentuka semua nembiak ulih meda enggau silik isi sesebengkah gambar tauka gambar dero. Nya kebuah, gambar tauka gambar dero nya mesti diengkah tauka digitang ba tempat ti engkeman. Enti ulih, pengajar nya tau mai gambar nya ke mua kelas. Pengajar mesti nyeliahka diri bejuraika pekara nya enggau berumban laban nangika nembiak iya nadai chukup jam meratika pekara nya.

Enti pengajar ngena siti siri gambar tauka gambar dero dikena iya ngayanka rurun pekara ti nyadi dia pengajar nya mesti pandai narit ati sereta nyaga ulah nembiak ngambika sida ulih meri perati ngagai pekara nya. Gambar-gambar nya enda patut dibantaika kesemua sekali tang mesti diayan siti-siti nitihka rurun awakka nembiak ulih meri perati sida ngagai siti-siti gambar dulu sebedau ngalih ngagai gambar ukai. Pengajar patut nutup gambar-gambar ke enda dipejuraika sida.

Baka nya mega teknik mantaika charta. Enti charta nya ngundan beberapa bengkah sitak tauka bagi, dia pengajar patut nutup sitak ke enda dipejurai lalu semina mantaika iya ti benung diperatika sida sekelas. Pengajar mega ulih mai bala nembiak nembuka isi charta nya maya iya ngajar sida. Tulis sebagi ari atur jalai jaku nya aja lalu ngasuh bala nembiak nembuka atur ke bukai. Pengajar mega ulih minta nembiak iya meri chunto bukai ti bisi kaul enggau chunto ti diberi. Ba hal tu pengajar enda ibuh ngemeratka pemanah tulis sida ba charta nya.

Kad pemandang nya sebansa kereban ti beguna bendar maya ngajar jalai jaku. Iya ulih dikena ba mayuh leman aktiviti baka pengawa nipak, ngumpul, ngelumu, nampung, nyerara tauka nusun nitihka kategori leka jaku tauka rambai jaku. Pengajar mesti ngena kad pemandang ti ulih lekat tauka papan flanel (enti kad nya dilekat ba keretas pasir ba belakang iya). Kebuah pia, ngambika semua nembiak ulih meda kad pemandang nya lalu pengajar mega ulih ngasuh bala nembiak sama bela enggau ba pengawa ke bekenaka kad nya.

Siti kereban elektronik ti ulih bendar diguna maya ngajar jalai jaku iya nya audio rekorder. Iya ulih dikena ngerekod  sebengkah randau sekalika nya maya ngajar tauka sebedau ngajar sereta ulih dimainka baru ngambika dipendingka bala nembiak. Tang taja pia, bisi sekeda pengajar Jaku Iban meda iya ari sukut pengelemi lalu madahka kereban tu pedis deka dikena. Sida tu enda nguji dulu utai ti udah direkod nya sebedau sida bemainka rekorder nya ba dalam kelas. Kadang-kadang utai ke direkod nya enda tentu terang tauka bateri kereban nya deka abis. Sebedau bemainka kereban tu pengajar nadai madah ngagai nembiak iya tuju utai ke deka dipendingka sida lalu pekara ti patut diperatika bala nembiak lebuh sida mending rekoding nya.  Tu ngujungka nembiak semina beperindang tang nadai meri fokus ngagai pekara ti dipendingka sida. Pengajar patut minta nembiak iya meri fokus ngagai pekara ti nyemetak sebedau iya bemainka kereban nya. Ambika banding pengajar ulih meri adar baka tu: “Aku deka bemainka rekod pasal sebengkah jaku ba mua mayuh. Dalam jaku nya, iya ke bejaku tu suah ngena intonasyen ke mai reti tanya ba ayat ti bestrukturka ayat penerang selama. Uji rintai sereta tuliska ayat-ayat nya.”

Bisi mega sekeda pengajar ke ngerekod ba bilik kelas enggau berumban. Enti nitih, pengajar nya patut ngiring ngembing nembiak iya senentang pekara ti deka direkod baka belatih dulu lalu mantai ngagai sida dulu utai ke patut dikerejaka sida ngambika sida besedia sereta bisi pengarap ngagai diri empu. Ambika banding, sebedau ngerekod sebengkah drama ti dikeluluka bala nembiak, dia pengajar patut ngelatihka sida lalu udah nya diberi komen ari pengajar sebedau rekod nya ulih dipejalaika.

Enti disimpulka enggau jaku pandak dia penulis ngasaika pengajar enda ulih enda mesti landik ngena kereban bantu ngajar laban nya ulih ngasuh pengawa ngajarka jalai jaku ba bilik kelas nya semitan agi ari selama.




BUP SANDING PENEMU

Abdullah Hassan 1984, Linguistik Am untuk Guru Bahasa Malaysia, Penerbit Fajar Bakti Sdn.Bhd. , Petaling Jaya.

_________________ (ed) 1987, Kesalahan Bahasa dalam Bahasa Melayu, Dewan Bahasa dan Pustaka (DBP) Kuala Lumpur.

_________________ 1974, The Morphology of Malay, Dewan Bahasa dan Pustaka (DBP) Kuala Lumpur.

Anthony, E.M. (ed). 1976, Reading: Insights and Approaches, Singapore University Press, Singapore.

Ashley, R.S., 1984, Successful Techniques for Teaching Elementary Language Arts, Parker Publishing, New York.

Asmah Haji Omar dan Rama Subbiah (1968), An Introduction to Malay Grammar, Dewan Bahasa dan Pustaka (DBP) Kuala Lumpur.

_________________ (ed)1984, Kaedah Pengajaran Bahasa. Dewan Bahasa dan Pustaka (DBP) Kuala Lumpur.

Azman Wan Chik (1981), Prinsip dan Kaedah Mengajar Kesusasteraan Melayu, Utusan Publications, Kuala Lumpur.

_________________ 1982, Ujian Bahasa Malaysia, Dewan Bahasa dan Pustaka (DBP) Kuala Lumpur.

_________________ (ed)1986, Mengajar Bahasa Malaysia: Latihan Guru dan Bahan, Dewan Bahasa dan Pustaka (DBP) Kuala Lumpur.

Gurner, R. (1976), Language, Learning and Remedial Teaching, Edward Arnold, London.

Koh Boh Boon (1981), Pengajaran Bahasa Malaysia, Utusan Publications, Kuala Lumpur.

Koh Boh Boon (1990), Pengajaran Tatabahasa Bahasa Malaysia: Prinsip dan Teknik, Penerbit Fajar Bakti Sdn. Bhd., Kuala Lumpur.

_________________ 1981, Pengajaran Pemulihan dalam Bahasa Malaysia, Dewan Bahasa dan Pustaka (DBP) Kuala Lumpur.

_________________ 1984, Bahan Pengajaran Kendiri Terancang, Dewan Bahasa dan Pustaka (DBP) Kuala Lumpur.

_________________ (ed) 1989, Perspektif-perspektif dalam Pengajaran Bahasa Malaysia, Dewan Bahasa dan Pustaka (DBP) Kuala Lumpur.

_________________ 1978, The Teaching of Malay Affixes, Penerbit Fajar Bakti Sdn. Bhd., Kuala Lumpur.

Lado, R., (1976), Language Teaching: A Scientific Approach, Tata McGraw-Hill Publishing, Bombay.

Lim Kiat Boey (1975), An Introduction to Linguistics for the Language Teacher, Singapore University Press, Singapura.

Lufti Abas (1975), Tatabahasa Perbandingan: Predikat, Dewan Bahasa dan Pustaka (DBP), Kuala Lumpur.

_________________ 1976, Tatabahasa Perbandingan: Ayat, Dewan Bahasa dan Pustaka (DBP) Kuala Lumpur.

Mackey, W.F., (1978), Language Teaching Analysis, Longman, London.

Mashudi B.H. Kader ((1981), The Syntax of Malay Interrogatives,  Dewan Bahasa dan Pustaka (DBP), Kuala Lumpur.

Mohd. Taib Osman (ed), (1977), Pengajaran Bahasa dan Kesusasteraan Malaysia, Dewan Bahasa dan Pustaka (DBP), Kuala Lumpur.

Nik Safiah Karim (1978), Bahasa Malaysia Syntax, Dewan Bahasa dan Pustaka (DBP), Kuala Lumpur.

_________________ (ed), 1986, Bahasa Melayu Tinggi: Teori dan Penerapan, Dewan Bahasa dan Pustaka (DBP) Kuala Lumpur.

_________________ et al. (ed), 1982, Tatabahasa Dewan: Ayat. Dewan Bahasa dan Pustaka (DBP) Kuala Lumpur.

_________________ et al. (ed), 1989, Tatabahasa Dewan: Perkataan. Dewan Bahasa dan Pustaka (DBP) Kuala Lumpur.

Payne, E.M.F., (1970), Basic Syntactic Structures in Standard Malay, Dewan Bahasa dan Pustaka (DBP), Kuala Lumpur.

Raminah Hj. Sabran dan Rahim Syam (1985),  Kaedah Pengajaran Bahasa Malaysia,  Penerbit Fajar Bakti Sdn. Bhd., Petaling Jaya.

Richards, J.C. dan Rodgers, T.S. (1986), Approaches and Methods in Language Teaching, Cambridge University Press, Cambridge.

Rivers, W.M. (1981), Teaching Foreign-Language Skills, The University of Chicago Press, Chicago.

Sofiah Hamid dan Zaiton Ab. Rahman (ed), (1988), Ke Arah Keprofesionalan Guru Bahasa dan Sastera Melayu, Dewan Bahasa dan Pustaka (DBP), Kuala Lumpur.

Stern, H.H. (1983), Fundamental Concepts of Language Teaching, Oxford University Press, Oxford.

Wilkins, D. A., (1978), Linguistic in Language Teaching, ELBS and Edward Arnold, London.

_________________ 1981. Second Language Learning and Teaching, ELBS and Edward Arnold, London.














  







 

Tiada ulasan:

Catat Ulasan