16 SEPTEMBER ukai semina ngembuan reti ti besai ngagai
kira-kira 11,500 rayat Malaysia ti diada maya nya 55 taun suba. Iya mega ukai
semina signifikan ngagai bepuluh-puluh orang ti benama Malaysia baka ke
direjista dalam kad pengelala sida. Hari Malaysia nya udu signifikan ngagai 31
juta rayat Malaysia ari pupu raban etnik, pengarap enggau budaya enda ngira di
Semenanjung, Sabah tauka ba Sarawak. Tu mih hari bala pemesai menua enggau rayat
ba ketiga-tiga bengkah menua tu besetuju deka idup segulai sejalai nyadi sebuah
menua enggau bansa ke dikumbai Malaysia. Hari Malaysia 16 September berengkah
diintu sereta nyadika pemisi rama serata Malaysia dalam taun 2010.
Hari Malaysia meri reti ti besai ngagai rayat laban iya
nyadika tanda ti balat bendar beguna dikena ngerakupka rayat ba ketiga-tiga menua
nya. Pemesai reti hari pengada Malaysia enggau hari merdeka Sarawak sereta Sabah
dalam Malaysia patut bendar dipetatika taja pan mayuh bendar kontroversi sereta
sentimen bekaul enggau hari bulan merdeka sereta maya Malaysia diadaka.
Kemaya hari tu, udah bisi penegap penemu ba raban
peranak menua Sabah enggau Sarawak ke madahka 31 Ogos enda relevan agi lalu
enda tentu dikemeratka sida. Besenutuk enggau nya mega, baka di Sarawak bisi
raban ke ngumbai 22 Julai nya mih hari Sarawak merdeka lepau ari dipegai
perintah British, lalu ukai nya 16 September baka ke ditemu bala mayuh.
Kenyau ari nya, beberapa taun ke udah peminta enggau sentimen
ti ngeringka 'Sarawak ungkup Orang Sarawak' enggau 'Sabah ungkup Orang Sabah'
(S4S) ti disadaka sekeda orang, individu, gerempung enggau sekeda parti politik
diperatika bisi ngembuan agenda sida empu. Gerempung S4S ada ketegal bisi raban
ti digela raban Sabah, Sarawak Keluar Malaysia (SSKM).
Raban tu ngembuan penemu ti madahka kenyau ari Malaysia
ditumbuhka, kedua-dua buah nengeri nya balat bendar agi tinggal di belakang ba
semua aspek pemansang lalu nama-nama pekara ti bisi Sempekat Malaysia enda
dikeamatka.
Amai tauka enda Sabah enggau Sarawak kelalu jauh tinggal
di belakang tauka iya semina dipeda ari sukut persepsyen? Realiti ti ngayanka
fakta Sarawak enggau Sabah diruga raban komunis sereta diambu Filipina enggau
Indonesia, kelimpah ari ditinggal pemansang sereta dipanjuk penyeranta maya nya
patut bendar diperetika kitai enggau betul. Anang semina meda ari cheremin mata
diatu ti penuh enggau prasangka ti negatif.
Dalam hal tu, penanda kaul penemu enggau naratif ti betul
sereta manah senentang sejarah penumbuh Malaysia patut bendar diterenak ngagai
semua rayat Malaysia ngambika sentimen negatif enda majak nyadi-senyadi lalu
iya tau ngasuh sistem federalisma nya lemi. Tu mega tau bendar nganchurkan sovereigniti
nasional ba timpuh ti panjai. Nya alai rayat patut meretika asil ti udah
diasaika sida kenyau ari penumbuh menua Malaysia,
sereta nimpai empas enggau implikasyen iya enti sida semampai beserekang penemu,
enda seati, lalu kelebih agi enda manah,
enti sida ngembuan runding ti deka pansut ari Malaysia.
Nambahka nya mega, nengah Malaysia baru (ubah pemerintah)
tentu rayat Sabah enggau Sarawak ngarapka pekara ti badas agi datai ari
perintah kediatu bebanding enggau ke dulu suba ngambika nengeri tu maju agi
lalu enda tinggal dalam singkang pemansang nasional.
Selamat Hari Malaysia ke 55.
Tiada ulasan:
Catat Ulasan