Ngajar Sistem Jaku Jaku Iban: Prinsip enggau Teknik Tusun Kedua belas

NUSUN SERETA NGENATAIKA ISI PELAJAR

PEMUKA JAKU

SEPENGUDAH pengajar jaku nentuka isi pelajar ti deka diajar dia iya mesti berundingka tusun tauka ripih isi pelajar nya. Iya mesti nusun pelajar sempama baka tukang masa nusun utai dikena nasilka sebansa pemakai.

Ba sesebengkah pelajar jalai jaku, pengajar mesti ngatur bagi isi nitihka rurun ti logik ngambika ngemudahka nembiak meretika pelajar nya. Nya alai keterubah iya, pengajar mesti nentuka dulu bagi ti bisi kaul enggau topik jalai jaku ti deka diajar nya. Imej bagi isi tu ulih dipeda ari sukut siti struktur topik.

STRUKTUR TOPIK

Struktur topik ngundan subtopik ti bisi kaul enggau sesebengkah topik jalai jaku ti deka diajar. Nangkan tu diayanka siti chunto struktur topik ungkup siti topik jalai jaku Jaku Iban.

Grafik ngayanka topik nya ulih dibagi ngagai dua subtopik ti bisi kaul enggau pangan diri. Ambika banding, subtopik keterubah nya nge- dikena ngaga leka jaku pengawa lalu subtopik kedua nge- dikena ba jaku adjektif tumbuh.

STRUKTUR TOPIK: RETI PENAMBAH NGE-

	Nge-
jaku pengawa		jaku adjektif

Subtopik keterubah nya bekaul enggau reti nge- ti tumbuh nyadi leka jaku pengawa. Ambika banding leka jaku ngerebuk. Subtopik ke dua numbuhka leka jaku adjektif. Ambika banding leka jaku ngemesai. Struktur topik ulih disemaka baka sebatang pun kayu ti bepangga lalu tiap-tiap enti pangga nya ngembuan dan iya empu. Kadang-kadang kitai mega tau ngumbai struktur topik nya ‘kar topik’ laban iya dipeda baka kar. Struktur topik nya ngayanka rurun isi ba baruh sesebengkah topik nya.

Struktur topik nya sebengkah konsep ti beguna amat ngagai pengajar Jaku Iban lebuh iya merambu sesebengkah pelajar jalai jaku. Konsep tu ukai semina nyaup pengajar nentuka pekara ti deka diajar tang konsep tu mega mantu pengajar nusun ripih isi nitihka rurun logik.  Lebuh nusun isi nitihka rurun, pengajar ulih ngatur sereta ngenataika isi pelajar nitihka singkang pelajar ti berurun. Pengawa mantaika pelajar baka tu ngasuh pengajar ngerembaika pelajar enggau teratur lalu ngaitka sebengkah pekara enggau pekara bukai. Rurun singkang pelajar tu tentu meri pengarap ngagai pengajar kelebih agi pengajar ke benung belatih nyadi pengajar. Ambika banding, ungkup topik nge- bisi dua subtopik iya nya (a) nge- dikena nempa leka jaku pengawa tumbuh lalu  ba (b) nge- dikena nempa leka jaku adjektif tumbuh. Pengajar mesti mutus ni bagi subtopik ke deka diajar dulu.  Ambika banding ba kelas jaku pengawa; Jaku pengawa tumbuh nya jaku pengawa ti nyadi ari proses meri penambah ngagai urat jaku. Urat jaku nya ukai semina ari raban jaku pengawa tang tau mega berasal ari raban jaku bukai baka jaku nama tauka jaku adjektif. 

Pemutus penemu mesti digaga ba peringkat unit laban bisi lebih ari siti unit ba tiap-tiap subtopik nya. Subtopik keterubah bisi kaul enggau leka jaku pengawa tumbuh nge- lalu baka nya mega subtopik kedua ti bisi kaul enggau leka jaku adjektif. Nya alai, pengajar pengajar mesti mutuska pekara senentang tusun tauka rurun unit-unit nya. 

Nya kebuah, struktur topik ulih mantu pengajar nusun isi pelajar jalai jaku enti pengajar nya mereti amat sereta landik ngena iya.

LANGKAH RAPAT INDUKTIF ENGGAU DEDUKTIF

Pugu tuju lebuh ngajar jalai jaku nya pemereti sereta guna generalisasyen tauka simpul penemu. Genap bengkah pelajar jalai jaku Jaku Iban endang ngembuan tuju dikena mantu nembiak nengkua simpul penemu senentang sistem jalai jaku Iban.

Ambika banding dalam pelajar senentang ayat turu, siti simpul penemu tauka atur ti deka diajar iya nya: Ayat turu ngundan dua tauka lebih ayat tunggal. Atur tauka simpul penemu tu ulih diubah nyadi: siti ayat turu digaga nengah chara ngulaika dua tauka lebih ayat tunggal.

Pengajar bisi dua langkah rapat dikena iya ngajar sebengkah simpul penemu senentang jalai jaku. Iya ulih ngepunka ajar iya enggau chara nerangka atur ti deka diajar. Udah nya iya ngerembaika penerang senentang atur nya lalu disempulang enggau chunto-chunto ti engkeman. Langkah rapat tu bepun enggau penerang atur penemu lalu ditangkan enggau kerembai penerang sereta chunto ti engkeman. Langkah rapat tu dikumbai deduktif.

Pengajar mega ulih ngena sebengkah agi langkah rapat. Iya ulih ngepunka ajar iya enggau chara meri chunto-chunto ti relevan ngambika diperatika nembiak. Udah nya iya ngiring sida nuju ngaga simpul penemu. Ba hal tu, langkah rapat bepun enggau nembiak meratika chunto lalu ditangkan pengawa ngiga simpul penemu sambil disaup pengajar. Langkah rapat tu dikumbai induktif.

Ari penerang tu, nyata bendar langkah rapat deduktif bebida enggau langkah rapat induktif ari sekeda sukut. Peratika bida entara langkah rapat deduktif enggau induktif tu.

BIDA ENTARA LANGKAH RAPAT DEDUKTIF ENGGAU INDUKTIF

Aspek	Langkah Rapat Deduktif	Langkah Rapat Induktif
1. Peragam	Siti adar ti dulu digaga (advance organiser) beguna amat ba nembiak	Nembiak bulih penguntung enti sida tetemuka saut kediri empu
2. Chara	Simpul Penemu → Chunto	Chunto → Simpul Penemu
3. Tanggung pengawa pengajar	Nyadi pemantai sereta pengerembai saut	Pemeri peransang lalu nyadi malin ngiga saut
4. Tanggung pengawa nembiak	Nyadi penerima saut ti pasif	Ngiga saut sechara aktif

Enti dipeda ari sukut pedagogi, langkah rapat deduktif bepelasarka peragam ke madahka siti adar ti diberi dulu nya mega siti simpul penemu ke dipadah ba pun pelajar. Tu deka ngemudahka pengawa belajar. Kebuah pia, simpul penemu tu deka madahka ‘kuing’ runding nembiak. Reti nya ari pun, nembiak udah dipadahka pekara ti deka diajarka pengajar. Nya alai, runding sida ulih difokus ngagai jurai senentang simpul penemu nya. Chara tu disemaka baka siku tukang silap mata ke narit ati orang ke madah enggau jaku ‘diatu aku deka ngelesapka telu ke bisi dalam jari aku’.

Langkah rapat induktif  bepelasarka peragam ke madah nembiak deka belajar enggau semitan agi enti sida empu ngiga simpul penemu sambil disaup mimit ari pengajar. Reti nya, nembiak ulih ngingatka saut nya enggau lama agi laban sida empu ke ngiga sereta tetemuka saut nya. Chara tu baka chara siku polis ke mansik siti kes bunuh lalu ba pengujung pansik iya mujur nangkap orang ke munuh sepengudah iya meratiaka garuh ti udah digumpulka iya.

Langkah rapat deduktif enggau induktif ulih mega dibanding ari sukut penemu abstrak tauka konkrit. Siti simpul penemu nya siti penerang ke udah disimpulka tauka diabstrak ari chunto konkrit ti sebaka data tauka fakta. Ambika banding, simpul penemu ke madah ayat turu ngundan dua tauka lebih ayat tunggal’ nya disimpul ari merati seraban ayat ti ngayanka pola ti sama iya nya ayat ke nyadi ari lebih ari siti ayat tunggal baka chunto di baruh tu:

1	Lebis rindu ngirup kupi tang bini iya rindu ngirup teh.
2	Orang ke benung betelefon nya menija kompeni.
3	Sida baru nemu sida udah ditikika pangkat.
4	Jabah minta pengawa nya taja pan iya nadai ngembuan peneleba bekereja baka ke dipinta.
5	Pengajar ti dibasa nya selalu merati pengelemi nembiak lalu ngiga chara mutarka penanggul nya.

Chunto ba atas nya sekeda data tauka fakta ti diguna maya ngajar simpul penemu senentang ayat turu – ayat turu ngundan dua tauka lebih ayat tunggal.

Enti pengajar ngena langkah rapat deduktif, iya deka mantaika chunto sepengudah iya nerangka simpul penemu nya. Pengajar ngena chunto nya dikena nya bejuraika simpul penemu kelebih agi ayat turu ti ngundan dua tauka lebih ayat tunggal. Pugu penteba ayat turu nya diterang enggau chara nyerara tiap-tiap chunto ayat turu nya nyadi ayat tunggal baka tu:

Ayat turu		Sitak
1	Lebis rindu ngirup kupi tang bini iya rindu ngirup teh.	(a) (b)	Lebis rindu ngirup kupi. Bini iya rindu ngirup teh.
2	Orang ke benung betelefon nya menija kompeni.	(a) (b)	Orang nya menija kompeni. Orang nya benung betelefon.
3	Sida baru nemu sida udah ditikika pangkat.	(a) (b)	Sida baru nemu (hal). Sida udah ditikika pangkat.
4	Jabah minta pengawa nya taja pan iya nadai ngembuan peneleba bekereja baka ke dipinta.	(a) (b)	Jabah minta pengawa nya. Iya nadai ngembuan peneleba bekereja baka ke dipinta.
5	Pengajar ti dibasa nya selalu merati pengelemi nembiak lalu ngiga chara mutarka penanggul nya.	(a) (b) (c)	Pengajar nya dibasa Pengajar selalu merati pengelemi nembiak. Pengajar nya selalu ngiga chara mutarka penanggul nya.

Iya ti suah diperatika kitai nya kerembai simpul penemu ditangkan enggau pengawa latih sekalika latih ba jaku tauka betulis. Ba pelajar ‘ayat turu’ di atas, pengajar deka ngelatih nembiak iya magi tauka nyitak ayat turu ngagai ayat tunggal. Ungkup tuju tu dia nembiak diberi ayat-ayat turu. Sida dipinta merati ayat nya enggau silik lalu nentuka ayat tunggal dalam genap iti ayat turu nya.

Ba langkah rapat induktif, pengajar enda meri simpul penemu ba pun ajar, tang iya mantu nembiak iya ngiga tauka ngaga simpul penemu enggau chara beberika data ti bisi kaul enggau pekara nya. Data tu mungkur ayat-ayat turu ti deka dianalisis nembiak ari sukut struktur tauka pola iya bepelasarka malin pengajar. Nengah sekeda rintai tanya, pengajar ulih nguingka runding nembiak iya ngagai pugu penteba ayat turu ngambika ba pengujung pelajar nya nembiak iya ulih ngaga simpul penemu senentang struktur ayat turu. Pengajar nyaup nembiak merati enggau silik chunto ayat turu  lalu ngiring sida ngagai penteba ayat turu iya nya tiap-tiap iti ayat nya ngundan dua tauka lebih ayat tunggal. Pekara ti difokus ditu iya nya ba langkah rapat induktif nembiak nya empu ngiga tauka ngaga simpul penemu.

Pengawa ti nangkan tu iya nya pengawa latih. Pengawa tu diberi awakka sida nemu ngena simpul penemu nya. Ambika banding, nembiak diberi serintai ayat-ayat. Sekeda ayat nya  ayat tunggal lalu sekeda agi nya ayat turu. Nembiak dipinta mida lalu nyerara ayat turu ari ayat tunggal.

Siti agi latih ti ulih diberi ngagai nembiak iya nya ngasuh sida nyambung dua ayat tunggal ngambika nyadi siti ayat turu. Leka jaku dikena nyambung dua iti ayat tunggal nya mega diberi.

Ayat tunggal			Leka jaku
1	(a)	Igat suah puntan dalam pengawa dagang.	tajapan
	(b)	Igat enda mudah ngalahka diri.
2	(a)	Bala ke meda lumba nya begau.	ketegal
	(b)	Bala ke meda lumba nya ninga bunyi letup bom.
3	(a)	Pengajar muji nembiak nya.	ti
	(b)	Nembiak nya udah ngayanka pengulih diri.

Dalam pengawa ngajarka jalai jaku Jaku Iban, langkah rapat deduktif enggau induktif nya dua strategi ti bebida lebuh ngenataika isi pelajar. Pengajar mesti meretika prinsip ti nyadi pelasar langkah rapat tu. Iya mesti landik ngena langkah rapat tu ba bilik kelas. Kedua-dua langkah rapat tu ngundan pemanah kediri empu enti dikena maya ngajar jalai jaku Jaku Iban. Nya kebuah, pengajar mesti nemu maya ti patut ngena langkah rapat deduktif tauka induktif.

Kelimpah ari nya, bisi mega sadang penemu ke ngasuh pengajar ngena siti agi langkah rapat ke dikumbai langkah rapat elektik. Langkah rapat elektik ti asil ari ngempung dua langkah rapat deduktif enggau induktif. Langkah rapat elektik tu ngundan dua varian baka ke dibantai di baruh tu:

VARIAN LNGKAH RAPAT ELEKTIK
1	Simpul penemu → Chunto → Simpul penemu
2	Chunto → Simpul penemu → Chunto

Ba langkah rapat ekektik ti keterubah, pengajar ngepunka pelajar madahka simpul penemu lalu ditangkan enggau meri chunto ti bisi kaul enggau simpul penemu nya. Udah nya bala nembiak dipinta nerangka enggau silik simpul penemu nya.

Ba langkah rapat kedua, pengajar mantaika chunto-chunto ti engkeman. Udah nya nembiak dipinta meratika chunto nya sambil dibantu pengajar lalu ngiga tauka ngaga simpul penemu. Udah nya sida dipinta meri chunto ke bukai lalu nerangka simpul penemu bepelasarka chunto ti diberi sida.

Varian keterubah nya tampung ari langkah rapat deduktif lalu varian kedua nya pekara tambah ngagai langkah rapat induktif.

Pengajar ke ngena langkah rapat di atas enda patut nyalahka langkah rapat ke dikena iya enti ajar iya enda semitan. Kebuah pia, laban pekara tu bepanggai ba pengajar nya empu; naka ni iya ulih belematika langkah rapat nya lalu naka ni iya landik ngena teknik-teknik ti patut dikena maya ba kelas.

	Ayat turu	Bagi
1	Lebis rindu ngirup kupi tang bini iya rindu ngirup teh.	(a) Lebis rindu ngirup kupi. (b) Bini iya rindu ngirup teh.
2	Orang ke benung betelefon nya menija kompeni.	(a) Orang nya menija kompeni. (b) Orang nya benung betelefon.
3	Sida baru nemu sida udah ditikika pangkat.	(a) Sida bau nemu. (b) Sida udah ditikika pangkat.
4	Jabah minta pengawa nya taja pan iya nadai ngembuan peneleba bekereja baka ke dipinta.	(a) Jabah minta pengawa nya. (b) Iya nadai peneleba bekereja baka ke dipinta.
5	Pengajar ti dipebasa nya selalu merati pengelemi nembiak lalu ngiga chara mutarka penanggul nya.	(a) Pengajar ti dipebasa. (b) Pengajar nya selalu merati pengelemi nembiak iya. (c) Pengajar nya lalu ngiga chara mutar penanggul nya.

Suah mega pengawa ngerembaika simpul penemu ditangkan enggau latih nengah chara bejaku tauka betulis. Ungkup pelajar ‘ayat turu’ di atas, pengajar deka ngelatih nembiak magi tauka nyerara ayat turu nya ngagai ayat tunggal. Dikena nyapai tuju tu, nembiak deka diberi ayat turu ngambika diperatika sida. Udah nya sida dipinta nentuka ayat tunggal dalam genap iti ayat turu nya.

Ba langkah rapat induktif, pengajar enda madah simpul penemu ngagai nembiak iya ba pun pelajar, tang iya mantu nembiak ngiga simpul penemu enggau chara meri data ngagai nembiak iya.  Data tu mungkur ayat turu ti deka dianalisis nembiak ari sukut struktur bepelasarka malin pengajar. Nengah tanya ti bisi kaul enggau pekara tu, pengajar ulih ngadapka runding nembiak ngagai pugu penteba ayat turu awakka ba pengujung pelajar sida ulih ngaga simpul penemu ti dipinta senentang struktur ayat turu. Reti nya, pengajar mantu nembiak iya merati chunto ayat turu lalu ngiring sida ngiga penteba ayat turu iya nya dua tauka lebih ayat tunggal. Iya ti deka disebut ditu madahka ba langkah rapat induktif nembiak empu ngiga tauka ngaga simpul penemu.

BUP SANDING PENEMU

Abdullah Hassan 1984, Linguistik Am untuk Guru Bahasa Malaysia, Penerbit Fajar Bakti Sdn.Bhd. , Petaling Jaya.

_________________ (ed) 1987, Kesalahan Bahasa dalam Bahasa Melayu, Dewan Bahasa dan Pustaka (DBP) Kuala Lumpur.

_________________ 1974, The Morphology of Malay, Dewan Bahasa dan Pustaka (DBP) Kuala Lumpur.

Anthony, E.M. (ed). 1976, Reading: Insights and Approaches, Singapore University Press, Singapore.

Ashley, R.S., 1984, Successful Techniques for Teaching Elementary Language Arts, Parker Publishing, New York.

Asmah Haji Omar dan Rama Subbiah (1968), An Introduction to Malay Grammar, Dewan Bahasa dan Pustaka (DBP) Kuala Lumpur.

_________________ (ed)1984, Kaedah Pengajaran Bahasa. Dewan Bahasa dan Pustaka (DBP) Kuala Lumpur.

Azman Wan Chik (1981), Prinsip dan Kaedah Mengajar Kesusasteraan Melayu, Utusan Publications, Kuala Lumpur.

_________________ 1982, Ujian Bahasa Malaysia, Dewan Bahasa dan Pustaka (DBP) Kuala Lumpur.

_________________ (ed)1986, Mengajar Bahasa Malaysia: Latihan Guru dan Bahan, Dewan Bahasa dan Pustaka (DBP) Kuala Lumpur.

Gurner, R. (1976), Language, Learning and Remedial Teaching, Edward Arnold, London.

Koh Boh Boon (1981), Pengajaran Bahasa Malaysia, Utusan Publications, Kuala Lumpur.

Koh Boh Boon (1990), Pengajaran Tatabahasa Bahasa Malaysia: Prinsip dan Teknik, Penerbit Fajar Bakti Sdn. Bhd., Kuala Lumpur.

_________________ 1981, Pengajaran Pemulihan dalam Bahasa Malaysia, Dewan Bahasa dan Pustaka (DBP) Kuala Lumpur.

_________________ 1984, Bahan Pengajaran Kendiri Terancang, Dewan Bahasa dan Pustaka (DBP) Kuala Lumpur.

_________________ (ed) 1989, Perspektif-perspektif dalam Pengajaran Bahasa Malaysia, Dewan Bahasa dan Pustaka (DBP) Kuala Lumpur.

_________________ 1978, The Teaching of Malay Affixes, Penerbit Fajar Bakti Sdn. Bhd., Kuala Lumpur.

Lado, R., (1976), Language Teaching: A Scientific Approach, Tata McGraw-Hill Publishing, Bombay.

Lim Kiat Boey (1975), An Introduction to Linguistics for the Language Teacher, Singapore University Press, Singapura.

Lufti Abas (1975), Tatabahasa Perbandingan: Predikat, Dewan Bahasa dan Pustaka (DBP), Kuala Lumpur.

_________________ 1976, Tatabahasa Perbandingan: Ayat, Dewan Bahasa dan Pustaka (DBP) Kuala Lumpur.

Mackey, W.F., (1978), Language Teaching Analysis, Longman, London.

Mashudi B.H. Kader ((1981), The Syntax of Malay Interrogatives,  Dewan Bahasa dan Pustaka (DBP), Kuala Lumpur.

Mohd. Taib Osman (ed), (1977), Pengajaran Bahasa dan Kesusasteraan Malaysia, Dewan Bahasa dan Pustaka (DBP), Kuala Lumpur.

Nik Safiah Karim (1978), Bahasa Malaysia Syntax, Dewan Bahasa dan Pustaka (DBP), Kuala Lumpur.

_________________ (ed), 1986, Bahasa Melayu Tinggi: Teori dan Penerapan, Dewan Bahasa dan Pustaka (DBP) Kuala Lumpur.

_________________ et al. (ed), 1982, Tatabahasa Dewan: Ayat. Dewan Bahasa dan Pustaka (DBP) Kuala Lumpur.

_________________ et al. (ed), 1989, Tatabahasa Dewan: Perkataan. Dewan Bahasa dan Pustaka (DBP) Kuala Lumpur.

Payne, E.M.F., (1970), Basic Syntactic Structures in Standard Malay, Dewan Bahasa dan Pustaka (DBP), Kuala Lumpur.

Raminah Hj. Sabran dan Rahim Syam (1985),  Kaedah Pengajaran Bahasa Malaysia,  Penerbit Fajar Bakti Sdn. Bhd., Petaling Jaya.

Richards, J.C. dan Rodgers, T.S. (1986), Approaches and Methods in Language Teaching, Cambridge University Press, Cambridge.

Rivers, W.M. (1981), Teaching Foreign-Language Skills, The University of Chicago Press, Chicago.

Sofiah Hamid dan Zaiton Ab. Rahman (ed), (1988), Ke Arah Keprofesionalan Guru Bahasa dan Sastera Melayu, Dewan Bahasa dan Pustaka (DBP), Kuala Lumpur.

Stern, H.H. (1983), Fundamental Concepts of Language Teaching, Oxford University Press, Oxford.

Wilkins, D. A., (1978), Linguistic in Language Teaching, ELBS and Edward Arnold, London.

_________________ 1981. Second Language Learning and Teaching, ELBS and Edward Arnold, London.