Budaya Negatif Orang Malaysia

MALAYSIA ngembuan juluk ati deka nyapai status menua maju dalam taun 2020. Taja pia, pekara tu nyangka enda ulih dijapai laban agi mayuh peranak menua Malaysia ngembuan budaya ti negatif. Ulah ti negatif enggau attitut nya ngayan sekeda rayat Malaysi balat bendar begunaka kimpin dikena ngangkatka nilai ti besai sereta adat basa entang bala mensia mayuh. 

Kes buli ba jalai raya sereta ngelanggar undang-undang trafik  majak nyadi. Baka nya mega pengawa bebuaika uras seberang endur sereta pengawa ngerusak perengka rama nya evidens ke madahka orang Malaysia agi jauh amat tinggal ari pengawa ngemeranka adat basa. 

Tama ngagai pitak kuning maya lampu trafik agi mirah ngayanka deriba kitai balat enda liat ati sereta ngemeratka diri empu aja. Udah nyadi pemai ulah sereta pekara selama ba sekeda bala deriba ngempang kerita bukai maya sida ngetu ba pitak kuning seraya ke nganti lampu trafik berubah gadung. Taja pan menua kitai mansang ari sukut teknologi, kitai agi betapi enggau ulah ti enda liat ati sereta nilai moral ti majak nurun dalam pengidup besehari-sehari.

Enti diperatika ari ulah ke nyau majak enda manah ba sekeda peranak Malaysia dia kitai ngasaika kimpin adat basa ti kala dipejalaika ngelama tu enda tentu semitan dikena ngubahka ulah enggau perangai rayat Malaysia. Nya alai genap lapis komuniti patut nanya sida empu penyukup kimpin adat basa enggau nilai ke kala udah dipejalaika ngelama tu.

Bepelasarka ari perati, adat basa, ulah ke ngemaruhka diri, toleransi enggau bebasaka orang bukai agi jauh bendar bedau bisi dikembuan peranak menua Malaysia. Agi mayuh pekara ke patut bendar dipejalaika dikena ngangkatka adat basa orang Malaysia kelebih agi raban nembiak rebak baru kemaya hari tu.

Mayuh bendar nembiak sekula kemaya hari tu ke enda kiruh meri terima kasih lebuh sida nerima sesebengkah utai tauka perais ari orang bukai. Ambika banding, tu ulih dipeda maya pengerami nyuaka sepetikit enggau perais ngagai bala nembiak. Sida mimit pan nadai nyebut terima kasih tang lalu terus ngejang ari orang ke nyua setipikit enggau perais.   

Nambahka nya mega, udah nyadi pekara selama meda raban deriba ke ngengkah kerita sebarang endur, muai uras ba palan rama, vandalisma, ngelih orang maya bebaris sereta enda minta ampun maya ngaga penyalah. 

Isu bukai ke patut mega diputar nya hal ke bejaku rengkang maya bejaku enggau bala pemeli, nginsap ba palan ti enda patut alai nginsap, ngeludah ba palan rama sereta enda meri tempat duduk ngagai orang tuai, orang ke timpang pendiau enggau indu ke ngandung. 

Endang udah chukup maya ke patut alai orang Malaysi mutarka isu baka tu sereta nanya diri empu sida ni naka adat basa udah dikemeranka sida ngelama tu. Ngatur kimpin adat basa endang patut bendar ti pejalaika tang iya ke patut dikemeratka mega nya semua ulah tu patut bisi sereta dikemeran rayat semua. Iya patut nyadi sebagi ari budaya rayat Malaysia enda milih dini-dini endur sida sereta enggau sapa sida begulai.

Raban sivil servis, ambika banding, patut nerenak adat basa ba staf ke gawa ba kaunter kelebih agi lebuh sida betapi enggau mensia mayuh enggau basa lebuh nyaut telefon tauka malas surat ngagai orang bukai. 

Genap kimpin adat basa mesti berengkah ari sekula ngambika iya ulih mujur. Ba hal tu, subjek baka Pendidikan Moral patut ngemeratka pengawa belajar sereta praktis 36 bengkah ajar manah di sekula. Pengawa ti semina ngapalka 36 bengkah ajar manah nya laban deka pas dalam subjek endang nadai mai penguntung sereta reti ti menyana. Ke bendar kitai patut matih diri ngemeranka ajar manah nya dalam pengidup kitai besehari-sehari.

Juluk ati ke deka ngulihka menua tu nyadi menua ti maju sereta ngembuan status menua bepenatai pemisi ti tinggi semina ulih dijapai enti peranak menua Malaysia mujur ngemeranka adat basa enggau ajar manah. Nya alai, kitai ngarap bendar perintah ulih merambuka jalai ti patut dikena nerenak budaya adat basa enggau ajar manah dalam menua kitai.