Budaya Macha Orang Jipun

Panyun Jaku

Sejarah udah ditulis madahka bansa ti mujur nya ulih dipeda penteba iya ari komuniti sida ke ngembuan budaya literasi. Baka nya mega kitai meda komuniti ti enda mansang mega dipeda enti sida nadai ngembuan budaya literasi. Sesebengkah bansa ti ngembuan kuasa tauka pemujur dalam sesebengkah bidang enda ulih ngetanka reta tengkira sida enti sida nadai ngembuan  budaya penemu  ti tegap. Nambahka nya mega sida diperatika semampai bepanggai ba bansa bukai  ti bepenemu agi ari sida. Evidens tu ulih ditimpai kitai lebuh meda chara menua pengeluar minyak ti kaya-raja dipejal begantung ba semua aspek pengidup menua sida nya ngagai  menua bukai ti maju agi ari sukut penemu enggau pemandai.

Sejarah mega udah bisi evidens madahka komuniti maju ti ulih nengkua mayuh leman bidang dalam pengidup sida lalu nempa sejarah nya mih komuniti ti ngembuan pengerindu macha. Disiplin macha dikena ngulihka penemu nya sebengkah  kuasa ti ulih ngelepaska diri ari dipanyuk penyeranta enggau penanggul ti nadai bepenemu.

Batang Kenang

Budaya macha ngasuh runding siku-siku orang nya ngerembai lalu ngembuan imaginasyen ti tinggi agi maya bejaku sereta lanchar mantaika penemu enti dibanding enggau orang ti kurang macha. Nitihka Kenedy (1981), macha nya ‘pengulih siku-siku orang nerenak tukuh visual (lambang-lambang grafik ti ngarika jaku tauka leka jaku). Tukuh visual tu ti nyambung gaya intu, tauka munyi reti ti udah ditemu, lalu udah nya bepelasarka  peneleba lama, mereti sereta ulih nerangka reti’.

Pengawa macha ulih dikaitka enggau pengawa nempa penemu diri. Kebuah pia, laban bida ti nyata entara individu ti rindu macha bebanding enggau individu ti enda rindu macha ulih diperati ari penemu ti dikembuan kedua-dua individu nya. Komuniti ti rindu macha ulih ngasilka siku mensia ti beguna sereta ngembuan tikas runding ti tinggi. Raban tu mega raban ti nyadi pemesai tauka tuai sesebengkah menua laban idea-idea badas sida ulih nyaup ngemansangka menua nya.

Nambahka nya, siti agi chunto ba pengarap Islam ti meransang raban pengarap iya macha nyentukka ulih ngasil mayuh raban orang pandai baka Ibnu Sina, Al-Khawarizmi, Al-Razi, Al-Haitham, Al-Khindi, Ibnu Biruni enggau sida ke bukai. Kesemua sida tu pandai bepun ari pengerindu sida macha baik nya macha inggar tauka macha sengian. Tu ngujungka sida ulih  ngasilka pekara baru. 

Maya Barat dalam Jeman Pemetang, bida entara dunya Islam enggau Barat ulih disempamaka baka langit enggau tanah. Victor Robinson ngaga banding tu dalam bup iya ti dikumbai The Story of Medicine (The New Home Library, New York, 1943). Iya madahka, ‘Eropah maya nya agi ngasaika pemetang tang Cordova (menua Islam ba Sepanyol) udah tampak ketegal penerang lampu. Eropah maya nya mengkang kamah tang Cordova udah ngaga 1,000 buah tempat mandi. Eropah nyau dedat enggau indu utai tang peranak Cordova nganti pekayan dalam sida tetiap hari. Jalai di Eropah agi tanah luchak tang jalai di Cordova udah dibelakin. Istana di Eropah nyau penuh enggau lubang asap ba perabung rumah tang rumah di Cordova manah memelan. Pemesai-pemesai Eropah enda nemu nyain nama diri empu tang bala anak di Cordova udah besekula. Pemesai-pemesai pengarap di Eropah enda nemu macha  brosur Kristian tang ulama Islam di Cordova ngaga librari ti besai.’ Tu mih tanda-tanda bansa ti rindu macha mansang nyegang nyadi bansa ti mujur.

Semua tuai pemegai menua mesti meransang perayat iya macha awakka sida enda tinggal pemansang sereta ulih napi dunya moden. Ba komuniti Jipun, macha udah nyadi sebengkah ari tebiat lalu nyadi pengawa ti semampai dikereja laban ari budaya macha, sida ulih ngangkatka tikas idup lalu ulih besemekih enggau dunya luar.

Taja pia, komuniti ti nerima ubah teknologi ti moden sereta  sofistikated kemaya hari tu udah mega ngemeranka pengawa macha kereban bacha ti enda patut dibacha sida. Budaya ti baka tu ke ngasuh komuniti kelebih agi bala nembiak redak ngembuan ulah ti baruh sereta pabu penemu. Bansa kereban bacha ti dibacha sida ulih dikategorika ‘kamah’ tauka enda manah laban iya eksploit seks nyadika pugu kereban. Sekeda kereban bacha tu ngayanka gambar indu dimantaika tubuh enggau gaya ti seksi dikena sida penjual ngelakuka bup sida. Nembiak redak ti suah disapi enggau kereban baka tu tauka ngasuh sida gagit, rindang sereta gian macha kereban bacha ti baka tu. Tu tau ngujungka raban tu enda ulih bepikir sechara matang lalu deka tinggal dalam mayuh bengkah aspek.

Sejarah mega udah ngerekodka menua baka Jipun, Amerika Syarikat, United Kingdom, enggau Jerman nya entara menua enggau bansa ti maju ketegal komuniti sida udah nempa budaya literasi. Nya kebuah, endang patut mih lebuh menua tu mansang dalam semua bidang, jauh ngalahka menua bukai. Kelimpah ari megai ekonomi dunya, menua tu mega tebilang dalam bidang teknologi. Kedar pengidup komuniti iya mega dinamik amat, kelimpah ari ngembuan ringkat dispilin ti tinggi. Reti nya, budaya literasi ngembuan tanggung pengawa ti besai amai dalam pengawa ngemansangka sesebengkah komuniti enggau menua. 

Lebuh ngemeranka pengawa macha, kitai nyadi nemu sereta meretika agi sesebengkah pekara lalu tu ulih ngasuh kitai terus ngulihka tinjau pemansang baru. Penemu baru senentang mayuh bengkah pekara nya mih ti ngasuh kitai teperansang deka majak ngaga ubah baik dalam pengidup tauka rampa ke ngelingi kitai. Evidens baka tu ulih dipeda ba menua Jipun. Jipun nya sebuah menua ti udah  anchur lela maya Perang Dunya Kedua ketegal dibom atom Soldadu Aliied Forces. Tang Jipun udah nya ulih ngangkatka diri ari menua ti anchur sepengudah perang lalu ngemeratka pelajar bansa iya. Perintah sida lalu ngirum bala perayat iya ke  menua maju baka Amerika Syarikat enggau menua Eropa. Asil ari nya, Jipun mujur ngemansangka baru menua iya ti udah anchur. 

Kemaya hari tu, mayuh leman teknologi ulih digaga orang Jipun. Indah, Amerika Syarikat ti ngelama tu nyadi hero bekuasa ba semua bidang sereta dalam mayuh bengkah hal berengkah ngaku Jipun nya tebangkar agi ari sida. Pemujur Jipun megai ‘dunya’  nya sigi bepun ari budaya literasi ti udah diterenaka sida kenyau ari dulu suba. Enda patut Jipun ulih ngasilka mayuh orang ke kingan ti nengkebang mayuh pekara baru ba mayuh bengkah bidang, enti budaya literasi di Menua Matahari Tumbuh nya enda  ditempa. Nya kebuah, enti di Jipun kitai nyangka enda tetemuka orang ke buta urup. Pekara ti nyadi baka tu laban sida balat agi jelai berita nyadi komuniti ti rindu macha enda ngira dini-dini endur. 

Ketegal ke rindu macha mega, media chelak din mayuh amat baka kulat tumbuh maya pengujan. Indah, penyampau surat berita ti disadung di Jipun nya pan ngalahka penyampau surat berita ti disadung ba serata dunya. Nitihka Cakram Fokus edisyen April 2006, ari 10 surat berita ke pengabis besai di dunya, ari rintai nya penuduk satu ngagai lima endang dipegai surat berita Jipun nyadi penyadung ti pengabis mayuh. Penuduk keterubah dipegai surat berita Yomiuri Shimbun  lalu penyampau disadung nya bisi 14 juta salin surat berita sehari. Kedua, surat berita The Asahi Shimbun enggau penyampau disadung nya 12 juta salin surat berita sehari. Ketiga, surat berita Mainchi Shimbun enggau penyampau disadung nya 5.5 juta salin surat berita sehari. Keempat, surat berita Nihon Keizai Shimbun enggau penyampau disadung nya 4.6 juta salin surat berita sehari lalu kelima, surat berita Chunichi Shimbun enggau penyampau disadung nya 4.5 juta salin surat berita sehari. 

Berebak enggau nya mega, surat berita di Jipun dikeluarka dua kali sehari iya nya pagi enggau lemai. Enti dikira, dalam sehari, siku orang di Jipun macha empat surat berita ti bebida. Uji peratika pekara tu enggau silik! Tu ngayanka peninggi daya bacha orang Jipun.

Indah Singapura ti saiz menua iya jauh mit agi ari Malaysia mega ngembuan pengeransing ti sama enggau Jipun. Ekonomi, pelajar enggau mega budaya macha komuniti sida Singapura  ngelui ari menua bukai di Asia Tenggara. Enggau penyampau peranak nya kira-kira 4.5 juta, sida bisi tujuh surat berita lalu penyampau disadung nya datai ngagai 1 juta salin surat berita sehari. 

Lebuh kitai tama ke dalam kedai bup di menua Jipun, bisi sekeda pekara dia ti tau narit ati kitai. Tu nyengkaum saiz bup baka bup novel, bup bacha rama enggau bup akademik ti dichelak nitihka saiz kuchik ngambika nyamai disimpan dalam kuchik sereta dibai kin kitu. Mayuh lapis ringkat orang Jipun enda ngira tuai biak lelaki indu ngemenuhka genap keduk kedai bup.

Gaya ulah orang ke dipeda macha bup enda ngira dini-dini endur endang nyadika pekara selama di menua Jipun. Taja pan sida ba taman bungai, bas, kommuter, kerita enggau endur bukai, orang Jipun enda malu macha sebarang bansa kereba bacha nyengkaum bup komik. Bisi mega orang ngumbai koleksyen bup jaku English mega mayuh ba kedai-kedai bup di menua Jipun. Tu semina peragam sekeda orang laban iya ke bendar tusah amat deka tetemuka bup jaku English ba kedai bup selama kelimpah ari kedai bup Kinokuniya.

Bup-bup asil karang pengarang tebilang dunya dikalihka terus ngagai jaku Jipun ulih pengeluar bup Jipun enggau naka pengelengkas. Orang ke rindu ke bup enda ibuh nganti lama sampai bebulan-bulan enti sida deka macha bup menua luar ti laku amat dijual. Bup ti udah dikalihka ngagai jaku Jipun tu mih meransang semua raban enggau lapis komuniti macha bup-bup enggau enda ibuh landik ba jaku bukai. Ukai semina nya aja, enti deka ngiga bup dalam jaku English ba librari Palan Pelajar Tinggi sida mega tusah laban mayuh bup Akademik baka nya udah dikalih ngagai jaku Jipun.

Media elektronik mega meri sukung ngagai industri bup nengah chara ngeluarka program ti dikumbai ‘Hon-Ya no Seki-Guchi’ reti nya ‘Kaunter kedai bup’. Program tu meri penguntung ngagai pengeluar bup laban sida ulih ngelakuka bup-bup baru sida. Maya program nya siku ikon komuniti ( artis, penyanyi, tukang kelugi, raban pelumba enggau pemain, tuai komuniti enggau sida ke bukai) deka dikangau nyadi temuai program lalu diasuh meri komen senentang isi sesebengkah bup. Udah nya artis ke bukai ke bela bisi datai dalam program nya dipinta meli bup nya bepelasarka ke komen ti udah diberi.

Utai ti narit ati iya nya isi bup ti dikomen nya nyadika  kereban visual awakka bisi dipeda ba skrin televisyen. Komuniti mega ulih meretika isi bup nya enggau dalam agi lebuh meda iya ari sechara visual. Mensia mayuh ti bisi ati deka macha bup nya ulih mesan nengah telefon. Enggau chara tu iya ulih mantu mensia mayuh ti kiruh enggau mayuh macham aktiviti sehari meli bup enggau enda ibuh ke kedai bup.

Taja pia, di menua tu, kemaya hari tu kitai agi betunyau enggau budaya macha ti agi mambam nyadi ba raban komuniti kitai. Pengawa ti patut dikemeranka rayat Malaysia kenyau sida agi mit awakka ulih ngasilka komuniti ti ngembuan pengerindu macha. Dikena ngemeraka budaya macha dia semua raban enda ngira nya perintah, raban prebet, gerempung ukai dikuasa perintah enggau mensia mayuh patut bisi tanggung pengawa kediri empu kelebih agi ngena penemu ti udah dibacha nya ba pengidup besehari-sehari. Terenak mih budaya macha raban komuniti Jipun enggau Eropa ke dalam komuniti kitai awakka kitai mega ulih nyadi bansa ti mujur.

Penutup

‘Bansa macha nya bansa mujur’ nya sulu jaku ti udah entap sereta suah didinga. Ari sukut realiti iya, penempa sesebengkah bansa ti tegap sereta tebilang bepun enggau penemu sereta pemereti ati senentang sesebengkah pekara. Reti nya kesemua tu bepun enggau minda ti lati ke datai ari budaya macha. Minda ti lati nya mih pintu penama ngagai semua pemujur.