Ngangkat juluk ati ngulihka pengelantang dalam Malaysia Baharu

PAGILA kitai nerima penatai taun baru 2019. Taun 2018 ngayanka mayuh penguji sereta balat ngujika pengetan enggau pengeliat ati kitai enggau pangan diri kelebih agi menua kitai ke endang diwan mayuh pupu raban bansa tu. Tentu mayuh bendar pekara ke deka ditapi kitai dalam taun 2019 kelebih agi dalam pengawa ngemetulka pengelemi enggau pengurang ke diwariska rayat ari perintah lama suba, sekalika nya ari sukut politik tauka ari pengawa merintah menua tu empu.

Genap iku ari kitai tentu dekaka perintah ti teulihka pemujur lebuh betapi enggau mayuh leman isu  ke tau bendar ngenusahka rayat, kelebih agi ke bisi kaul enggau rega barang ti majak niki sereta hal ke bisi kaul enggau negapka penyerakup entara pupu raban bansa ti bisi napi penanggul mimit bekaul enggau insiden entara bansa apin lama tu tadi. Penatai taun baru endang patut nyadika peransang kitai semua besampika pekara ke manah agi nyadi dalam taun dudi sereta bulih pemujur ke enda ulih dijapai kitai ngelama tu.  

Kitai mega enda ulih enda ngaku taun 2019 dipelabaka taun ke tau ngasuh kitai berasai kusang ketegal gaya ekonomi ti enda tentu manah ke ditapika kitai sepemanjai taun 2018. Ekonomi menua ngerekodka pemansang ti lubah dalam taun 2018. Ketegal tu mayuh kompeni dipansal ngurangka operasyen sida lalu ngujungka mayuh pekereja sida dipinta badu gawa tauka diasuh kemisi. Pekara ti balat bendar ngenyit ati kitai semua iya nya majoriti pengundi milih numbangka perintah Barisan Nasional (BN) lalu ngantika enggau Pakatan Harapan (PH) ba Pengawa Bepilih Besai Ke-14, 9 Mei tu tadi.

Dalam taun 2019 mayuh kes beprofil tinggi ba court deka dipejalaika. Tu mungkur tuai pemegai menua ke suba nyengkaum Menteri Besai ke suba enggau mandal iya. Kelimpah ari seduai, bisi mega sida bukai baka menteri ke suba enggau sekeda individu ari raban korporat ti diparit enggau pengawa makai suap sereta salah guna duit rama enggau kompeni ti bisi kaul enggau perintah. Tu nyengkaum FELDA, FGV enggau Tabung Haji. Bisi mega kes belaya ba kuil Sri Maha Mariamman, Subang Jaya, Selangor mega deka dipecharaka, nyengkaum pemati raban bomba, Muhammad Adib Mohd Kassim. Pengelengkas polis mutarka penanggul tu patut bendar dipuji tang taja pia, iya mega tau ngujungka kaul entara bansa bisi rajai mimit. Kaul meranggang entara bansa tu enti enda diputar enggau manah tau disemaka baka time bomb ti barang maya tau meletup.

Nya alai, kitai bela ngarapka taun baru tu ila nadai agi penusah baka nya nyadi laban iya tau bendar ngujungka nyawa orang periman tauka raban pengelikun bebadi. Genap iku kitai patut belajar ari tragedi ti nyadi nya. Tu nyengkaum sida ke nyadi tuai politik enggau tuai-tuai komuniti ngambika  enda enggau orang ngulu sereta ngepunka insiden ti enda manah baka tu lebuh sida ngeringka bansa tauka komuniti ti diarika sida.

Runding Malaysia Baru patut nyadika pugu langkah rapat bepolitik ungkup tuai-tuai politik laban hal ngeringka bansa diri sereta benchika bansa bukai udah nadai patut bisi ba menua tu agi. Pekara ti patut dikeingatka kitai semua nya nurunka menua Malaysia ti manah sereta likun ngagai sida ke serak dudi.