Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Selasa, 29 Januari 2019

Ubah Ketegal Maya Kemaya Hari Tu


Pengajar enggau nembiak udah nampung pengawa ngajar enggau belajar ungkup sesi sekula 2019. Taun tu berengkah ubah dalam sistem pelajar menua. Hal tu berindik ari atur Perintah Pakatan Harapan enggau Menteri Pelajar, Dr. Maszlee Malik ke ngembuan tanggung pengawa deka ngamatka danji dalam pengawa bepilih besai ke-14 tu tadi.

Sekeda orang ngumbai, genap kali betukar pemesai be peringkat tinggi dalam Opis Menteri Pelajar Malaysia (KPM) dia deka berubah mih polisi enggau program pelajar menua ari tikas sekula primari nyentuk ngagai pelajar tinggi.

Pia mih baka selama, lain orang lain mega langkah rapat ke dikena. Taja pia, nama-nama pekara ti berubah enda patut ngeruga tuju asal sistem pelajar bansa, tang tuju iya dikena ngemanahka agi polisi ke udah bisi nya bepelasarka Filosi Pelajar Bansa.

Kitai endang udah nemu chara idup peranak menua tu semampai berubah, teknologi baru seruran ditengkebang lalu anak nembiak kemaya hari tu mih deka pekereja jemah ila. Nya kebuah, sida mesti disikap enggau pengelandik setipak enggau ubah maya kemaya hari tu.

Mensia mayuh nyengkaum pengajar enggau pengelicha patut ngembuan penemu ti tebuka enggau hal ti bekaul enggau pekara ti berubah nya lalu sida enda ulih enda besedia ngiraika diri ngagai ubah ti udah diperambu nya. Nama agi dih kemaya hari tu KPM udah bisi inisiatif nentuka penteba mensia baru dikena ngenapka standard antarabansa.

Penteba tu beguna amat dikena ngeluarka nembiak sekula enggau universiti ti ngembuan pengelandik Industri 4.0 sereta ngasilka sida ke pandai. Nya alai, kurikulum sekula dikemanahka agi ngambika pengelandik ti diterenak ngagai nembiak nya engkeman enggau ubah sereta guna kemaya hari tu.

Setipak enggau tuju nya, endang patut bendar pengajar enggau nembiak endang ditating enggau mayuh leman pekara lalu pekara ti berat patut bendar dikurangka. Komiti Polisi Pelajar Menua enggau Kaunsil Penyanding Penemu Pelajar Bansa ti udah ditumbuhka meri tuduh penemu senentang ubah ti patut dipejalaika.

KPM udah ngatur singkang pengawa ke tumu sereta meri fokus ngagai hal nya. Naka kediatu, sida udah ngemaduka peresa Taun Satu ngagai Tiga berengkah ari taun 2019.

Kitai sama-sama ngarapka pengajar ke udah dilatih diatu ngembuah strategi dikena sida napi penguji tu. Proses belajar ti dikarapka Menteri Besai iya nya bekaul enggau pengawa ti ngemeranka rukun pendiau ti menyana lalu ngasilka mensia ti manah agi sereta ngembuan seregah diri ti tinggi.   

Tiada ulasan:

Catat Ulasan