Budaya muai uras enggau chara ti betul

Isu muai uras ba palan rama semampai dikerandauka di peringkat nasional. Isu nya udah nyadi pekara selama ba komuniti di menua tu. Taja pan mayuh macham inisiatif dipejalaika perintah dikena mutarka isu nya, komuniti lokal agi ngumbai sereta meda isu nya sebagi ari pekara mudah sereta enda tentu dikeibuhka sida.

Pekara tu tampak bendar dipeda lebuh Opis Menteri Rumah enggau Local Council ngayanka data madahka 60 persin rayat ba menua tu agi enda nemu muai uras enggau chara ti betul ke dalam tung uras. Iya ti balat ngenyinuka ati penyampau tu enda nyengkaum pemandai rayat ari menua bukai nisihka uras.

Menteri opis tu madahka budaya muai uras ke dalam tung uras agi kurang. Tu ngujungka opis  menteri patut merambu program bepelasarka pelajar dikena ngangkatka penemu rayat senentang pekara tu. Ketegal hal tu mega, perintah diansak meri fokus ngagagai pengawa ngajar rayat muai uras enggau betul lalu perintah mega meri perati ngagai perambu ngatur teda solid. Komuniti patut ditangkanka enggau jaku madahka semua uras mesti dibuai ke dalam tung uras lalu ukai ba endur ke ngelingi tung.

Nitihka penyading penemu Bagi Rampa Menua, Gerempung Rinduka Rampa Menua (MNS), isu bebuaika uras ba endur ke ukai  endur muai uras enda patut nyadi kemaya hari tu. Taja pan pelajar udah mayuh dikenataika di sekula senentang hal tu tang, mensia mayuh agi bedau ulih belematika budaya ke enda ngasuh muai uras sebarang endur.

Dikena mutarka penanggul tu, semua orang patut beripai ngaturka kimpin beskala besai sereta neritka adat sentang ulah muai uras ti betul.

Kelimpah ari nya, papan notis ba jalai besai mega ulih dikena nyadi sebagi ari kimpin ngambika mensia mayuh nemu sereta ingat enda muai uras sebarang endur kelimpah ari kimpin  anti makai suap ke benung dipejalaika diatu.

Nambahka nya mega, kimpin baka poster enggau klip video pandak senentang tebiat muai uras ti  betul enda tau enda disadung dikena ngajar mensia mayuh sepemanjai maya. Poster nya mega ulih ditampal ba tiap-tiap bilik kelas dalam kandang sekula lalu pengajar ulih ngingatka nembiak iya belama senentang pekara tu. Ari nya, maya nembiak tu pulai ke rumah, sida ulih ngenataika pesan ngagai bala sida sebilik. Enti langkah rapat tu ulih dipejalai enggau manah,  dianggarka tiap-tiap hari, kira-kira 10 juta individu deka bulih mesej senentang enda ngasuh muai uras sebarang endur. Nya alai, semua menteri patut meri komitmen bekaul enggau isu muai uras kelebih agi uras plastik.

Nambahka nya, dikena nambahka penemu mensia mayuh, opis menteri ke bekaul enggau pekara tu patut madahka kos ngatur teda solid ti terang-terang amat ngenusahka menua.

Penanggul muai uras sebarang endur tu ulih diputarka enti mensia mayuh ngemeranka budaya muai uras ba tempat ke betul. Budaya baka tu patut bepun ari rumah. Ngemeranka budaya tu ukai pekara ti mar dikereja enti digaga ari peringkat baruh. Apai indai ngembuan tanggung pengawa ti berat ngajar nembiak rebak baru ngambika sida muai uras ke dalam tung uras lalu tu sida mih nyadika suri teladan sereta chunto pengabis manah ngagai bala anak kelebih iya ti bekaul enggau pengawa bebuaika uras. Enti apai indai ngembuan ulah ke enda kiruh deka ngajar bala anak sida senentang pemesai reti muai uras ba endur ti betul, nya tau meri impak negatif ngagai  menua kitai jemah ila.