MALAYSIA ngembuan mayuh palan nemuai ti manah melan sereta besejarah, taja
pan penyakit enggau penanggul vandalisma ngerusakka rampa timpai sereta meri peragam
negatif ngagai temuai ke datai ke menua tu.
Pemansang menua nadai guna, enti rayat nadai ngembuan tikas penemu ti tinggi
dalam hal nyaga reta tengkira rama. Budaya vandalisma enda ngayanka pemansang
ti diasaika menua kemaya hari tu. Enti enda diputarka dia pengawa baka tu deka
terus dikemeranka serak dudi peranak menua.
Tu asil chunto ti enda manah ke diayanka mensia mayuh kemaya hari tu. Uji
pikir nama enda runding siku-siku temuai ari menua luar maya iya ngena kereban
rama ti jai. Tentu hal nya ngasuh ati iya pedis sereta sinu. Baka nya mega maya
ngena agu rama ti kamah tauka pintu sereta dinding nya diukir enggau tulis ti
enda patut. Hal tu tentu meri empas ti enda manah ngagai sektor dagang temuai
menua kitai.
Enda ngira penunga nemuai, ulah vandalisma nya patut diseliahka ngambika
semua kitai lantang laban aktiviti tu ngayanka kitai dirempah enggau ulah ke
enda manah. Iya mega ngayanka kitai enda beterima kasih ke pengelantang enggau
pemisi ke diberi Petara laban enti nunda semua pemanah tu diguna enggau naka
pematut.
Kelimpah ari nya mega udah nyadi tanggungjawab kitai semampai ngelalau semua
raban komuniti senentang pemesai guna nyaga reta tengkira rama. Enti reta
tengkira enggau rampa menua ulih dijaga enggau manah dia semua orang nyengkaum
temuai ari menua luar deka berasai gagit sereta lantang. Ari nya mega imej menua
Malaysia ulih dijaga ari perspektif ti berisiko ke tau ngerusak reputasyen
menua.
Semua raban patut bejalaika pengawa diri empu dikena nentuka ulah vandalisme
ulih diketu. Bala apai indai enggau penyaga, mesti seruran ngelalau anak sereta
bala sida sebilik senentang perkara tu.
Anang ketegal ulah sekeda komuniti, iya meri empas negatif ngagai orang bukai.
Pengawa nyaga rampa menua nya pekara ti dipinta semua pengarap nyengkaum
pengarap Islam, Kristian enggau ke bukai.
Tiada ulasan:
Catat Ulasan