Kati enti Einstein diau di Malaysia

LAPA budaya kreativiti ba raban nembiak sekula enggau graduet kitai Malaysia enda tentu manah amat taja pan mayuh macham kus pengelandik bepikir kreatif diberi ngagai sida? Nembiak dilatih enggau pengelandik bepikir kreatif tikas tinggi. Pengelandik Lateral Thinking, Divergent-Convergent Thinking, Parallel Thinking enggau mayuh ke bukai.

Taja pia, anang tekenyit enti bisi nembiak ke bulih skor A ba peresa lalu nengkua pengelandik bepikir kreatif ke bendar enda kreatif ba dunya luar akademik! Engka nembiak ke skor C ke balat kreatif agi ari sida ke bulih A nya tadi. Aram kitai meratika sekeda chunto pengamat penerang tu.

Steve Job ke dikumbai raja dunya Apple ke bendar enda mujur peresa semester kesatu di kolej! Iya dikumbai nembiak kusut pendiau lalu enda ngembuan juluk pengidup ti menuku. Iya mega nadai ngembuan pelajar universiti. Indah bisi orang madah iya kala rari ke India ngiga pengelantang spiritual!

Bill Gates, orang kuat ba inovasyen Microsoft kala belajar pasal undang-undang di Universiti Harvard. Sepengudah dua taun, iya enda pas degree iya ketegal selalu enda datai ke sekula. Iya semina ngulang pelajar ungkup peresa maya nyau deka semak peresa aja!

James Cameroon, direktor tebilang ke ngasilka filem Titanic, mega puntan dalam pelajar iya. Sepengudah enda mujur, iya kala bekereja nyadi deriba lori!

Mark Zuckerberg mega nadai ngembuan degree. Iya badu belajar ba Universiti sepengudah iya nengkebang Facebook.

Kelalu mayuh pemikir kreatif ke bukai ke mujur dalam pengidup tang puntan dalam peresa akademik baka Buckminster Fuller, Frank Lloyd Wright, Tom Hanks, Harrison Ford enggau nembiak sekula ke pengabis muntat iya nya Albert Einstein. Einstein tu bebansa Judah kala dikumbai bala pengajar iya orang orang timpang pendiau tauka OKU tachat mental laban tusah bendar belajar bejaku taja pan udah manggai umur semilan taun. Iya siku orang ke enda rindu nurun ke sekula. Pemenchi iya nya ngujungka iya nyadi nembiak ke pengabis manchal di sekula. Ujung-ujung iya lalu dibuai pengajar ari kelas! Einstein kala nguji deka tama nyadi pelajar diploma ba sebuah kolej teknologi tang enda mujur dalam peresa masuk. Iya puntan dalam semua subjek semina Matematik.

Siku agi chunto iya nya Hamka. Iya tu orang kuat pengarap ke tebilang dalam pengawa nulis hal-hal kreatif. Orang kuat pemikir kritis enggau kreatif tu ke bendar nadai ngembuan nama-nama pelajar tauka setipikit akademik. 

Maya aku agi nyadi pengajar suba kala ga aku nanya nama enda resipi resia runding kreatif sida tu ke nadai dikembuan nembiak lati aku?

Ya, sekula tauka universiti semina ngajar pengelandik tang enda mujur nerenak ulah ‘gila’ bepikir kreatif. Einstein dikelala siku orang saintis gila. Indah semua iya ke udah disebut di atas nya mega dikumbai ‘gila’ enti sida nya besekula ba menua kitai ditu.

Kati enti orang OKU baka Stephen Hawking, nembiak ke manchal sekula baka Einstein enggau nembiak ke enda konformis ngagai budaya pengarap ti mainstream  baka Hamka, enggau semua sida ke bukai ba atas nya tadi ada lalu nerima pelajar sida di Malaysia? Katika sida tu deka diberi peluang ngulihka pemujur diri empu?

Ni naka budaya kreatif kitai ditu ulih nyungkit potensi kreatif Hawking, Einstein enggau Hamka enti sida tu rayat Malaysia ke semina belajar ba Malaysia? Aku teingatka nasit P Ramlee lebuh pindah ari Singapore ke Kuala Lumpur. Lagu kepenudi iya Air Mata Di Kuala Lumpur terang bendar ngayanka tikas budaya kitai ke ngelanyaika potensi kreatif individu.  Chukup sinu lebuh ngenangka nasit P Ramlee nya.

Ajar mih nembiak enggau naka pemayuh pengelandik bepikir tang enti budaya tetap kitai iya nya budaya exam oreinted sigi enda ulih nyungkit sereta ngerembaika potensi individu. Tu mih ke ngujungka nembiak ke bulih skor A deka baka burung ke patah sayap mega.

Tu mih ke diperatika aku diatu, iya nya reformasyen struktural Dr Maszlee maya budaya kitai empu ngelanyai pengawa nyelai iya ke tegap deka ngasilka OKU baka Stephen Hawking, nembiak manchal baka Albert Einstein enggau orang ke kuat pengarap ke nadai pengelumau baka Hamka.

Reformis struktural endang nyelai laban sida ngelaban arus pemansang budaya. Gerempung pengajar baru ngeleda  sereta muji pengawa ke dituduhka Dr Maszlee dalam reformasyen struktural pelajar iya. Media mega udah berengkah meretika pengawa aba luar kutak Dr Maszlee ke deka ngemaduka peresa, ngempuruka nembiak ari arus Sains enggau Litericha lalu nambah Humanisation (ngemensiaka) nembiak dalam formula 4M iya.