Kibuhka isu nembiak ke dibuai sekula

TAJA PAN, maya semua orang kisuk merambuka chara dikena negapka sistem pelajar, agi bisi sebengkah pekara ti jarang diperatika iya nya senentang nembiak ke dibuai sekula. Kini enda penunga sida sepengudah sida nadai agi ulih dikumbai nembiak sekula?

Nitihka utai ke suah diperatika kitai, nembiak ke udah dibuai sekula nadai agi penuduk tauka peluang iya pulai ke dunya sekula. Bisi dua kategori nembiak ke dibuai sekula iya nya kesatu sida ke enda pas dalam peresa enggau kedua iya ke bisi penanggul disiplin. Ungkup sida ke enda pas, sida ke bisi ati deka pulai belajar di sekula semina begunaka sida nandu peresa, tang  baka ni enggau nasit nembiak ke dibuai ketegal dadah tauka penyalah kriminal? Nembiak ke dibuai ketegal dadah enggau penyalah kriminal mayuh ke nadai meruan tuju pengidup sepengudah sida nadai agi besekula. Bisi ke milih bekereja lalu bisi mega ke agi marit diri enggau pengawa ke nadai bemoral nya.

Realiti ti ditapi sida kemaya hari tu agi sama baka sida ke ngambi dadah deka pulai ke sekula betemu enggau bala tawing sida. Ari penatai sida nya tau ngujungka bala tawing iya mega diparit enggau ulah ke digaga iya. Indahka bisi ke nyadi orang tukang sadung dadah ngagai nembiak bukai.

Nya alai, enda ngalitka ati enti surat berita Kosmo! apin lama ti udah ngeripotka 1,709 nembiak sekula ditemu positif dadah lebuh ti diperesa Agensi Antidadah Kebangsaan (AADK) kena bulan Januari ngagai bulan Oktober 2018. Tuai Pengarah iya, Datuk Seri Zulkifli Abdullah madahka, peresa nya dipejalaika ba 178 palan ti berisiko tinggi serata menua Malaysia lalu tu mungkur 41,741 iku nembiak sekula. Nyau deka semua nembiak tu diakun amat positif dadah. Sida tu berumur entara 13 ngagai 17 taun. Mayuh ari sida tu positif dadah bansa methaphetamine tauka syabu. Sarawak nya nengeri pengabis tinggi ngerekodka penyalah nguna dadah sereta ditangkanka menua Kedah enggau Kelantan.

Nya kebuah, Presiden Gerempung Apai Indai engga Pengajar Nasional (PIBGN), Datuk Mohamad Ali Hassan madahka, siti malin patut ditempa dikena munaska pengawa ti salah tu. Iya ukai semina dikena mantu nembiak ke udah teberayan tang mega nyaup nyelamat sida nembiak ke agi besekula ari ke diparit enggau penanggul ti baka tu.

Pansik holistik patut diatur enggau lengkas sereta dikemeranka sida. Penanggul disiplin ukai penaggul ti ulih dikena bemain tang iya nempa ulah enggau personaliti siku-siku.