Besedia napi limpah informasyen

RAMBAI JAKU tauka frasa information overload keterubah iya dikena saintis sosial, Profesor Bertam Gross dalam bup iya, The Managing of Organizations maya taun 1964. Bertam parai dalam taun 1997. Iya kala gawa nyadi profesor sains politik di Hunter College. Udah nya information overload dipopularka Alvin Toffler dalam bup iya ke laku amat dijual, iya nya Future Shock (1970).

Taja pia reti information overload dalam konteks bup Bertam enda sebaka enggau reti iya ke dikena maya digital kemaya hari tu. Information overload tauka limpah informasyen kemaya hari tu udah nyadi siti penanggul besai sereta begunaka langkah rapat ngatur, mereti enggau ngembuan disiplin ti tinggi dikena napi fenomena ke datai maya era digital kemaya hari tu.

Tu ke bendar entara virus ti patut diputar ngena pengelandik lebuh kitai nyingkang ngagai era baru globalisasyen. Kebuah pia, globalisasyen nya empu mai reti dunya ti nadai aris entara menua lebuh mensia ba serata dunya berandau enggau pangan diri nengah arus Internet. Tu ke nyadika pun penambah laman sesawang ke nyadi kebuah penerang nya regas amat disadung kin kitu.

Alun penatai penerang tu ditengkebang nyadi sebengkah pengidup sosial ti baru. Dunya nyau baka ke sempit lalu infromasyen tauka penerang betekang baka mua hari ke ngiga mansa iya. Pengawa ke kelalu gagitka teknologi sereta disempulang enggau penemu sosial ti tinggi nya tau nyadi pangkup ngagai kitai semua. Teknologi mega bisi pengurang enti iya enda digaga baka  ‘mensia’ ulih mensia nya empu.

Teknologi ti dikena  ke enda ngira aspek mensia tau bendar muka ruang ngagai informasyen ti enda nemban tauka enda amat tau mega dikumbai penerang selebebu ngapa. Informasyen endang beguna laban ngena informasyen nya mih kitai ulih megai dunya.

Ketegal nya mih dunya nyau majak mit laban teknologi mega nyau majak sophisticated kelebih agi lebuh informasyen nya nyau laju ari peluru leka bangkang, pantas ari upas kesulai tandang; pengelaju enggau penyampat ke enda ulih dirundingka akal mensia sebedau tu. Ambika banding, baka utai ke nyadi ba New York diatu deka datai terus ke jari kitai maya nya mega.

Profesor sosiologi di Universiti Kent, United Kingdom, Frank Furedi nganggap limpah informasyen baka bah ti ulih nenggelamka kitai dalam alun umbak data. Kebuah pia laban limpah informasyen ngenyadi seraka entara informasyen dipereti ti ngasuh kitai bepikir ngambika kitai meretika agi pekara nya.

Ketegal kelalu mayuh informasyen ti datai ngagai kitai nengah pekakas elektronik kelebih agi baka telefon binching tau ngasuh kitai puntan ngatur sereta napis enggau mudah ngujungka kitai diparit pemedis limpah informasyen ke dikumbai Frank Fureli baka bah. Analogi iya mudah, kitai begunaka ai lalu ukai bah.

Enti kitai dipangkup limpah infomasyen dia kitai tau pulai nyadi orang ke nadai utai temu. Kebuah pia, laban kitai enda mujur ngumpul sereta mantis penerang ti patut diguna ke datai ari endur ti nadai autoriti.

Media sosial baka Facebook, Twitter, e-mel enggau Instagram nyadi pelantar  ngundan sereta mai mayuh macham informasyen ngagai kitai. Enti kitai nadai ngembuan disiplin ti kering enggau penemu ti chukup senentang limpah informasyen dia kitai tentu nyadi mansa limpahan informasyen sosial tauka social information overload.

Nitihka siti pansik ke dipejalaika McKinsey Global Institute dalam taun 2017 madahka  28% ari maya bekereja diabiska enggau pengawa meresa e-mel. Nama penyadi enti kitai enda ulih ngatur penerang tu lalu iya nyau majak nyadi senyadi? Enti diperatika ari sukut bukai, enti kitai enda mujur ngatur limpah informasyen tu enggau manah, iya deka meri empas ngagai penyampat enggau penemban kitai ngaga sesebengkah pemutus penemu. Reti nya fenomena baka tu tau ngasuh kitai minah lebuh ngaga pemutus runding laban dirempah penerang sereta balat bepanggai ba informasyen ke mayuh leman.  

Nya alai kita enda ulih enda nyingkang ke mua napi sebarang fenomena limpah informasyen ti baka tu. Keterubah, tapis sereta tentuka penatai informasyen nya. Enti enda berapa tau dilengka pia aja.  

Kedua, sekat informasyen ti tama ke pekakas kitai empu  baka telefon binching. Ketiga, tentuka kitai ke bekuasa ke atas infomasyen nya ukai iya ke megai kitai. Pechaya mih, ba luar din besun-sun manipulator, konspirator ke benung ngiga mansa iya. Nya alai, anang enda besedia napi limpah informasyen.