Kuasa pengguna ulih nekat rega barang ari niki

NYENTUKKA sehari tu, mayuh pengguna kelebih agi sida ke baruh enggau jelan penatai pemisi serebana madahka rega mayuh macham barang ti dikena besehari-sehari majak niki ngujung ngenusahka pengidup sida. Tu nyengkaum barang basah baka ikan, dagin, telu datai ngagai barang ke bukai baka sabun basu enggau ubat ngeli. Rega barang diatu mayuh ke majak niki-seniki. Ba sida ke begaji besai, pekara tu enda tentu diasaika sida tang ba sida ke begaji mit udah tentu ngasaika pemedis genap hari.

Pekara baka tu enda ulih enda ditapi sekeda ari komuniti kitai kemaya hari tu lebuh bala pedagang mupuk meri mayuh macham dalih awakka sida ulih nyual barang enggau rega ti tinggi.

Ba sekeda kes, tanggung pengawa orang tengah seruran bendar dikaul enggau pun kebuah rega barang nya niki kelimpah ari dalih bukai baka kos operasyen tauka kereban mata ke niki ngujungka raban pengeluar enda ulih agi untuk nyual produk sida nitihka rega ti baruh baka ke ngelama tu.

Rindu tauka enda, pengguna diperatika baka ke nadai chara milih kelimpah ari dipejal napi senario nya lau enda ulih enda meli sesebengkah produk tauka barang ke diguna nya taja pan iya dijual enggau rega ti tinggi.

Taja pan baka nya, kitai pengguna ke bendar, agi ulih napi ulah sekeda pedagang ke amu bejualka barang sida enggau rega ti tinggi. Agi mayuh ari kitai ti enda nemu kitai nya mih ngembuan ‘kuasa’ sekurang-kurang iya ulih ‘nentuka’ rega barang ari dijual nitihka rega peneka ati bala pedagang ke amu tu.

Kuasa ti ku aku tu iya nya kuasa pengguna. Enti kitai semua bepekat, kitai ulih ‘ngajar’ raban pedagang ke nadai betanggungjawab tu ari ke nyual barang sida enggau rega ti enda patut. Ambika banding enti sesebengkah rega barang nya dijual enggau rega ti enda patut, semua pengguna mesti bepakat enda meli nya sereta boikot barang nya.

Pechaya mih, enti tu ulih dikerejaka kitai, iya ke bendar iya tentu ulih ‘ngajar’ raban pedagang nya. Tu ngujungka kitai ulih nekat rega barang nya ari majak niki.

Tang utai ke nyadika penanggul nya, enda mayuh ari kitai ke sanggup bepekat sereta berakup nentuka pekara tu nyadi, kelebih agi sida ke nadai suntuk duit. Sida tu  tetap deka meli sesebengkah barang tauka produk nya taja pan rega iya mar.

Pengawa kitai ke tetap meli barang ke berega mar nya tau disemaka baka kitai ‘ngemendarka’ raban pedagang tadi niki rega barang sida. Nya kebuah, kitai ke nyadi pengguna mesti pandai ngena kuasa ke dikemisika kitai enggau chara boikot barang-barang tauka produk ti dijual sida enggau rega ke tinggi.

Enti nya ulih dikerejaka kita, reti nya rega barang ti dikena mensia mayuh besehari-sehari di baruh kuasa kitai. Enggau chara tu kitai ulih ngetanka rega barang nya ari majak niki. Kelimpah ari ngetanka rega barang, iya mega ulih  mantu pengguna ari diakal pedagang ke nadai betanggungjawab.

Pengawa tu patut dipejalaika gerempung-gerempung pengguna ke endang udah sedia bisi kemaya hari tu. Gerempung tu ulih nyadung semua penerang senentang barang ti patut diboikot. Tu ulih ditabur nengah arus media-media sosial ngambika siti pengawa besai ari bala pengguna ulih selampur dipejalai.

Sanggupka kitai semua ngereja pekara tu? Enti kitai amat-amat deka nyeliahka diri ari raban pedagang ke semampai nikika rega barang, dia semua pengguna mesti berakup sereta bepakat dalam hal tu. Nya aja kuasa ke dikemisi bala pengguna. Nya alai, guna mih kuasa pengguna nya enggau manah.