Awak nulis, enti deka alah enda

NULIS endang dipeda baka pengawa ke nyamai sereta pengawa ti jelan dikereja. Bisi pekara tauka hal ti deka dikenataika, tinggal ditulis udah nya lalu dipublishka. Taja pia, enda mayuh orang ke bebendar amat deka nulis, lalu mimit agi orang ke nulis enggau konsisten. Indah aku ke suah nulis tu pan bisi maya berasai lembau deka nulis. Ambika banding, blog antologi jerpan aku kepenudi aku nulis nya kena 26hb November 2018 lalu karang rama tauka artikel aku ba blog Tempalai Kenang kepenudi nya ditulis sereta dikeluarka aku kena 11 April 2019. Tu ngayanka pengawa meransang diri empu ngambika majak sereta tetap nulis ukai pekara ti mudah.

Bepelasarka perati sereta randau aku enggau bala tawing ke sama ngembuan pengerindu nulis, kami bela sepenemu madahka kebuah orang nyau enda besemangat lalu enda konsisten nulis ketegal sida enda nemu tuju sida nulis, tauka enti sida nemu mayuh mega entara sida semina ngembuan motivasyen betimpuh pandak.

Sida ke enda nemu tuju nulis sigi mimit, laban orang ke nulis tentu ngembuan tuju ti nyemetak. Bepelasarka perati aku ba Internet baka baka ba blog, tuju ti pengabis mayuh nya tuju ti tukuh iya betimpuh pandak, ambika banding baka deka ngulihka duit kelebih agi baka sida ke nulis bup teks enggau orang ke masuk pekit nulis esei Kenegaraan  tauka ketegal deka ngulihka nama ngambika tebilang. Tu mih motif-motif ke dikumbai aku nulis enda lama aja laban deka nyapai juluk ati enggau jampat. Nya kebuah, mayuh penulis ke baru berengkah nulis berasai asa lebuh udah nulis bebulan-bulan lama lalu enda ga bulih duit tauka populariti ke dikeinginka sida.

Ba penemu aku enggau bala tawing ke konsisten nulis ngumbai orang baka tu nulis ukai ari ati, ngujungka sida enda rinduka  pengawa nulis nya empu. Bah baka ni kitai deka meransang diri empu nulis awakka tan lama? Pelaba aku siti chara nya nerenak peransang betimpuh panjai, iya nya motivasyen ti ngasuh kitai majak nulis taja pan kitai enda bulih utai.

Motivasyen betimpuh panjai tu entara kebuah nya laban ke deka beduaka penemu. Tu mih pengawa ti enda nemu abis taja pan kitai udah nadai agi di dunya tu. Kitai ngelantingka penemu kitai nya ngagai uchu ambu, sida ke serak dudi ngambika sida ulih nguna awak enggau manah. Penulis mega tentu deka ngasuh bansa iya ngeleda sereta pandai. Ketegal beberapa pekara tu ngujungka nulis nya empu ulih meri kitai berasai rindu ati sereta deka meransang kitai majak menulis.

Ba penemu aku mega, nulis ukai semina pekara passion tang iya mungkur tanggung pengawa semua orang ke pandai sereta tepelajar ngenjuk penemu sida nengah  rambai jaku ti manah enda ngira kitai nya orang dagang, tuai, kepala sesebengkah opis, orang profesional, lalu kelebih agi enti kitai nya bekereja nyadi pengajar. Nulis ukai nya semina bekaul enggau pekara ‘berat’ aja, tang kitai ke penulis mega ulih ngenataika nilai-nilai positif ti ulih diterenakka kitai besehari-sehari nuju orang ke macha.

Anang enda arapka diri empu. Pandak tauka mimit baka ni pan utai ke dituliska kitai, enti iya endang ditulis ari ati ti pengabis dalam laban deka nyadung pemanah, tentu pekara ti ditulis nya  beguna ba orang mayuh. Mensia ke badas nya mensia ke mai pemanah ngagai orang bukai.