Ubah mih chara bekimpin

Sehari tu 28 April iya nya genap lapan hari timpuh maya bekimpin ke parti politik beserimbai enggau pengawa bepilih besai ke-13. Tu reti iya nya nyau tinggal tujuh hari da agi alai semua pengari politik ke betanding nya ulih bekimpin dikena ngulihka sukung pengundi.Tu mega mai reti dalam timpuh tujuh hari kepenudi tu, kitai deka meratika kimpin ke balat agi agresif ari kedua-dua piak baik nya parti perintah tauka parti penyakal.

Mayuh macham label tauka tanda udah diberi ngagai PRU 13 tu. Bisi nya madahka PRU 13 tu indu ke semua pengawa bepilih besai. Bisi mega sekeda nya ngembuan pengarap PRU 13 tu deka nentuka mati idup parti perintah enggau karier Tuai Rama Parti Keadilan Rakyat, iya nya Datuk Seri Anwar Ibrahim. Bisi mega jaku ke tepambur ari mulut Penyanding Penemu DAP, Lim Kit Siang ke madahka PRU tu ke pengabis kamah dalam sejarah PRU menua kenyau ari menua tu merdeka.

Enti diperatika sepemanjai minggu keterubah tu enda tentu mayuh utai berubah iya nya ari chara tuai-tuai kedua-dua parti tu bekimpin. Sama-sama agi ngena strategi bekimpin sereta langkah rapat ti sama enggau taun-taun ke udah. Ba tanah sida parti perintah, strategi ke dikena nya nyengkaum pengawa ke meri imej ke jai baka madahka sida penyakal tu enda berakup enggau pangan diri, enda ngembuan rekod perintah ti lati sereta mega seruran deka mandangka diri gauk sereta ganas. Ba tanah sida penyakal, sida balat agi ngambarka parti perintah nya raban ke makai suap sereta sumbung, ngemeranka kronisme enggau rasis.

Pekara ti dikenataika dua-dua piak tu mandangka ngagai rayat budaya bepolitik ke enda manah. Kedua-dua raban tu ngarapka taktik ngemaruhka imej enggau nama tuai tauka individu ulih meri empas ke maksimum maya hari ngundi ila. Taja pia kitai patut mega ingat, ukai semua pengari ke betanding nya ngembuan ulah ti baka tu. Tang anang enda ingat, ulah sekeda pengari tu udah chukup mandangka pengawa ke enda tentu manah.

Pekara ke nyadika tanda tanya nya, lapa enda pengari ke betanding tu ngubah chara bekimpin sereta bekelikuh senentang polisi tauka danji ke deka dikeamatka sida ngagai pengundi? Nama nya pengari tu lalu empai besedia pia? Tu mih ti deka didinga sereta dianti raban pengundi. Sida deka ninga penerang. Rayat minta dijamin lalu minta dinah enggau manah enti dekaka undi sida.

Kelimpah ari nya, sida mega patut bisi chara ti konkrit dikena mutarka penanggul ke ditapi raban rayat ba sesebengkah genturung pendiau. Enti tak semina nabur semaya sereta nadai madahka langkah rapat dikena mutarka penanggul nadai mai nama-nama reti.

Lebuh ke gagit deka ngulih sukung pengundi, sida patut bendar nyaga ulah sereta bebasa ke bala pengundi. Anang mih ketegal gagit deka ngulihka undi dia siku-siku pengari nya sanggup ngadai maruah sereta ngereja pengawa ba luar ari bidang kuasa iya ketegal deka ngulihka undi nya.

Enti dibandingka enggau PRU ke udah, PRU 13 sekali tu deka ditentuka ari pengulih parti-parti politik nyual idea sida nengah chara kreatif sereta inovatif ngagai raban pengundi. Reti nya sida ke deka mujur sereta menang dalam pengawa bepilih tu ila iya sida ke ulih ngenataika idea ke manah sereta ulih besemekih enggau sida ke dilaban sida.

Pengari ti betanding patut mereti sereta nemu sida ke datai ke pengawa bejaku ba mua mayuh enggau kimpin nya ukai reti ulih dikira nyukung sida maya hari ngundi ila. Ukai semina enda nyukung tang bisi nya endang datai ngapa datai saja kia. Nya alai, manah sida ke pengari ti betanding tu ngena mayuh bengkah strategi dikena sida ngumpan sereta ngumbuk pengundi milih sida.

Tikas runding raban pengundi kediatu udah jauh bendar berubah. Trend ti baka tu deka terus mansang berubah jemah ila. Nya alai, bepanggai ba pengari ke betanding mih milih chara ti manah baik nya ngena mayuh jalai bekimpin lalu beterus-terang tauka majak dipanjuk enggau chara politik lama ti nadai pengujung. Sida patut nemu, raban pengundi kemaya hari tu kelebih agi raban nembiak rebak baru tauka Gen-Y enda mudah dibuti sengapa. Enggau ubah pemansang dalam teknologi pemadah ke nadai besekat tu, raban pengundi PRU patut ukai agi bemimpi tang bediri ba bumi nyata sereta besedia deka berubah dalam konteks tu. Enti enda pia sida nyangka enda dipilih maya pengawa hari ngundi 5 Mei tu ila.

Anang mih nyadi pengari ke semina baka belah batu bedilang, charik daun pisang. Pemintar, pengering enggau pemandai mesti diansing enti pengari nya deka minta dipilih rayat laban kenu ke jaku sempama tuai sebelansai pan batu chanai enti enda dipumai nadai mih bulih padi; segantang pan batu lua kenyalang enti enda ditandang nyerang, enda mih tetumbangka tiang jangka lelabi.

(Tu semina penemu dua puluh sen penulis) 

Nyunting ngena runding

Landik Milih

Siti ari chara dikena mantu raban pengundi milih pengari dalam pengawa bepilih nya ngena chara sistem 4 C ti ulih dikena meresa pengeregas pengari ke deka dipilih.

Sistem 4C tu nadai nitih sebarang personaliti, parti tauka ni-ni raban pengarap.

Tang iya ngemeratka empat tukuh ti engekeman dikena belematika pemanah siku-siku pengari. Empat tukuh tu diambi ari leka jaku English iya nya:

 

CHARACTER – kati sida bisi ngembuan integriti?
COMPETENCE – kati sida iya pandai sereta ulih ngereja pengawa?
CONNECTIONS – enggau sapa sida tu bekaul?
CONTENT – perambu polisi sida.

Character nentuka orang ke deka dipilih. Orang ke ngembuan ulah ke lemi deka meri peluang ngagai orang ke kuat. Orang ke lurus bisi intergriti lalu orang ke enda nya mudah agi deka ngenchuri ari perintah. Orang ke tegap karekter deka mai menua nuju pemujur tang orang ke lemi deka ngaga pemutus penemu ti palui, beguai ngaga pemutus menua ke tau ngujungka menua rusak. Undi  milih pengari ke ngembuan ulah ke manah sereta orang ke ngembuan  prinsip ti tegap ke udah tan laban penguji.

Competence nentuka baka ni tuai tauka pengari nya mutar pekara ti kompleks – ambika banding baka ekonomi, adat, teknologi enggau ti bukai. Dalam dunya ke jampat berubah tu tuai ke dipilih nya mesti orang ke seruran besedia sereta ulih ngaga pemutus penemu enggau lengkas. Ulah ke lumbu tentu ulih ngenataika pemutus penemu ti manah. Tuai tauka pengari ke manah nemu enggau lenak isu ke nyadi. Orang politik ke pandai ulih ngaga analisis semua penerang ti relevan. Pekara tu begunaka orang ke pandai sereta ulih mekuhka pengawa ti diberi enggau manah. Nya alai peresa orang ke deka dipilih nya kala mangku pengawa ti tinggi sereta udah ngerejaka pengawa iya enggau lati. Undi pengari ke competence. Pilih pengari ke pandai, bisi pengulih ngereja pengawa sereta pintar. 

Connections nentuka sapa ke bisi kuasa atas pengari nya. Ari ke meratika sapa ke nyukung pengari nya lalu sapa ke enggau iya gawa ulih meri idea ke manah ngagai kitai baka ni sida tu deka gawa ila. Kati pengari tu dikelingi orang ke manah tauka orang ke jai ti udah kala ngereja penyalah? Kati iya tu agi bisi gawa ke firma dagang tauka orang ke kaya? Kati iya dikelingi orang ke pintar tauka enda?  Undi  mih pengari ke bisi kaul ke manah (candidates who have good connections), iya ke pandai sereta bisi sukung ke tegap ari belakang (beneficial associates).

Content  nentuka tuju polisi sida. Tu madahka perambu ke deka dipejalaika sida enti sida menang ila. Semua tuai tauka pengari enda milih nya manah tauka jai patut bisi perambu. Tang suah agi perambu sida nya enda praktikal, ngemeratka diri empu tauka tambab. Tuai ke manah ngaga perambu ti manah lalu sida bediri bepelasarka perambu tu. Pengari tu bisi visyen ti tampak sereta positif ke menua iya. Polisi ti diperambu nya manah sereta praktikal. Pemilih patut ulih meratika polisi sida. Pengari patut ulih ngerintaika ripih isi polisi sida sebedau pengawa bepilih. Undi  ke content ti manah. Pilih pengari ke ngembuan polisi ti terang sereta manah ti diekenataika sebedau pengawa bepilih.

Pengawa ti enda digaga maya ngundi!

·        Anang nyual undi nuan. Laban enti pia nuan nya ungkus nyual pengulih jemah ila ngagai krook.

·        Anang semina ngundi ketegal pemanah tauka populariti. Peratika mega ulah pengari.

·        Anang ngundi orang ke bisi pengulih ti nadai engkeman enggau pengawa politik ambika banding nemu bebukut. Peresa enti sida tu tuai ke ulih dikearap?

·        Anang ngundi ketegal iya serumah tauka semenua enggau nuan. Kati iya patut dipilih nuan tauka enda.

·        Anang ngundi orang nya ketegal sama pengarap enggau nuan. Peratika iya tu ulih nyadi pengulu, rentang sereta ulih ngereja pengawa.

·        Anang ngundi orang ketegal iya bisi kuasa sereta ari raban elit. Peratika iya nya orang ke lurus sereta ngembuan polisi ti manah.

·        Anang ngundi orang ke besemaya bisi polisi jemah ila. Enti sida nadai perambu polisi sida enda patut bediri dalam pengawa bepilih. Laban enti sida menang nya mih munyi ke sempama maya deka bebini baru betutus, tutus gerai bini parai.

·        Anang ngundi orang ke udah ditemu kitai kala makai suap tauka orang ke bisi kaul enggau raban ke kala makai suap taja pan iya madahka diri iya empu enda mudah tekuing ruing enggau pengawa raban iya.

(Dibali  ari http://www.globalchristians.org/vote/)

MANIFESTO RAYAT

PAKATAN PENGARAP RAYAT

Pengelantang Rayat

• Rega minyak diturunka
• Bayar lektrik murah agi
• Bayar ai murah agi
• Ngapuska tol
• Ngapuska monopoli
• Nurunka rega kerita
• 150,000 buah rumah ti nyamai endur diau ulih dibeli
• Opis Rumah Bansa: puku dagang RM5 billion diperanakka ba taun keterubah lalu RM2 billion setaun udah nya dikena ngaga rumah nyamai endur diau ti ulih di beli
• Pelajar ti pechuma ke semua, ngapuska PTPTN
• Ngapuska AES, Nginsil saman AES
• Pengelurus ke raban FELDA
• Bayar wad pechuma (kelas 2 enggau 3) ke semua rayat di semua hospital perintah
• Bantu Opis Pengelantang Raban Bansa ditikika ngagai RM550 sebulan

Rayat Diri Menyadi

• Belematika penuduk pengarap Islam nyadika pengarap menua lalu meri jamin kuasa mili pengarap baka ti bisi dalam Adat Bansa
• Ngangkatka gaya idup nyadika teras manah idup dalam raban bansa
• Wang Turu ke Raban Orang Indu Malaysia: perintah deka nyimpan RM50 sebulan ke tiap iku bini orang ti patut diberi; lalu laki sida dipinta nyimpan entara RM100 sebulan, nitihka penatai pemisi diri
• Skim Bonus Orang Tuai (60 taun ke atas): Bonus RM1,000 setaun
• Jaku Bansa dikemesaika, kuasa jaku diri empu dijamin lalu jaku English diangkatka
• Bantu tambah RM300 ke tiap iku nembiak sekula ninting taun ke 1,854 buah Sekula Pengarap, SJKC, SJKT, sekula privat China, Tamil, Iban, Kadazan enggau sekula mission
• Ngelala Sijil Peresa Beturu Serakup Sekondari China (UEC)
• Bebasaka penuduk Sabah enggau Sarawak dalam Perintah Besai – ngereja pengawa begempung, bepengarika chara lurus, beperanak menua, ngelala kuasa atas Tanah Adat, penyikar Sabah enggau Sarawak, pengelurus dalam isu minyak, pemansang ti sebaka
• Program ti segera ke Sabah enggau Sarawak – ngapuska atur sabotaj, peransang dagang nambahka pemayuh tubuh pengereja pengawa, kompeni minyak ke Sabah enggau Sarawak, ngapuska projek ngaga tekat ai ti ngerusak rampa menua ti lalu muru rayat pansut ari menua asal sida empu
• Kami deka nikika bayar royalti minyak ngagai semua nengeri ti ngeluarka minyak ari 5% ngagai 20%
• Kuasa atas tanah enggau pengelantang Orang Asal dikemataka

Ekonomi Rayat

• 1 juta peluang kereja ti baru ke rayat enggau chara ngurangka atur ngambi raban pengereja pengawa ari menua bukai
• Gaji pengabis mit RM1,100 sebulan; wang turu RM2 billion ngemudahka pejalai atur gaji pemadu mit
• Skim Pematih Rayat; dikena matih 1 juta nembiak ti udah badu besekula ti enda nampung pelajar sida ngagai ikas ti tinggi agi dalam pengawa teknikal, begulaika peluang bekereja tetap enggau meri sijil pengelandik
• 5 buah universiti teknikal enggau 25 sekula vokasional ti baru deka didirika
• Reformasi pelajar dikena meransang ekonomi menua
• Ngemeranka chara bekunsi pemintar gerempung pengereja pengawa, pengaji enggau perintah
• IKS enggau inovasi pugu ekonomi menua – wang turu inovasyen RM500 juta, ngubah peransang chukai
• Ngatur baru chukai ke bala rayat – chukai pemadu tinggi 26% ke chukai penatai pemisi ti tau dichabut lebih ari RM400,000 ke atas, enti dibanding enggau RM250,000 ke diatu
• Ekonomi meruan – ngetuka operasyen palan Lynas, mansik baru atur pejalai RAPID, reformasi semua undang-undang ti bisi kaul enggau pengawa ngulihka kayu lalu ngemataka pengawa ngulihka kayu batang
• Nyaga ekonomi enggau pengelantang raban soldadu – RM500 juta Wang Turu Orang DagangMit Raban Soldadu, duit simpan turu ari perintah ke dalam LTAT ari 15% ngagai 20% (diputarka ngatika diri wang turu pencen). Dividen ke raban soldadu iya nya elaun RM2,000 setaun ke bala soldadu ti udah badu kereja ti enda bepinchin
• Bedayaka dagang pejalai teksi enggau chara meri pemendar terus ngagai bala deriba teksi empu
• Beranakka puku dalam pengawa R&D ngambika manggai 5%KDNK
• Atur pengangkut mensia mayuh nyadika nyawa ekonomi menua – atur pengangkut mensia mayuh pechuma ke raban orang ti enda sebaka penimpang ba pendiau, atur tisegempung ba pejalai bas enggau MRT di Lembah Klang, RM2 billion dikena nambah penyampau bas enggau agih belanja sekali lipat, singkang nuju pengawa ngaga sistem kerita api laju entara nengeri ti keterubah di Asia Tenggara
• Mechahkamonopoli dikena ngeregaska semekih – Komisyen Dikena Ngelaban Monopoli, Komisyen Kontrak Menua dikena meresa sempekat awam baka IPP enggau konsesyen ti berat sepiak, mechah monopoli telekomunikasyen, pemakai, ubat enggau utai bukai, ngapuska 1 MDB, ngatur tender tebuka, ngapuska tanggam perintah dalam GLC nengah atur meli pengurusan (MDB) dikena ngasilka mayuh agi orang dagang

Perintah Rayat

• Reformasi institut pengarap Islam enggau atur jalai bepengarap
• Pakej atur mayar gaji enggau servis dalam kereja perintah
• Atur bepilih besai ti beresi, lurus sereta tampak
• Reformasi institut akim, Bilik Lawyer Bansa, SPRM enggau PDRM
• Reformasi parlimen
• Media ti ngatika diri lalu mulaika pengarap ngagai raban media
• Ngemunaska AUKU enggau nyamin pengawa akademik ti ngati kediri
• Ngapuska semua undang-undang ti ngelaban rayat
• Bejalaika Polisi Nagang Penyalah Makai Suap Menua (DEBARAN) – ngubah opis agensi pemunas penyalah makai suap, ngubah perening dikena mansik kes penyalah beprofil tinggi sereta bisi ngeruga pengelantang bansa, neritka undang-undang penyalah makai suap

Manifesto Barisan Nasional

Tu tiga ari 17 pekara dalam manifesti Barisan Nasional. Arapka kitai sama-sama beratika semaya sida ngagai kitai rayat Malaysia.

Manifesto Barisan Nasional 1 : Kos Ngidupka diri

·        BR1M ditiki ke RM1,200 sepintu bilik; RM600 ke orang bujang.

·        Baucar Buku 1Malaysia ditiki datai ngagai RM300; Bantu Sekula ditiki ke RM150.

·        Rega kerita deka diturunka entara 20 ngagai 30 peratus berenggat-renggat serata meratika baru Polisi Automotif Nasional.

·        Kedai Rakyat 1Malaysia deka dikemayuhka agi.

·        Klinik 1Malaysia deka dibuka ba genturung pendiau ke mayuh orang.

·        Pusat Nyaga Ninting Hari 1Malaysia deka ditambah ungkup apai indai ke bekereja.

·        Nurunka yuran jalur lebar sekurang-kurang iya 20% enggau jamin bandwidth internet

·        Polisi 1Menua 1Rega bagi barang ke diguna ninting hari.

Manifesto Barisan Nasional 2 : Pengelikun Rama

·        4,000 iku polis deka ditambah ninting taun.

·        5,000 kereban pengangkut tambah dikena Unit Penginau Bemotosikal PDRM.

·        Raban Soldadu deka  ditingkat pengulih ngambika ulih napi pengachau luar.

·        Suruhanjaya Polis akan diperkuatkan.

·        Sistem 6P deka dikena napi penatai orang ke masuk enda beradat.

·        Program SafeCam akan diwujudkan.

·        50,000 raban Sukarelawan Polis Simpan deka ditambah dikena nyaup PDRM.

Manifesto Barisan Nasional 3 : Ba bidang pelajar

·        Mai Malaysia ke tikas “kategori ketiga atas” dalam sistem pelajar ke pengabis manah ba dunya.

·        Nyeruri guna jaku Malaysia enggau English ba nembiak sekula; ngaga jaku English nya mata pelajar ti mesti pas ba tikas SPM di semua sekula.

·        Neruska agih khas ke semua bansas sekula nyengkaum Sekolah Kebangsaan, Sekolah Jenis Kebangsaan Cina, Sekolah Jenis Kebangsaan Tamil, Sekolah Agama Bantuan Kerajaan, Maktab Rendah Sains MARA, Sekolah Berasrama Penuh enggau sekula misyen.

·        Ngaturbaru institut-institut pematih pengajar sereta ngangkatka syarat ngambil pengajar pelatih.

·        Ngagihka RM100,000 setaun ke sekula kebisi nyediaka kelas pelajar khas.

·        Ngubah sekolah vokasional nyadi kolej lalu nambah 20% penyampau nembiak masuk kia.

·        420,000 pengajar deka ditikika pangkat enggau naka pengelengkas bepelasarka prestasi.

·        Nyediakan jalur lebar WiFi nengah chara enda bebayar sereta dijamin ba semua kampus pelajar tinggi perintah.