Siruka Main Asal Diri

Raban nembiak rebak baru patut diperansang belajarka main asal Iban ngambika ulih ditampung sereta bisi dipeda rebak dudi. Bala nembiak Iban patut siruka main asal diri baka belajarka nebah gendang pampat, bepantun, beramban enggau mayuh agi ke bukai ngambika iya enda retai di panas, enda sebah di ujan ketegal dilamun ubah pemansang.

Sebengkah main asal Iban iya nya gendang pampat patut dipelajarka sereta ditampung rebak baru ngambika iya enda punas. Nembiak rebak baru kelebih agi ke diau di rumah panjai enda patut malu belajarka main asal tu laban sida nya mih dikeandal nurunka main asal tu ngagai rebak dudi.

Enti sida ke biak enda nemu sapa agi dikarapka ulih ngetanka main asal tu laban diatu semina orang tuai aja agi nemu pasal main asal tu lalu patut dipeturun ngagai nembiak rebak baru.

Berebak enggau nya mega, raban bansa Iban patut ngelala bida adat enggau pengarap. Pengarap nadai nagang raban bansa Iban majakka main asal aki ini taja pan udah megai pengarap Kristian.Taja bansa Iban udah mayuh megai pengarap Kristian, main asal bansa diri empu endang patut dijaga ngambika bisi dipeda nembiak rebak dudi.

Bejalai Betungkatka Adat

Bejalai mindah ari alai siti ngagai alai ti bukai; bedarat, mindah ngagai menua bukai ngiga pengawa dikena ngulihka reta tengkira; pegi; belelang. Belelang datai ari urat jaku lelang. Reti lelang nya pegi ngampar lama ninggalka menua diri enggau nadai meruan tuju. Pegi – bejalai keluar ari menua diri begigaka utai ti dijuluk ati; mindah ngagai menua orang laban bisi utai berat dipeguna deka digiga baka sampi tu:

Niang Minggat apai Runai kami ga ngimbai,

Alai tembai ke tebantai nyadi tuai dipeguna tuan,

Tang jawang iya enda ngasika perarang ajar tuai,

Enggai enda bara ingga mejuh jauh pejalai,

Pegi ke nengeri Pulau Panai,

Ngiga rangki besai ke simpai ibang lengan,

Nya kebuah iya bekata laya jung enda pulai.

Parai di ujung Tanjung Binjai seberai Nanga San.

(Serebareti Jaku Iban)

Uji peratika jaku Peter Kedit senentang kebuah bala Iban bejalai.

An important indication of the value place on mobility in the Iban community is the custom of bejalai. The Iban custom of bejalai encourages young men to leave their longhouse and venture out into the world to seek wealth, material goods and social prestige.  In the old days, bejalai which involved warring expeditions or migration to another area was common, due to the necessities of shifting cultivation In the late, 1900s, many bejalai missions involved collecting jungle products in exchange for priced antique Chinese jars.  These voyages are "omewhat in the spirit of the medieval European quest seeking old Chinese jars, sometimes, imbued with magical powers, instead of the holy grail or fragments of the true cross."' (Peter Kedit IBAN OF SARAWAK: A Southeast Asian Austronesian People.27 June 1999)

Enti dikalihka baru jaku di atas nya kurang lebih munyi tu. Indikator ti pengabis beguna nentuka mobiliti tauka pemindah komuniti Iban nya bepun ari adat asal ti dikumbai bejalai. Adat bejalai bansa Iban meransang orang bujang ninggalka rumah panjai sida lalu bejalai ke dunya luar ari menua sida begigaka reta tengkira, pengaya, pengeraja sereta engga prestij ari sukut sosial. Menya, aktiviti bejalai nyengkaum pengawa ngayau, pindah ke menua baru ketegal deka bumai. Dalam taun 1900, aktiviti bejalai tu lebih ngagai pengawa begigaka asil kampung laban deka ditukar enggau tajau china. 

LEBUH ti bejalai ba menua orang, enti dulu kelia tau mega dikumbai belelang laban lebuh taun 1960-an tauka sebedau nya, enti bala Iban bejalai ke menua bukai selalu iya dikumbai nurun belelang laban lama amat deka mulaika diri empu. Mayuh nya terus belelang enda tepulaika diri ngagai menua asal, bebini tauka belaki ba menua orang.  Pekara baka tu nyadi nyangka laban dulu kelia ukai baka ke diatu. Kereban pengangkut agi kurang lalu ditambah mega enggau jalai ti enda datai ba kaki tangga baka kediatu. Kelimpah ari, jeman kelia nadai bekenaka telefon. Reti nya nadai rengka rama ke besangkaut paut enggau teknologi, penerang enggau komunikesyen (ICT), ke ulih dikena ba ujung jari, ulih kena begigaka pangan diri sereta ulih datai ba sebengkah-sebengkah menua ke dituju enggau lengkas sereta jampat.

Lebuh bala Iban nurun bejalai tauka belelang, jaku ajar sereta iya ke selalu diberi sida ke tuai nyadika ‘bekal’ maya ba menua orang, begulai enggau orang bukai iya nya rambai jaku ti munyi tu; ‘Bejalai betungkatka adat, tinduk bepanggalka pengingat’. Reti rambai jaku tu iya nya chara kitai tau mai diri lebuh ba menua orang, begulai enggau orang ngambika enda bulih penusah tauka charut enggau orang bukai. 

Leka jaku nya mega dikena nyadika malin ngambika kitai semampai ngingatka diri empu awakka senang ngidupka diri begulai enggau orang bukai. Adat sereta basa nya beguna kelebih agi lebuh kitai begulai enggau orang ke bepangkat, tang lebuh maya begulai enggau bala kaban enggau ‘nembiak redak’ adat sereta basa mega beguna bendar.

Nya meh kebuah orang tuai jeman kelia menya nengkebang leka jaku tauka sempama nya, ngambika nyadika chuan sereta teladan, kelebih agi dituju ngagai sida ke rebak baru. Taja pan baka nya bisi mega maya utai belebas, lebih agi jeman moden kemaya hari diatu. Pekara tu nyadi, kelebih agi senentang adat tauka chara pengidup raban bansa Iban ke diau di rumah panjai dulu menya. Mayuh aktiviti ba rumah panjai tauka menua nya enda tentu engkeman enti terus dikemeranka tauka dikena lebuh ti diau di nengeri. Mayuh mega begunaka Iban empu meratika orang bukai, nitihka singkang orang bukai dalam mayuh bengkah pengawa.

Sebengkah agi adat sereta basa ke selalu disebut orang ke tuai di rumah panjai, “semampai ngemaruhka diri, enti begulai enggau orang”. “Anang rigang-rigang, anang ngeringka diri”. Nya jaku ke selalu didinga. Lebuh diperatika baru mayuh nya amat sereta endang tau nyadika lalau sereta tenggau lebuh begulai enggau orang bukai. 

Taja pia enti diperunding enggau dalam, enda semua pekara nya tau kelalu nyadika lalau, laban enti baka leka jaku “semampai ngemaruhka diri”, nya nyadika lalau iya tau bendar nagang raban bansa Iban ari ti ngemansangka diri. Kemaya hari tu, bansa Iban patut sama besemekih enggau orang bansa bukai. Sida enda tentu ulih kelalu ngemaruhka diri, bisi orang nyebut jelan iya, nya baru enda tinggal ari orang.

Sepekara agi nya anang kelalu kena palit leka jaku “awakka orang dulu”  tauka ngelakka orang dulu. Tu tau ngujungka raban bansa Iban terus tinggal, enda tegagaika orang ke sigi udah lama dulu bekejang ari mayuh sukut bidang pengawa. 

Ngagai kita ke macha kenang ngarapka enda ensiban ati. Enti asai iya penemu ditu enda tentu engkeman, ambi aja pekara tu semina leka jaku maya berandau kediri, berandau nengali. Kelimpah ari nya iya tau mega nyadika pun randau dikena kitai sama ngemansangka bansa Dayak kelebih agi bansa Iban awakka ulih besemekih enggau bansa bukai, enda tinggal ngasaika pemansang, nyulut dalam aspek pelajar ngambika tau ngemansangka diri empu enggau bansa kitai ke dudi hari ila.

Ngerembaika penemu pasal sabak sebengkah adat enggau jalai pengidup Iban

Sabak nya pengawa ti ngiring pemati nyentuk ngagai sangkai di rumah panjai sebayan. Sabak tu dikenataika orang ke tebangkar dalam leka sebak lalu iya dikumbai tukang sabak. Leka sabak tauka nyabak ke orang mati tu endang pengawa dikena meri basa sereta penyinu enggau penusah ati ngagai orang ke udah mati. 

Sabak Kenang – Journey to the Land of the Dead, is about the first category of Iban ritual dirges. It highlights the significance of Iban’s dead rituals and the extra-ordinary expert knowledge of Tukang Sabak reciting her chant using poetic language of the Sabak which are very moving and emotionally powerful of all forms of Iban ritual poetry. – Dr. Robert Menua

Nitihka adat asal raban bansa Iban bisi mayuh bansa sabak. Tu mega bebida nama ari pelilih menua siti ngagai menua siti. Sabak diserenggutka sebedau bangkai dikubur, iyanya sebedau makai pana tauka sebulan udah niang ninggal maya udah tembu timpuh ngulit. Sabak Bebuah dipejalaika sebedau bangkai disimpan ke dalam larung lalu sepengudah pulai ari pendam, Tukang Sabang nya nyabak baru lalu sabak tu dikumbai Sabak Pana ti dikena nganjung asi ke sebayan.

Sabak bepanggai bendar ba tuju enggau konteks pengawa nyabak taja batang pengawa nya endang mantaika penyinu ati nuju orang ke udah nadai. Munyi ke udah disebut nama sabak mega bebida nitihka tuju, konteks enggau menua ti ngemeranka adat tu. Ambika chunto Sabak Sedan tauka Sabak Ngerais tauka Sabak Rempah ba pelilih menua Rajang tauka Sabak Sebana  ba pelilih menua Saribas disempulangka enggau sabak ke bendar, iya nya duie-duie enggau berempah. Sabak Tina  ke dikemeranka ba pelilih menua Rajang nya diserenggutka udah tembu timpuh ngulit. Tuju tu dikena madahka niang nya endang amat udah nadai. Tina nya chelum ti dipinka ba baju tauka ditanchangka ba punggung tanda orang ngulit. Sabak Kenang  ba pelilih menua Sri Aman tu diserenggutka maya Gawai Antu. Tuju sabak tu dikena nusuika pengidup orang ti udah nadai iya nya dikena masa iya. 

Nitihka atur tu tukang sabak deka berayun ba Wa (Ayun), lalu bisi orang semak wa dia nulung iya ngingatka pemanah enggau pengawa niang ngambika ulih dilaguka tukang Sabak.

Empat pengawa ti ditempuh rambau pejalai nya ke bepun ari nengah titi rawan, rembus di pintu tanah, mudik Batang Mandai enggau pengawa ngetaska ranyai. Tukang sabak ngelaguka timang dalam kes tu iya dikumbai Sabak Kenang dikena ngiring pejalai pemati sepengelama semilan nyentuk ke sepuluh jam, berengkah ari tumu lemai nyentuk ke tumu pagi hari siti.

Adat nyabak ke nyadi sebengkah ari adat enggau jalai pengidup Iban tu udah diangkatka sereta dikerembai ngagai tikas antarabansa. Nya alai, kena 13 nyentuk 25 September 2016 Yayasan Tun Jugah (YTJ) bisi nganjung tukang sabak tebilang Siah Tutong, 74, ke Armoury’s Wade Thomson Drill Hill, New York City. Lebih 25 iku bala ari serata dunya baka ari menua Ghana, India, USSR, Kyrgystan, Azerbaijan, Armenia, Columbia, China,. Finland, Keny, Bhutan, Ecuador, Greece, Venezuela enggau Romani kelimpah ari Malaysia bisi ngulu pengawa nya. Siah Tutong tu entara 25 iku orang ari serata dunya ti bisi ngambi bagi ba pengawa mantaika leka sabak enggau chara nyabakka orang mati ba renggat antarabansa di menua New York. Siah Tutong tu datai ari Rumah Nabau, di Entawau, Baleh, Kapit.

Pengawa Yayasan Tun Jugah (YTJ) ti nganjung tukang sabak tebilang Siah Tutong, 74, tu ke menua New York diarapka ulih ngetan, ngerembai sereta ngangkatka adat enggau jalai pengidup asal Iban ba pengawa nyabakka orang mati. Kelimpah ari nya iya mega diarapka ulih ditan sereta ditemu nembiak rebak baru kelimpah dikelala serata dunya.

Tanggung pengawa YTJ ditumbuhka dikena ngemeranka pengawa nyaga, ngetan sereta ngangkatka adat enggau jalai pengidup asal, seni enggau jaku Iban.  Raban bansa Iban patut bendar temegah ati laban YTJ udah mujur nganjung tukang sabak tebilang Iban Siah Tutong, 74, ngagai renggat antarabansa. Tuju nganjung Siah awakka iya ngambi bagi ba pengawa mantaika leka sabak enggau chara nyabakka orang mati ba renggat antarabansa.

Enggau pengawa ke nganjung pengari tu ke renggat antarabansa dia adat enggau jalai pengidup kitai Iban pasal nyabak ke orang mati tu dikiraka udah ditemu ba serata dunya. Ari pengawa tu mega bansa Iban nya dikiraka sebengkah ari bansa di dunya ti ditemu bisi adat enggau jalai pengidup asal kediri empu maya bisi orang mati, taja pan chara enggau bunyi leka sabak nya enda sama.

Berindik ari leka sabak sereta chara nyabakka orang mati ti dikemeranka Iban tu udah datai ba renggat antarabansa, gerempung YTJ arap bendar adat asal nya mengkang dikeingkat sereta dikelala raban bansa Iban empu. 

Pengawa ngerembai sereta ngidupka adat enggau chara pengidup asal Iban baka leka  sabak enggau chara nyabak ke orang mati ngagai rebak baru bansa Iban endang patut bendar dikereja laban sida kediatu mayuh bendar ke agi enda nemu pengawa tu. Kelimpah ari nya mega nyentuk ke sehari tu lalu nadai penganti tukang sabak nyema sida ke tuai tu udah nadai.

Nambahka nye mega, raban bansa Iban ke sayauka adat asal patut mega ngembuan pengirau ati ngagai nembiak Iban rebak baru laban mayuh ari sida tu nadai tentu pengerindu ba adat enggau chara pengidup asal bansa, baka nyabak ke orang mati ti majak enda dikemerat sereta dikemeranka kelebih agi ba peranak Iban ke diau di nengeri. Siti ari kebuah kitai patut bendar nangika pengawa asal bansa Iban tu ari punas ketegal enda mayuh bala indu iya nya tukang sabak ke nemu pengawa nya mengkang idup.

Orang kelia ba rumah panjai enti maya bisi pemati endang nyabak mantaika penyinu enggau penusah ati ngagai orang ke mati, tang diatu pengawa tu bisi kurang bendar digaga laban nembiak rebak baru berasai malu. 

Taja pan pia agi bisi bansa Iban ke udah megai pengarap Kristian lebuh ke ngintu pemati mengkang ngambi tukang sabak ti dikarapka sida ulih ngiring semengat pemati nya ke menua serega. Enti dulu suba kenang sabak ngiring pejalai pemati ke sebayan tang diatu sepengudah sekeda bala Iban megai pengarap kristian dia kenang tu dikarap ngiring pemati nya ke serega. Mayuh bansa Iban ngemeranka pengawa tu lalu sida ngaku nya sebengkah ari pengawa asal raban bansa Iban.

Nya mih kebuah pengawa Yayasan Tun Jugah ngerekod leka sabak sereta nuliska leka sabak tu ke dalam bup endang patut bendar disukung. Naka kediatu Yayasan Tun Jugah udah mayuh ngerekod pasal mayuh macham bansa sabak baka sabak bangkai, sabak lumbung enggau ke bukai ari bala tukang sabak di menua tu kelebih agi ba kandang menua Batang Rajang. Enggau nya diarapka chara pengidup asal Iban ti dititi temali ari aki ini munya enda mudah lenyau jemah ila.

Patut tauka enda pengerami Ngiling Bidai diintu ngelui ari bulan June

Pengerami ngiling bidai nya pengerami bansa Iban dikena sida nutupka pengerami gawai. Nitihka penemu rama sekeda ari bala Iban madahka timpuh ti pemadu manah ngatur pengerami Ngiling Bidai dikena nutup Gawai Dayak ti diintu ninting taun kena 1 Jun, iya nya 30 Jun.

Siku orang ke nemu pasal adat Iban, iya nya Jimbun Tawai (Utusan Borneo, 29 Jun 2014) madahka maya ngatur pengerami Ngiling Bidai enda patut ngerampit bulan bukai kelimpah ari dalam bulan June. Jimbun tu kala nyadi Pengajar Lati Jaku Iban. Diatu iya gawa nyadi Sapit Pemesai Pemansik Rama ba MAIS. 

Pekara bekaul enggau ngatur pengerami Ngiling Bidai entara pekara ti kala dipejuraika dalam aum Majlis Adat Istiadat Sarawak (MAIS).  Nama rasional pengerami ngiling bidai mesti diintu enda ngelui ari bulan June?

Nitihka aum MAIS, timpuh ngatur pengerami Ngiling Bidai nya anang ngerampit bulan Julai, Ogos enggau bulan bukai. Nitihka sida, diperambuka maya ke patut iya nya 30 Jun. Lalu enti deka ngerami ngelui ari timpuh nya (30 June) patut diberi nama bukai, anang meri nama pengerami Ngiling Bidai.

Laban enti diperundingka enggau ngena, bidai tauka ke dianchau maya Gawai Dayak enti kelalu lama enda digiling, ngujungka tikai nya kamah. Nya mih kebuah anang kelalu lama ngiling iya. Bansa Dayak patut bisi basa adat enggau main asal diri empu ti dipeturun ari aki ini nitihka rurun atur pengawa ti nyemetak.

Timpuh ti kelalu lama mega deka mandangka kitai Dayak tauka Iban nyau baka ngayanka nadai basa ngagai adat enggau main asal diri empu. Enti kitai ke empu adat enggau main asal nya enda ulih bebasaka nya, bansa bukai tentu mega nadai basa ngagai kitai adat enggau main asal kitai. Tu mega nyengkaum  atur pengawa Ngiling Bidai. Ambika banding raban bansa bukai lebuh ngintu pengerami sida pan bisi timpuh lalu enda kelalu lunggar. Sekeda chunto nya baka pengerami Taun Baru China ti diintu naka 15 haribulan dalam taun kelinda China. Baka nya mega pengerami Hari Raya Aidil Fitri ti diintu dalam kandang sebulan iya nya dalam bulan Syawal.

Nya alai, baka nya mega pengerami Ngiling Bidai tu endang enda patut diatur kelalu lunggar tauka ngerampit bulan July enggau bulan ke bukai, enggaika kitai diketawaka bansa bukai.