Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Rabu, 13 Jun 2018

Sistem pelajar begunaka Industri 4.0


PEMANSANG Revolusyen Industri 4.0 (RI 4.0) meri empas ti terus ngagai mayuh bengkah bidang nyengkaum bidang pelajar kelebih agi iya ke nyadi pelasar nyediaka pengereja pengawa. Kebuah pia, laban revolusyen industri ke baru tu begunaka set pengelandik ti baru.

Empas ari tu ngujungka sistem latih enggau pelajar tu deka mansang sesingkang enggau pengawa nyediaka industri ke bisi pengereja pengawa ti landik lalu ulih nyukung pemansang industri kemaya hari tu.

Bisi orang madahka sistem pelajar menua kitai agi tinggal dalam pengawa ngangkatka  RI 4.0. Statemen tu enda betul. Kebuah pia, laban mayuh kus bidang pelajar ti nyediaka peluang kereja enda kala dikira tinggal pemansang tang chara ngenatai sereta ngajar lelemu nya ke udah enda engkeman enggau idar jeman revolusyen industri baru.

Nadai bidang penemu ke bendar tau dikira udah lama tang chara ngajar nyangka enda agi semitan enti dipeda nyerumba pemansang teknologi baru ke nyadi gaya idup rebak kediatu.

Penatai enggau guna telefon pintar balat ngemenuhka ruang pengidup mensia mayuh kemaya hari tu. Dia kitai meda chara belajar ba universiti ke mungkur sesi licha ti panjai udah dianggap enda engkeman agi.

Diatu orang nyau berubah ngagai chara belajar ti bemalinka teknologi digital ke balat agi betukuh interaktif sereta fleksibel. Langkah rapat belajar di Malaysia kemaya hari tu agi begunaka kitai empu bisi ayan ba balai pengelicha sambil nyalin not ari papan tulis. Tu dikira udah jauh tinggal pemansang.

Fleksibel

Iya nyangka tau nyadika kereban keluji enti pekara tu agi dikemeranka ba institut pelajar tinggi laban ba peringkat sekola primari enggau sekondari sistem belajar udah berubah lalu majak fleksibel sereta interaktif; ambika banding baka ke digaga iya nya nyediaka smart class room.

Kemaya hari tu, raban ke betanggung pengawa mega chakah mantaika kus baru setipak enggau RI 4.0 ti bepelasarka kreativiti. Industri ngerembai berengkah ari kuasa ai, stim sereta mekanikal lalu ditangkanka elektrik ti dikeluarka enggau penyampau ti mayuh. Nangkan tu baru komputer, automasyen enggau elektronik. Tu mih tiga revolusyen industri ti udah dipeda ngerembai mansang kenyau ari taun 1760 ngagai 2010. Bah, nama mih ke nangkan tu?

Baik kitai ngasai tauka enda, diatu kitai benung ba sengkan revolusyen industri ti dikumbai RI 4.0. Revolusyen tu bekaul enggau kilang-kilang pintar iya nya injin ti disambung nengah arus internet ngagai sistem beteknologi ke ulih ngambarka rintai pengeluar lalu ulih ngaga pemutus penemu kediri empu. Iya ngari gempuru sistem siber-fizikal, Internet of Things (IoT) lalu iya mega bepelasarka kaul internet.

Taja pan individu dalam raban rebak baru diatu ngasaika agi kelalu tumu endur sida ngaga spekulasyen senentang gaya pengawa ti begunaka RI 4.0 ba serata dunya tang sida mesti nyikap diri dulu napi utai ke deka nyadi jemah ila.

Nembiak lepas Sijil Pelajaran Malaysia (SPM) ke deka nampung pelajar mesti nemu senentang pengawa jemah ila ti ukai semina begunaka sida belajarka mayuh leman penerang enggau lelemu tang mesti disempulang enggau pemandai ngambika sida ulih ngena penerang sereta lelemu ke dikembuan sida enggau naka optimum.

Ba era RI 4.0, pemandai siku-siku individu ulih nyaup ngangkatka tikas bayar upah pekereja tang ba awak ti sama mega bisi meri pengelebih dikena narit ati orang ke ngaji sida.

Opis Menteri Pelajar Sektor Pelajar Tinggi udah nengkebang siti alur ti betul dikena nyamin pengelama sereta pengetan institut pelajar tinggi (IPT) di Malaysia awakka terus nyadi palan penempa pengereja pengawa ti mansang setipak enggau revolusyen industri.

Proaktif

Ubah ti dipejalaika nya ukai semina mungkur aspek ruang belajar, langkah rapat ngajar, kurikulum ti organik agi sereta fleksibel tang iya ke bekenaka teknologi kemaya hari tu. Nya alai nembiak lepas SPM ke merambu deka nampung pelajar sida mesti proaktif agi dalam konteks tu.

Nama-nama ubah revolusyen ke nyadi, dia pugu konsep ngaukka penemu mesti sepemanjai maya. Kaul entara informasyen, lelemu enggau pemandai enda tau enda diperetika enggau lenak.

Dalam pemasang teknologi tu, nembiak ukai semina mesti bisi penau ngulihka penerang dikena nyukung pemansang penemu tang sida mega begunaka penau enggau pemandai ngena penemu ti dikembuan sida enggau optimum.

Utai ti patut diperatika nya pemereti ati senentang kaul penerang, penemu enggau pemandai dalam pengidup ngambika ulih mantu sida napi penguji dalam genap bengkah revolusyen.

Selasa, 29 Mei 2018

Impak ngemaduka GST ngagai kos daya idup rayat


CHUKAI Barang enggau Servis (GST) ti dipejalaika di Malaysia kena 1 April 2015 ngembuan tuju ke deka ngemanah lalu nusun baru struktur chukai menua ngambika semitan agi, rentang, efisien sereta ludas.

Kelimpah ari nya, iya mega ngembuan tuju ke deka napi pengelemi dalam sistem Chukai Jual enggau Servis (SST) ti dikena ngelama tu kenyau ari taun 1970-an kelimpah ari cukai bukai ke belunjak tauka betingkat, pemindah rega enggau nilai, nadai pengurang chukai ti genap baka barang ti dieksport, isu-isu klasifikasyen enggau pekara bukai.

SST ti diletakka perintah mungkur chukai jual nitihka kadar 5 persin, 10 persin enggau spesifik agi chukai servis 10 persin lalu kadar standard 6 persin diletak ungkup GST ba barang sereta servis.

Belalulauka GST ti udah dipejalaika kenyau ari bulan April 2015 dia perintah bisi madahka RM27 bilion udah mujur dikumpul dalam taun 2015, RM41.2 bilion (2016) enggau RM44 bilion (2017).

Taja pia, baru-baru tu perintah ke baru udah madahka GST nya ila deka diletakka ba kadar sifar tauka kusung lalu atur tu deka dikena ba serata menua Malaysia berengkah ari 1 Jun tu ila.

Nitihka Pengelicha Kanan Fakulti Ekonomi enggau Manajemen Universiti Putra Malaysia, madahka, langkah rapat nya diperatika ari chara teknikal. Reti nya GST udah dikemaduka lalu deka diganti enggau SST. Mensia mayuh ngelama tu pechaya GST nya ke pun rega barang niki. Sida ngasaika nyau lebih ari peniki gaji sida ngujungka gasa meli sida mega nurun lalu nekan pengidup sida.

Taja pia nitihka pengelicha tu mega, kos daya idup enda nyadi penanggul di Malaysia enti kadar pemansang penatai pemisi tinggi agi bebanding enggau pemansang rega barang. Besenutuk enggau nya, iya madahka faktor GST enda meri empas ti signifikan ngagai kos daya idup laban ku iya rega barang niki ukai semina ketegal sistem chukai aja.

Nitihka prinsip ekonomi, kos GST ti dibayar raban ke bejalaika pengawa dagang nya baruh agi bebanding SST laban iya nya chukai ke diletak ke atas nilai ditambah ti diulih ari genap rintai raban ke mekal barang. Lebuh kos ngeluarka barang nya baruh agi, rega barang deka nurun tang hal tu enda nyadi sepengudah tiga taun GST dipejalaika.

Pansik ngayanka bisi empat faktor ke ngasuh rega barang majak niki sepengudah GST dipejalaika.

Keterubah iya, tikas penyampau raban orang dagang ke nitihka sistem GST agi baruh. Nitihka pansik, enda datai 50 persin ari firma ngerejistaka diri. Enti nitihka sida patut nitihka atur nya ba tikas 100 persin.

Kedua, raban penerit adat enda bebendar bejalaika pengawa sida ngujungka orang dagang manipulat rega barang di makit.

Faktor ketiga mungkur pemereti penemu orang dagang ke agi baruh lalu baka nya mega  raban pengguna enggau sida ke patut ba pengawa tu senentang sistem chukai pengguna nya.

Faktor keempat iya nya rega barang niki ketegal pengelemi nilai ringgit ke ngasuh import nyadi mar agi, upah minimum ti nikika kos pekereja lalu disempulang enggau struktur makit ti betukuh monopoli.

Faktor keterubah ngagai ketiga enda relevan agi enti GST nya dikemaduka ila tang  faktor keempat agi relevan.

Impak ke atas rega barang ketegal GST dikemaduka nyangka enda mai empas tauka semina mai empas ti minimum aja ketegal pengeluar agi nanggung kos pengeluar ti niki ketegal ari kos import kereban mata (raw material) enggau kos pekereja.

Kelimpah ari nya mega, makit ke betukuh monopoli mega nekanka raban orang bedagang mit enggau jelan pemesai lebuh sida dipejal besemekih kompetitif agi enggau orang bukai.

Besenutuk enggau nya, Pengelicha ba Pusat Pengajian Pembangunan Sosial enggau Ekonomi Universiti Malaysia Terengganu, madahka, lebuh ke deka mutarka penanggul  kos daya idup ti nanggulka rayat kemaya hari tu dia perintah patut meri perati ngagai pugu komponen ke ngasuh mensia mayuh bebelanja besai.

Bepelasarka sidi Penyiasatan Perbelanjaan Isi Rumah 2016 ti dikeluarka Opis Statistik madahka  belanja pengguna isi rumah bulan-bulan di Malaysia pukul rata udah niki ari RM3,578 dalam taun 2014 ngagai RM4,033 dalam taun 2016.

Rumah, bil ai, lektrik, gas enggau kereban api nya begunaka belanja ti besai iya nya kira-kira 24 persin ari semua belanja raban pengguna. Tu ditangkan enggau pemakai enggau ai irup iya nya 18 persin, kereban pengangkut (13.7 persin) sereta restoran, kulau enggau hotel (13.4 persin).

Kelimpah ari restoran enggau hotel ti dikiraka sebengkah ari belanja gaya idup, tiga komponen bukai ke nyadi pelasar belanja patut bendar diperatika perintah enggau silik.

Mayuh bengkah faktor ti ngasuh rega barang niki. Mayuh agi nya ketegal faktor rega minyak ke meri empas ngagai kos pengangkut, tol enggau ti bukai. Taja pia, rega minyak ke nurun sebedau tu nadai mega ngasuh rega barang nurun.

Kelimpah ari nya, barang mega bekos tinggi ketegal peminta ke tinggi bebanding ari iya ke ulih dikeluarka maya musin hari besai, empas pengelemi mata wang lokal bebanding mata wang menua bukai ti meri impak ngagai kos ngimport barang sereta ditambah enggau ulah orang dagang ke nadai betanggung pengawa nikika rega barang sepeneka ati sida.

Perintah patut mega meri timbang penemu ti engkeman sebedau ngemaduka GST, meratika iya enggau silik agi ngambika iya ulih nyadi sebengkah chukai ti betukuh progresif bebanding tukuh regrasif sebedau tu ke ngujungka iya meri empas negatif ngagai raban ke bepenatai pemisi ti baruh. GST udah ngayanka evidens ke nambahka penatai pemisi menua enti dibandingka enggau SST tang GST ke bisi diatu balat agi betukuh regresif. Enti GST deka diteruska dia mekanisme ti baru patut diperindingka ngambika iya amat-amat meri pemanah ngagai rayat.

Ahad, 27 Mei 2018

Lapa Kitai Mesti Ngembuan Pengarap


Pekara ti mida mensia enggau jelu nya ulih dipeda ari sukut bepikir. Semua aktiviti mesti bepun enggau proses bepikir lalu ukai semina ketegal pengeka tauka instint kitai empu. Uji perunding enda mukai-mukai sekali maya pagi nuan dani lalu berasai lapar. Maya nya nuan deka makai asi guring tauka telu guring. Tu nandaka nuan udah mikir dua pekara tu.

Keterubah iya, nuan berunding nimbang penemu baik nya deka nyumai asi guring tauka telu guring. Kedua, nuan mega mikirka proses sereta chara nyumai ngujungka asi tauka telu guring nya sedia diempa.

Taja pia ba situasyen ke bebida, bepikir ulih nyadi aktiviti ti mar dikereja. Kebuah pia laban maya bepikirka pekara berat iya tentu mai empas ti besai amat. Ambika banding, lebuh kitai mutus deka bebini tauka belaki kitai deka ngaga pemutus penemu lalu proses bepikir nya balat agi serius sereta tuai agi runding. Pengawa nya enda ngemudah baka kitai ke deka makai asi gurung tauka telu guring.

Lebuh kitai bisi ngaga penyilap, apai indai selalu madah, ‘pikir dulu sebedau bejaku tauka ngereja sesebengkah pengawa.’ Rambai jaku nya ngembuan reti ti besilup lalu semua empas ke deka ditapi kitai sepengudah kitai bepikir.

Lebuh kitai enda dikerindu orang bilik sepiak ketegal kitai ke rindu masang radio enggau inggar nyangka ngayanka kitai bepikir musik ke nyarih nya dipasang ngambika ngeyelapka ati kitai.

Baka nya mega maya napi penanggul ti besai, tentu kitai deka bepikir enggau naka ulih ngambika bulih jalai dikena mutarka penanggul nya. Pandai tauka enda siku-siku orang nya ditentuka enggau chara iya bepikir. Untak deka bekereja ngiga jalai ti pengabis mudah. Iya deka meri sekeda chara mudah enggau chara ti pengabis semitan sebedau kitai netapka siti tauka dua pemutus penemu ti pengabis manah.

Nemban tauka enda penanggul nya ulih diputar bepanggai ba chara kitai mutarka penanggul nya. Mayuh agi penemu kitai tentu mayuh agi chara ti ulih dikena mutarka sesebengkah pengawa. Nya kebuah, kitai ulih nambah penerang sereta sanding penemu ari pekara rama, pekara ti dipratikka, trivia, ari orang ke tebangkar lalu mega nengah raban filosofi. Taja pia, kitai mesti ingat ukai semua penerang nya ulih dikena sereta relevan enggau penemu kitai. Kitai empu mesti milih iya ke patut.

Bepikir nya pugu pekara ari semua pekara ke dikerejaka kitai. Ambika banding, aktiviti ke digaga kitai nya baka mai kerita, ngelawa laman web, nulis enggau ngaga pemutus penemu. Semua nya asil ari proses bepikir.

Bepikir mega ngayanka mensia enda dikungkung. Tu ulih dipeda ari rentak lagu, ukir, karang, tukuh rumah, filem tauka pansik dalam pelajar. Bepikir ngasuh kitai ulih ngaga pemutus penemu enggau enda besekat.

Sabtu, 14 April 2018

Gajet enggau Internet sanding penemu nembiak sekula ba abad Ke-21


PENGAWA macha kelebih agi ba raban nembiak sekula udah bisi berubah guna ari ke macha kereban bacha bechelak ngagai macha kereban bacha ti diambi ari Internet. Taja pia, iya dipeda baka ti mudah, tang ba raban nembiak sekula kelebih agi ba sida ke di institut pelajar tinggi, pun penatai kereban bacha nya mega ngembuan penanggul iya empu. 

Ketegal nya, sekeda strategi mesti bisi dikena napi penanggul tu dalam ngangkatka tikas pemereti sida senentang kereban akademik ti diambi sida ari Internet. Tu ulih  nyaup nembiak nembuka pengawa ti diberi, nyaut kuiz lalu lebuh nyediaka diri napi peresa. Mayuh kereban bacha akademik ke bisi di Internet nya ditulis dalam jaku English. Nya alai mayuh nembiak dituntung penanggul meretika pekara ti dibacha ketegal kurang vokabulari enggau terminologi dalam disiplin akademik ba jaku English.

Taja pia, semua tu ulih diputar nengah chara bekenaka dictionari online. Dictionari online meri mayuh macham servis ngagai bala nembiak. Sekeda ari pengelebih iya, iya nya meri servis ti enda bebayar. Kelimpah ari nya, iya mega meri malin chara nyebut ti betul. Nembiak semina dipinta mendingka chara jaku nya disebut lalu nunda sebut jaku nya. Bisi dua bansa sebut ke suah dikena  iya nya sebut chara British enggau sebut chara Amerika. Bisi mega dictionari online ke ngena visual dikena mantu sereta ngangkatka pemereti nembiak senentang sesebengkah pekara tauka penanggul.  

Nembiak ke ba bidang sains enggau perubat ulih ngelawa laman web Merriam-webster online dictionary. Kebuah pia laban utai ke bisi ba dalam nya ngundan definisyen ungkup terminologi bidang sains enggau perubat. Kelimpah ari nya, bisi mega dicionari online ti umbas iya popular ba raban nembiak iya nya DictionaryReference.com. Kebuah dictionari tu popular laban iya ngena leka jaku ti mudah diperetika nembiak kelebih agi sida ke kurang penemu dalam jaku English. 

Bisi maya dictionari ngena leka jaku ti kompleks agi ngujungka nembiak enda meretika definisyen ti diberi. Bisi mega dictionari online ke ngerintaika tuduh leka jaku ti ngembuan reti ti nyau deka sama enggau leka jaku ti uji digiga nembiak. Nembiak mega ulih ngena Google Images ngayanka imej sesebengkah leka jaku, ambika banding leka jaku gallbladder stones. Nembiak semina naip leka jaku nya ngena Google Images lalu imej bekaul enggau batu empedu ulih dipeda nengah ba skrin komputer. 

Pengawa ke ngena Google Translate mega popular ba raban nembiak sekula. Google Translate tu meri servis ngalihka leka jaku English ngagai jaku Melayu. Naka kediatu Google Translate bedau bisi servis ngalihka leka jaku English ngagai jaku Iban. Google Translate nulung nembiak ngulihka idea senentang reti kereban bacha nya. Taja pia, pekara ti dikalih nya enda meri penerang reti ti nemban. Ambika banding, leka jaku jaku English; Run! There's a fire lebuh dikalih dalam jaku Melayu iya munyi tu -  'Jalankan. Kebakaran berlaku.' Tang kalih ti betul dalam jaku Melayu iya nya, 'Lari! Terdapat kebakaran.' 

Kelimpah ari nya, bisi mega kereban bacha ari laman web ke ngena leka jaku ti mar lalu disempulang enggau penerang baru ngagai nembiak. Nya alai, dikena meretika kereban bacha nya tauka  sesebengkah topik  ke mar dipereti nya, bisi sekeda laman web ti ulih mantu nembiak baka SlideShare enggau mega YouTube. SlideShare nya laman web ke mayuh ngena Powerpoint. Iya ngena tulis ti besai lalu bisi mega maya iya disempulang enggau audio dikena meri penerang senentang topik nya. Laman web YouTube ngayanka video ti ngundan rekoding senentang sesebengkah pengawa ngajar, pengawa meri penerang, proses tauka sebengkah pengawa kelulu.

Nambahka nya mega, nembiak ulih mega muka akaun lalu ngelawa laman web Blendspace. Laman web Blendspace nyediaka ruang ngagai bala pengajar munggah niki tauka upload kereban ngajar sida enggau pengawa latih ti bisi kaul enggau topik pelajar. Nembiak mega ulih ngena laman web bukai ti ngembuan topik sama tauka nyau deka sama enggau Google Scholar.

Pengawa ti ngena hyperlink ke bisi dalam kereban bacha mega meri servis ngagai bala nembiak ngelawa laman web ti bisi bekaul enggau pengawa pelajar. Tu ngemudahka sida nambahka pugu penemu senentang topik ke deka diperetika sida. Nambahka nya, pugu penemu mantu nembiak meretika kereban bacha ti mar dibacha. Kebuah pia, sida ulih ngaitka penemu ari kereban bacha tauka laman web bukai ngagai kereban asal ke deka diperetika sida. 

Bisi mega laman web ke ngena saiz tulis ti kelalu rapat, padat sereta mit. Hal tu ngasuh nembiak enda tentu rindu maya macha kereban nya lalu suah agi enda fokus kelebih agi sida ke tuai laban nyau pedis mata macha kereban bacha ba situasyen ti baka nya. Chura tirai juru enggau pemandang bantai tauka iklan ti nadai bekaul enggau pelajar mega ulih ngachau nembiak bebachaka kereban bacha. Dikena mutarka penanggul tu, nembiak ulih diajar ngena Zoom tauka copy and paste penerang nya lalu mindahka iya ngagai software Microsoft Word. Tu nyaup nembiak macha enggau lantang agi laban sida ulih ngemesaika saiz  tulis lalu nukar bansa tulis nya nitihka pengelantang diri empu. Kelimpah ari nya, sida mega ulih muai iklan ke ngachau fokus sida. Software Microsoft Word mega ulih mantu pemacha laban sida bisi nyediaka servis baka Synonyms, Translate enggau Search with Bing. Nembiak mega ulih nulis komen lalu nukar chura sesebengkah ayat maya deka ngulang pelajar tauka maya ngaga not. 

Siti agi strategi macha iya nya bejurai enggau pangan diri. Jurai ulih dipejalaika maya betunga mua tauka nengah chara online ngena  aplikasyen baka WhatsApp, Telegram enggau Facebook. Jurai raban WhatsApp Pelajar ulih muka sebuah ruai raban pejurai nengah raban WhatsApp. Bisi maya taga pengawa ti padat ngujungka nembiak nadai awak bejuraika sesebengkah pekara maya sida betunga mua enggau pangan diri. Nya kebuah, bejurai nengah chara online nya fasiliti ti ulih diguna enggau tuju ti meri pemanah ke lebih. Nembiak ulih nanya sebarang pekara lalu tawing sida ke bukai ulih nyaut enggau jampat  taja pan sida enda semak dia. Penemu nembiak sama-sama diguna sereta betambah. Nembiak pan enda berasai sunyi. Sida ngasaika diri balat agi bisi motivasyen deka belajar. Sulu jaku ti suah didinga dikena orang kemaya hari tu iya nya 'Sharing is Caring'. Bisi mega nembiak ti enda chakah bejurai maya betunga enggau pangan diri ba dalam kelas, tang nyadi aktif maya bejurai nengah chara online. Sida ngasaika diri bisi diberi peluang ti sama rata lalu enda ibuh mantaika sesebengkah pekara enggau jaku ti nyarih sereta ngayanka tubuh sida. Bisi nembiak ke ngasaika munyi nyawa sida kelalu mit tauka pendiau fizikal tubuh sida ke enda tentu manah. Tu ke ngasuh sida  malu deka bejurai maya ke betunga enggau pangan diri. Nembik ulih ngemetulka ayat enggau isi jurai sida ngujungka ba ruai WhatsApp lalu sida bisi pengarap bekunsika pekara nya enggau pangan diri. Pengawa bejurai ngena aplikasyen WhatsApp enggau Telegram  balat bendar popular kemaya hari tu laban iya enda bebayar. Gambar, link sereta video ulih mega dikunsi enggau pangan diri. 

Dipandakka jaku, pengawa macha ba abad ke-21 tu mayuh agi begunaka gajet enggau internet dikena mantu nembiak ngangkatka tikas pemereti sida senentang sesebengkah kereban bacha. Nya alai, strategi macha patut bendar diubah setipak nitihka ubah maya enggau guna.