Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Ahad, 21 Ogos 2016

Anang ngapal maya belajar



Pentaksiran Tingkatan Tiga (PT3),peresa Sijil Pelajaran Malaysia (SPM) enggau peresa Sijil Tinggi Persekolahan Malaysia (STPM) nya peresa perintah ke dipejalaika maya ujung taun. Kelimpah ari nya, bisi mega peresa ujung taun sekalika ba tikas sekula tauka institut pelajar tinggi (IPT).

Musin peresa tu ngasuh bala nembiak bebendar ngirai diri sebedau peresa baka orang ke besediaka payung sebedau ujan. Tu nyengkaum pengawa ngulangka pelajar tauka ngaga latih tambah. Taja pan pia, agi mayuh nembiak enda tentu ulih ngetanka momentum meretika pekara ti diulang pelajar ngujungka iya meri impak ba balai tauka bilik peresa sereta ba pemutus peresa ti dikeluarka udah nya. Enti nembiak endang udah besedia sereta udah bisi pengarap lalu ngemeranika diri empu enggau jaku munyi tu; ukai tak enda alah sungkit leka mata!

Pengawa nandu pelajar nya beguna bendar dikena nyikap diri nembiak ari sukut psikologi mental enggau fizikal sebedau peresa. Pengawa ti nyikap diri empu enggau mekanisme pelajar ti engkeman ulih mantu sida balat agi besedia lalu enda mudah dikeruga maya napi peresa. Besedia enggau chukup atur sereta perambu nyadika pugu penyadi enti nembiak deka nyapai pemujur laban chara belajar ti betul deka nguing pengasai ati sereta chara belajar sida. Nadai guna belajar bejam-jam, tang mimit pan lalu enda meretika pekara ti udah diulang nya tadi. Tu semina muai awak sida.

Dalam konsep teknikal pelajar, mekanisme dikena meretika sesebengkah subjek nyadi kunchi pelasar dikena nentuka pengulih nembiak nya mujur nyaut tanya tauka enda. Peragam sekeda orang ke ngaitka pengulih nembiak enggau aspek pemandai individu nya kurang nemban. Pengulih untak mensia nerima enggau meroses penerang ari sukut pukul rata nya sama aja, semina lain ba sida ke tachat maya ada baka Sindrom Down. Reti nya pengulih nembiak enti dikira ari sukut individu tau dikumbai sama. Pengulih sida sama rata maya sida ada. Iya ti ngemidaka pemandai siku-siku nya jalai sida napi penerang ti dikulihka sida nya nyadi siti konsep ti mudah diperetika lalu terus ulih mali iya ngagai sukut bukai nyengkaum ba keretas saut peresa sida nya.

Mayuh bendar pansik ba menua tasik ke madahka nembiak ti mereti penerang ti diberi ngagai sida bulih pemutus peresa ti lati maya peresa enti dibanding enggau sida ti semina ngapal tauka ngeripit pelajar baka ke digaga mayuh ari nembiak kitai menua tu. Konsep belajar chara ngapal semina tan dalam awak ti serekat enti dibanding enggau konsep meretika sesebengkah pekara.

Dalam teori sains ti seruran dibantai,  ari sukut pukul rata fungsi untak ngingat sesebengkah pekara semina ulih tan entara tiga ngagai tujuh hari tauka nyangka  kurang enti diansak enggau mayuh macham subjek. Tang penerang ti diulih nengah pemereti ati ulih tan lama laban untak ulih meroses sereta meretika pekara nya ngujungka iya ulih dikerembaika enggau luas agi nitihka kreativiti diri empu.

Mayuh nembiak rindu ngapal tang enda meretika utai ti diapalka sida nya. Tu tau ngenusahka sida laban iya ulih ngurang pengulih sida nyaut tanya maya peresa. Bisi mega sekeda nembiak nya betapi enggau penanggul ‘runding ti rugang’ maya penerang ti diapal nya tak enda mukai-mukai lenyau ari minda maya sebedau peresa tauka maya baru deka nyaut tanya. Insiden runding rugang seruran nyadi maya nembiak nya panik lalu berasai kesal di jungkal kandang ati ketegal ngumpul penerang ti berasuk kin kitu ba dalam untak. Tu mih risiko ti enda ulih enda ditapi nembiak ngena konsep ngapal ketegal kerembai penerang ti besekat lalu semina bepusin ba pekara ti dibacha aja. Bebanding enggau konsep pemereti ati, nembiak deka nyadi tenai agi laban sida udah bisi penerang tauka jaku kunchi ti diperetika sida.

Budaya ngapal seraya ti enda meretika pekara tusah deka diseraraka laban iya rurun ari sistem pelajar ti udah raruk dalam sistem peresa betulis sereta iya mega betukuh kelalu akademik. Taja pan sistem nya ari sukut pelasar iya ulih ngasilka nembiak ti lati, tang mayuh ari sida ngasaika diri napi pemedis lebuh masuk IPT ti ngena langkah rapat pelajar ti bebida. Ba IPT, proses ngajar enggau belajar udu agi ngemeratka komunikasyen dua piak kelimpah ari ke ngasuh nembiak ngaga pengawa, keretas kereja, pemantai runding enggau pengawa bukai. Tu nyengkaum mayuh chara praktikal lalu konsep ngapal nya semina mungkur bagi pelajar ti mimit aja. 
 
Ketegal pelasar belajar chara ngapal udah lama dikemeranka, mayuh nembiak enda ulih tetitihka pekara ti dipinta ba pelajar tinggi. Nya kebuah, anang alit ati enti nembiak ke masuk IPT enggau pemutus ti lati ba sekula tau ngujungka sida pansut enggau pemutus ti selama aja. Nya alai, anang udu ngapal pelajar kitai! Anang mega baka orang ke ngerumban pasang.

Sabtu, 20 Ogos 2016

Anak rindu beperatika laman sosial



Anak ti ada maya taun 1995 ngagai 2009 dikategorika Generasyen Z (gen z). Mayuh ari sida tu ngena awak sida nunga komputer enggau gajet bukai ke bisi kemaya hari tu nyau deka sepemanjai hari. Mimit amat awak dikena merati enggau silik sereta nimbang sesebengkah penerang. Sida mega enda tentu ibuhka penerang nya engkeman tauka nemban.

Anak bujang enggau anak dara endang bedau datai ba tikas runding ti tuai, tauka dikumbai bedau tuai runding. Nama utai ti dikunsi sida dalam Facebook suah agi ke semina bisi kaul enggau konteks pengidup sida di sekula enggau pangan serambau. Lalu nya dikira ukai dalam konteks realiti pengidup ke bendar.

Apai indai patut duduk berandau enggau anak maya ti tenai sereta bebasaka sida sentang isu guna Facebook ngambika sida enda berasai dilalau tauka dianu kitai ke apai indai. Anak maya umur tu patut nyadika tawing apai indai enggau berandau, bekunsi timpai runding enggau penanggul. Kitai ke apai indai patut nyadi peninga ti manah sereta mereti utai ti dibantaika sida lalu ukai semina ngayanka autoriti nyentuk ke sida ngasaika diri dikungkung tauka dipejal ngereja sesebengkah pengawa.

Apai indai mega enda patut ngayanka pengeringat ti kelalu balat enti anak sida udah tekelanjur bekunsi penerang ti patut dipelalai kena nyaga pendiau diri. Minta anak meri penemu diri sentang empas ari salah guna Facebook ngambika sida ulih belajar bepikir enggau rasional lebuh mutarka sesebengkah penanggul sebedau iya nyadi balat sebalat. Endang udah arang, arang mih tang pekara ti baka tu agi ulih diputarka apai indai anang ngasuh asi nya datai nyadi bubur.

Enggau nya bala nembiak bisi pengarap ke pengulih diri lalu ngasaika penemu sida diterima. Ari nya udah tentu nya bala apai indai deka balat agi dipebasaka bala anak sida.

Ahad, 7 Ogos 2016

Mutarka penusah buli ba sekula: Sapa bempu tanggung pengawa?



Panyun Jaku

Kes buli enggau ulah ke ganas ti bisi nyadi sereta diayanka media massa kemaya hari tu ukai isu ti baru.Taja pan penyampau kes ti diripot nya bisi nurun baka ti dipadahka Opis Menteri Pelajar tang sesebengkah pengawa ti drastik patut bendar diatur dikena ngemaduka ulah ti baka tu. Nya mih kebuah, pekara ti baka tu begunaka saup sereta sukung raban apai indai, kaunselor profesional, orang ke tebangkar dalam bidang psikologi enggau gerempung bukai.

Ulah muli pangan diri bisi nyadi bedau lama ti udah ke alai siku nembiak sekula dipejal bala pangan iya ngerat dilah diri empu kenu ku orang empu tubuh udah ti ngeripotka hal tu ngagai indai iya. Amat mih udah nya kes tu ukai kes ti amat nyadi tang iya ulih mega nyadika chunto enti pekara tu amat-amat nyadi. Ulah ti ganas baka tu endang enda ulih diterima nama agi enti iya nyadi ba nembiak sekula ke agi biak umur baka sida tu. Sida ke ditemu salah endang patut bendar ditinggang ukum disiplin lalu diberi kaunseling. Pengawa ti nyadi baka tu balat bendar ngirauka ati lalu iya tentu nyadika tanggung pengawa sida ti patut mutarka penanggul tu.

Batang Kenang

Nitihka ripot polis, nembiak sekula ti maruk diri enggau pengawa ti salah nya bisi 0.9 persin ari indeks kriminal menua. Opis Menteri Pelajar mega madahka raban nembiak ti bisi maruk diri enggau penanggul disiplin nya kurang ari dua persin ari penyampau peranak menua kitai. Taja pan penyampau tu dipeda mit tang pekara tu patut bendar ditimpai enggau serius. Hal disiplin di sekula baka kes teruan, salah ulah, enchuri enggau belaya semua ngujungka ulah ti ganas lalu tau ngasuh orang bukai pedis tauka bakal. Nya alai sida ti bekuasa ba sekula enda ulih nejuka pekara tu.

Kes buli pangan diri ba sekula patut bendar diputarka enggau segemitan dikena nentuka pengelemi atur sekula dikemanahka agi sereta langkah rapat ti engkeman dipejalaika kepala pengajar enggau pengajar disiplin nengah SOP (Standard Operating Procedure) ti udah diteritka.

Utai ti ngirauka kitai iya nya budaya ganas udah majak nyadi-senyadi ba institusyen pelajar sekula kitai kemaya hari tu. Kitai ngarapka ba dunya realiti kemaya hari tu bala anak sereta uchu ambu kitai enda bangat disuap enggau pekara ti udu ngasuh sida ganas. Ulah ti jai, bedendam, ngeransu pangan diri nyau nyadi pekara selama ti diayan dalam filem kelebih agi ba televisyen. Nambahka nya, nembiak dipandangka enggau ulah ti sama mega nengah Internet. Berindik ari nya, ulah ti baka tu suah bendar dititihka bala nembiak. Indah cherita kartun kemaya hari tu mega mupuk ngayanka cherita ti bisi adegan ganas, adegan buli baka watak Giant dalam cherita Doraemon ke deka bendar muli bala pangan iya.

Mayuh Bengkah Buli

Buli nya pengawa ti agresif dikerejaka ngagai orang bukai nengah pengawa ti tau ngemediska orang, ngemale tauka ngelese orang. Buli tu dikereja betandu-tandu  enggau orang bukai ketegal penanggul enda setimbang ari sukut kuasa enggau pengering. Nitihka pansik, bisi empat bansa buli; iya nya buli ngena chara jaku, fizikal, relational enggau buli siber. Tiap-tiap bengkah tu bebida ari pangan diri, ari ke buli chara jelan ngagai iya ke ekstrem.

Nama Kebuah Orang Buli

Buli tu ukai ulah pemai ada, reti nya iya nyadi ketegal bisi kebuah bukai lebuh anak mit nya nyau mansang besai. Tu utai ti patut ditemuka bala apai indai. Nitihka Tom Thelen, iya tu tukang motivasyen ti tebangkar di Amerika madahka buli nyadi ketegal dekaka kuasa, iya nya pengingin ati deka ngasaika diri kering lalu ngemediska orang bukai. Nitihka pansik, nembiak bisi biuh deka nunda tauka niru pengawa orang bukai ke dipeda ngelingi sida. Rampa kelingi sida nentuka gaya ulah, chara sida mutarka krisis sereta gaya pendiau sida.

Tu sekeda ari faktor rampa kelingi sida nembiak ke meri empas ngagai gaya pendiau sida:-

- Rega tauka nilai diri sebilik kelebih agi baka ruang bilik ke betapi enggau kes ganas rumah tangga, apai indai ke enda ibuhka anak, apai indai tauka diri menyadi ke ngembuan ulah baka orang pemuli.

- Status sosio-ekonomi baka penyeranta tau mega ngasuh pedis ati tauka enda puas ati sereta chemburu meda gaya pendiau nembiak bukai ti manah agi ari sida empu.

- Tawing ti di dalam tauka ba luar kandang sekula enggau sida ke berimbai pendiau mega marit nembiak ngereja pengawa ti enda manah. Ambika banding baka sida ke diau ba genturung pendiau ke mayuh kes kriminal tauka endang bisi ati deka nunda orang buli laban dikumbai orang kemaya hari tu “cool”.

- Kaul nengah chara online enggau raban netizen ke bukai. Ambika banding begulai enggau sida ke ngembuan ulah ti agresif.

Taja pan baka nya, ukai reti nya bala nembiak ke diau ngelingi rampa ke udah dirintai ba atas deka nyadi pemuli. Apai indai ti nerenak moral ti tinggi sereta pugu etika ti tegap ba anak sida deka nulung bala nembiak tu ngaturka pendiau diri lebuh begulai enggau orang ti ngembuan ulah manah tauka jai. Nya mih kebuah malin pengidup ari apai indai begunaka bendar kelebih agi ba nembiak ke seranta tauka ba ruang bilik ti udah pambar ketegal apai indai ti udah beserara enggau pangan diri.

Kelai Buli
Baka ni kitai deka ngelala orang pemuli tauka pengawa buli tu? Buli tu sempama ukai utai ke dipeda engkeman manah dalam sebuah kutak mit tang iya endang meruan bisi kelai ti ulih mantu kitai ngelala sereta nemu buli nya.

Nitihka sidi psikologi, lebuh buli nyadi nya reti iya orang ke buli nya minta tulung. Pemuli berengkah buli orang bukai ketegal dekaka sesebengkah utai tauka pekara baik nya puji ari sukut emosyenal; jaku mudah nya minta puji tauka upah ari sukut material. Buli tu ngembuan tukuh ti nyemetak. Ambika banding, enti anak nuan rindu bejaika orang, ngasuh orang pedis ati ke diri empu, rindu nundi orang, ngeju orang, ngegap tauka ngemba orang, ngembuan ayam tauka duit orang, nuan anang enda sekali-kali ibuhka anak nuan laban nya mih kelai anak nuan nya udah nyadi pemuli. Tu mih maya kitai ke apai indai patut ngiga jalai mutarka pekara tu.

Sebengkah agi taga penanggul ulah ke tau nyadi nya dikumbai The Jekyll and Hyde Child. Nembiak ke ngembuan ulah baka tu ulih ngubah ulah jai sida baka sitan nyadi manah baka malaikat nitihka maya ti engkeman ba mata apai indai tauka sekula bepanggai ba utai ti nyadi tauka pengeka ati sida. Ulah manah sida ke baka malaikat tau bendar ngasa ati bala pengajar, apai indai tauka orang ngujungka sida ngumbai nembiak pemuli nya tadi mansa sesebengkah kes salah ulah.

Mutarka penusah buli ba sekula: Sapa bempu tanggung pengawa?

Pengawa ti ngayanka elemen ganas baka buli tu endang patut bendar dipansik enggau silik enti kitai amat-amat deka mutar penanggul kriminal ke ganas ti marit raban nembiak kemaya hari tu.

Enti penanggul disiplin baka buli tu bisi nyadi di sekula, kitai patut mutarka penanggul nya ari pun sereta ngiga chara ti engkeman dikena mutarka penanggul nya. Kitai enda ulih semampai nyungkal isu ti seruran nyadi ba sekula. Semua sida ti bisi tanggung pengawa patut begaut mutarka pekara nya kelebih agi enti bisi penanggul disiplin ti serius nyadi ba dini-dini endur sekula. Semua raban ukai semina sida sekula aja tang nyengkaum apai indai, polis enggau mensia mayuh patut sama-sama besaup mutarka penanggul disiplin nembiak.

Raban sekula patut berundingka langkah rapat ti engkeman dikena neritka disiplin nembiak. Kemaya hari tu bisi trend kepala pengajar enggau raban pengatur sekula enggai ngeripot kes buli ngagai opi pelajar enggau polis laban nangika imej sekula sida jai. Sida sanggup ngelalaika kes buli ti bisi nyadi di sekula sida tang munyi ke sempama jaku tuai dibungkus abus tekebu mih abu; dipelam riam temu mih bau.

Besenutuk enggau nya mega, raban polis patut suah agi nemuai ke sekula ngambika sida ulih berinteraksyen enggau bala nembiak sereta mega bala pengajar. Chara tu ulih nyeliah sida nembiak sekula ari tepejuh enggau aktiviti samseng sereta pengawa salah ti bukai. Penatai polis ba sekula ulih mantu sekula ngurangka penanggul disiplin ti bisi nyadi. Sekurang-kurang nembiak berasai nangi deka ngereja penyalah tauka buli pangan diri.

Kelimpah ari neritka disiplin, ukum ti setipak enggau penyalah patut diletak ba sida ti bisi ditemu salah nya. Kaunseling ti profesional mega patut diberi ngagai bala nembiak. Kaunselor sekula patut diasuh enggau masuk sesebengkah latih ti seriran enggau pekara tu ngambika sida ulih mutarka penanggul nembiak sida ti bisi diparit enggau kes jenayah. Diatu semua sekula udah bisi kaunselor ti udah diberi latih ti engkeman enggau tuduh pengawa sida. Sida mega nadai diasuh ngajar. Pengawa sida kelimpah ari ngatur kus peransang ngagai nembiak ba kelas peresa sida mega nulung pengatur sekula mutarka kes disiplin nitihka chara ti udah dipelajarka sida.

Kelab Penagang Kriminal (Kelab Pencegahan Jenayah) patut ditumbuhka ba semua sekula slalu sida mega patut proaktif agi narak nembiak sekula senentang chara nyakang ulah ti salah ari nyadi sereta mutarka penanggul disiplin di sekula.

Gerempung Apai Indai enggau Pengajar (PIBG) patut mega mantu sekula enti bisi kes buli nyadi ba sekula sida. Gerempung tu patut nyadi medium tauka pengentara entara sekula enggau apai indai. Apai indai enda tau neju pengawa buli tu ngagai sekula aja laban ulah buli tu mega tau bepun ari rumah. Pia mega raban pengajar enda ulih nganti pengawa apai indai seratus persin.

Nya alai enti apai indai bisi nerima kangau telefon tauka nerima surat ari sekula pasal anak sida, sida enda patut terus ngerijat tang nerima berita nya enggau penuh adat basa sereta ngembuan pengeliat ati sereta mega enda kelalu ngenanka tauka defensif ke anak sida empu. Apai indai patut nyerenih pekara nya dulu sereta mendingka cherita ari kedua-dua piak baik nya ari sida sekula tauka ari anak diri empu. Enti ulih iya ti manah agi nya apai indai dalam maya ti baka tu minta penemu ari raban ti bepenemu tengah hari tauka sida neutral party.  Apai indai patut mereti utai ke nyadi nya lalu enda mudah nyelampur rawang ati sida enti nya kes buli tauka semina salah sangka kelebih agi enti sida empu enda kala meda kelai buli bisi ba anak sida empu. Siti agi faktor ti patut diperatika enggau silik nya nentuka anak sida nya endang pemuli ketegal sigi bisi ngembuan ulah pemuli tauka ngetanka diri empu ngelaban orang ke buli iya.  Tauka amat enda anak nya tadi bisi penimpang (baka autisma) ke tau ngasuh iya ngembuan ulah sosial ti baka nya?

Apai indai patut betanggung pengawa mutarka penanggul buli tu enti amat anak nya tadi bisi penanggul ba ulah ukai ketegal penimpang. Hal tu mesti diputarka enggau lengkas ngambika enda nyadi besai. Nya mih kebuah, sida apai indai mesti enggau kaul ti rapit enggau raban pengajar di sekula ngambika sida di sekula ulih besaup meratika ulah ti nanggulka anak sida.

Penutup Kenang

Ngubah chara ulah anak nembiak ukai mudah. Iya begunaka awak ti panjai sereta pengawa ti bebendar tang kitai enda patut mudah nyerah alah. Beri jaku ti positif dikena ngerakka minda sida. Enti diberi timpuh ti chukup dipelabaka sida tentu ulih mujur ngubah ulah sida.

Sanding Penemu :

HealthToday July 2016

3,000 kes buli di sekolah direkod pada 2015 - Malaysiakini Berita 27 Mac 2016

Masalah Buli : Apa yang boleh dilakukan – Sinar Harian 8 April 2016

Kes buli jadi jenayah di sekolah – Berita Harian Januari 3 2015
  
Empowering Parents - www.empoweringparents.com

NoBullying.com - www.nobullying.com

Parents - www.parents.com

Psychology Today - www.psychologytoday.com

Raising Children - www.raisingchildren.net.au

The Revive - www.therevive.com

The Star - www.thestar.com.my      

Jumaat, 5 Ogos 2016

Glosari Tusun Ketiga



Pun Jaku
 
Glosari tu ngundan penerang pasal mayuh macham leka jaku enggau rambai jaku ti dikena bekenangka atur nusun jaku tauka jalai jaku dalam jaku Iban nitihka konteks linguistik. Tuju ngaga glosari tu iya nya dikena nyemakaka tauka ngetanka konsistensi (maintain consistency) jaku ti patut dikena lebuh bekenangka atur jalai jaku Iban. Dalam glosari tu, sekeda jaku ti berasal ari jaku English bisi dipasukka ditu ngambika konsep ti deka diterangka ditu tau mudah agi ditemu.

Sekeda ari leka jaku tauka rambai jaku ti dipasukka dalam glosari tu nadai dikena dalam bup sistem jalai jaku tu tang bisi dikena dalam dokumen bukai baka turai pelajar, kerembai turai pelajar enggau bup teks jaku Iban.


B

batang ayat (main sentence/ main clause)
        ayat ti nyadi pugu elemen dalam ayat turu.

benefektif (benefective)
reti sesebengkah penambah ti dikena dalam konteks ti meri penguntung ngagai orang ke nyadi penerima ba ayat nya. Chunto: penambah –ka ba ayat, Luga melika adi iya buah limau.

 D

dialek (dialect)
variasyen jaku ti dikena ba sesebengkah kandang menua. Chunto: dialek Iban Ulu Ai, dialek Iban Remun, dialek Iban Balau, dialek Iban Undup.

diftong (dipthong)
diftong nya dua vokal berimbai ti nyadi siti munyi. Chunto diftong nya: ai, au, ui /oi

 F
fonem (phoneme)
munyi jaku ti mida reti leka jaku. Chunto: /p/ enggau /b/ ba leka jaku pagi enggau bagi.

fonem injau (loan phoneme)
munyi jaku ti nadai dalam jaku Iban tang diinjau ari jaku bukai. Chunto: /f/, /v/, /q/, /x/ enggau /z/.

fonetik (phonetic)
bidang penemu ti mansik tukuh munyi ari chara nyebut, ninga enggau gaya munyi.
 
fonologi (phonology)
bidang penemu ti bekaul enggau pengawa mansik pasal  munyi jaku, iya nya munyi ti beguna ba sesebengkah jaku.

fokus (focus)
pugu pekara.

H

harmoni vokal (vowel harmony)
pekara ti bekaul enggau jalai ngena urup vokal ti setipak nitihka atur ti diterima. Chunto: u-u baka ba leka jaku buluh, pulung.

homorganik (homorganic)
sama bela munyi bilabial tauka munyi mulut atas betemu enggau mulut baruh.  Chunto: munyi /p/ enggau /m/ etb.

idiolek (idiolect)
gaya siku-siku orang mansutka jaku. Chunto: sebut iya ngentak-ngentak, retih-retih, kat-kat,katat-katat, letup-letup.

intonasyen (intonation)
intonassyen tauka munyi tinggi baruh sebut ba ayat. Chunto: intonasyen ayat tanya bebida ari intonasyen ayat penerang.