Buah Mata Kucing tauka Buah Kakus?

Buah Isau

Pun kayu Mata Kucing nya sebansa utai tumbuh ari subspesies pun Longan. Kebuah kayu tu dikumbai baka nya laban gaya enggau saiz buah tu sebaka enggau buah Mata Kucing. Buah Mata Kucing mit mimit ari buah longan. Kebuah buah tu dikumbai buah Mata Kucing laban iya bisi engkabih mata mayau.

Pun kayu Mata Kucing mayuh tumbuh ba kampung Dipterokarp kelebih agi ba sepemanjai tebing sungai ke ami sereta jauh ba menua pesisir. Pun kayu tu jelan pemesai. Mayuh pun buah tu diatu bisi ditanam ba genturung pendiau kelebih agi ba ulu sungai Rejang. Tiap-tiap kayu Mata Kucing tu ulih ngeluarkan 2,000 hingga 2,500 igi buah ninting kali musin buah.

Buah Guring

Di Sarawak bisi empat bansa buah Mata Kucing ke tebilang bendar, sub spesies Mata Kucing iya nya isau, sau, kakus enggau guring. Tiga ari buah tu tadi ngembuan kulit ke bekerutu. Buah isau bechura gadung taja pan lebuh iya udah mansau. Buah kakus bechura coklat. Buah kakus besai agi ari buah isau. Isi buah kakus lemi agi, belai sereta mipau agi ari buah isau. Buah sau nya kira tetengah entara buah isau enggau buah kakus. Buah guring ngembuan kulit ti lichin sereta bechura pirang baka buah longan ti diimport ari Thailand. Taja pia, isi iya mipau sereta belai.

Buah Kakus

Buah Mata Kucing

Buah Mata Kucing ngundan antioksidan ke engkeman dikena raban indu ke betubuh bisi. Igi buah Mata Kucing tau dikena ngubat orang ke diketup ular.

Engkilili

Pasar Engkili nya opis Pelilih Menua Mit Engkilili iya nya 56 kilometer ari pasar Lubok Antu lalu 37 kilometer ari pasar Sri Aman. Asal nama pasar Engkilili datai ari nama pun kayu ke mayuh tumbuh ba menua tu menya. Nama pun kayu nya Engkilili.

Engkilili tauka pun Ceri Terengganu tau mega dikumbai pun Johor tauka pun Perupuk. Iya ngembuan nama saintifik Lepisanthes alata. Pun Engkilili tu ngembuan tukuh ke manah kelebih agi enti diperatika ari sukut pun enggau buah iya. Kanopi iya mit, ayung sereta segala. Daun iya mayuh lalu sekeda pasang anak daun nya lunchik sereta besayap. Pemanah pun kayu tu ditambah mega enggau puchuk iya ti lemi ngelentur sereta bechura ungu puda. Asal penatai Pun Engkilili tu ari Asia Tenggara lalu mayuh ditemu tumbuh ba Semenanjung Malaysia, Jawa, Borneo enggau Filipina. Pun kayu tu suah digaga nyadika pun kayu ias laban pendiau gaya kayu tu manah dipeda.

Buah Engkilili betangkai baka buah anggur. Kulit iya manah amat baka buah ceri, mirah terang, lichin sereta beperenching. Buah tu begantung ba dan enggau ranting mit. Taja pan asai buah tu manis, isi iya nipis lalu igi iya besai. Pun Engkilili manah ditanam dikena ngiaska taman laban mayang daun iya ngerembai manah. Daun puda tauka puchuk iya bechura ungu puda dipeda manah amat lalu baka nya mega enggau bungai iya ti mega bechura ungu. Daun ti udah tuai bechura gadung, lunchik lalu ngembuan 8-12 lambar anak daun (leaflets) ba siti-siti mayang ke ulih dataika pemanjai iya sampai 50 cm. Pun kayu tu manah ditanam dikena ngiaska rampa menua laban iya ulih mega alai beteduh baka ba taman, ngelingi rumah, sekula enggau palan rama ke bukai.

Kayu Engkilili tu bebuah sepemanjai taun. Buah iya tau naritka ati laban ke betusun ba tangkai ti panjai lalu tiap-tiap tangkai ngundan 20 igi buah ti bechura mirah tuai sereta beperenching. Saiz buah tu iya nya antara 2 cm ngagai 3 cm, segala sereta lunchik ba ujung iya. Tiap-tiap buah tu ngembuan seleka ngagai tiga leka igi. Isi buah tu manis lalu bisi kelat mimit. Taja pan buah tu tau diempa tang kayu tu seruran agi ditanam ketegalka nyadika kayu ias. Buah Engkili dikerinduka burung lalu nya mih kebuah kayu tu nyadika palan ti ditujuka burung-burung tu.

Kelampai

Pun kelampai

Kala meda sereta ninga buah ke dikumbai kelampai? Nama sungai enggau nama menua bisi kala ninga baka sungai ke dikumbai Sungai Kelampai tang buah kelampai nyangka mayuh bedau kala meda sereta nemu buah tu. Nyadi sekali tu kitai deka meratika buah ke dikumbai kelampai.

Pun kelampai tu tinggi sereta iya mayuh tumbuh ba kampung ke bebukit-bukit. Buah kelampai tu besai, iya nya 5cm panjai sereta deka labuh lebuh mansau. Faktor ribut chukup beguna dalam proses ke ngasuh iya labuh. Kelimpah ari nya, faktor jelu baka kera mega mantu proses ngelabuhka buah tu. Kulit iya kering, nipis sereta lichin.

Buah tu mesti dipalu dikena mechahka kulit sereta ngulihka isi iya. Isi iya kering sereta bechura burak. Buah tu nadai igi. Buah kelampai mega ngundan mayuh asid ‘hydrocyanic’ sereta beminyak baka buah kepayang. Buah kelampai mesti direbus tauka diguring sebedau dipanduk. Iya tau mega direndam enggau ai garam tauka digaga ke tuak. Minyak kelampai ulih dikena nyadika minyak makai. Buah kelampai enti diempa mayuh sereta enda dipanduk tauka ngasuh mabuk tauka pedis pala. Kenu ku orang ke kala makai buah kelampai madahka asai buah tu asai buah nangka rebus tang ku sida buah kelampai nya nyamai agi.

Buah tu ulih dijeruk. Enti menya bisi sekeda orang nya rindu nyeruk buah kelampai tu lalu disimpan bebulan-bulan, iya nya enda ibuh disimpan dalam peti ais. Enti disimpan dalam tempayan tauka jebul ti besai ke diisika enggau ai ulih ngasuh buah tu tan lama agi.

Buah kelampai ngundan zat ti tinggi lalu kaya enggau mineral baka phosphorus, kaliam, kalsium lalu bisi mega ngundan protein.

BR1M enggau Duit bantu

Danji deka nambahka skim BR1M ngagai RM1200 sepintu bilik enggau RM600 ungkup orang ti agi bujang deka nambahka belanja menua tu ngagai kira-kira RM8 billion setaun. Dalam 2013 bajet ti udah diperambuka perintah nya RM215.6 billion lalu semina RM3 billion aja diungkup ke BR1M. Tu mih nyadika buah kenang pengarang sekali tu.

Dalam bulan September 2012, lebuh bejaku ba mua mayuh, Najib madahka tiap sepintu bilik ke nerima gaji kurang ari RM3,000 lalu individu ke agi bujang ti nerima enda lebih ari RM2,000 sebulan tau nerima bantu RM500 enggau RM250. Iya madahka, bantu tu ulih meri penguntung ngagai 4.3 juta pintu bilik sereta 2.7 juta individu ke agi bujang. Ungkup bajet tu nya kira-kira RM3 billion.

Taja pia dalam manifesto BN tu tadi madahka dalam timpuh lima taun tu ila Najib dijangka deka nambahka penyampau duit bantu tu ngagai RM1,200 enggau RM600. Tu ngujungka semua penyampau BR1M jemah ila deka betambah ngagai RM6.78 juta ninting taun. Reti nya duit agih ke BR1M tu deka mega betambah RM3.78 ungkup taun 2013.

Kelimpah ari nya, ti masuk dalam lis duit bantu tu mega nyengkaum BB1M ke diungkupka nembiak ba institusyen pelajar tinggi. Bajet 2013 ngagihka RM325 juta ungkup 1.3 juta nembiak.

Taja pia, duit agih tu deka betambah ngagai RM65 juta laban dalam manifesto BN tu tadi udah bedanji deka nambahka duit bauchar bup ari RM250 ngagai RM300 ngujungka penyampau semua tu RM390 juta setaun.

Nambahka nya mega, manifesto tu ke dikumbai Akujanji mega bedanji deka nambah duit bantu ke nembiak ba sekula. Duit bantu tu deka meri penguntung ngagai 5.4 juta nembiak lalu ungkup agih duit tu RM540 juta.

Ba pengujung kimpin tu tadi, menteri besai agi bisi besemaya deka nambah duit bantu ngagai nembiak sekula ari RM50 ngagai RM150 lalu tu deka nambahka penyampau duit agih tu betambah ari RM270 juta ngagai RM810 juta.

Enggau rintai tiga item ke udah dikenang di atas tu tadi dia perintah menua deka napi penambah ba belanja ngatur menua iya nya kira-kira RM412 billion dalam taun tu aja. Nya alai kitai ke rayat Malaysia tu semina baka puyu bedebu nutu keruh tang perintah nya ila tau disempamaka baka tuman ngereman nyungkap ambuh.

GAMAT

Gamat

Nitihka tradisional, Gamat sigi udah lama diguna raban aki ini kitai kenyau ari beratus taun suba dikena mantu ngeraika telih tauka litan udah beranak. Iya mega nyadika ai irup tonik dikena mulaika pengering, nyadika minyak untus kena ngeraika sakit urat enggau pedis bingkul isi. Kelimpah ari nya iya mega dikena ngeraika abi sengat indu utai sereta dikena ngurangka pemedis enggau kembai.

Taja pia, agi bisi sekeda individu ke agi saru enda nemu mida entara Gamat enggau Entimun Tasik

Entimun Tasik

(Timun Laut/Sea Cucumber). Gamat tu ti bendar mega ari raban famili Entimun Tasik ke alai 9 spesies ari 49 spesies Entimun Tasik bisi ditemu ba tasik ngelingi menua Malaysia. Iya ke nyelai sereta beguna amat ari sukut berubat iya nya “Gamat Emas”. Gamat tu asal ari spesies Stichopus horrens selenka nitihka pansik DNA ti digaga Kamarul, Ridzwan enggau Gires dalam taun 2010 (dulu suba iya dikumbai Stichopus hermanii)

Pendiau Gamat baka silinder lalu rata ba endur dorso-ventral. Iya nadai tulang belakang lalu tebuka ba mua enggau belakang. Mekanisma chara iya beranak betelesak nya nengah chara seksual, tauka aseksual (melah tubuh) enggau chara autotomi (kerimpak kulit tubuh iya).

Prof. Dr. Hj. Ridzwan Hashim (diatu Konsultan Gamat Emas Sdn Bhd) nya orang ke keterubah mansik Entimun Tasik di Malaysia bepun ari taun 1980an di Universiti Kebangsaan Malaysia Kampus Sabah enggau kerejasama ari Ko-Nelayan Sabah sereta mega sekeda agensi ti bisi kaul enggau pengawa tu. Kenyau ari tu, bisi mega sekeda raban pemansik ari universiti bukai ngaga pansik senentang Gamat enggau Entimun Tasik.

Prof. Dr. Hj. Ridzwan Hashim agi regas enggau pengawa tu lalu iya diatu mekuh pengawa nyadi tuai pemansik senentang pengada Entimun Tasik, pengawa ti dikereja ba baruh Geran TechnoFund, Menterian Sains, Teknologi enggau Inovasyen (MOSTI). Iya mega benung gawa nyadi Profesor di Jabatan Bioperubatan ba Universiti Islam Antarabangsa Malaysia (UIAM) Kampus Kuantan Pahang. Sebedau tu Prof. Dr. Ridzwan mega kala nguluka nyadi tuai Geran IRPA RMK ke 7 senentang Entimun Tasik ba tasik Malaysia baruh Menteri Sains enggau Teknologi (MOSTE).

Kelimpah ari nya pengelandik iya mega bisi diguna maya ngaga dokumentari senentang gamat enggau entimun tasik ke diaturka sekeda agensi perintah enggau prebet nyengkaum Filem Negara Malaysia, Opis Muzium enggau Antikuiti Malaysia, sekeda program RTM enggau TV3. Nyau deka semua surat berita Malaysia bisi ngenang tauka nulis senentang pansik ti digaga Prof. Dr. Ridzwan pasal Gamat enggau Entimun Tasik. Prof. Dr. Ridzwan diatu aktif ngiring sereta ngembing nembiak PhD enggau Master nyengkaum sida ari menua tasik. Naka kediatu iya udah ngasilka 4 buah bup senentang Entimun Tasik sereta pun penatai pemakai ari tasik.

Nitihka asil pansik iya enggau bala pangan nya madahka “Gamat Emas” nya ngundan mayuh protein, iya nya lebih 44%, 3-5% karbohidrat lalu kurang ari 2% gemu kasar. Iya ti balat merangsangka kitai nya “Gamat Emas” mega ngundan mayuh macham utai bioaktif ti manah ke pengerai. Sekeda ari tu nyengkaum asid amino enggau asid gemu, vitamin, mineral enggau iya ke bukai.

“Gamat Emas” manah amat dikena mantu ngeraika telih dalam enggau ba luar tubuh. Pansik mega madahka gamat ulih mantu nagang penyakit tungkul atau, ngurangka penyakit sup tauka kembai, nyadi ubat pengetan pemedis, nagang sereta ngurangka penyakit kemi manis sereta darah tinggi, ngurangka pedis urat, ngeraika ulser enggau gastrik sereta bisi potensi ngubat penyakit kulit. Gamat mega ngundan natural antioksidan ke nyaga ari diri radikal bebas ti bepun ari sel ti udah jai sereta penyampau iya ti majak kurang. (Dibali ari Gamat Emas Sdn. Bhd.)

Penyampau MP Dayak dalam kabinet patut ditambah

Kabinet perintah besai dikearap ulih nambahka penyampau kuota mangku pengawa nyadi menteri enggau sapit menteri ungkup Kaban Parlimen bansa Dayak ari Sarawak dalam rintai Kabinet Perintah Besai ila.

Kaban Parlimen Sri Aman, Masir Kujat madah, tu berindik ari pengundi bansa Dayak ari Sarawak agi tegap nyukung parti Barisan Nasional (BN) bepelasarka pemutus Pengawa Bepilih Besai Ke-13 (PRU13) kena 5 Mei tu tadi.

Ku iya, siti ari kebuah ke nyenggala udah dipeda iya nya lebuh Parti Rayat Sarawak (PRS) mujur ngetan kesemua enam buah penuduk parlimen enggi sida ba pelilih menua pesisir ke bisi endur sida bediri maya PRU-13 tu tadi.

Masir madah, iya sigi setuju enggau penemu Presiden Parti Rayat Sarawak (PRS), Tan Sri Dr James Jemut Masing ba surat berita kemari minta kabinet perintah besai beratika atur meri pangku pengawa menteri penuh ngagai Kaban Parlimen ari Sarawak.

“Aku sigi nyukung penemu Masing nya lalu kuota pangku pengawa nyadi menteri enggau sapit menteri ditambah ungkup Kaban Parlimen bebansa Dayak,” ku iya maya dikerandau surat berita Utusan Borneo.

Dalam PRU ke-13 PRS mujur menang semua penuduk iya ba Lubok Antu, Julau, Selangau, Kanowit, Sri Aman enggau Hulu Rajang.

Iya mega madah, atur nambahka kuota pangku pengawa nyadi menteri enggau sapit menteri nya ngambika ulih terus meri pengandal ati orang Dayak ba baris kabinet perintah BN ila.

Rayat setuju Entulu nyadi menteri penuh

Kelimpah ari penemu YB Masir, penyukung kuat parti Barisan Nasional (BN) Parlimen Selangau Ansam anak Gemang be¬setuju enggau perambu ngangkatka nama Kaban Parlimen Selangau Datuk Joseph Entulu anak Be¬laun nyadi menteri penuh ba rintai nama kabinet Malaysia.

Entulu ke mega Sapit Presiden Parti Rayat Sarawak (PRS) ngembuan peneleba dalam dunya politik sepengalama 15 taun ke udah (tu masuk penggal keempat) pengudah tembu Pengawa Bepilih Besai ke-13 tu tadi endang patut enti atur nambahka penyampau Kaban Parlimen Dayak ari Sarawak diangkat nyadi menteri penuh.

Ansam ke mega Ketuai Raban Nembiak Parti Progresif Demokratik Sarawak (SPDP) Pampang Selangau madah, Entulu patut ngisi pangku pengawa nya ari kuota PRS berindik ari sekeda menteri penuh ke sebedau tu bisi alah sereta enda dirintai nama nyadi chalun maya PRU13 tu kelimpah ti bisi peneleba nyadi Sapit Menteri Pemansang Menua Pesisir enggau Kan¬dang Mengeri.

Pia mega, pemujur iya teulihka 7,555 undi majoriti rambau PRU13 tu tadi man¬dangka iya sigi nerima sukung taja pan suba ba PRU12 iya menang ba darat tang serak tu iya betapi enggau chalun penyakal (Dato Sng ari Parti Pekereja Sarawak) ke chukup kuat.

SPDP Kota Sentosa merambuka Tiong dipadu nyadi menteri penuh

Kaban Parti Demokratik Progresif Sarawak (SPDP) pampang Kota Sentosa, ngarapka Kaban Parlimen Bintulu, Datuk Seri Tiong King Sing dipilih nyadi menteri penuh ba rintai kabinet baru perintah besai tu ila.

Chairman pampang nya, Thomas Ng arapka Menteri Besai, Datuk Seri Najib Tun Razak berundingka peminta nya, ukai ketegal Tiong dipebasaka laban iya siku orang politik tang, semina iya aja bansa China ke ngarika BN ke dipilih nyadi kaban parlimen di menua tu.

“Laban semina iya siku aja Kaban parlimen bansa China ari menua Sarawak ba perin¬tah ke diatu sereta ngembuan peneleba dalam politik, kami arap endar Datuk Seri Tiong King Sing ulih bejakuka raban bansa China ba kabinet perin¬tah besai ,” ku iya bejaku ba aum enggau pengarang berita ditu kemari.

Kelimpah ari SPDP, parti bukai ke ngarika bansa China iya nya SUPP. Taja pia, semua chalun SUPP alah magang ba semua sitak ke diuan raban bansa China baka Bandar Kuching, Stampin, Sibu, Lanang, Sarikei enggau Miri ba jari Pakatan Rakyat maya PRI 13 tu tadi.

Pengundi minta Salang dichiri nyadi menteri penuh

Pengundi Julau ngarapka Kaban Parlimen (MP) sida Datuk Joseph Salang Gandum dichiri nyadi menteri penuh.

Chairman Parti Progresif Demoktratik Sarawak (SPDP) Pampang Meluan Jerry Clement madah juluk ati nya ukai semina datai ari pampang ke dipegai iya tang ari raban gempung Barisan Nasional (BN) ke bukai baka pampang PBB enggau SUPP kelimpah ari gerempung ukai dikuasa perintah (NGO) mega udah besetuju enggau pekara nya.

Rambau Pengawa Bepilih Besai Ke-13 tu tadi, Salang menang ba Parlimen Julau ke mayuh agi diuan bansa Iban nengah majoriti 5,955 iti undi. Iya teulihka 9,891 undi ari penyampau 16, 973 undi ke belaban antara tiga sukut.

Wong Judat ari Sarawak Worker’s Party (SWP) teu¬lihka 3,936 undi lalu Andy Wong Hong Yu ari parti Keadilan Rakyat (PKR) semina bulih 2,852 iti undi.

“Kami pechaya ke Salang ti ngembuan mayuh peneleba nyadi sapit menteri iya nya keterubah nyadi Sapit Menteri Menua Luar, nang¬kanka nya Sapit Menteri Energi, Ai enggau Penyambung lalu kepenudi Sapit Menteri Pemadah, Komunikasi enggau Main Asal.

“Iya ngembuan pelajar ba Master’s degree in Business Administration ari Iran Centre for Management Studies, Tehran enggau Bachelor’s degree in Liberal Art dalam Ekonomi ari Westland Mary¬land College, Maryland, Amerika Syarikat.

“Tu mih awak ke engkeman iya diangkatka nyadi menteri penuh ketegal peneleba enggau meri basa ngagai iya laban udah mayuh bejalaika tanggungpengawa ke menua,” ku Jerry dikerandau ditu kemari.

“Tu mega deka meri basa ngagai semua penyukung BN di menua pesisir kelebih agi ba sitak Julau ke udah mantu ngetanka kuasa merintah BN di menua,” ku iya.

Kebuah bukai kena mandangka ngagai ra¬ban penyakal Salang, ke mega mandal presiden PRS nerima sukung ke kuat.

Ku iya, Salang siku tuai ke chukup tebilang bepun ari iya ke nyadi pengari rayat dalam taun 1999.

Jerry madah, awak Salang chukup besai laban mayuh raban menteri alah sereta enda dirintai nyadi chalun bediri ba PRU13 tu tadi.

“Kami setuju endar iya diangkatka nyadi menteri penuh. Iya seiku ari ketuai BN ke suah betemu enggau rayat.

“Iya enda sumbung sereta senang enggau begulai. Iya mega mayuh kaul enggau tuai BN ke bukai.

“Salang siku MP ke ulih bejalaika pengawa sereta mai pemansang ngagai rayat di Julau,” ku iya.

Riot: menteri penuh nya bonus

Datuk Richard Riot, pengari ari Serian madahka diri lantang ati enti iya dichirika nyadi menteri penuh. Iya madahka penusah mai pemansang sebedau iya dituduh nyadi sapit menteri luar laban agih duit MP nya bisi tikas. Tang udah ke nyadi sapit menteri iya bisi kuasa mimit dikena mantu rayat ba sitak iya. Iya mega madahka enti sema dichirika nyadi menteri penuh nya tau pulai ke bonus ngagai raban komuniti Bidayuh.

Dikena nyukung penemu iya nya, SUPP’s Central Working Committee (CWC) bisi udah meri sadang penemu ngagai Menteri Besai Datuk Seri Najib Tun Razak minta MP Serian, Datuk Richard Riot dituduh mangku pengawa nyadi menteri penuh.

Tang ba penemu Riot, sadang penemu nya datai ari pemutus pengawa bepilih besai tu tadi ke ngujungka semina iya siku aja menang ari Parti SUPP.

BN S’wak meri perambu lis nama menteri ngagai PM

Parti komponen Barisan Nasional (BN)Sarawak deka meri perambu lis nama Kaban Parlimen (MP) ngagai Menteri Besai (PM) Datuk Seri Najib Tun Razak, ngambika PM ulih berundingka lis nama MP nya dipilih duduk dalam kabinet iya.

Presiden Parti Rayat Sarawak (PRS) Tan Sri James Masing madahka parti nya udah merambu lis nama MP ti deka dipilih duduk dalam kabinet Malaysia ngagai PM.

“Kediatu aku bedau ulih madahka sapa nama sida ditu laban deka nukuka PM empu madah dalam dua, tiga hari tu ila,” ku iya madah lebuh dikerandau pengarang Utusan Borneo ditu,kemari.

Masing ti nyadi Menteri Kanan Sarawak mega ngarapka pangku pengawa menteri penuh deka diberi ngagai Kaban Parlimen PRS ke udah menang dalam PRU13 tu tadi.

Ba atur tusun nama baru kabinet Perintah Besai 2010 tu tadi, dua Kaban Parlimen (MP) ari PRS dipadu mangku pengawa nyadi sapit menteri, iya nya Datuk Joseph Salang anak Gandum ke mangku pengawa nyadi Sapit Menteri Pemadah, Penyambung enggau Main Asal lalu Datuk Joseph Entulu Belaun, mangku pengawa nyadi Sapit Menteri Pemansang Menua Pesisir enggau Kandang Nengeri.

Kelimpah ari nya, Presiden Parti Demokratik Progresif Sarawak (SPDP) Tan Sri William Mawan Ikom sebedau tu kala madahka iya merambu ngagai PM, iya nya Anthony Nogeh ke menang di penuduk Parlimen Mas Gading mangku pengawa nyadi Sapit Menteri lalu Anyi Ngau ke baru udah menang di Parlimen Baram sama diperambu mangku pengawa nyadi sapit menteri.

Mawan mega dipelebaka deka ngangkatka Sapit Presiden parti, Datuk Seri Tiong King Sing nyadi menteri penuh laban beratika Tiong udah lama gawa enggau parti, tambah mega Tiong nyadi MP di sitak parlimen Bintulu, sepengelama empat penggal berengkah ari taun 1999.

Ba atur tusun nama baru kabinet Perintah Besai 2010, dua MP ari SPDP dichiri mangku pengawa nyadi sapit menteri, iya nya Jelaing Mersat (Sapit Menteri Pengangkut) enggau Datuk Jacob Dungau Sagan (Sapit Menteri Dagang Antarabansa enggau Industri).

PM disadang mantaika tusun nama kabinet iya dalam kandang minggu tu.

(Penyanding Penemu: Utusan Borneo)

Undi Bansa Malaysia ngasuh ati balat enseriban

Panyun Jaku

Pengawa bepilih besai Parlimen enggau Kaunsil Nengeri udah tembu. Ke ulu ke ili, ba kedai kupi, ba laman sosial baka facebook (fb) enggau televisyen bela bejaku sereta meri komen senentang empas ari pengawa bepilih tu. Ari iya ke tinggi datai ke iya ke pengabis baruh, ari ke bepangkat ngagai sida ke diau ba menua pesisir bela ngenataika asai ati diri. Lebuh tepedaka mayuh amat komen baka ba fb enggau blog, aku ngasaika diri mit nadai tentu bisi empas enti aku meri buah kenang tang nyau kepuas ke macha enggi orang bisi ga ati deka ngerichau mimit ditu. Penemu ditu ukai ari pejal sereta empas penemu orang tang datai ari perati aku senentang utai ke nyadi ngelingi rampa pengidup aku. Semina deka enggau orang ngeruhka ai aja meri buah jaku ditu.

Batang Kenang

Undi popular dalam pengawa bepilih besai 2013 udah balat bendar meri gambar ngagai kitai senentang rebak baru Bansa Malaysia ke bisi nurun ngundi keterubah kali diperatika ukai agi ari sukut bansa taja pan ba penemu Barisan Nasional (BN), sida muntang agi nyalahka pengundi China ari ke nentuka penyerakup tauka ngaku strategi sida enda mujur.

Nyau deka sepenyampau 13.3 juta pengundi muai undi keterubah sida ba pengawa bepilih besai tu lalu balat agi ke musuh BN, Pakatan Rakyat (PR) ti besemaya deka munaska kronisme, pengawa rua bebelanja enggau makai suap.

Pengundi baru tu, mayuh ari sida nya di baruh umur 30 taun, besai maya jeman perintah Tun Dr Mahathir Mohamad, iya nya menteri besai ke pengabis lama gawa nyadi menteri besai sereta iya ke merambu Wawasan 2020 dalam taun 1991 lalu iya mih ke bejaku senentang Bansa Malaysia ti patut besemekih nengah chara meritokrasi dalam menua ke majak mansang tu.

Pengundi baru tu mega ngasuh BN lenyau tujuh lagi kerusi Parlimen enti dibanding enggau pengawa bepilih besai 2008, 133 ari 222. Ba tikas Dewan Undangan Negeri (DUN) nya balat agi. BN teulihka 275 enti dibanding PR 230 ari 505 kerusi DUN.

Pengelemi prestasi BN mandangka sida nya enda diterima semua lapis rayat Malaysia lalu ukai ketegal minoriti Cina. Tu ke bendar ukai tsunami China tauka cauvinisme bansa, tang tsunami Malaysia ti bepaksika pengingin enggau realiti baru kelebih agi raban pengundi rebak baru.

Mayuh mega penganalisis enggau raban politik ti bisi dibacha sereta didinga meri komen enda besetuju enggau teori “tsunami Cina”. Ba penemu sida tu pemayuh sereta pemansang undi popular ngagai PR nya ketegal pupu raban bansa ke milih sechara natural lalu mega ketegal ubah pemansang runding ari pengundi ba nengeri, pasar enggau sida ari kelas tengah ke meda seraka entara nengeri enggau menua pesisir di Malaysia nyau majak besai sebesai.

Topik pugu berita Utusan Malaysia iya nya surat berita ke diempu Umno madahka ”Apa lagi Cina mahu?” terang bendar nunjuk BN ngiga dalih luar lalu nguing runding sereta perati bala tuai-tuai part ari ke meda pengelemi strategi sida ba pengawa bepilih besai 2013 tu.

Pengerusi BN ke lalu nyadi Menteri Besai, Datuk Seri Najib Razak empu meri sadang penemu madahka “tsunami Cina” nya mih ke ngujungka BN alah mayuh kerusi. Tuduh penemu tu mega disambut Presiden MCA Datuk Seri Dr Chua Soi Lek lalu diteguhka enggau penemu ari tuai ari MIC Datuk M. Saravanan.

Dr Mahathir mega enggau orang bukai nyalahka orang bansa “Cina yang tidak bersyukur” enggau “Melayu tamak (bam)”, kelimpah ari ke madahka idea enggau raban strategi BN nya enda mujur.

Taja pia raban pengkritik nyakal penemu tu madahka, Dr Mahathir endang aktif bekimpin ke BN, kelebih agi mantu dua pengari Perkasa — Datuk Ibrahim Ali di Pasir Mas enggau Datuk Zulkifli Noordin di Shah Alam. Seduai tu mih ke balat ngasuh orang ukai Melayu muras laban jaku pejah seduai ngelama tu ke balat bendar rasis sereta ngeringka bansa diri.

Kedua-dua pengari tu betanding ba kerusi Parlimen ke ngembuan majoriti Melayu tang tetap mega alah. Nya nandaka penemu BN nya salah sentang China ti dikumbai sida nyadika pun sida alah.

Taja pia, penemu Dr Mahathir bisi ga betul lebuh iya nyebut senentang raban strategi BN, ke sekeda nya meri sadang penemu ngasuh ngelaban penyakal ngena chara ngenyaika tukuh tuai penyakal, ngenakut-nakutka enggau ngegapka sereta ngeleseka manifesto PR ngena mayuh macham media enggau ruang iklan.

Nyalahka DAP labah ulih nguing runding pengundi nya nunjukka raban strategi DAP nya pintar agi ari sida ke ba BN. Raban strategi BN tu semina deka ngelalaika fakta senentang nembiak Bansa Malaysia rebak baru ukai nyalahka China aja ke enda ngundi sida.

Endang amat muntang enti kitai nyalahka pengundi enggau parti bukai tang fakta nya kereban pengawa bepilih besai kitai empu ke enda nyadi laban enggi PR nya manah agi. Jentera PR kiraka manah agi laban sida bejaku senentang isu-isu enggau kaul entara raban bansa. Tu ke tau dikira balat mantu sida ngulihka pengundi.

Bansa China nya 28 peratus ari 29 juta penyampau tubuh di Malaysia, lalu kurang ari separuh sida tu ngerijista nyadi pengundi. Taja pan ari penyampau pengundi nya mimit, Suruhanjaya Pilihan Raya (SPR) madahka peratus keluar ngundi bisi mechahka rekod datai ke 84.84 peratus.

Ari penyampau pengundi nya, BN teulihka 5,237,699 undi ke 222 kerusi Parlimen dibanding enggau parti Pakatan Rakyat ti ngumpul 5,623,984 undi.

Gerempung tiga parti PKR, PAS enggau DAP nya mega ngalahka BN dalam undi di Dewan Undangan Negeri (DUN) lebuh sida teulihka 4,879,699 undi dibanding enggau gerempung 13 parti nya ke teulihka 4,513,977 undi.

Penutup Kenang

Nya ga gaya buah kenang aku senentang pengawa bepilih besai parlimen ke 13. Ngagai sida ke menang kitai meri sida tabi puji lalu berengkah mih merambuka pengawa ke deka dikereja. Bekereja ke rayat, munyi ku jaku dalam pengarap Kristian ‘to serve not to be serve’. Ngagai sida ke udah mujur megai tampuk perintah laban bisi kuasa perintah, bejalaika pengawa perintah enggau rentang, nadai niki nibung nadai niki pinang. Keamatka semaya enggau danji sebedau pengawa bepilih besai laban enti kitai merintah, kuasa ba jari kitai. Ngagai sida ke alah anang mih putus pengarap, atur strategi baru dalam timpuh 5 taun ke deka datai tu enti agi bisi ati deka enggau orang ngeruh ai nyadi pengari.