Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Rabu, 14 Jun 2017

Nguji Pengelandik Macha Tusun Kesatu



1.           Tuju Macha Sengian

Macha sengian bebida ari macha inggar ari sukut guna maya bekomunikasyen. Macha inggar dikena ngenataika sesebengkah pekara tauka komunikasyen lalu tuju macha sengian nya dikena nerima sesebengkah pekara tauka komunikasyen.

Frank Smith (1980) midaka dua bansa pengawa macha chara sengian. Macha bansa tu ngembuan tuju ti nyemetak (bacha befungsi) enggau macha tuju beperindang. Nitihka Smitih, macha ti ngembuan tuju nyemetak nya baka dikena lebuh ngulihka penerang maya orang nya macha bup direktori telefon, diksionari, ensiklopedia, bup atur sepil, buku sama reti, bup teks enggau kereban ti bukai. Machatuju beperindang iya nya dikereja dikena ngisi maya lepa, lalu tuju iya lebih ngagai beperindang tauka ngerinduka ati aja. Pengawa macha tu baka macha bup cherita, novel, leka main, jerpan, surat berita, majalah ekb.

Louise Rosenblatt (1978, 1980) midaka dua bansa bacha tu ngena terminologi ke dikumbai iyadiffirent reading (bacha befungsi) enggau aesthetic reading (bacha tuju beperindang).

Pekara ti pengabis berat dalam kedua-dua pengawa macha nya ari aspek meretika teks ti dibacha.   Aspek meretika teks kala dikumbai ‘meretika runding penulis’, ‘meretika kereban ti dibacha’, ‘nerima komunikasyen’ tauka ‘betatika penerang ari teks’. Nya kebuah, tuju kitai nguji pengelandik macha sengian iya nya dikena nguji aspek meretika kereban bacha nya.

Uji peratika objektif macha ba Kurikulum mata pelajar Bahasa Iban sekula sekondari (KBSM). Ba pengujung pengawa ngajar enggau belajarka Bahasa Iban di sekula sekondari, nembiak disadang nemu meretika isi mayuh macham kereban ti dibacha, macha lalu meri respons ngagai kereban tulis tradisi enggau moden. Ba pom empat, sida dikarapka ulih macha teks ti mayuh tingkat jaku enggau bidang sereta ngena mayuh teknik macha lalu meretika penerang enggau chara ti efektif. Sida mega dikarapka ulih macha kereban litericha enggau akademik ke tuju beperindang lalu ngaga analisis karya ari mayuh aspek.

2.           Nguji Tikas Pemereti Macha

Endang enda ulih diseliahka penemu ti madahka meretika sesebengkah pekara nya pugu pengawa belajar. Tu sigi amat, sekalika pelajar nya diulih nengah chara mending tauka chara macha.  Guna nembiak meretika pekara ti dibacha di sekula tauka ba luar sekula enda ulih disekat ngagai semina macha bup teks aja tang patut mungkur macha kereban bacha ti bukai. Aspek macha sereta meretika teks ukai mega semina ngagai tibak teks nya aja tang iya mungkur  kesemua mata pelajar dalam kurikulum. Kelimpah ari macha bup teks mata pelajar jaku Iban ambika banding, nembiak mega patut macha sereta meretika bup teks dalam bidang ke ngumbuan isi pelajar (content areas) ti nyemetak baka mata pelajar sejarah, geografi, sivik, ekonomi. Sains, matematik etb.

Nitihka pansik ba tikas sekula sekondari, ambika banding ba pom 4, ari 10 mata pelajar ti dipelajarka sida nembiak sekula nya, 80% ari nya ngundan isi penemu ba subjek ke baka ke udah disebut tadi. Nya alai pengawa tu sigi realistik sereta beguna amat dikena raban pengajar ngelatih sereta nguji pemereti nembiak sentang teks ti dibacha sida lalu ukai semina macha kereban ti bekaul enggau budaya enggau litericha aja. Kereban bacha ti dikena ungkup latih enggau nguji nya mesti ngayanka sida ulih napi  penguji sereta pemereti macha bup teks dalam bidang isi pelajar subjek ti dipelajar sida di sekula. Reti nya kereban dikena ngelatih sereta nguji macha sereta meretika teks mesti ngundan sampel ari mayuh bengkah teks mata pelajar di sekula lalu enda ditatak ngagai tema budaya, litericha tauka pekara selama ti kala didinga aja tauka iya ti udah ditemu sida nembiak. Kereban bacha ti semina fokus ngagai tema memarin, lumba sekula, hari apai indai lalu pekara ti semina datai jengkau ukai semina ngasuh nembiak leju tang pekara nya udah kala didinga sida sereta nadai ngeruga runding lalu mega enda realistik enggau pengawa sida ti patut macha mayuh macham penemu. Nya kebuah teks bacha mesti mungkur mayuh macham disiplin penemu. Nangkanka tu kitai meda kaul antara taksonomi pelajar enggau taksonomi meretika kereban bacha (reading taxonomy) dalam konteks macha enggau belajar sereta dalam konteks macha sereta meretika teks.

(a)        Taksonomi Belajar

Benjamin Bloom (1956) kala ngeluarka siti taksonomi belajar dalam bidang kognitif. Nitihka Bloom bisi enam ringkat pelajar iya nya ari ke pengabis baruh ke ringkat ti pengabis tinggi. Ringkat nya baka ke ditusun di baruh tu:

(i)
Knowledge (Penemu) :
pengulih ngingatka fakta, terminologi, definisyen, fomula, prinsip etb.
(ii)
Comprehension (Mereti):
pengulih ngalihka idea ari siti-siti tukuh ngagai tuku ke bukai.
Ngaga interpretasyen, meda kebuah enggau empas etb.
(iii)
Aplikasyen:
(Guna)
pengulih ngena formula rama enggau prinsip situasyen ti nyemetak
(iv)
Analisis :
(Ngaga Analisis)
pengulih ngaga analisis tauka mechahka sesebengkah pekara (konsep, idea. Penanggul etb.) ngagai komponen ti beguna ngambika terang lalu ulih dipeda kaul entara pekara nya.
(v)
Sintesis:
pengulih ngatur sereta nempa penteba tauka fakta ngambika ulih meda imej konsep, idea, penanggul etb.
(vi)
Evaluation:
(Meri timbang penemu)
pengulih ngakim sesebengkah pekara (fakta, konsep, idea, faktor, penemu etb.) ari sukut penemban pengamat pekara nya.


Taksonomi Belajar Kognitif baka ke udah diterang tadi suah agi dikena pengajar milih sereta ngatur objektif ngajar enggau belajar dalam bidang mata pelajar sains, matematik, geografi, sejarah etb. Taksonomi nya mega semampai dikena raban penguji nguji sereta nyukat pengulih ngajar enggau belajar baikka iya nya semitan tauka enda. Konsep Taksonomi Bloom luas agi ari konsep pelajar  nengah pengawa macha laban konsep tu  mungkur konsep belajar nengah chara bukai baka licha, tutorial, demonstrasi etb.

Bisi mega penemu ti madah Taksonomi Belajar Bloom tu semina engkeman dikena ngajar enggau belajarka pekara ti bekaul enggau content areas aja lalu engkeman enggau mata pelajar bukai baka sejarah enggau geografi. Kelimpah ari nya, bisi mega penemu ti madah Taksonomi Bloom nya engkeman agi dikena ngajar, belajar enggau nguji ba tikas tinggi baka ba sekondari, kolej enggau universiti lalu enda engkeman dikena ba sekula pra tauka sekula primari.  Nya alai mayuh raban akademik bekelikuhka pekara tu lalu nya kebuah taksonomi tu bisi diubah nitihka segang pemansang pelajar dunya. Raban akademik ari bidang jaku ke bukai baka Holy (1971), Glen (1977) enggau Rowntree(1979) bisi mantaika siti taksonomi ke dipikir sida engkeman ba nama-nama bidang mata pelajar.

(i)
Ngingatka baru:
fakta tauka prinsip
(ii)
Guna:
nemu nguna fakta tauka prinsip maya mutarka penanggul
(iii)
Milih :
milih sesebengkah pekara ti manah ari semua fakta tauka prinsip ti ditemu dikena mutarka penanggul
(iv)
Nempa petua:
nempa tauka ngasilka petua tauka formula ari peneleba mutarka sesebengkah penanggul ngena fakta enggau prinsip ti ditemu nembiak

(b)        Taksonomi Meretika Teks

Taksonomi Bloom (1956) nadai nentuka enggau nyemetak ngagai pengawa belajar nengah chara macha aja. Nya kebuah taksonomi tu jarang dikena terus dalam pengawa nguji macha sengian. Raban dalam bidang belajar senentang jaku udah nguji sereta ngubah Taksonomi Bloom ngambika engkeman agi  dikena nitihka konsep meretika kereban bacha lalu ukai semina  ngagai konsep belajar chara rama aja.  Nya kebuah iya begunaka model taksonomi ti kediri ke meri fokus ngagai mayuh renggat pemereti ti bisi ayan dalam sesebengkah teks tauka kereban bacha. 

Asil ari penemu tu  lalu bisi sekeda model taksonomi meretika teks dikeluarka Frank Smith (1969), Barret (1972), Lamberg & Lamb (1980) enggau sekeda raban ke bukai nyentuk ke sehari tu.  Nitihka Frank Smtih (1969), meretika kereban bacha ulih dibagi ngagai empat peringkat iya nya literal, interpretation, critical and creative evaluation. Nitihka Barret (1972) iya dibagi ngagai lima peringkat, iya nya literal, conclusion(simpul penemu), interpretation, evaluation enggau appreciation. Nitihka Lamberg & Lamb (1980), meretika kereban bacha ulih dibagi ngagai tiga tikas pemereti iya nya mereti chara literal, interpretation, critical enggau creative.

Ari tiga chunto taksonomi pemereti macha nya tadi, terang bendariya ngayanka pekara nya bisi dipeda sebaka sereta bebida ari sukut tikas taksonomi nya empu. Kebuah pia, laban iya bepelasarka teori sida empu nya kebuah enda tentu mudah alai kitai ngayanka pengamat sesebengkah taksonomi nya. Taja pia, raban pengajar ulih milih model taksonomi pemereti teks ti dikira engkeman enggau diri empu tauka iya ti praktikal dikena maya dalam bilik kelas.

Uji kitai beratika siti ari taksonomi tu ti diambika chunto kitai lalu meratika chara kitai ulih nanya tanya ti ngujika pemereti nitihka tikas-tikas pemereti:

(i)
Mereti chara literal:
pengulih meretika jaku ti reti ti nyata dalam teks. Tanya selalu bepun enggau leka jaku baka: nama, sapa, kemaya, dini, cheritaka etb.
(ii)
Mereti chara interpretation:
pengulih ngaga interpretation lalu meretika jaku ti ngembuan reti besilup. Tanya selalu bepun enggau leka jaku baka: lapa (nama kebuah), baka ni, terangka, banding sereta bida, ba penemu nuan etb.
(iii)
Mereti chara kritis-kreatif:
pengulih ngakim sereta meri pemutus penemu senentang penerang, idea, penemu, tuduh penemu etb lalu ngasilka idea tauka tuduh penemu baru senentang sesebengkah pekara ti udah dibacha nya. Tanya selalu bepun enggau leka jaku baka: kelikuhka, nama simpul penemu, nama utai ti tau nyadi etb.

...betampung


Ahad, 21 Mei 2017

Pangka Globalisasyen



Pemuka Kenang

Globalisasyen nya sebengkah proses ti nempatka dunya tu ba baruh siti unit ti sama sereta nadai disekat ari sukut aris entara menua enggau penuduk geografi sesebengkah menua. Nengah proses tu mega dunya nadai agi dipeda ari sukut aris entara menua lalu langit sesebengkah menua mega nyau sedandang tebuka ke alai mayuh macham informasyen ulih disadung nengah media komunikasyen baka internet, media eletronik tauka teknologi siber. 
 
Batang Kenang

Globalisasyen ukai sebengkah fenomena baru ti semina nyadi maya abad ke-21 tu, tang udah lama bisi dalam rampa pendiau mensia mayuh. Taja pia empas iya chukup mimit suba. Diatu  globalisasyen nyau majak balat sebalat sereta nyata amat dipeda dalam semua aspek pengidup mensia.

Dalam dunya nembiak sekula, ambika chunto, globalisasyen mega dipeda sebengkah ari transformasyen ti nyangka ngasuh mayuh bengkah singkang proaktif udah sereta ulih dipejalaika.  Tuju tu dikena nentuka nembiak menua tu empu tauka nembiak lokal ulih besemekih sereta besedia napi mayuh macham penguji.

Taja pan bisi sekeda orang ngumbai ubah ti dipejalaika nya bisi dipeda kelalu drastik, tang kebuah pia dikena nentuka nembiak lokal ulih besemekih enggau orang bukai. Nya mih kebuah pengawa tu patut dikereja enggau nadai betagai.

Munyi ke udah disebut, transformasyen nya patut dipejalaika dikena nentuka sektor pelajar menua kitai ulih berumpak enggau orang ari menua luar nitihka peminta globalisasyen. Enggau tu iya lalu ulih ngangkatka sektor pelajar nya ngagai tikas ke dinamik agi.

Rukun Pelajar Menua tauka Falsafah Pendidikan Negara ngemeratka aspek pelajar nya  dikemeran sepemanjai maya lalu iya ulih ngerembaika penemu enggau pengelandik individu ti mungkur semua pekara sereta dipejalaika ngena chara integrated. Tuju Rukun Pelajar Menua mega dikena nempa mensia ti setimbang sereta harmonis ari sukut intelek, pengarap, emosyen enggau selangkuh tubuh bepelasarka pengarap  sereta semampai beseruanka perintah Tuhan. Kelimpah ari nya, iya mega dikena nempa rayat Malaysia ti bepenemu, ngembuan seregah diri, ngembuan ulah manah, bisi tanggung pengawa lalu ulih nyapai pengelantang diri sereta ngenjuk pemeri ari sukut pemaik ngagai mensia mayuh tauka menua.

Nya kebuah iya ngemerat sektor pelajar laban nya mih platform ti beguna amat ukai semina dikena ngasilka modal mensia tang mega mungkur penemu sereta ulah. Dalam aspek pelajar, globalisasyen mai pangka enggau ubah ti besai nengah kurikulum pelajar sereta mega sistem pelajar nya empu.

Arus kuing globalisasyen nudukka sistem pelajar tu nyadi penanda tikas pemansang sesebengkah menua lalu enti iya enda tejapaika kualiti, sistem nya nyangka dikira enda ulih besemekih enggau menua bukai. Taja pan ari sukut polisi sigi pedis deka ngulihka kualiti pelajar ti betikas antarabansa, tang iya mesti dikereja nitihka peminta globalisasyen ba bidang pelajar.

Dikena nentuka kitai enda tinggal tauka ngaga sektor pelajar menua ti bekualiti agi, mayuh ubah patut dikereja tauka diaduka baru. Sekurang-kurang iya dikena nentuka tikas pelajar kemaya hari nitihka standard antarabansa ketegal iya mega ulih meri empas ngagai belanja belajar jemah ila.

Enti standard globalisasyen enda dikemeratka sepemanjai maya iya enda sengaja tau meri empas ngagai rebak baru ari aspek peluang bekereja, kualiti pelajar, pengulih bejaku, spritual enggau selangkuh tubuh. Nya kebuah, tanggung pengawa ngiring sektor pelajar menua ngambika sama-sama seriran enggau globalisasyen pelajar antarabangsa nyadi tusah dikereja taja pan iya mesti dipejalai ungkup pemanah jemah ila. Taja pan pia, di tengah pengeranchak transformasyen bisi mega empas positif tauka negatif ti deka ditapi.

Institut pelajar tinggi baik nya enggi perintah tauka prebet ulih muka peluang ti besai ngagai nembiak ari menua luar kena sida ngauk penemu di menua tu. Besenutuk enggau nya, mayuh bengkah perengka-guna enggau kereban pelajar patut disediaka tauka dikemanahka agi nitihka guna kemaya hari tu. Tu ke nyadika sistem pelajar menua regas mansang ari selama. Penatai nembiak ari menua luar ngayanka reti sistem pelajar menua kitai udah datai ba tikas antarabansa. Pekara tu ulih meri peluang alai besilih budaya entara nembiak menua tu enggau nembiak antarabansa sereta ulih nempa kaul ti manah entara kedua-dua menua. Nambahka nya pengelandik enggau penemu teknologi ulih dipindah ke menua tu nengah chara beambika raban ke tebangkar ari menua luar.

Taja pia, enti dipeda ari sudut negatif, penatai nembiak ari menua luar mega  disempulang enggau budaya ari menua asal. Hal tu enti enda ditapi enggau silik dia sekeda elemen ti enda manah mega ulih nyelepak tama ke menua tu. 

Beserimbai enggau nya, iya mega mai empas ti negatif laban iya tau ngasuh sistem pelajar menua berubah-ubah nitihka pemansang arus globalisasyen. Tu tau ngirauka ati laban tau ngasuh pekara ke enda setimbang nyadi enti sema sesetengah hal globalisasyen dipeda enda ulih diterima genap lapis komuniti.

Pekara tu tau nyadi, ambika banding, enti komuniti nya agi benung ngemansangka sistem penerang sida, kurang akses ngagai menua luar, teknologi agi ba tikas baruh, tikas pelajar baruh, enda tentu landik ngena jaku menua bukai kelebih agi jaku English sereta raban ke tebangkar dalam ngemansangka sistem pelajar menua ke enda chukup.

Arus globalisasyen ti semampai berubah mega ulih meri empas ngagai identiti nasional laban sistem pelajar berubah ketegal peminta sida ari luar lalu ukai ketegal peminta sereta guna pelajar maya dia ba menua nya empu. Nya alai, mayuh macham rapat langkah proaktif, perambu timpuh pandak tauka panjai enggau perambu ke bukai patut diatur sereta dipejalaika dikena ngangkatka pengulih sektor pelajar menua kitai ngambika ulih nerima globalisasyen tu.

Utai ke balat ngirauka ati nya lebuh globalisasyen tu empu diperatika ulih nguingka runding mensia mayuh lalu ngujungka pelajar nya balat agi dipedagangka kitai tauka udah datai ba tikas komersial. Kebuah pia, laban bisi orang ke ngaga pelajar nya nyadi kereban alai beambi-ulih sereta ngira untung. Tu mih ke deka mai pengerusak ngagai bansa enggau menua jemah ila. Enti kitai kelalu ngira untung dia kualiti pelajar deka ditempaya pia aja lalu ngujungka atur ti lunggar lebuh nerima nembiak masuk, pengelicha enda ngembuan pengelandik ti chukup, kualiti pelajar ti enda diintu enggau manah, perengka-guna ke enda chukup, kurikulum ti enda nyeratan sereta enggau mayuh pekara ke bukai.

Kelimpah ari nya, iya ke dikenakutka kitai mega pengawa belematika penemu dalam raban nembiak nyau majak kurang laban sida nuntut penemu semina ketegal deka pas peresa aja lalu ukai ngena penemu nya dikena nempa pengidup jemah ila.

Penutup Kenang

Kitai enda ulih lari ari nerima impak globalisasyen taja pia kitai patut landik napi pekara nya. Iya begunaka pemintar dikena nentuka impak globalisasyen nya enda nempaya utai ke udah bisi lalu enda mega ngelepaska peluang ti patut diperebut ungkup menua kitai jemah ila.

Khamis, 11 Mei 2017

Empas bebaika gajet ke sekula



Tuduh penemu Opis Menteri Pelajar ti deka ngemendarka nembiak sekula bebaika gajet baka telefon pintar, tablet enggau komputer pangku ke sekula patut dipansik enggau dalam agi ari sukut chara kereban tu diguna. Iya mega patut mending penemu raban pengajar, apai indai sereta sida bukai ke relevan sebedau ngaga pemutus penemu ngemendarka kereban tu dibai ke sekula.

Menteri Pelajar apin lama ti udah madahka tuduh penemu nya setipak enggau guna teknologi tinggi dalam mayuh bengkah sektor nyengkaum ba sukut pelajar.

Ba penemu aku perintah patut meratika baru tuduh penemu tu enggau lenak agi laban iya tentu bisi pemanah enggau pengurang enti sema iya dikemendarka ila. Sigi amat kereban gajet tu beguna amat laban iya ulih ngemudahka proses belajar laban nembiak ulih bulih penerang semina ari ujung tunjuk.

Nengah bantu teknologi pemadah mega nembiak ulih nambahka pemereti sida senentang sesebengkah pekara ti diajar dalam kelas. Taja pia, enti tuduh penemu tu deka dipejalaika ila, perintah patut nentuka bisi malin sereta atur ti terit ke patut dititihka nembiak.

Malin atur tu ditempa dikena nentuka nembiak enda nyalahgunaka kereban ti disediaka perintah ngujungka iya tau ngerusakka runding enggau ulah sida. Raban ari opis menteri mega patut netapka orang ke patut ngemataka kereban gajet tu.

Ba pekara tu, tentu raban pengajar mih ke diberi tanggung pengawa ti berat tu taja pan kitai nemu sida enda patut dilempai enggau siti agi pengawa besai. Besenutuk enggau nya mega, sapa ti patut nyediaka kereban gajet tu ila laban enda semua nembiak sekula ulih meli kereban ti mar baka tu.

Enti nembiak enggau apai indai empu milih gajet ke deka sida, tentu ba sekeda ke mayuh penatai pemisi deka mai model ke mar sereta ke baru. Tu tau meri empas ti enda manah ngagai nembiak ke apai indai sida kurang penatai pemisi.

Kelimpah ari nya mega, tau nyadi kes enchuri enggau penanggul disiplin ti bukai. Enti perintah tauka sekula diberi tanggung pengawa nyediaka kereban gajet tu, pekara bekaul enggau kos tau nyadika penanggul besai laban naka kediatu bisi kurang lebih lima juta nembiak sekula di serata menua tu.

Nya kebuah, tuduh penemu tu patut dipansik enggau dalam agi. Raban ari Opis Menteri Pelajar patut betemu sereta ngaturka randau enggau Gerempung Pengajar Nasional sereta enggau Gerempung Apai Indai Nembiak enggau Pengajar di serata menua tu.

Taja pan tuduh penemu tu manah amat, kitai tentu enggai napi penanggul maya pekara tu deka dipejalaika ila laban nangika perintah diansak narit pulai pemendar nembiak mai sereta ngena gajet di sekula.