Konsumerisma enggau Finansial: Napi Peminta Anak Ke Baru Angkat Diri Bujang Tusun Keenam

Wat Tim minta sebuah papan lanchar tauka skate board tang indai iya enggai melika iya. Jang Lebis dekaka sepasang kasut main bol chap ke tebilang sereta mar rega tang apai iya enda setuju. Inu minta elaun ninting bulan iya ditambah tang apai indai iya enda nerima peminta iya. Semua sida tiga tu nembiak ke baru ngangkatka diri bujang enggau dara.

Di atas nya tadi sekeda chunto peminta sekeda ari bala anak kitai ke baru ngangkatka diri bujang. Nangkan tu aku deka ngena terma anak bujang dikena ngemudahka randau passal pekara tu. Ba konteks artikel tu anak bujang nya anak ke baru ngangkatka diri bujang tauka dara. Bisi orang ngumbai baru lanjau tang nya udah dikira jaku dalam.

Nembiak maya tu taja pan dipeda udah besai tang agi bisi sekeda ke enda meretika kebuah apai indai sida bekira amat enggau duit. Baka nya mega bala apai indai enda meretika kebuah bala anak sida taja pan udah bisi segala macham utai diberi ngagai bala anak agi ga sida semampai minta utai ke baru.

Situasyen baka tu ulih ngenataika penanggul tang apai indai enggau bala anak enda ibuh betalatka pasal duit. Bekompromi enggau bediplomasi nya chara mutarka pekara tu enggau manah. Kedua-dua piak, baik nya apai indai tauka anak, endang  patut sama-sama mending  sereta duduk betunga mua berandau dikena mutarka pekara tu.

NAMA KEBUAH ENDA NERIMA PEMINTA ANAK BUJANG

Duit nyangka nyadika pugu kebuah apai indai enda nerima peminta anak bujang sida. Taja pan pia hal tu enda seruran nyadika dalih sida apai indai. Apai indai berunding baka nya ketegal diperansang tanggung pengawa sida ngiring sereta ngemesaika bala anak sida ungkup diri anak sida empu mega jemah ila.

a. Suntuk duit

Enti duit semina chukup ungkup meli barang ke patut aja genap bulan dia barang bukai ke mar rega tauka peminta elaun tambah enda ulih diberi. Apai indai enggau bajet ti rapas nya bepikir enti sida ngena duit belanja bukai dikena meli kasut mar, sida nadai jalai bukai lalu dipejal netak duit belanja bukai. Enti anak nya sigi begunaka amat ke sepasang kasut tentu apai iya tetap melika iya kasut tang ukai ke mar rega sereta iya ti enda berat ba bajet sida sebilik.

Sekeda apai indai bisi ke ngasaika sida bebelanja mayuh ungkup anak bujang sida taja pan iya ti bendar nya sida enda begunaka utai ke baru maya nya.

b. Nerenak Ajar Manah Ba Nembiak Bujang

Duit ukai nyadika dalih apai indai madahka diri, “enda tau”. Bisi maya iya disebut ketegal apai indai deka ngajar rukun pendiau ti manah ke dalam runding enggau ulah bala anak sida ke baru ngangkatka diri bujang nya. Ambika banding, ajar baka bekelimat, bebelanja enggau jelan sereta enda kelalu materialistik tauka enda ibuh mih nitih trend fesyen kemaya hari nya sekeda chunto dikena nerenak ajar manah ngagai bala nembiak.

c. Nangika pengelikun anak

Siti agi kebuah nya faktor pengelikun. Ambika banding, indai Wat Tim nyangka ngumbai bemain papan lanchar nya main ke tau nganu anak iya.  Endangka baka iya, bisi apai indai ke nangika anak sida bakal lebuh bemain.

Enti apai indai nerangka ngagai anak kebuah sida enda nerima peminta sida nyangka anak nya tadi ulih nerima dalih apai indai sida, mantah tauka mutap baik nya di mua tauka di belakang. Tang sekurang-kurang iya nemu kebuah apai indai enda nerima peminta iya nya tadi.

NYAPAI KOMPROMI

Apai indai balat gaga sereta lantang ati enti bala anak sida kepengujung iya setuju enggau penemu apai indai sida. Ngulihka sesebengkah utai ti mar lalu udah nya enda tentu dikena nya utai ti dikira masau tauka ngeruaka belanja tauka main nya empu ulih ngasuh diri sida pedis tauka bakal. Taja pia, enti bala anak agi ngumbai apai indai sida enda rasional dia apai indai mesti ngiga jalai bukai mutarka pekara tu, iya nya meda pekara nya ari sukut sida nembiak empu.

Bala nembiak nyangka nemu, bala tawing sida enda tentu ibuhka fesyen gari tauka imej sida. Tang sida enda meda penusah ti tau nyadi enti nunda budaya befesyen ti mar tauka bemain main ti tau ngasuh diri bakal.

Nya alai, apai indai enggau anak sida enda ulih enda belajar bekompromi enggau pangan diri kelebih agi iya ti bisi kaul enggau duit.

·         Begiga model ti murah agi

Ba penemu apai indai Jang Lebis kasut dikena bemain nya semina sepasang kasut main, tang ba Jang Lebis iya lebih ari nya. Nyangka ba penemu Jang Lebis mar agi rega kasut reti nya kasut nya manah sereta tan. Iya ti bendar Jang Lebis enggau apai indai ulih bekompromi ngiga kasut main ti bejenama tang model ke murah agi ari selama.

·         Bekunsi kos

Enti nembiak dekaka sesebengkah barang ngujungka iya sanggup bekunsi mayar ngena duit kuchik iya empu dia apai indai ulih berunding baru senentang pemutus penemu sida ke dulu agi ari tu.

Bekunsi kos semina semitan tauka efektif enti penanggul nya bisi kaul enggau duit tauka apai indai nya nadai ngayanka pengerindu ngagai utai ke dipinta anak sida. Bala anak ke besedia mayar sebagi ari kos barang nya ngayanka ngagai apai indai sida pemesai reti barang nya ba sida.

Taja pia, chara tu bisi tekat. Ba sekeda apai indai bisi barang nya enda dipeda beguna ba runding sida taja pan anak sida sanggup mayar semua kos nya.

·         Begiga informasyen

Apai indai patut nerang ngagai anak sida madahka dalih ‘semua orang ngembuan mayuh agi’ nadai mai reti kini-kini. Bisi apai indai ke enda rinduka enggau  chara baka tu.

Enti bala anak dekaka elaun ditambah, chara iya ukai ngena chara madahka bala tawing iya bulih elaun lebih ari iya tang patut ngerintaika belanja lalu madahka rasional elaun nya patut ditambah. Nembiak patut ngaga rintai pengechik laban nya ukai semina ngasuh sida nemu baka ni penggemar sesebengkah barang nya tang mega ulih mantu sida minta elaun ditiki enggau chara ti patut.

Kadang-kadang utai ke dipinta bala anak ukai nya bangat mar baka ke dipikirka bala apai indai. Ambika banding, enti bala anak sida bisi nyidi dulu ba sekeda kedai, nyangka sida bulih barang nya ti berega murah kelebih agi enti maya bisi promosyen tauka hari ‘jual gudang’.

·         Besimpan

Enti bala anak dekaka sesebengkah barang, sida patut belajar nyimpan duit. Anak bujang ke ulih gawa sambil tauka gawa maya kemisi sekula patut diberi apai pemendar ari apai indai sida.

Enti pekara tu enda ulih dikereja, chara ti pengabis manah nya nyimpan duit ari elaun sekula ke diberi apai indai, ukai melanja duit nya. Tu ulih diaturka enti sida mai pemakai ari rumah.

·         Hari pengada

Besedia nganti barang nyadika perais maya hari pengada enggau pengeliat ati ulih mantu bala nembiak ngayanka pengelurus ati sida. Tang enti hari nyadi nyau semak, sida ulih minta bala bukai dalam diri sebilik ke selalu meri perais nya bekunsi duit enggau apai indai dikena ngulih perais ti nyelai nya.

PENUTUP

Apai indai patut mikirka chara bekompromi. Enti bala anak enda rindu uji chara ti bukai tauka bekompromi. Ambika banding, dikena malas basa apai indai ke meri sida elaun ti mayuh asuh bala anak meli mayuh agi barang ke suah dibeli apai indai ke sida.

Taja pia, enti kedua-dua piak enda besetuju enggau pangan diri dia bala anak patut minta hal nya enda dikeibuhka. Sebagi ari proses ngangkat diri besai nya nerima realiti nama-nama aja ke dipinta. Bisi hari jemah ila tentu sida ingat sereta beterima kasih ke penemu apai indai sida nya.

Konsumerisma enggau Finansial: Duit enggau pengidup maya umur agi biak Tusun Kedua

Apai indai suah ngayanka penyayau sida ngena chara ngandaika anak sida. Sida nunda ku jaku orang tuai nyadi orang senurut aja nitihka pengeka anak sida; baka kereban ayam, pemakai ti mar, TV, kereban main video, gari benama mar, telefon binching. Iya ti bendar bala apai indai berasai tusah begiga sereta besimpanka duit.

Apai indai patut nyikap anak sida napi mayuh leman penanggul dideka ditapi sida jemah ila. Entara penanggul ti besai bendar iya hal duit. Kelimpah ari nyediakan bala anak enggau penemu, hal mina duit mega patut dikemeratka apai indai. Bala anak patut diajar ari biak senentang chara mina duit.

Duit kenu ku orang, - enda ulih idup enti nadai duit. Ngembuan duit ti mayuh ulih ngelantangka ati kitai tang penyilap mina duit ulih ngasuh kitai tusah. Uji nanya sida ke kala digagai along tauka tauke ke alai sida berutang. Sida ke digagai along semampai irau ati nangika kerita, rumah tauka keresa bukai diambi pulai. Tentu utai baka tu ukai utai ti dikedekaka bala anak kitai.

Penanggul hal duit bedau datai ba adan taja pan kitai enda ngembuan mayuh duit. Raban ti kaya raja mega enda lepas ari penanggul baka ketegal penyilap mina duit. Tu tau ngujungka orang nya dipanjuk utang.

Ba sida ke apai indai, senario hal ti bekaul enggau duit udah jauh bendar bebida ari maya jeman sida menya. Ambika banding, kitai enda kala betapi enggau mayuh bengkah bank ke ngumbuk kitai ngena kad kredit sida. Kemaya hari tu kitai ulih meli barang ngena chara pupuk enggau enda ibuh mayar duit panjar.

Enti kitai enda nyikap bala anak napi dunya kredit ti mudah enda ngalitka ati kitai meda kemaya hari tu mayuh bendar raban ti bengkerap maya umur sida agi biak. Bisi hari jemah ila tentu anak kitai enda ulih enda ngaga pemutus penemu ti bekaul enggau duit lalu besedia napi belanja ti lebih ari duit kuchik ti diberi apai indai lebuh ba kantin sekula. Sida mega patut berundingka penyampau ti patut disimpan dikena meli utai ti dikedekaka ati.

Ngaga pemutus penemu nyadi tusah agi lebuh sida baru berengkah gawa. Kereja keterubah sida nyangka kereja sambil maya peremisi sekula tauka sepengudah sida badu besekula. Ambika banding, lebuh bala anak ninggalka rumah laban ke deka nampung pelajar tauka bekereja, sida mesti ngembuan pugu penemu senentang penyampau kos ungkup idup kediri. Sida mesti nemu penyampau siwa enggau hak nyadi penyiwa rumah. Jaku lalau mesti diberi pasal chara bekelimatka kos pemakai enggau pengangkut ngambika sida ulih bebelanja setipak enggau elaun tauka gaji ti diterima sida.

Kelimpah hari nya, sida mega patut dipadahka pasal penyai kad kredit mudah. Sida mesti diajar kad kredit nya ulih ngasuh tusah, pekara ti enda dipadah sida bank lebuh sida deka ngulihka kad nya.

Sida mega patut dipadahka proses siwa beli tauka skim bayar mudah ti mungkur lebih ari semina bayar pupuk bulan-bulan. Sida mega patut nemu enti barang nya diambi pulai sida agi berutang enggau bank tauka tauke.

Enti sida bisi pugu penemu senentang hal duit diri empu ti betul sida deka nyamai agi ngaga analisis produk duit lalu mudah agi deka enggau orang beranakka puku. Sigi diarapka sida enda mudah nyadi dengah ti dipanjuk orang ke tukang nipu duit orang bukai.

Subjek penglandik ngidupka diri senentang konsumerisma enggau finansial endang patut bendar diajar di sekula. Nya alai iya nyadi siti ari tema dalam mata pelajar Jaku Iban.

Konsumerisma enggau Finansial: Berengkah Ari Biak (Tusun Kelima)

Nembiak kemaya hari tu ngembuan mayuh agi duit dikena sida bebelanja enti dibanding enggau orang serak ke dulu. Ulah enggau perangai sida ngena duit balat dirempah apai indai, media enggau bala bakih sida. Nya alai, kenyau ari mit sida patut diiring diembing ngambika sida ba lantar ti betul. Kebuah pia awakka nya ulih nukuh ulah bebelanja ti betul lebuh sida udah besai ila.

Nembiak ke belajarka pengelandik mina wang maya sida agi mit deka nyadi orang ke ulih ngaga pemutus penemu ti manah senentang hal duit lalu sida mega deka kurang agi betapi enggau penanggul nya.

Taja pia, ngajar nembiak kemaya hari tu senentang wang balat pedis agi kelebih agi ba sekeda komuniti ti enda ngena duit tunai laban sida jarang meda duit dibayar maya orang tuai nya bebelika barang. Kebuah pia, laban sekeda ari kitai diatu idup dalam komuniti ke alai kredit tauka utang muntang agi dikena. Nama agi diatu diatu kitai ulih mayar barang ngena chara online baka nengah grab pay, boost enggau ti bukai. Nya kebuah, belajarka chara mina wang tu patut bendar dikemeratka kitai sereta diajar ngagai nembiak redak.

Ni maya nembiak patut diajar senentang duit?

Berengkah ari mit

Nadai siku nembiak ada sengenda lalu bisi ngembuan pengelandik mina wang enggau manah. Sida enda ulih enda diajar mina wang enggau betul. Nitihka pansik apai indai patut ngepunka proses tu maya umur anak sida tiga taun. Maya nya nembiak ngembuan konsep ti kelabur senentang chara nukar duit enggau pemakai tauka ayam. Utai tu dipeda sida lebuh sida pansut bebelika enggau barang enggau diri sebilik.

Bah baka ni chara?

1. Ngayanka teladan ti manah

Pengawa ke dikereja endang semitan agi ari jaku kelebih agi lebuh kitai deka nerenak ulah ti manah ngagai nembiak nama agi dalam hal duit. Nembiak ulih nyidi sereta meratika ulah apai indai ti bejaku tang ngereja utai lain ari ke disebut munyi ku jaku orang tuai tak semuti jaku. Nya kebuah, apai indai patut meratika ulah sida empu dalam hal mina wang. Ambika banding, pekara tu ulih dipeda ba sida ke enda mayuh berutang enggau sida ti enda mudah dirempah pemandang dagang tauka sida ke enda mudah nanggam pengerindu enggau barang ke bejenama. Apai indai patut semampai ngayanka chunto lebuh bebelanja lalu seruran bekelimat sereta cheremat kelebih ba mua anak sida lebuh ke bebelika barang, makai di kedai tauka lebuh ngatur sesebengkah pengerami.

2. Ajar bala anak chara MINA WANG

Nembiak mega belajar bepelasarka peneleba. Nya alai, kelimpah ari ngayanka teladan ti manah, apai indai mega patut ngelatih anak sida mina wang. Ba hal tu duit kuchik siti pekara ti beguna bendar dikena ngelatihka sida nembiak mina wang. Duit kuchik mai reti duit saku (Melayu) tauka pocket money (English).

a. Nama kebuah?

Duit kuchik ulih nyadi pengajar ti manah laban iya ngasuh nembiak mina wang dalam rampa dunya sida empu ke likun. Penyampau iya mega mimit lalu sebarang penyilap ti nyadi enda bangat ngeunsahka sida. Tu enda sebaka enggau kes orang tuai ke alai penyilap digaga sida besai agi sereta tau ngujungka sida nadai agi reta tengkira baka kerita tauka rumah.

Belajar betanggungjawab enggau duit diri empu

Duit kuchik ulih ngajar sida nembiak senentang tanggungjawab sida ngagai pekara ti bekaul enggau duit. Ambika banding, nembiak ti deka meli sesebengkah barang baka ayam baru ulih dipinta nyimpan sebagi ari duit kuchik sida dikena meli barang nya.

Tu mega bepanggai ba umur nembiak nya. Sida nyangka begunaka bantu dikena sida nyapai juluk ati sida iya nya ke deka meli barang ke dikeinginka sida. Ba hal tu, apai indai bisi peluang mantu ngerembaika pengelandik anak sida belajar bekelimat sereta belajarka pengelama sida patut nyimpan sebedau meli sesebengkah utai ke dikeinginka sida.

Belajar enda kalut ketegal deka ngemuaska ati

Nyimpan ketegal deka meli sesebengkah barang ulih ngajar nembiak senentang pematut sida ngelanjarka pengingin ati sida ngagai timpuh ke bukai. Ba hal tu sida patut belanjar nangguhka bebelika sesebengkah barang nya ngambika sida enda begaut deka ngemuaska ati. Nembiak ti belajar ngasaika pemanah nyimpan duit ulih ngasuh sida enda mudah tetarit ati enggau mayuh macham barang ti bisi ba pasar. Sida deka berunding dulu sereta enda mudah dirempah pengingin ati enggau jampat baka hal ke deka nguna kad kredit, mayar pupuk tauka mayar chara sewa beli.

Belajarka empas lebuh bebelanja lebih ari patut

Enti nembiak mina wang sida enggau manah, sida bisi peluang belajarka sesebengkah pekara lebuh sida bisi ngaga penyilap. Penyilap ti digaga nya mega nyangka ukai kos ti tinggi. Sida mega belajar senentang pemesai rega sesebengkah barang ke deka dibeli nya. Kelimpah ari nya, sida mega deka belajar neleba diri nyimpan beberapa minggu sebedau meli sesebengkah barang. Enggau chara nya, sida ulih nemu pemesai empas enti sema sida bebelanja lebih ari patut.

Nambahka nya mega, apai indai enda tau ngemeranka ulah ke deka meri duit tambah enti anak sida bebelanja lebih ari patut. Enti apai indai beguai mantu, dia anak sida enda belajar ari empas bebelanja lebih.

Enti bala anak udah bebelanja lebih ari patut, sida patut nginjau ari apai indai sida dikena sida ngenyukupka belanja sida. Apai indai patut netapka timpuh anak sida mayar pulai duit injau sida. Nengah chara tu sida nembiak bisi peneleba berutang.

Enti bala anak majak bebelanja lebih, reti nya udah datai alai sida patut diberi awak ngaga bajet sida empu.

b. Ni maya?

Nembiak berengkah diberi duit kuchik tauka elaun maya sida ba sekula primari. Maya nya sida nguna duit nya dikena sida meli pemakai ba kantin.

c. Berapa penyampau?

Duit kuchik ti deka diberi bepanggai ba pengulih apai indai sereta enggau rega pemakai ba kantin. Apai indai mega nyangka deka nemu duit kuchik ke diterima bakih anak sida. Ari nya, sida ke apai indai ulih berundingka penyampau ti deka diberi ngagai anak sida.

Apai indai enggau anak sida patut sama-sama besetuju senentang penyampau duit kuchik ti patut diberi tauka diterima. Taja pan duit kuchik nya semina dikena meli pemakai ba kantin, apai indai mega patut meri lebih mimit awakka ngelatih anak sida ngaga pemutus penemu.

Kitai ke tuai tu suah agi ngaga pemutus penemu lebuh kitai deka bebelanja tauka bebelika barang. Nya kebuah kadang-kadang  pemutus penemu ti digaga nya enda tentu betul sereta tauka ngenusahka kitai empu. Belajar idup ari ngaga pemutus penemu ti salah maya bebelanja nya siti ajar ti berega. Nya alai, tejuka aja bala anak belajar ari penyilap sida.

d. Berapa penyuah?

Dikena ngepunka dulu, duit kuchik ulih diberi ninting hari laban nembiak nya agi mit lalu bedau nemu ngatur duit sida enggau menyana. Taja pia lebuh sida mansang besai, elaun nya ulih diberi genap minggu. Enti sida nyau ngangkatka diri bujang dia elaun ulih diberi tiap-tiap bulan.

Lama agi sida nganti elaun sida mayuh agi ga pengelandik sida ngatur bajet diri.

3. Sidi kebuah BEBELANJA LEBIH

Bebelanja lebih ari patut mega sebagi ari chara belajar mina wang. Enti utai tu suah nyadi, sida ke apai indai patut nyidi pun kebuah hal nya nyadi. Lapa elaun sida jampat amai abis? Kati sida nemu penunga duit ke dipelanja sida nya? Enti enda nyangka tu mih awak ti chukup manah ngasuh sida nembiak nyimpan rekod ti mudah ungkup elaun ti diterima sida. Tu mih maya mega  dikena sida merambu bajet sida.

Merambu bajet ulih mantu sida melanja duit sereta nentuka belanja nya patut tauka patut dikurangka.

4. Ajar bala anak chara apai indai ngeluarka duit ungkup BELANJA DI RUMAH

Lebuh apai indai mayar bil maya ujung bulan baka bil elektrik, ai, telefon tauka Astro sida patut mai bala anak ngambika sida ulih nerang ngagai bala anak sida senentang bil ti dibayar nya. Tu ngasuh sida nembiak nemu penunga duit ti dibelanja apai indai ninting bulan.

5. Ajar bala anak maya BEBELI barang ba kedai runchit tauka makit

Bai bala anak lebuh bebelika barang dapur ngambika sida nemu rega barang. Terangka ngagai sida kebuah kitai ke apai indai milih sekeda chap bebanding enggau chap bukai. Ajar  sida pemesai reti sida meratika kos ungkup tiap-tiap unit barang nya bebanding enggau rega barang bukai ti bisi dijual dia.

Terangka ngagai sida mega penyampau ti ulih dikelimat enti sida nawar sereta ngerintai barang ti deka dibeli.

6. Belajar “MAYAR NGAGAI DIRI EMPU DULU” iya nya nyimpan sebedau bebelanja

Nembiak patut meda apai indai sida nyimpan duit lebuh terima gaji ninting bulan. Nyamai agi nyimpan ba pun bulan enti dibanding enggau ujung bulan.

Enti bala anak meda apai indai ngaga hal tu genap bulan, sida nyangka berunding dalam ati nya mih pekara ti teleba digaga ngujungka sida nunda ulah apai indai sida lalu sama nyimpan lebuh sida udah terima gaji diri empu.

7. Terangka ngagai bala anak bida entara ‘GUNA’ enggau ‘PENGINGIN’

Terangka ngagai bala anak entara ‘guna’ enggau ‘pengingin’. Ambika chunto, pemakai, gari, pekakas elektrik enggau kereban pengangkut nya mungkur  kategori ‘guna’ mensia. Gari, kupi ti mar rega enggau ayam nya dikira ‘pengingin’.

Anang enda ingat bala nembiak merati chara apai indai bebelanja. Tentuka apai indai enda  nyebut munyi tu ngagai anak sida, “Nuan enda begunaka nya” tauka “Nya muai duit aja” tang ke bendar nuan empu ke apai indai pan meli barang ti enda beguna. Nambahka nya, bala anak meratika apai indai sida meli utai ti masuk dalam kategori ‘pengingin’ aja.

Bala anak patut nemu pugu tanggung pengawa apai indai sida iya nya nyediaka utai ke ‘guna’ sida sebilik. Sepengudah utai ke ‘guna’ nya dibeli nya baru ulih mikirka deka meli barang bukai tauka ke dikeingka ati.

8. Buka AKAUN SIMPAN ungkup bala anak

Buka mih akaun simpan ungkup bala anak. Tu ulih meransang sida nyimpan lebuh sida meda duit majak nambah kelebih agi lebuh bup akaun sida nya dikemaska baru. Sekeda akaun simpan nembiak bisi meri perais pechuma sereta mega meri peluang nyadi raban kelab nembiak redak.

9. Ajar bala anak ngambika sida bejimat lebuh meda PEMANDANG DAGANG

Ajar sida bejimat lebuh meda pemandang dagang ti bisi ayan dalam televisyen.

Anang ngemaruhka pemandang bantai ti bisi ayan ba TV. Terangka ngagai bala anak pengelimpau produk ti dipeda sida sereta utai ke dipeda nya ukai selalu ngayanka utai ke diulihka sida. Bisi produk semina manah dipeda mata aja.

Jaku Penutup

Bepelasarka jurai di atas, dia kitai beratika pemesai guna pengelandik mina wang tu patut bendar diterenak ngagai bala nembiak redak bepun ari umur sida agi biak munyi ku sempama Melayu, enti ngelenti buluh, lenti mih ari tubu.