Bujang Skrang

Kemaya hari tu agi bisi bala kelebih agi nembiak rebak baru rindu nitih gaya, tauka nyebut leka jaku ti bisi dikena kelebih agi dalam lagu. Tang mayuh ari bala nembiak enda tentu nemu reti ke bendar sesebengkah rambai jaku nya. Sida semina ngena jaku nya lebuh ke berandau enggau pangan diri tauka lebuh nulis karang dalam mata pelajar jaku Iban di sekula. Ngena rambai jaku baka tu manah laban jaku tu suah agi ke dikumbai kitai dalam kategori jaku tuai tauka jaku dalam. Semina kitai patut beati-ati lebuh ke ngena iya enggaika reti iya jauh lari ari reti ke bendar.

Kenang ti deka dipejuraika ditu nya senentang rambai jaku Bujang Skrang. Dipelabaka suah amat kelebih agi orang Iban ninga sereta besebutka leka jaku tu. Nya alai ke sekali tu Tempalai Kenang nguji ngenangka reti rambai jaku tu ngambika bala nembiak redak rebak baru tau beratika reti ke bendar senentang rambai jaku tu.

Asal gelar nama Bujang Skrang tu suba semina engkeman dikena anak lelaki ke datai ari menua Batang Skrang. Tang ketegal ubah pemansang kemaya hari tu nadai salah gela tu mega dikena ngagai lelaki Iban ari menua bukai.

Gelar nama Bujang Skrang bepun ari pengawa enggau pengidup anak lelaki orang Batang Skrang ke dulu suba tebilang amat pegi gawa ke menua bukai laban deka ngulihka pengidup sereta enggau penemu dikena ngidupka diri.

Bisi sekeda ari sida tu, tak semina baru angkat bujang tang udah dibai pegi nyempulang kaban aya tauka bala menyadi ke udah bisi peneleba pegi gawa ba menua bukai. Lebuh gawa di menua orang, dia iya belajarka jalai ngereja mayuh macham pengawa, nitihka pengelandik enggau pemintar berunding belajarka jalai pengidup bansa bukai.

Kadang-kadang sida ke pegi gawa ke menua bukai suntuk amat penemu enggau pemandai pelajar sekula. Tang bepelasarka pengeransing enggau pengeliat ati, dia ari ke nyau betaun-taun gawa sereta belajarka penemu enggau pengelandik di menua bukai, enda berasai umur tudah nyau majak tuai-setuai. Taja pia, enti penemu enggau pengelandik ngereja pengawa dikena ngidupka diri agi apin bisi ke bekal dibai pulai, dia iya tetap agi ngemeranka pengawa gawa di menua orang nyentukka iya bisi utai ulih dibai pulai nyadika tanda anak Skrang udah pegi bekereja di menua orang.

Ketegal ke lama rindang ngulihka penemu enggau reta di menua bukai, dia lebuh maya mulaika diri ke menua di rumah panjai, umur pan nyau udah tuai tang lalu apin bebini.

Ukai ketegal enggai bebini tumu tauka ukai ketegal orang indu enggai tang laban bekiraka pengidup ke dudi hari. Nya alai, lebuh apai-indai meda anak ti pulai pegi, bisi penemu enggau pengelandik ngereja pengawa dikena ngidupka diri, dia baru sida iya berunding ngiga indu dara ke patut ditanya nyadika menantu.

Umur amat udah lunggar tang Bujang Skrang ke udah pegi belelang gawa ke menua bukai amat diperening bala indu dara laban enda mayuh orang ke ulih beberita pegi gawa di menua orang. Nya mih kabuah, gelar nama Bujang Skrang lalu lekat nyadika jaku sema orang, baka Bujang Skrang.

Dalam bup Jaku Dalam (2006), reti rambai jaku Bujang Skrang nya bujang ke laun bebini taja umur  nyau lunggar mimit ari maya ti patut endur numbuhka ruang bilik laban tembu kiruh ngading pendiau diri dulu.

Nya alai dikena nyimpulka kenang senentang rambai jaku Bujang Skrang tu nadai salah dipelabaka reti tu dikena ngerembai ngagai ukai semina orang bujang ari Skrang ke lunggar umur ke laun bebini tang mega orang bujang ari pelilih menua bukai.

(Dibali ari artikel Bujang Skrang, http://ruaibujangskrang.blogspot.com/)