Ikan Empurau

Ikan Empurau sebansa ikan kap dalam raban Cyprinidae ti betisik besai.  Ikan tu balat dikerinduka orang ke nginti tauka orang berikan. Ikan tu mayuh ditemu ba menua Malaysia, Indonesia, Pakistan enggau Semenanjung India.

Ikan tu keterubah digambarka Hamilton dalam taun 1822, lalu keterubah iya disebut dalam pengawa nginti Majalah Oriental Sporting dalam taun 1833. Ikan tu balat digiga bala orang British ke rinduka pengawa nginti ti netap di India. Pemanjai ikan tu tau datai ngagai  2.75 meter (9 kaki) lalu pemerat iya tau datai ngagai 54 kilogram (118 paun). Kelimpah ari nginti, chara bukai ngulihka ikan tu nya nengah chara mukat, nyala tauka nimbak ngena senapang ikan.

Ikah Empurau bisi ditemu ba sungai kelebih agi ba ulu sungai ke bisi kerangan, chiru  sereta ba danau. Iya niki ngagai ai sungai ke deras sereta ba lubuk ke begerugu batu lebuh betelu. Ikan tu mega sebaka enggau ikan kap bukai. Ikan tu dikumbai omnivor lalu makai ukai semina kulat, krustasia, indu utai, engkatak, sereta ikan ti bukai, tang mega makai mayuh bansa buah ti labuh ari pun iya di atas.

Di Sarawak ikan tu mayuh amat ditemu bisi ba Batang Rejang. Ikan empurau udu disebutka bala mensia mayuh laban pengelunak isi iya ti nyamai enti dipanduk ngena jalai kukus. Ikan tu tau mega diguring rangkai tang ari segi penyamai isi udah kurang lalu pia mega baka vitamin nya nyau lenyau lebuh diguring rangkai. Bansa Iban balat agi ngasam ikan tu laban iya muntang dikereja sereta tan disimpan lama. Chara ngasam iya nya semina diperuk enggau garam kasar sereta berau guring lalu diperam sepengelama tiga minggu. 

Ikan empurau tu ukai semina nemu diempa bala bansa Iban tang mega bansa bukai baka China, India enggau melayu. Raban bansa China ke mayuh makai ikan empurau nya raban bansa China  Foochow di Sibu enggau Kapit. 

Ikan empurau tu chukup laku ba pasar lalu tau berega RM800 sekilogram. Ba menua China ikan empurau idup dijual enggau rega RM1,200 sekilo. Ikan Empurau udu laku maya ari besai Orang China. Ketegal ikan tu berega dia bansa Iban sebelah Batang rejang udu begigaka ikan empurau tu. 

Kelimpah ari ke bisi di sungai, ikan empurau mega ulih ditupi. Nya alai perintah menua Sarawak bisi merambu deka ngeluarka urung empat juta benih anak ikan empurau nengah saup raban pemansik enggau pemansang begulai enggau sida ari Opis Menteri Sains, Teknologi enggau Inovasyen (MOSTI). Nitihka jaku Sapit Kepala Menteri Sarawak, Tan Sri Jabu (Borneo Post 20 Julai 2011), perintah besai udah ngungkupka belanja kena mansik enggau ngemansangka ikan empurau. Belanja ke udah diagihka pengawa tu nya RM1.3 juta. Nitihka iya, ikan tu ila deka ditupi ba tekad ai Bakun.

Pengawa nupi ikan Empurau ulih narit mayuh agi raban orang betanam betupi enti timpuh ngenataika pemerat ikan tu ulih dipandakka ari ke selama. Nitihka pansik pemerat ikan Empurau dalam dua ngagai tiga taun nya kurang lebih sekilogram. Berindik ari nya, ungkus dikena meli pemakai ikan Empurau nya besai amat sereta enda mudah ditapi orang ke betupika ikan tu. Bansa pemakai ke engkeman nya bansa pemakai ti ngundan protin tauka amino asid. Tu beguna dikena ngeyampatka pemesai ikan ngambika timpuh pemerat ikan tu datai ngagai sekilogram nya dipandakka ngagai dua taun.

Besenutuk enggau nya mega kos enggau risiko ke ditapi orang ke nupi ikan Empurau tu uih dikurangka. Iya mega ulih meransang mayuh agi raban orang betanam betupi enggau masuk industry akuakultur ikan Empurau.

Rega ikan Empurau ke mar sereta ngembuan peminta ti tinggi dalam makit nentuka akuakultur ikan Empurau tu ulih nyungkak penatai pemisi raban orang betanam betupi kelimpah ti meri penguntung ngagai ekonomi menua. Peminta global ngagai produk akuakultur dipelabaka ulih nambah ari RM251.0 biliun taun 2005 ngagai RM635.0 biliun ba taun 2020 bepelesarka pemansang pukul rata 7 peratus setaun.