Beibida penemu politik ukai dalih enda ulih ngangkatka bansa diri nengah gerempung

Gerempung ti bekaul enggau raban bansa Dayak mayuh bendar udah ditumbuhka bepelesarka tuju ti deka ngangkatka status bansa diri. Taja pia kadang-kadang gerempung ti baka tu balat dikuingka runding raban ke ngemeratka pengawa politik. 

Nya alai raban Dayak ti ngembuan penemu politik bebida ti bisi dalam gerempung ukai politik patutbendar nda ngenyarut gerempung ti dipasukka sida tang patut besaup ngemujurka gerempung nya.  Taja pan diatu raban Dayak datai ari mayuh bengkah penemu politik tang sida enda tau changka enggau pangan diri ba atur ngangkatka pemansang bansa Dayak. Bebida penemu politik enda patut nyadika penanggul. Semua raban dalam gerempung patut sepenemu sedada sama seati. 

Dalam gerempung ke ditumbuh ketegal Dayak  semina raban bansa  Dayak mih dikeandal nyaga gerempung nya. Kelimpah ari pengelama ke udah ditumbuhka, gerempung tu patut balat agi ngemeratka pemansang raban bansa Dayak belalauka tuju enggau objektif penumbuh gerempung nya.

Kelimpah ari nya mega raban dalam gerempung ulih terus ngetanka kaul entara sida.Gerempung tu ngembuan tanggung pengawa numbuh sereta negapka penyerakup bansa Dayak lalu nyantilka kaul sida enggau bansa bukai. Gerempung patut nyadika platform numbuhka penyerakup bansa . Nya alai enti penemu politik ti bebida dibai ke dalam gerempung , nya ke tau ngujungka  gerempung tu tau pambar.

Gerempung Dayak ke udah bisi kemaya hari tu bela ngembuan tanggung pengawa ti sebaka lalu badas agi enti gerempung tu majak dikemansangka agi awakka ulih mantu nyaguka agi pengidup bansa Dayak. Runding sereta penemu deka  dulu agi dipendingka orang enti kitai bela beserakup enggau pangan diri dalam sesebengkah gerempung.

Gerempung baka  SDNU, SADIA, OUNA, AEDIL enggau ke bukai engkeman bendar  alai ngemansang pekara ekonomi, pelajar, budaya enggau mayuh pekara ke bukai. Nya alai, nengah gerempung ti baka tu  bala Dayak patut bebendar ngulihka pelajar kelimpah ari nerenakka runding ke deka ngangkatka penatai pemisi diri ngambika enda tinggal singkang pemansang ari orang bukai. Kelimpah ari nya, nengah gerempung tu mega raban bansa Dayak enda tau enda landik bekenaka awak ti endang udah nyengala ba mua, alai ngidupka diri ba dunya kemaya hari tu.