KUCHING: Presiden Sarawak Dayak
National Union ke baru ungkup renggat 2012-2015, Tan Sri William Mawan besemaya
deka meratika enggau silik agi projek Rumah Dayak ke udah tejanggal kenyau ari
taun 1997.
Bejaku ngagai pengarang berita
kemari sepengudah ngulu aum Aum Besai Tiga Taun Sekali Ke-33, iya madahka enda
nemu ulu ili senentang batang penanggul kebuah Rumah Dayak enda tembu digaga. Enggau
nya iya deka ngatur langkar baikka nya langkar panjai tauka langkar pandak
ngambika projek tu diteruska.
“Beri aku awak berandau enggau
komiti sereta meretika batang kebuah projek Rumah Dayak tejanggal.
“Kitai deka minta saup sereta minta
buah runding ari orang ke landik senentang chara kitai ulih mutarka pekara tu.
Atur deka diperambu baikka nya langkar timpuh panjai tauka pandak ngambika
projek Rumah Dayak diteruska,” ku iya.
Rumah Dayak ke diperambu digaga
nengah ungkus RM8 juta maya nya napi penanggul ari pun projek alai kompeni ke
udah diberi tanggung pengawa nembuka projek nya suah ngetuka pengawa sida iya.
Sempekat ke disain dalam taun
1997 entara SDNU enggau kompeni ti ngaga Rumah Dayak nerangka SDNU deka
nyendiakka palan (tanah) sereta nerima 20 persin syer alai kompeni nya deka
ngeluarka duit puku lalu teulihka 80 persin syer.
Taja pia, nyentuk ke sehari tu, rumah
tinggi ke setengah tembu nya mengkang reregah enda tembu nya ulih dipeda ari sepiak
Flyover Satok. Dibali ari Utusan Borneo
Tiada ulasan:
Catat Ulasan