Nama Reti Perintah

Ba tebal agi orang Sarawak, lebih agi orang ti diau jauh ari sekula sekondari, leka jaku PERINTAH tu mai reti kuasa ti datai ari atas. Tu sebaka enggau reti kuasa ari bala Sultan, ari bala Rajah Brooke ti diau dalam astana putih sida di seberai nengeri Kuching, enggau ari bala pemerintah koloni British ti kindang-kindang nangkin pedang sereta begari sereba burak. Sebaka mega reti enggau kuasa nyebut sebarang utai ti deka nyadi enggau enda deka nyadi.

Chara runding enggau penemu ti lama enda tau enda dilengka ke kitai ari diatu! Tiap iku orang Sarawak nya orang ti “bebas” (reti nya ukai ulun ke sapa-sapa.) Sida tau sepeneka ati ngidupka diri dalam menua ti dikumbai demokrasi. Sida tau milih sapa orang ti patut ku ati sida mangku pengawa nyadi tuai sida, sekali ke orang nya bekereja di Kuala Lumpur, tau ke di Kuching.  Sida mega tau enda besetuju enggau pemutus perintah, lalu milih sapa-sapa orang ti ulih ngiring sida nunda ku runding sida.

Pengawa ngundi dalam pengawa bepilihka pengari parlimen tauka kaunsil negeri tu ulih dikena nukar parti perintah tauka ngetanka parti ke merintah ngelama tu. Perintah bepanggai ba orang ti kena pilih nya ngembuan ati ti lurus, taluk sereta bisi penyiru ke menua Sarawak, lalu ukai orang ti ngembuan ati ti berunding ke diri empu aja.

Nya alai, ba maya ngundi ti deka datai tu ila, pilih mih pengari ti ulih ngeringka bansa enggau menua, ke mai pemansang ngagai rayat sereta merintah enggau ati ti lurus sereta enda bechiping. Pengari rayat ke udah ditemu kitai baka lintah ti semina beridup nginsap darah rayat patut ditukar enggau raban orang ti lurus ati sereta besedia deka bekerejaka rayat lalu ukai orang ti nginsap darah rayat dataika sida nyau gemu.

(Diambi sereta dibali ari  Apai M. (http://ai-pengayu.blogspot.com)