Ngerembaika program nyaga rampa menua

Guna kampung ngagai pengidup mensia besai amat reti dalam dunya moden kemaya hari tu kelebih agi nengah fungsi iya ke nyadi biodiversiti sereta ngasuh gaya hari setimbang.

Taja pan 'landskap' asal bumi tu besai bendar pemeri iya ngagai mensia tang mensia tetap ngerusakka kampung atas nama pemansang sereta mega ketegal deka nitihka arus ubah pemansang moden.

Mensia mayuh nyau majak kurang sensitif ngagai kampung. Nya alai ozon majak mipau ketegal pengawa betebangka kayu sereta beperimbaka kampung.

Pengawa ke mai penemu senentang pemesai reti rampa menua kelebih agi kampung patut bendar dikerembaika ngagai ukai semina sekula tang mega di semua tikas pengidup mensia.

Menua tu ngembuan rampa kampung ti besai tang agi mayuh orang enda nemu fungsi iya. Kampung besai bendar reti ngagai ekosistem kitai kelimpah ari ke nyaga rampa menua, iya mega meri angin beresi ngagai pengidup ukai semina mensia tang mega pengidup bukai.  Kitai mega patut nemu enti kampung nya dipejaika sepeneka ati, bah besai deka nyadi sereta bumi deka majak angat.

Aktiviti nanam kayu besai bendar reti sereta relevan ketegal komuniti agi kurang ibuh ke isu gaya hari ke majak berubah kelimpah ari tikas pemanas global kemaya hari tu. Kayu ti ditanam deka nyaga tanah ari tusur, stabilka tanah, ngurangka kadar angin bepuput, nyaga arus ai lalu nyerap karbon dioksida kelimpah ari ke mai penyelap enggau angin ti beresi, ngurangka amau  sereta bunyi inggai. Semua tu ngujung situasyen ke nyamai sereta ngelantangka ati.

Kurang  penemu sereta ngembuan ulah ke enda peduli tau ngujungka isu nyaga kampung dikumbai nadai beguna.

Tiap-tiap individu patut ngembuan tanggung pengawa ngadungka bumi nengah chara betanamka pun kayu ngelingi rumah. Chara tu ulih narak pengerindu ke rampa menua sereta meri pemanah ngagai rampa menua kelebih agi ba nengeri.

Kampung enda ulih sepeneka tebang ketegal nama pemansang laban iya nya pemeri ari Tuhan ti enda ulih dibanding enggau utai bukai. Pengawa ngerusakka kampung nya sama pengawa baka ke bejaika pemeri ari Tuhan. Nya alai sebarang pemansang ti deka dipejalaika patut diatur enggau chukup perambu.