Bebasaka Hak Bejaku Orang Neutral

Kati nuan nya siku ari orang ke ‘neutral’? Engka leka jaku ‘neutral’ nya enda nemban, leka jaku ke deka disebut nya nadai partisan tauka nadai ngembuan parti (dalam jaku English dikumbai ‘non-partisan’) tauka dalam jaku Iban klasik nya enda menibung pinang. Orang ke neutral tauka non-partisan nadai kaul enggau  parti politik, lalu enda ibuh kiruh enggau orang beparti politik. Tang anang mega salah peragam, orang ke neutral tu ukai enda bepolitik, semina sida enda ngembuan parti politik.

Enti nuan nanya aku nama bida entara politik enggau beparti politik? Ba penemu aku, tentu bisi bida entara politik enggau beparti politik. Di Malaysia, mayuh bendar perkara ti bekaul enggau politik. Main bol, pemakai disediaka tekala nya (makanan segera), minyak enggau ekonomi, semua tu bisi kaul enggau politik. Politik empu endang udah tentu bisi kaul politik. Ngaum diri dalam politik ukai reti iya nitihka atur parti politik ti endang udah sedia bisi. Politik ngembuan tukuh enggau gaya ke mayuh macham tang politik ke bisi parti semina ngembuan siti tukuh politik.

Tang nasit orang neutral di Malaysia enda manah enti dibanding enggau orang ke bisi parti politik. Sida seruran disalah anggap. Pekara tu nyadi ketegal orang neutral ngembuan runding ke bebida enggau politikus parti, ngujungka orang neutral dituduh ngelaban sereta nyukung orang ke ngelaban sida. ‘Enti nuan enda nanah kami, reti nya nuan ngelaban kami,’  ku bala politikus. Enda kira mih ni-ni parti.

Runding ‘neutralisme’ nya mega dijadika isu. ‘Baka ni nuan ulih tetap ngembuan runding neutral, maya Malaysia benung charut,’ ku munyi tanya sida. Baka ke enda ulih ke enda ga ngembuan parti. Baka ke bisi perang besai benung nyadi ke ngasuh semua patut milih di entara dua.

Orang neutral ukai enda rindu ke politik tauka enda ibuhka isu-isu ‘politikal’ tanah ai. Orang neutral ukai nadai tuduh penemu tauka runding ti tegap. Semina bida iya nya tuduh penemu tauka runding nya bepanggai ba isu. Sida enda mudah tekuing runding tauka disekat enggau pugu runding parti politik. Ukai ketegal orang neutral enggai tang sida bisi pilih sida empu ba peti undi nya ila.

Kasih ga meda orang neutral. Sada serebana sida nyau majak jauh enda tentu didinga, ditenggelamka orang ke kering agi rekung ke majak cahpuh ngenataika retorik politik sida kemaya hari tu. Kedua-dua piak parti politik meda orang neutral tu enggau penuh kamaru. Penemu sida suah ditukik sereta mar dikearap baka ke nyadi batu penekul ngagai menua Malaysia ti manah agi.

Politik ukai semina chelum tauka burak aja. Iya mega ukai semina patut bebaris tauka bepekat aja. Politik nya mungkur rampa ti besai sereta ngembuan mayuh lapis. Nyangka penemu orang neutral bisi sama tauka engkabih enggau penemu sesebengkah parti politik tang nya ukai reti iya orang neutral nyukung parti politik nya, tauka ngelaban orang ke ngelaban sida. Politikus enda tau dikaburka enggau  pengawa sida ti kelalu regas dalam parti ngujungka kitai enda tentu arapka sida.

Pemansau kitai bepolitik mega nyengkaum penemuai runding kitai nerima enggau meri kritik. Pemansau bepolitik reti nya kitai enda ulih ngembuan tinjau pemansang(wawasan)  ke sempit sereta semina nitih churung parti aja. Ukai nadai jaku ke nyebut, politik nya kelalu besai reti enti dilakka ngagai politikus aja.

Anang salah peragam. Enda salah kitai beparti sereta nyukung parti politik. Enda salah mega kitai nyadung ideologi enggau pemereti ati parti politik. Tuduh penemu ti mayuh macham patut diterima sereta diperansangka. Orang neutral mega anang enda ingat senentang pemesai reti parti politik enggau raban politikus. Anang mega sumbung madahka parti politik enggau politikus nya udah nadai diguna agi.

Taja pia, kitai patut meri peluang ngagai orang neutral bejaku. Kitai patut bebasaka hak sida bejaku. Di menua kitai, jurai isu-isu nasional dikenataika nitih rentak parti-parti politik. Pekara ti suah amat nyadi maya sesebengkah isu nya  nyadi buah mulut orang mayuh kelebih agi enti iya bisi kaul enggau parti politik sereta politikus. Nya alai, sada nyawa alternatif, ti enda dikuingka runding nitih penemu parti, nya endang berat sereta patut dipendingka. Kadang-kadang, sada orang neutral ulih bejuraika selaput-selaput politik sesebengkah isu sereta ninjau pugu kebuah isu nya dibantai.

Pengawa nirika menua tauka nation-building patut mungkur runding sereta penemu ti dalam udah nya dipejuraika nyadi konsensus nasional.