Panyun jaku
Bansa Iban agi jauh
tinggal dalam pengawa dagang enti dibanding enggau bansa bukai. Nama kebuah
pia? Nama nadai gerempung Iban ke bisi sedia meri bantu? Nama tuai-tuai raban
bansa Iban enda ulih mantu? Kinika bala pedagang Iban ke udah mujur dalam
pengawa dagang? Bisi sida sedia mantu bala Iban ke bukai ti deka enggau pengawa
dagang? Baka ni jalai bansa Iban ulih
ngemansangka diri ba pengawa dagang ngambika belubah-lubah ulih nitihka bansa bukai?
Nya sekeda tanya ke
patut bendar ditanya ngagai bala Iban empu enti deka bejuraika pengawa dagang
ti ngaul orang Iban empu. Naka ke diatu raban bansa Iban endang bisi enggau
raban bansa bukai ngemeran pengawa dagang. Taja pia, mayuh ari bansa dagang ti
dipejalaika sekeda bansa Iban tu agi ba tikas ti mit baka bejualka sayur enggau
engkayu di pasar, nyadi kontraktor enggau sub-kontraktor ngaga rumah tauka
nyeruri rumah, dagang dalam bidang pemerindang baka muka palan karaoke, pub,
kompeni rekod. Bisi mega sekeda nya muka kedai makai sereta nyediaka katering
maya pengerami, muka dandang kebun sawit sereta dagang ke bukai.
Bisi Penemu Dagang
Sebedau bala Iban
ngiruhka diri ngeruh ai dalam pengawa dagang, sida patut bendar bisi penemu
enggang pengelandik senentang pengawa dagang tauka dikumbai orang business
acumen. Penemu enggau pengelandik ulih dipelajar. Kemaya hari tu mayuh bendar
kolej enggau universiti bisi ngajar orang senentang pengawa dagang sema jaku
enti deka alah enda, enti enggai bisi tau mih nadai. Tang ba raban bansa China,
penemu enggau pengelandik formal tikas tinggi baka ba tikas universiti enda
tentu dikemesaika sida. Mayuh ari orang dagang China ke mujur semina belajar
naka tikas pom lima. Iya ke ngasuh sida nya mujur ukai semina penemu enggau
pengelandik formal tang bisi faktor bukai.
Berani
Kedua nya ngembuan
pemerani deka ngereja pengawa dagang. Pengawa dagang tu pengawa ngatika diri
reti, iya nya ukai pengawa ti digaji orang. Diri empu gawa nyadi tauke enggau
kuli. Enti nadai pemerani deka gawa kediri endang enda ulih mujur. Bedau
berengkah udah ngaku diri alah. Sulu jaku Iban ti tebilang dikena bala bujang
berani kelia iya nya ‘agi idup agi ngelaban’ patut bendar nyadika sulu jaku
orang ke deka masuk dalam pengawa dagang.
Puku ti chukup
Ketiga nya ngembuan
puku ti chukup dikena bejalaika pengawa dagang. Enti nadai puku kati ulih
bedagang? Indahka bejual sayap manuk tunu ba tebing jalai pan begunaka puku
taja pan enda mayuh. Bisi orang nanya, kati enti nadai puku ulihka bedagang?
Saut ya enggau enda. Ya enti kitai nguji ngiga jalai ngiga puku. Enda enti
kitai enda berani sereta enda nemu jalai ngiga puku. Kemaya hari tu mayuh bendar
bank enggau kompeni finance bisi meri kredit ngagai orang ke deka ngemasukka
diri dalam pengawa dagang. Anang aja kitai nguji nginjau duit ari orang ke enda
dikemendarka perintah baka ari ah long enggau chetti. Sida tu mega nyali duit
tang bayar pulai ngena bunga ti tinggi.
Liat ati
Keempat nya ngembuan
pengeliat ati. Kadang-kadang dalam pengawa dagang tu pemujur enda datai kemaya
nya, untung enda labuh ari langit. Orang ke dipeda kitai udah mujur sereta kaya
nya nadai dipeda kitai maya sida berengkah bedagang, penusah ke ditapi sida
maya terubah bedagang. Enti sida nadai ngembuan pengeliat ati sida nadai datai
ba tikas pemujur ke dipeda kitai. Ambika banding Tuai Pemesai Esekutif Airasia,
Tony Fernandes enggau balan raban iya bepun bisnes penerebai bilun ari dua buah
bilun maya ke ngepunka dagang nya suba. Baka orang ke bedagangka insuran mega
begunaka pengeliat ati. Sehari tu betemu enggau lima iku orang sereta becherita
senentang insuran tang ari lima iku nya engka siku aja ke meli insuran.
Giga orang ke sama dagang enggau
kitai
Nama dagang ti deka
dipejalaika orang Iban dih? Enti udah bisi dalam ati, giga penerang ti silik
senentang dagang nya sereta chara kitai bejalaika dagang nya. Giga orang bukai, kompeni enggau projek ke
sama enggau pengawa dagang ke dikerejaka kitai ngambika senang alai kitai
berandauka pekara ti bekaul enggau dagang nya. Enti bisi ke manah sida tentu
deka nulung kitai meri penemu senentang ngemansangka dagang kitai nya. Iya ke ngembuan
ati dengki, bingking sereta ninding nya enda ulih dikira. Dalam pengawa dagang
orang sama bela besemekih deka ngemujurka diri. Dalam ngemujurka diri sida
sanggup ngindik pangan diri, narit pangan diri ke udah di atas lalu enti iya
udah di atas iya ngeju orang ke deka niki.
Bepun ari dagang ti mit
Chara ti nangkanka tu
nya ngepunka pengawa dagang ari ke mit.
Enda semua dagang patut dipejalai
enggau chara besai ti begunaka belanja datai ke bejuta-juta ringgit. Bepun ari hobi
sereta pengerindu maya lepa sereta ulih
nyadi penatai pemisi sambil pan udah chukupai. Ambika banding Aya Abas ngembuan
dagang bejualka keropok ba menua iya. Dagang
tu endang diwariska ngagai iya ari apai iya suba. Nyadi, Aya Abas mantu apai iya
ke udah tuai laban udah enda ulih agi ngereja pengawa berat. Nyau kepuas iya ke
mantu apai iya nya, pengerindu iya nyau majak betambah dalam pengawa dagang
lalu iya neruska pengawa nya sepengudah apai iya ninggal. Lebuh keterubah
berengkah bedagang, apai iya nyual kerupuk ngena motosikal aja. Udah gintir Aya
Abas ngambi ari apai iya, dia iya nginjau duit ari bank dikena iya ngaga sebuah
kilang ngaga kerupuk ke didirka iya di belakang rumah iya. Pengulih iya nyau
majak maju kelebih agi lebuh bisi pengerami. Semua tu ketegal Aya Abas udah
bisi peneleba lebuh ke mantu niang apai iya suba. Kemaya hari tu, Aya Abas udah
mujur bisi lima buah kilang ba pelilih menua iya.
Ngupah pekereja ke
ulih dikearap
Udah ke ngembuan penuduk ti manah dalam pengawa dagang dia tentu kitai
bisi ati deka ngerembaika pengawa dagang kitai nya. Ambika chunto, dagang kedai
gari lelaki enggau indu. Muka pampang baru begunaka mayuh agi pekereja ngambika
bisnes nya lanchar diaturka. Enggau nya, kitai begunaka duit ngupah orang ke
ulih dikearapka ngambika dagang kitai nya enda dipejaika orang ke deka ngelabuhka
kitai. Nyangka kitai ulih ngupah orang ke berimbai pendiau enggau kitai ke udah
lama dikelalaka kitai sebedau kitai ngepunka dagang kitai nya tauka ngupah pangan
ke udah kitai temu ati budi sida. Enti enda pia, dagang kitai deka puntan
ketegal bisi orang ke bingking sereta ninding enggau pengelantang ti diulihka
kitai. Nya alai, kitai patut ngaga kaul ke manah sereta enda bemusuh enggau semua orang ngambika kitai mega
selamat lalu pengawa dagang perniagaan
kitai terus maju.
Ngembuan strategi ti
semitan
Kelimpah ari nya, dikena nenetuka sesebengkah dagang nya mujur, kitai
mega patut ngembuan strategi ti semitan. Ukai semina pengawa dagang, tetiap kereja
ti digag begunaka perambu ti chukup. Enti enda juluk ati kitai nya puntan di
tengah. Ambika banding, ngepunka dagang dalam bidang ubat-enggau farmasi. Dalam
dunia ti sereba changgih sereta maju tu, kitai seruran nerima mayuh macham
bengkah penyakit ketegal ti salahguna
kereban kimia industri, penyakit ngerekai ketegal kereban kimia belebih dalam pemakai
baka sayur sereta penyakit bejangkit ti mudah ngerekai pemindah mensia tauka
jelu. Penyakit ti bisa mar diubati, tang taja pia kitai agi bisi peluang ngurangka
iya. Nya alai, dagang dalam bidang ubat enggau farmasi seruran diterima enggau manah laban kitai enda nemu
maya kitai tau sakit. Dagang tu dagang ke ulih meri penguntung ngagai orang ke
ngereja pengawa tu. Komuniti kemaya hari tu mega nyau majak pandai nentuka ubat
ti semitan dikena ngetanka penyakit ari ngerekai.
Mending lalu
nitihka pengeka pelanggan
Orang ti nentuka pengelabuh sereta pengangkat sesebuah dagang iya nya pelanggan enggau
mensia mayuh. Nya alai, pengingin enggau pengeka sida patut diperundingka
sereta enda tau dipeda pia aja. Enti enda, pelanggan deka rari lalu kitai deka napi
pengerugi ketegal enda nitihka pengeka
sida. Sekurang-kurang iya pengeka pelanggan
merika kitai utai ke baru kena kitai nguji dalam dunya dagang nya. Chunto ke
pengabis rapat enggau komuniti iya nya dagang francais iya nya McDonalds, ti
mujur ngerembaika dagang ke serata dunya. McDonalds di India udah nyediaka menu
endang ditaga peranak India enggau nyediaka
burger manuk. Sida nyediaka menu Chicken Maharaja Mac, laban orang menua nya
enda ulih makai dagin sapi. Kelimpah ari
nya, di Itali mega, sida nyediaka burger ti diidang enggau dagin jani. Di
Norway, burger dinah enggau kerat dagin ikan salmon ti dikerinduka peranak
menua nya. Di Thailand, iya diidangka enggau nyampurka pengasai tomyam ngambika disedia nitihka nyawa orang dia. Baka
nya mega enggau McDonalds di Malaysia.
Besedia ngerembaika
pengawa dagang perniagaan ti besai
Pengawa dagang ke
majak maju nyadi juluk ati semua orang ke mekuh diri enggau pengawa dagang. Tang
katika kitai udah besedia deka ngerembaika dagang kitai ke renggat ti nangkanka
tu? Pemujur kitai ulih disukat
sepengudah kitai empu meda sereta ngasaika penerima ari orang mayuh. Ambika
banding, dulu suba Jupong semina bedaja laksa ngena motosikal aja. Udah 5 taun betunggang
lupung, dia iya udah ngumpul duit ti mayuh lalu muka sebuah kedai laksa bekunsi
enggau menyadi lelaki iya. Endang juluk ati Jupong deka muka sebuah kedai laksa
asil ari resipi niang indai iya. Iya udah besedia enggau chukup dikena napi
pengawa dagang nya. Udah kedai baru nya dibuka, Jupong nyau majak kering semengat
deka bekereja sereta ngubah ke penguntung jemah ila. Makin sehari, dagang iya nyau majak maju ketegal
Jupong udah bisi pelanggan tetap ngelama 5 taun ti udah sepemanjai iya bedaja ngena motosikal betayar tiga.
Bantu ari agensi bukai
Kelimpah ari nya,
mayuh bendar agensi ti ulih meri bantu ari sukut penemu sereta duit jali ngagai
orang ke deka bedagang. Sekeda ari tu baka Majlis Amanah Rakyat (MARA), Tabung
Ekonomi Kumpulan Usahawan Niaga (TEKUN), Dayak Chamber of Commerce and Industry
(DCCI). Ambika banding TEKUN. Duit pinjau
ari TEKUN berengkah ari pengabis baruh RM 500.00 ngagai RM 50,000.00 lalu
timpuh mayar pulai nya entara sebulan datai ke lima taun. Entara syarat-syarat
dikena minta duit jail ngagai TEKUN iya nya peminta ari bansa Bumiputera ke
beumur 16 – 65 taun. Peminta mesti bisi
tuduh penemu sereta perambu dagang ke bisi potensi ngambika ulih terus mansang.
Entara syarat-syarat nangkanka nya iya
nya, peminta mesti bisi lisin tauka permit rejista dagang ke udah diakun.
Dayak Chamber of
Commerce and Industry (DCCI) mega patut ulih mantu raban bansa Iban ke bisi ati
deka bejalaika pengawa dagang. Dayak Chamber of Commerce and Industry, Sarawak
(DCCI) tu endang gerempung ti ditumbuh dikena mantu raban bansa dayak dalam
pengawa dagang enggau industri. Gerempung tu udah direjistaka enggau Registrar
of Society kena 11hb January 2003. Idea numbuhka gerempung tu bepun ari seminar
ke bisi diatur ba K.L. dalam bula April,
2002, ke disepunsaka YB Tan Sri Bernard Dumpok enggau YB Datuk Amar Leo Moggie sereta
dipejadika YAB. Dr. Mahathir. Seminar nya bejuraika enggau lenak senentang isu
kurang orang Dayak Bumiputera masuk dalam pengawa dagang taja pan Polisi
Ekonomi Baru ti ngembuan ngangkatka pemayuh orang Bumiputera dalam dagang udah
dipejalaika dalam timpuh 30. Tuduh penemu madahka raban bansa Dayaks patut
ngatur diri enggau manah agi ngambika sida ulih ngerebut peluang ti disediaka
perintah. Nya mih kebuah Dayak Chamber of Commerce & Industry (DCCI) tu
ditumbuhka sereta direjista kena 11hb
January, 2003.
Penutup jaku
Nya alai dikena ngujungka
jurai tu, raban bansa Iban patut berunding enggau lenak agi senentang pekara ti
ulih mantu sida dalam pengawa dagang. Orang bukai semina ulih mantu ngena chara
meri penerang tauka duit jali tang pemujur pengawa patut dikemeranka enggau
betul ngambika iya ulih ngasil penguntung ari tulang urat kitai empu. Penguntung
enggau pengerugi dalam pengawa dagang nya pekara selama. Nya alai kitai patut besedia
napi semua penguji ti deka datai. Sekali labuh ukai reti iya kitai lalu enda
ulih angkat agi. Jadika perkara tu dikena kitai ngeringka semengat agi idup agi
ngelaban. Enti deka mujur dalam pengawa dagang mesti bisi pengerindu ti dalam, bagas
lalu gawa enda ngira pengelelak. Dalam jaku mudah, tiap-tiap pengawa ti
dikerejaka kitai tentu ngenataika asil enti udah chukup maya iya ila. Terus
gawa enggau naka ulih sereta besampi ngagai Petara ngambika pengawa kitai mudah
sereta gerah.
Penyanding penemu:
Dayak Chamber of Commerce and Industry, Panovel
Commercial Centre, Jalan Simpang Tiga, 93300 Kuching, Sarawak, MALAYSIA
Tiada ulasan:
Catat Ulasan