Pengajar Patut Angkun Sereta Landik Narak Nembiak

Pemansang pelajar di Malaysia kemaya hari tu suah bendar nyadi topik ti dipejuraika semua lapis komuniti enda ngira pupu raban bansa. Entara pekara ti suah nyadi buah kenang nya nyengkaum sistem pelajar ti semitan kelebih agi ba aspek kurikulum, kokurikulum, disiplin, fungsyen pelajar, jalai nukuh ulah ti manah, negapka penyerakup menua, agih pengawa ari modal mensia enggau peminta ari industri sereta opis perintah.

Isu kus kena ngelatihka pengajar nitihka anggar opis menteri mega suah nyadika topik ti dipejuraika kelebih agi enti bisi pekara ke nyadi baka anggar ti belunjak entara Opis Pelajar Tinggi  ti nyediaka kus Sarjana Muda Perguruan enggau anggar ti disediaka Opis Menteri Pelajar.

Menteri Pelajar Tinggi madahka ninting taun opis iya bisi nerima anggar penyampau nembiak ari Opis Menteri Pelajar ke patut diambi  ti udah nya diagih ngagai Institusi Pelajar Tinggi Perintah (IPTA) ti nyediaka kus ngelatih orang nyadi pengajar.

Opis Menteri Pelajar Tinggi endang bekerejasama enggau Opis Menteri Pelajar dikena mutarka isu tu dikena nentuka sektor pengajar menua terus dinamik lalu ngasilka pengajar ti bekualiti setipak enggau juluk ati perintah ke dekaka semua pengajar ngembuan degree.

IPTA kemaya hari tu semina diberi tanggung pengawa ngeluarka pengajar ti ngembuan degree ke sekula sekondari lalu Institut Palan Pematih Pengajar Malaysia (IPG) nyediaka pengajar ti ngembuan degree ungkup sekula primari.

Kabinet endang udah netapka polisi tu. Nya alai IPTA ti bisi kala nyediaka kus ke pengajar sekula primari sebedau tu udah badu agi ngambi nembiak baru.

Semua lapis komuniti kelebih agi raban apai indai endang ngembuan pengarap ati ke pengajar ke dilatih baik iya ba IPTA tauka ba IPG nya pengajar ti bekaliber sereta ulih ngajar, ngiring nembiak nengah disiplin, akal budi sereta seregah diri.

Sida enggaika pengajar ti semina lati dalam bidang akademik aja tang enda ulih napi penanggul ulah enggau moral nembiak-redak di sekula. Utai ke berat dipejalaika sida nya ngenatai diri nyapai juluk Falsafah Pendidikan kebangsaan.

Pelajar enggau penemu nya prasyarat ti besai bendar reti ke menua ti deka ngulihka pemujur. Pengetan enggau pengering nya bepelasarka komuniti ke bepelajar sereta bepenemu ke ulih ngalahka pengering soldadu. Baka nya mega ulah enggau moral ti setimbang ulih narak pendiau sereta seregah diri sesebengkah bansa.

Menua mega patut ngembuan komuniti ti ngemeratka pelajar enggau penemu ari semua utai bukai. Kelimpah ari nya pelajar ti setimbang ari sukut fizikal, emosyen, pengarap enggau intelek endang enda tau enda dikemeratka.  Orang ke bepelajar sereta setimbang ari sukut ulah enggau moral ulih mantu ngemansangka menua.

Kelimpah ari nya lebuh ngambi sida masuk belatih nyadi pengajar, penyampau pengajar lelaki enggau pengajar indu mega patut setimbang nitihka anggar opis menteri. Naka ke diatu penempat sereta penyampau pengajar lelaki agi jauh kurang kelebih agi ba nengeri enti dibandingka enggau pengajar indu.

Iya ti patut dikemeratka mega iya nya pengawa mandal kepala pengajar bidang nembiak sereta pengajar disiplin patut dipekuh pengajar lelaki ke bisi penau ngambika ulih napi sereta mutarka penanggul disiplin di sekula. Naka ke diatu agi mayuh amat penuduk nya dipegai pengajar indu kelebih agi sekula ba nengeri.

Taja pan pengajar indu mega ulih mekuh pengawa narak nembiak ke bedisiplin tang pengawa nya engka manah agi enti dipegai pengajar lelaki laban mayuh agi penyalah baka  penyalah nginsap, ponteng sekula, belaya, kes buli sereta ngerusak reta tengkira sekula dikereja nembiak lelaki kelebih agi ba sekula sekondari. Mayuh ari sida tu ngereja pengawa nya dalam raban sereta begunaka  perati sereta ajar.

Nama agi komuniti kemaya hari tu nganggap institusyen pelajar baka sekula nya pugu agensi alai narak ajar manah sereta akal budi ti bekualiti ngagai nembiak rebak baru kelebih agi nembiak sekula.

Penegap nilai ulah deka ngasilka seregah diri ke manah ti ngujungka landskap sosial ke harmoni sereta dinamik dalam komuniti. Nya alai, tiap-tiap pengajar ngembuan tanggung pengawa narak ulah sereta seregah diri nembiak ngambika sida nyadi orang ke ngembuan pengarap sereta berulah manah. Pemansang sereta penau profesionalisme pengajar mesti setipak enggau ubah pemansang.

Pengajar patut ngembuan pemagas sereta pintar ngajar nembiak, ngiring sereta ngembing sida ngembuan ulah ti manah nengah mayuh bengkah langkah rapat setipak enggau Falsafah Pendidikan Kebangsaan ke ngembuan tuju ti deka ngasilka mensia ke setimbang ari sukut mental enggau fizikal.

Tanggung pengawa enggau kereja pengajar kemaya hari tu balat agi berat sereta penuh enggau penguji kelebih agi kemaya hari tu era teknologi pemadah. Pengajar ukai semina ngembuan tanggung pengawa nyadi pengajar aja tang mega enda tau enda ngembuan  pengeliat ati ke deka ngajar, ngiring sereta ngembing nembiak nitihka seregah diri ti bepelasarka nilai pengarap enggau budaya bansa.

Enti disimpulka enggau jaku pandak, reti nya menua tu nengah chara ke besilup meri kuasa penuh ngagai pengajar ngambuh anak bansa nyadi orang ke menyana, pintar, berakal lalu ngembuan ulah ti manah kelimpah ari ke mega ngambuh sida nyadi komuniti ti ngembuan nilai manah sereta beharmoni.  Nya alai tanggung pengawa pengajar chukup mulia sereta ngembuan reti ti besai ngagai semua mensia kelebih agi lebuh ke deka ngulihka juluk tinjau pemansang sereta agenda pelajar menua.