Penti Pemali Mandi Malam

Dalam komuniti raban bansa Melayu, mayuh bendar penti pemali nyengkaum pengarap ke enda tau mandi malam, tinduk ba atas geladak simin sereta ngirup ai ais.
 

Bisi sekeda ari kitai pulai ke rumah maya malam baka burung antu tauka entambah ti terang mata iya lebuh malam.

Pulai maya malam endang pekara selama enda kira mih baikka kitai pulai ari tempat kereja, ari endur bebelika utai, betemu enggau bala pangan tauka kaban belayan.

Enti ba nengeri ke endang terang benderang laban lampu pulai ke rumah nyau jauh malam enda tentu ngirauka ati.

Lebuh mulaika diri ke rumah, tentu kitai enda lalu terus nudukka diri semak bala kitai, makai enggau sida, meda televisyen tauka iya ke balat agi nya lalu terus merejuk  ke katil lalu tinduk sebedau mandi. Enti enda mandi tubuh kitai bebau but, angat, likat sereta kamah laban nyau sehari enggai kitai dibalut amau.

Tang, bisi orang tuai madah mandi malam enda manah ke pengerai. Pekara tu jaku orang tuai, enda ga aku berani ngamat tauka ngemulaka pekara tu laban nadai ga kala udah ninga ari sukut saintifik.

"Enti nuan mandi nuan mudah bulih penyakit lempuang. Tulang pan jampat repuk," pia ku jaku ‘tagang’ sida.

Tu mih sekeda ari pengarap tauka 'mitos' ti suah didinga dalam komuniti Melayu ke bekaul enggau pengawa mandi malam. Kelimpah ari penti pemali nya bisi mega penti pemali bukai.

Tu nyengkaum mali suah ngirup ai ais tauka tinduk di atas geledak simin laban baka pengawa  mandi malam, iya mega dikumbai tau mai penyakit lempuang, ngasuh tulang repuk sereta mega ngasuh pedis buku tulang tauka reumatisma.

Bisi mega sekeda ke arapka diri enda tau tekena ujan enggaika angat isi, rengga tauka tubuh 'tama angin'. Kelimpah ari nya, anang ngelakka diri dibalut stres, enggaika buk jampat buban.

Semua pengarap ti baka tu endang nadai pengamat ari sukut pengerai taja pan iya ngembuan empas negatif tu bukai.

Ambika banding, enti kitai ngelakka diri mandi ai ujan, tentu tubuh kitai berasai dadam sereta tubuh berasai enda nyamai tang ukai reti iya tau ngasuh kitai tabin angat isi.

Buk buban ketegal faktor umur lalu enti iya buban tumu ari timpuh selama, iya suah agi ketegal faktor peturun (genetic factor).

Taja pia penti pemali ke madah ‘enda tau mandi malam, enda tau ngirup mayuh ai ais, sereta enda tau tinduk atas geladak simin (tauka seramik, batu marmar)'  taja pan bisi tikai, endang patut dikemetulka kelebih agi ti besangkut-paut enggau penyakit lempuang.

Nya alai, Dr Radiah Salim ari Poliklinik Yishun bisi meri penerang senentang pekara tu.

Penyakit lempuang tauka pneumonia ku Dr Radiah, nyadi ketegal sistem pengetan tubuh tauka imuniti kitai nyau lemi.

Bisi sekeda faktor risiko ti ngasuh penyakit pneumonia tang pengawa mandi malam nya ukai faktor kebuah penyakit nya. Faktor tu nyengkaum:

Umur: Orang ke lunggar umur balat agi berisiko ketegal sistem pengetan tubuh sida nyau majak lemi.

Pesakit kemi manis: Pesakit kemi manis balat agi deka kena penyakit lempuang laban sida enda ulih nyaga penyakit tauka tikas gula dalam darah sida enggau manah.

Penginsap: Raban penginsap endang nyamai agi dirampit mayuh macham penyakit.

Kurang pemakai ti bepengerai: Kedua-dua raban anak mit enggau orang tuai ke kurang zat pemakai balat agi deka kena pneumonia, laban sistem pengetan tubuh sida mega lemi.

Hari ti kelalu chelap: Tu ke ngasuh orang nyangka mandi malam mai penyakit laban maya malam hari ai suah agi ke chelap. Tang iya nadai nyadi penanggul enti kitai mandi ngena ai nyilu kuku.

Mandi siang tauka malam ke bendar nya manah ke kitai laban iya meresika tubuh kitai, nama agi baka gaya hari ke angat baka di Singapura.

Nitihka Dr Radiah, enti tubuh enda diperesika nengah chara mandi kelebih maya hari angat, dia kitai deka mudah agi kena flu (influenza). Flu nya mih faktor risiko ke penyakit pneumonia.

"Ketegal nya, kitai dilalau betuchuk vaksin flu, kelebih agi raban ke berisiko tinggi sereta sida ke ngembuan sistem pengetan tubuh ke lemi.

"Taja pia, penyakit pneumonia balat agi diidap sida ke ba menua chelap.

"Nya alai, di Australia, ambika banding, mayuh orang ke tuai nya mindah ke pelilih menua  Queensland laban gaya hari di menua nya angat agi enti dibanding enggau di Melbourne," ku jaku ke diterangka Dr Radiah.

Pesakit riman: Sida ke benung berubat nengah chara kemoterapi sereta pesakit HIV enggau Aids.

Pesakit lempuang: Iya tu baka penyakit ke nyerang lempuang ti udah ba tikas kronik (chronic obstructive lung disease). Penyakit tu suah agi diidap raban penginsap ke udah betaun-taun nginsap ruku.

Nya alai mandi siang tauka malam ke bendar nya manah ke kitai laban iya meresika tubuh kitai. –Berita Harian Singapura