Penyanyi Iban enda dipebasaka sereta dikemaruh

Tu berita udah lama dikenang dalam surat berita Utusan Borneo tang dikenataika ditu dikena kitai bela mulaika pengingat senentang pekara tu. Isu berita baka tu enda nemu bari laban naka ke diatu iya mengkang nyadi dalam pengidup raban penyanyi Iban enti enda semua sekeda ari bala penyanyi Iban ke kala ngasaika diri dikemaruhka orang.

Gerempung Dayak Miri (DAM) ngenataika asai enda nyamai ati sida senentang chara orang ke ngatur konsert  di menua ngagai raban penyanyi Iban ke ba runding sida enda bebasaka bala penyanyi sereta ngemaruhka pengelandik sida.

Presiden gerempung nya Ellison Ludan ke mega siku ari penyanyi madahka, iya empu dipejal enda nerima sekeda peminta ngasuh belagu ba konsert laban ngasaika diri enda diterima enggau manah ari sida ke ngaturka konsert.

“Ambika chunto pengatur pesta ria ke ngengkahka gambar artis ba atas keretas A4  lalu udah nya nampalka keretas nya di tiang-tiang lampu, dinding sereta sekeda nya di agu rama.

“Aku empu meda gambar artis-arti Iban digaga baka nya, gambar-gambar nya ditampal lalu  diengkah ba endur ke enda patut alai engkah.

“Ba aku pekara tu enda patut nyadi laban baka sida ke enda bebasaka bala penyanyi nya empu,” ku iya.

Besenutuka enggau nya mega, Ellison ngelalau penyanyi Iban ngasuh sida bebasaka pengelandik ke bisi ba diri empu sreta meri syarat ke terit agi ngagai pengatur konsert tauka pesta ria ngambika sida enda sebarang nempaya gambar sida sengapa.

“Sida patut berani madahka runding diri senentang chara gambar tauka poster nya digantung kelimpah ari berundingka rega ke diletakka sida lebuh beperindang,” ku iya.

Nitihka iya, pengatur konsert tauka pesta ria ulih bulih untung ke mayuh laban ngena nama artis Iban kelimpah ari beperindang, sida patut nemu hak artis ke patut dipebasaka.

Nya mih penusah enggau sekeda raban artis kitai Iban, enda tentu kiruhka hak diri. Sekeda ari sida tu semina nganjung pengerindu belagu aja. Nya kebuah nyamai amai bala tauke konsert enggau kompeni ngaga VCD ngaturka sida nya disempamaka baka linut sepeneka orang ngaga. Raban penyanyi enda ulih nerima seratus peratus dalih bala pengatur konsert ke madah sida nadai chukup duit. Ngantung gambar ba sebarang endur nya ukai begunaka duti tang untak sereta bansa ngagai orang ke dikangau kitai belagu. Poster baru begunaka duit. Tang poster pan ukai semina keretas A4 kitai difotostat kitai mayuh ke semina berega 10 sen sekeping. Enti kitai sanggup ngaturka konsert tentu kitai mega sanggup ngeluarka kos ti lebih dikena ngelakuka artis ke dikangauka kitai.

Enti ngelama tu kitai ke nyadi penyanyi nya baka papung batang; anyut ke ulu dialun segang rarat ke ili dipangka pasang patut mih kitai ngena peluang ke bisi ngubahka chara orang nerima penatai kitai. Kitai penyanyi patut mantaika pemerani ketegal bendar sanggup ngembuan ati ti nyeligi nyemilu bintang. Nya baru orang bisi bebasa ngagai kitai.

Kelimpah ari nya mega imej diri patut dijaga. Imej tu nyengkaum chara ke begari, chara kitai ngenataika diri ba mua mayuh. Semua utai tu endang bisi etika enti kitai deka dipeda orang nyadi penyanyi ke dibasaka orang mayuh.