Kupi Tai Munsang a.k.a Kupi Luwak

Kupi Luwak iya  sebansa kupi ti diproses ngena igi kupi ke diambi ari teda tai munsang. Igi  kupi tu dikumbai bisi asai ke bebida sepengudah diempa lalu nengah proses nganchurka pemakai ba dalam tubuh munsang. Kupi tu udah lama pegari ba endur Asia Tenggara kelebih agi ba Pulau-pulau Sumatera enggau pulau ke ngelingi nya dia. Tang iya semina nyadi tebilang lebuh iya dikeluarka enggau mayuh maya taun 1980-an. Kupi luwak nya kupi ke pengabis mar di dunya naka ke diatu. Rega iya ulih manggai ngagai $160 sepaun. Uji peratika ngagai  lis  kupi ke pengabis mar di dunia tu nyengkaum;

1.      Kupi Luwak – Indonesia

2.      Kupi ‘Hacienda La Esmeralda’ – Panama

3.      Kupi ‘Island’ – St. Helena

4.      Kupi ‘El Injerto’ – Guatemala

5.      Kupi ‘Fazenda Santa Ines’ – Brazil

(http://layartekno.blogspot.com/2013/03/kopi-terbaik-dan-termahal-di-dunia.html)

Asal Penatai

Kupi tu sigi udah bisi berengkah ari abad ke-18. Maya nya suba Orang Belanda ngepunka pengawa nanam kupi ba Pulau Jawa enggau Sumatera. Siti ari bansa kupi ti bisi ditanam nya kupi Arabika ti dibai ari Yaman. Maya era “Tanam Pejal” tauka Cultuurstelsel (1830—1870), Belanda nagang pengereja pengawa ba ladang kupi sida ngarang buah kupi ke guna diri empu tang raban pengereja ladang nya bisi ati deka nguji ngirup kupi ke tebilang nya.

Raban pengereja ladang nya bisi tetemuka sebansa munsang ti rindu makai buah kupi.Munsang tu semina ngunyah isi buah kupi aja tang igi iya agi manah. Igi kupi dalam tai munsang tu lalu  digumpul, dibasu, diserara, ditutuk, udah nya disumai enggau ai angat. Nya ngujungka lalu bisi kupi tai munsang tauka dikumbai kupi Luwak di Indonesia. Berita senentang penyamai kupi aromatik tu nyau datai ba pending orang Belanda ke ngempu dandang kupi nya. Tu ngujungka iya nyadi ai irup ti dikerindu orang kaya Belanda mega. Ketegal ke nyelai sereta proses ngaga kupi tu enda sebaka enggau kupi selama, kupi Luwak nyadi kupi ti mar kenyau ari jeman kolonial.

Munsang, tauka luwak,  (dalam jaku Indonesia) landik amat begigaka buah kupi ti chukup manah    sereta mansau nyadika pemakai iya. Luwak deka milih buah kupi ti mansau amat nyadi pemakai iya. Udah diempa semina isi kupi aja diproses iya. Igi kupi ti dirangkap kulit kering enda diinjin dalam perut munsang nya tang pansut sama-sama enggau tai luwak. Igi kupi ti pansut nyadi tai luwak tu enda jai sereta ngembuan kualiti iya ti manah ngujungka iya ulih diguna nyadika benih ngambika tau ditanam baru. Nya alai, luwak tu kiraka baka penyaga kualiti (QC) semula nyadi ti semina milih buah kupi ke pengabis manah. Nya asil iya, iya nya kupi ti pengabis manah. Nitihka penemu orang ke sigi rindu ngirup kupi, asai kupi Luwak tu sigi amat-amat bebida sereta manah agi ba sida ari kupi bukai.

(Diambi sereta dibali ari http://sohoque.com/kopi-tahi-musangluwak/)