Ngajar Sistem Jaku Jaku Iban: Prinsip enggau Teknik Tusun Kelapan

Kereban Sanding Ngajar Jalai jaku

Pengajar Jaku Iban mesti pandai milih lalu ngena kereban ari mayuh leman sanding penemu. Kelimpah ari bup teks Jaku Iban ti udah ditetapka sekula, pengajar mega patut nentuka kereban sanding bukai ke ulih dikena maya ngajar jalai jaku.

Bansa Kereban Sanding

Endang ulih disakalka agi, bup teks nya pugu kereban sanding ti semampai bisi di sekula sereta tikas standard iya ti seruran dijaga. Taja pia, pengajar mega patut  ngena kereban tambah dikena nganti kereban bup teks.

Dikena ngajar jalai jaku Jaku Iban, pengajar mesti milih lalu ngena kereban ari sanding bukai baka:

1	Bup teks enggau bup kereja
2	Bup jalai jaku enggau diksyenari
3	Kereban sanding bukai

Bup jalai jaku (Sistem Jaku Iban Di Sekula) enggau diksyenari dipasukka dalam rintai di atas laban kedua-dua bup nya nyadi pelasar kereban sanding ke dikena pengajar jaku kelebih agi dalam aspek jalai jaku.

Bup Teks enggau Bup Kereja

Taja pan bup teks Jaku Iban udah ditulis bepelasarka kurikulum pelajar ti sama sereta udah diperesa raban komiti pemanah ari Opis Menteri Pelajar, tang enti diperatika enggau silik, bup tu bisi bida ari sukut chara pekara ti dikenataika, tikas pemanah grafik enggau aspek milih kereban. Genap iti bup teks nya ngembuan penguat enggau pengelemi kediri empu. Kebuah pia, laban bup teks tu ditempa pengarang ti bebida peneleba, penau enggau orientasyen dalam ngajar Jaku Iban.

Nambahka nya mega, ari sukut guna Jaku Iban mega, bup teks ungkup peringkat sekula ti sama engka ngayanka tikas penggemar jaku ti bebida, iya nya enti diperatika ari sukut struktur ayat enggau pengelebat leka jaku tauka vokabulari ti dikena. Enti dibanding enggau bup teks mata pelajar bukai, bup Jaku Iban engka tau dikumbai mudah tauka tusah agi ari bup teks bukai.

Dalam mata pelajar Jaku Iban, pengajar nadai jalai ulih mantu sekula milih bup teks ti engkeman enggau tikas sekula sida laban semua sekula ngena bup teks ti sama lalu enda baka bup teks English tauka Bahasa Melayu.

Taja pia nadai pulaika salah enti bala pengajar nguji meratika bup teks ke bisi nya ari aspek jalai jaku. Nama kriteria ti ulih dikena nyadika malin pengajar nisih sebuah bup teks kelebih agi ari aspek jalai jaku? Kriteria tu ulih diterang ngena jaku tanya. Peratika chunto kriteria nangkan tu ti diterang ngena jaku tanya.

Keterubah iya, kati isi pelajar bup teks mungkur semua elemen jalai jaku ti udah ditetapka dalam Kurikulum Standard Pelajar Jaku Iban KSSM? Kati bisi elemen jalai jaku ti enda diberi fokus ti patut tauka kena tinggal?

Kedua, katika tusun enggau chara mantaika aspek jalai jaku dalam bup teks nya digaga nitihka prinsip pedagogi? Entara prinsip pedagogi nya nyengkaum:

1	Kaul-jaul jalai jaku enggau pengelandik jaku
2	Tusun isi ari ke mudah ngagai ke mar sereta berenggat-renggat
3	Chunto ti engkeman sereta chukup dikena nerangka sesebengkah atur jalai jaku
4	Mayuh leman pengawa latih dikena negap, nisih sereta nyeridi pelajar nembiak
5	Penerang senentang strategi enggau teknik ti diberi dalam bup malin pengajar

Ketiga, kati jaku ke dikena dalam bup teks nya betul/standard lalu engkeman enggau tikas pengulih jaku nembiak?

Keempat, katika grafik baka gambar foto, gambar dero, gambar-rajah enggau ti bukai bisi dikena enggau semitan ngambika ngemudahka nembiak meretika pelajar sereta narit ati sida?

Kelima, katika bup teks nya ngundan kereban stimulus/konteks ti engkeman dikena ngepunka pelajar senentang sesebengkah elemen jalai jaku?

Lebuh ngena bup teks Jaku Iban, pengajar mesti semampai ngembuan runding ti kritis senentang kereban jalai jaku ke dalam bup nya. Iya mesti meresa tiap-tiap jalai jaku ti dibantai nya dikena nentuka terminologi, chunto, konsep enggau generalisasyen ti dikena nya. Endang nyadika tanggung pengawa pengajar nyidi sereta ngemetulka sebarang penyalah ti nyangka bisi ba sesebengkah kereban dalam bup teks nya. Enti bisi pekara ti enda chukup, ambika banding ari sukut chunto tauka pengawa latih dia pengajar mesti ngiga kereban tambah ari kereban sanding bukai dikena ngenyukupka kereban nya. Pengajar mega patut ngelengka sesebengkah kereban pelajar dalam bup teks enti iya ngasaika kereban nya enda engkeman tauka kelalu mayuh ngundan pekara ti salah.

Dalam hal bup kereja Jaku Iban naka kediatu nadai mayuh bup kereja ti bisi ditulis sereta dijual ba kedai. Taja pia enti bisi, pengajar mesti meratika enggau silik laban iya enda baka bup teks. Kebuah pia, laban iya enda tentu standard sereta nadai diperati sereta dikemanahka raban Opis Menteri Pelajar. Pengajar mesti meresa enggau kritis genap ripih isi jalai jaku dia sebedau mutuska penemu deka ngena sesebengkah kereban ari bup kereja nya. Kebuah pia, laban bup kereja suah agi ngayanka  standard ke baruh. Bup kereja ti baruh standard mayuh ngembuan penyalah nyengkaum penyalah sepil enggau jalai jaku ti tau nyarutka runding nembiak sereta meri empas ti negatif ngagai pelajar sida senentang jalai jaku Jaku Iban.

Lebuh nisih sereta meresa bup kereja, pengajar mesti meratika leman pengawa latih ti disediaka laban guna bup kereja nya dikena ngenapka bup teks. Pengawa latih dalam  bup kereja mesti ngembuan mayuh leman latih ke ngembuan tuju dikena negap, ngaya, nisih sereta nyeridika pelajar nembiak. Iya mega ditulis dalam mayuh tukuh baka objektif, ngisi endur lapang, nipak tauka nyambung dua sitak, nyerara nitihka raban, nyidi enggau ngemetulka penyalah sereta ke bukai.

Pengajar patut ngena kereban dalam bup kereja nyadika kereja tambah tauka dikena sepengudah ngena bup teks. Nadai nyadika penyalah pengawa nya mega digaga di rumah. Pengajar enda patut kelalu gagit ngena bup kereja baka ke dipeda ari ulah sekeda pengajar ngujungka sida nempayaka bup teks lalu nganti iya enggau bup kereja aja.

Bup Jalai jaku enggau Diksyenari

Endang enda ulih disakalka agi bup jalai jaku (Sistem Jaku Iban Di Sekula) enggau diksyenari nya pugu kereban sanding ke besai bendar guna dikena pengajar ngajar jalai jaku.

Taja pia utai ke ngenyinuka ati nya agi mayuh pengajar Jaku Iban enda nemu Opis Menteri Pelajar ari baruh Bahagian Pembangunan Kurikulum (BPK) bisi ngeluarka bup Sistem Jalai Jaku Iban Di Sekula ke dikeluarka sida dalam taun 2007. Siti agi kereban sanding nya diksyenari. Naka kediatu mayuh bup diksyenari udah dikeluarka. Entara diksyenari ke bisi nya nyengkaum:

1	A Sea Dayak Dictionary (1900), William Howell and DJ. S Balley
2	English – Iban Vocabulary (1985), Rev. G. Bruggeman
3	Kamus Bahasa Iban – Bahasa Malaysia (19889), Dewan Bahasa dan Pustaka
4	English Iban Handy Reference (1994) Vinson Sutlive and joanne Sutlive
5	Kamus Tribahasa Iban – Melayu – Inggeris (2010) Harry Usup Umbar, Geoffrey Singgon, Timothy Salang
6	Bup Serbareti (2011), The Tun Jugah Foundation
7	A Comprehensive Iban-English Dictionary (2016), Dayak Cultural Foundation
8	Kamus Iban-Melayu Dewan Edisi Kedua (2016), Dewan Bahasa dan Pustaka

Maya milih tauka nyediaka kereban, pengajar seruran betapi enggau penanggul ngiga penerang ti engkeman senentang sesebengkah aspek jalai jaku Jaku Iban tauka iya agi kakang ati senentang guna jaku, rambai jaku tauka ayat ti nemban dalam sesebengkah kereban ngajar. Belalauka penanggul tu, pengajar ulih bepelasarka bup jalai jaku enggau/tauka diksyenari. Ari bup tu, pengajar ulih bulih informasyen tauka saut ti digunaka iya.

Maya ngajar jalai jaku Jaku Iban, pengajar mesti ulih nentu sekalika sesebengkah leka jaku, rambai jaku tauka ayat nya betul tauka salah. Nambahka nya mega, pengajar ulih nerangka kebuah sesebengkah pekara nya betul tauka salah bepelasarka jalai jaku Jaku Iban. Sigi enda chukup enti pengajar nya semina ulih madahka struktur sesebengkah ayat nya salah tang enda ulih nerangka kebuah ayat nya enda ulih diterima. Iya mesti ulih meri pengarap ngagai nembiak enggau penerang iya bepelasarka atur jaku nya. Naka kediatu kereban sanding autoritatif pasal jalai jaku nya bup Sistem Jaku Iban Di Sekula enggau diksyenari ti udah diterima dikena di sekula. Taja pia diksyenari Jaku Iban ke bisi diatu agi mayuh pengelemi sereta agi kalik-kalik ari mayuh aspek. Nya alai raban pengajar dipinta bejimat lebuh ngena diksyenari laban bisi sekeda pekara nya enda nemban baik ari sukut semantik, jaku penambah enggau ti bukai.

Kereban Sanding Bukai

Kelimpah ari kereban ke udah dipejurai di atas, bisi mega kereban sanding bukai ti patut dikena pengajar Jaku Iban maya ngaga langgur ngajar jalai jaku Jaku Iban.

Siti kereban sanding ti ulih diguna nya jurnal enggau majalah jaku ti meri fokus ngagai isi ti bisi kaul belajar enggau ngajar Jaku Iban nyengkaum jalai jaku. Amat mih naka kediatu kitai nadai jurnal enggau majalah jaku ke ditulis ungkup jaku Iban tang kitai ulih bepelasarka jurnal enggau majalah jaku Melayu. Naka kediatu bisi dua produksyen ti  engkeman iya nya Jurnal Dewan Bahasa enggau Pelita Bahasa ti dikeluarka Dewan Bahasa dan Pustaka.

Jurnal Dewan Bahasa  ngeluarka artikel ti bisi kaul akademik senentang ngajar enggau belajar mayuh aspek jaku Melayu nyengkaum jalai jaku kelimpah ari ngeluarka artikel akademik senentang jaku Melayu.

Pelita Bahasa nya sebuah majalah ti meri fokus ngagai guna jaku Jaku Melayu ti betul sereta disempulang enggau analisis penyalah jaku nyengkaum penyalah jalai jaku ke suah dikena bala nembiak. Tentu isi dalam majalah tu ulih diguna lalu nyadika sanding penemu ngagai raban pengajar.

Pengajar Jaku Iban patut mega nguna majalah akademik bukai ke bisi kaul enggau linguistik  lalu pia mega nguna surat berita nyadika kereban sanding dikena ngajar jalai jaku. Isi pekara ari majalah enggau surat berita ulih dikena nyadika tibak tauka genteran teks dalam pelajar jalai jaku. Taja pia sebedau ngena sesebengkah genteran teks, pengajar mesti nentuka tibak teks nya enda ngundan penyalah sepil enggau jalai jaku lalu enti ulih, pengajar mesti ngubah sereta nyeruri tibak teks nya nitihka patut.

Kereban sanding bukai baka novel, antologi jerpan, leka main enggau bup malin / ulang latih enti bisi sereta patut nitihka standard ti sama enggau iya ke dikena ba sekula. Siti bansa kereban ke nyangka enda mudah digiga nya kaset audio enggau video ti bisi kaul enggau pengawa ngajar jalai jaku Jaku Iban. Rekod kaset  tu engka ulih diinjau ari Radio enggau TV Pendidikan tauka ari Bahagian Teknologi Pendidikan (BTP) Opis Menteri Pelajar tauka ari ni-ni pusat kereban sanding pelajar.

Nya alai disimpuka jaku, maya ngaga langgur pelajar jalai jaku dia pengajar enda patut kelalu bepanggai ba bup teks aja. Pengajar mesti ngena kereban sanding ari mayuh leman penatai ke ari luar bup teks. Tu nyengkaum bup jalai jaku, diksyenari enggau jurnal/majalah ti engkeman enggau pelajar jalai jaku. Pengajar ulih ngambi tibak pekara ti engkeman ari majalah akademik, surat berita  enggau mayuh leman karya sereta ngena kaset audio  enggau video ke ulih diinjau ari  sekeda institusyen.

BUP SANDING PENEMU

Abdullah Hassan 1984, Linguistik Am untuk Guru Bahasa Malaysia, Penerbit Fajar Bakti Sdn.Bhd. , Petaling Jaya.

_________________ (ed) 1987, Kesalahan Bahasa dalam Bahasa Melayu, Dewan Bahasa dan Pustaka (DBP) Kuala Lumpur.

_________________ 1974, The Morphology of Malay, Dewan Bahasa dan Pustaka (DBP) Kuala Lumpur.

Anthony, E.M. (ed). 1976, Reading: Insights and Approaches, Singapore University Press, Singapore.

Ashley, R.S., 1984, Successful Techniques for Teaching Elementary Language Arts, Parker Publishing, New York.

Asmah Haji Omar dan Rama Subbiah (1968), An Introduction to Malay Grammar, Dewan Bahasa dan Pustaka (DBP) Kuala Lumpur.

_________________ (ed)1984, Kaedah Pengajaran Bahasa. Dewan Bahasa dan Pustaka (DBP) Kuala Lumpur.

Azman Wan Chik (1981), Prinsip dan Kaedah Mengajar Kesusasteraan Melayu, Utusan Publications, Kuala Lumpur.

_________________ 1982, Ujian Bahasa Malaysia, Dewan Bahasa dan Pustaka (DBP) Kuala Lumpur.

_________________ (ed)1986, Mengajar Bahasa Malaysia: Latihan Guru dan Bahan, Dewan Bahasa dan Pustaka (DBP) Kuala Lumpur.

Gurner, R. (1976), Language, Learning and Remedial Teaching, Edward Arnold, London.

Koh Boh Boon (1981), Pengajaran Bahasa Malaysia, Utusan Publications, Kuala Lumpur.

Koh Boh Boon (1990), Pengajaran Tatabahasa Bahasa Malaysia: Prinsip dan Teknik, Penerbit Fajar Bakti Sdn. Bhd., Kuala Lumpur.

_________________ 1981, Pengajaran Pemulihan dalam Bahasa Malaysia, Dewan Bahasa dan Pustaka (DBP) Kuala Lumpur.

_________________ 1984, Bahan Pengajaran Kendiri Terancang, Dewan Bahasa dan Pustaka (DBP) Kuala Lumpur.

_________________ (ed) 1989, Perspektif-perspektif dalam Pengajaran Bahasa Malaysia, Dewan Bahasa dan Pustaka (DBP) Kuala Lumpur.

_________________ 1978, The Teaching of Malay Affixes, Penerbit Fajar Bakti Sdn. Bhd., Kuala Lumpur.

Lado, R., (1976), Language Teaching: A Scientific Approach, Tata McGraw-Hill Publishing, Bombay.

Lim Kiat Boey (1975), An Introduction to Linguistics for the Language Teacher, Singapore University Press, Singapura.

Lufti Abas (1975), Tatabahasa Perbandingan: Predikat, Dewan Bahasa dan Pustaka (DBP), Kuala Lumpur.

_________________ 1976, Tatabahasa Perbandingan: Ayat, Dewan Bahasa dan Pustaka (DBP) Kuala Lumpur.

Mackey, W.F., (1978), Language Teaching Analysis, Longman, London.

Mashudi B.H. Kader ((1981), The Syntax of Malay Interrogatives,  Dewan Bahasa dan Pustaka (DBP), Kuala Lumpur.

Mohd. Taib Osman (ed), (1977), Pengajaran Bahasa dan Kesusasteraan Malaysia, Dewan Bahasa dan Pustaka (DBP), Kuala Lumpur.

Nik Safiah Karim (1978), Bahasa Malaysia Syntax, Dewan Bahasa dan Pustaka (DBP), Kuala Lumpur.

_________________ (ed), 1986, Bahasa Melayu Tinggi: Teori dan Penerapan, Dewan Bahasa dan Pustaka (DBP) Kuala Lumpur.

_________________ et al. (ed), 1982, Tatabahasa Dewan: Ayat. Dewan Bahasa dan Pustaka (DBP) Kuala Lumpur.

_________________ et al. (ed), 1989, Tatabahasa Dewan: Perkataan. Dewan Bahasa dan Pustaka (DBP) Kuala Lumpur.

Payne, E.M.F., (1970), Basic Syntactic Structures in Standard Malay, Dewan Bahasa dan Pustaka (DBP), Kuala Lumpur.

Raminah Hj. Sabran dan Rahim Syam (1985),  Kaedah Pengajaran Bahasa Malaysia,  Penerbit Fajar Bakti Sdn. Bhd., Petaling Jaya.

Richards, J.C. dan Rodgers, T.S. (1986), Approaches and Methods in Language Teaching, Cambridge University Press, Cambridge.

Rivers, W.M. (1981), Teaching Foreign-Language Skills, The University of Chicago Press, Chicago.

Sofiah Hamid dan Zaiton Ab. Rahman (ed), (1988), Ke Arah Keprofesionalan Guru Bahasa dan Sastera Melayu, Dewan Bahasa dan Pustaka (DBP), Kuala Lumpur.

Stern, H.H. (1983), Fundamental Concepts of Language Teaching, Oxford University Press, Oxford.

Wilkins, D. A., (1978), Linguistic in Language Teaching, ELBS and Edward Arnold, London.

_________________ 1981. Second Language Learning and Teaching, ELBS and Edward Arnold, London.