Nadai Kebuah Malu

Kekadang alit ga ati ngenang ulah sekeda ari kitai. Ulah ke tau ngasuh ati kitai alit nya senentang sekeda ari bala kitai ke ngembuan ulah ke malu ke jaku diri empu. Bansa Iban patut temegah ati enggau jaku diri empu laban jaku mih nyadi tanda pengalala bansa kitai.Nya alai kala kitai ninga orang nyebut, ‘dikelala buah ari langgu, dikelala bansa ari jaku’.

Berita senentang pekara tu kala dikenataika ba Utusan Borneo. Nitihka berita nya madahka Kaban Kunsil Nengeri sitak Bukit Begunan Mong Dagang munyi ke berupai enda lantang ati ninga sekeda bala kitai Iban enggai bejaku ngena jaku Iban lebuh betemu enggau diri sama diri di pasar tauka di nengeri. Nitihka berita tu, kebuah enggai, laban irauka orang mayuh ngelala sida nya bansa Iban.

Serimbai enggau nya, Mong nangi bendar, enti ulah malu bejaku ngena jaku Iban enggau pangan diri ba nengeri terus nyadi ba sekeda sida tu, nembiak rebak baru deka kelama-lama lenyau pengelala diri, nadai agi identiti bansa Iban laban enda nemu bejaku ngena jaku nya agi.

Enti Iban empu malu bejaku ngena jaku Iban enggau diri sama diri enda ngira di nengeri tauka sebarang alai endur, belabuh punas mih jaku Iban ari diatu. Enti jaku punas, bansa pan punas ga. Nama penyadi laban raban bansa Iban mih ke pengabis mayuh nguan menua Sarawak diatu bebanding enggau bansa bukai.

Nambahka nya, enti Iban enggai ngemeranka jaku diri empu, bakani ku Iban ulih terus ngemeranka adat enggau main asal diri empu baka besanggai, beramban, bepantun, berenung, mengap enggau main benyawa ke bukai.

Berita ke baka tu endang suah didinga kitai sebelah endur. Taja pia naka kediatu nadai udah bisi pansik senentang penyampau orang ke malu ke jaku diri empu. Nambahka nya mega nadai mega orang udah ngaga pansik kebuah orang malu ke jaku diri empu.

Taja pia, endang nadai salah kitai bejaku ngena jaku bukai maya ke betemu enggau pangan diri tang enda tau enda ingatka jaku enggau identiti diri empu.

Enti orang Iban empu malu bejaku ngena jaku Iban maya ke betemu enggau pangan diri laban maluka identiti ditemu tauka dikelala orang bansa bukai, pekara tu siti utai ti balat ngirauka ati sereta nyadi penangi besai ka bansa kitai. Ulah ke baka tu chukup ngelebuka bansa diri.

Ngelama tu, nadai orang akademik ke enda muji pemanah tusun jaku Iban sereta enggau pengelandik bala Iban ngena leka jaku setimbal dalam mayuh bengkah main asal oral tauka oral literature ngena main asal benyawa baka pengap, timang jalung, renung, pantun, jawang, pelian, sugi, sanggai enggau mayuh main bukai.

Main asal bukai ke dikena ngeramika gawai baka bebiau, besampi, begeliga, jaku ansah, muka kujuk tauka muka panggang enggau mayuh agi endang balat bendar mandangka pengaya jaku Iban.

Nya alai jarang bansa di dunya ngembuan pengaya jaku enti dibanding enggau enggi bansa Iban. Keba Professor Clifford Sather, ke kala mekuh chair of Asian Studies ba Unimas, Kuching ditu kala madah Iban chukup kaya sereta landik dalam jaku.

Kelimpah ari Sather, Professor Derek Freeman, siku anthropologist tebilang ari Australia ke mayuh nulis bup pasal raban bansa Iban, mega keran bendar madah bansa Iban siti bansa ti chukup kaya sereta landik dalam jaku enggau penemu asal.

Ukai seduai tu aja ke kala muji pengaya jaku Iban. Penulis orang putih ke bukai baka Ling and Roth, Pringle, Baughman enggau sida bukai endang muji jaku Iban.

Nya alai, kitai ke endang empu jaku nya patut bendar ngetan sereta ngena jaku nya ngambika enda lesi dibai hari, danjan dibai bulan. Nembiak rebak baru patut ngembuan temegah ati laban jaku nya mih ke nyadika pengelala bansa diri empu.

Kitai mesti terus bejaku Iban enti enggai pengelala bansa punas.