Pesepsyen enggau Pengarap

-->

Politik balat bendar bepanggai ba pesepsyen. Pemanah enggau penyai imej politik nya begantung ba pesepsyen ke lekat ba minda tauka runding orang ke betati sereta menilai politik.

Ba Malaysia, imej politik udah lama bakal baka ke kena timbak. Lebuh maya pengawa bepilih besai ke 12, rayat Malaysia dinah enggau mayuh macham cherita politik ke sensational ari kes merejuk parti, kes enda bebasaka institusyen beraja, kes belaya pasal hak sesebengkah bansa, kes makai suap, kes salah ngena kuasa, kes enchuri pasir, kes nuduh bala kaban belayan mangku pengawa ke besai sereta kes senentang pengawa beleman. Semua pekara ke udah dirintaika nya tadi balat amai meri pesepsyen ke negatif ngagai pengawa politik.

Nambahka nya mega, anang mih kitai tekenyit enti pesepsyen ke negatif nya tadi tau berubah ngagai tikas ti tinggi agi, iya nya ngagai pengarap. Ba tikas tu, imej politik ke negatif enda ulih diperesika agi ketegal ba minda sereta runding mensia mayuh, orang ngembuan pengarap ke madahka politik nya kamah sereta semina pengawa bemain dikena ngulihka kuasa.

Nya alai, mayuh amai risiko ke patut ditapi sida ke megai tampuk pemerintah enti udah datai ba tikas ke bansa tu. Tuduh penemu tauka agenda dikena ngemansang sereta nyaga pendiau rayat engka semina dikumbai rayat ngeleseka sida iya aja. Taja pan wakil ke dipilih endang beamat-amat deka ngerejaka pengawa iya, tang suah agi bala mensia mayuh endang entap ati ngumbai sida tu ngembuan agenda diri empu.

Enti diperatika ngena mata kasar, sida ke rebak baru balat agi ngembuan pesepyen enggau pengarap ke baka tu. Siti surat kabar jaku china kala ngaga pansik taun nyin kemari senentang pekara tu. Nitihka pansik nya, lebih ari 85 peratus responden ti semua iya bansa china ke beumur 35 taun ke baruh balat amai berasai skeptikal senentang pengawa bepolitik. Sida ngumbai politik nya kamah nya alai sida nadai ngembuan pengerindu senentang pengawa nya.

Majalah Dewan Masyarakat mega kala ngaga pansik sebulan sepengudah pengawa bepilih besai ke 12. Pansik nya madahka ari seribu responden ari semua menua ba Malaysia ke dikerandauka majoriti iya sida ke beumur 40 taun ke baruh. Ari seribu iku sida tu, 98 peratus balat amat berunding negatif senentang politik. Nya alai kitai tau nyimpulka penemu madahka sida tu udah nadai agi arapka institutional politik.

Senutuk enggau nya, kitai tau nyebut madahka pemutus pengawa bepilih besai ke 12 udah balat berubah ari selama. Mayuh amai bala ke baru ke asal iya blogger sereta individu enggau masuk bediri dalam pengawa bepilih tu. Ari nya mayuh mega sida dipilih rayat sereta menang dalam pengawa bepilih nya. Enti diperatika enggau amat-amat, sida ke menang tu ukai ketegal bisi pengelandik tauka penau ke chukup tang ketegal pengundi udah bansu udah leju enggau pekara ke nyadi ba pengawa politik menua tu.

Bulan tiga tu tadi, genap mih dua taun pengawa bepilih besai ke 12. Taja pia, mimit pan nadai meda bala sida politik bisi ati deka ngubahka imej politik sida ke sigi udah enda dipeda manah. Ukai semina naka nya aja, berita ke enda manah senentang bala orang politik majak amai nyadi ari sehari ke sehari. Nya alai kitai ke rayat selama, mensia mayuh patut berunding enggau naka penalam sapa orang ke patut disukung sereta disunting maya bepilih dudi hari ila laban empas ari undi kitai nya mih tumbuh siti perintah.