Tu pekara ti pemadu berat sereta patut diperatika kitai. Pelaba aku mayuh orang besetuju enti lebuh milih indu nengeri, pekara ti nyadika kriteria milih nengeri baka tu; iya nya nengeri nya alai tiga bengkah pampang perintah iya nya alai merintah (executive), alai nengkebangka adat enggau undang-undang menua (Legislature/Parliament) enggau ke ketiga nya alai mutuska pechara (Judiciary). Ambika banding sekeda menua ba dunya ke bisi chunto kriteria baka tu nya nyengkaum Australia, New Zealand enggau Canada.
Nyadi ba Malaysia, sepengudah ke meredika, Kuala Lumpur udah dipilih nyadi indu nengeri menua Malaysia lalu mengkang baka nya nyentukka sehari tu. Taja pia hal ti bekaul enggau Executive and judiciary udah dipindahka ngagai Putrajaya. Dua tiga hari ti udah kitai bisi ninga Parliamen mega deka dipindahka ngagai Putrajaya.
Kelimpah ari duit rayat ke nyampau RM800 juta, utai ke nyadi isu nya katika Kuala Lumpur agi ulih ditanka nyadi indu nengeri Malaysia jemah ila? Tauka perintah bisi runding bukai ke deka ngaga Putrajaya nyadi indu nengeri menua Malaysia ke baru?
Siti agi isu ditu nya status Kuala Lumpur enti semaka Putrajaya nya ila udah diangkatka nyadi indu nengeri menua Malaysia. Nya alai sekeda bala rayat bepenemu madahka perintah besai enggau perintah menua Selangor patut meratika baru agreemen ke nyerahka Kuala Lumpur ngagai perintah besai maya nya suba.
Pelabaka aku dalam agreemen nya suba tentu madahka seagi Kuala Lumpur diserahka ngagai perintah besai seagi nya mih iya nyadi indu nengeri Malaysia. Nya alai sida ke pakar tauka pandai ba bidang undang-undang enggau adat patut ngaga pansik lalu nyediaka keretas kereja dikena ngelalau perintah besai enggau perintah menua Selangor senentang isu tu.
Tiada ulasan:
Catat Ulasan