Apin lama ti udah ba aum Parlimen dia menteri ti bekaul enggau pengelikun (Menteri Pertahanan) udah terang amat madahka sekeda pupu raban bansa menua tu enda taluk ke menua diri ketegal mayuh amat sida nadai kiruh deka enggau masuk nyadi soldadu. Aku enda nemu berapa iku orang di Malaysia tu besetuju enggau penemu menteri tu. Enti munyi mayuh amat bala kitai di menua tu tau dikira enda taluk ke menua laban enda enggau orang nyadi soldadu.
Penemu baka tu dibantai pelabaka ukai ari pansik tang semina ari runding diri empu aja. Kati baka iya empu ke enda nyadi soldadu dih? Tau kini dikumbai enda taluk ke menua iya empu? Pelabaka kitai enda ibuh ngerua duit belanja ngaga pansik kebuah orang enggai nyadi soldadu. Bala Iban dipelabaka mayuh amat deka nyadi soldadu tang ukai semua ke enggau interview nya bulih. Kati sida ke enda bulih nya dikumbai kitai enda chukup taluk ke menua mega kini? Parai enti kitai majak berunding munyi nya.
Mayuh kebuah orang enggai nyadi soldadu tang siti ari kebuah nya ukai ketegal enda taluk ke menua diri. Kini tunga kitai lari, nadai menua bukai kelimpah ari Malaysia tu aja semadi mih kitai mayuh duit ulih pindah ke menua bukai.
Pengawa ke bisi ba Malaysia tu chukup mayuh. Semua orang Malaysia milih pengawa sida ketegal pengerindu tauka pemandai enggau pengelandik sida. Enti pemandai kitai bisi sereta nadai ngembuan pengerindu nyadi soldadu tentu kitai enda deka kiruh enggau orang minta pengawa nyadi soldadu.
Siti agi kebuah nyangka polisi milih orang ke tau masuk nyadi soldadu nya terit amat ti ngujungka mayuh nembiak enda tentu rindu deka masuk nyadi soldadu. Kedua nyangka peluang niki pangkat enda tentu mayuh sereta kadang-kadang chara milih siku-siku niki pangkat nya enda tentu dipejalaika enggau betul ngujungka mayuh orang nadai ngembuan pengerindu deka nyadi soldadu.
Mayuh amat chara siku-siku peranak menua Malaysia nunjukka diri nya taluk ke menua. Kitai ke udah gawa sereta ngembuan gaji besai endang meruan mayar cukai ngagai perintah. Tu pan siti ari chara kitai nya rayat ti taluk ke menua.
Kelimpah ari nya kitai enda enggau orang ngelanggar adat enggau undang-undang menua baka undang-undang jalai raya, ngerumpak, makai suap, ngaga sereta bejualka barang-barang ukai chulin tauka barang tiru. Nya sekeda ari orang ke enda taluk ke menua diri empu. Chunto bukai baka ngagai kad pengelala, pasport ke palsu sereta enda kiruh nangkap rayat menua bukai ke masuk enda beradat taja pan pengawa kitai endang nyadi imigresen. Enda mayar chukai dagang tauka minta duit suap ari orang ngambika projek ulih dipejalaika enggau jampat nya sekeda agi chunto bukai ti nunjukka rayat nya enda taluk ke menua.
Nya alai enti kitai deka meda menua tu maju sereta mansang baka menua bukai ke udah dulu mansang kitai patut ngembuan adat ti rentang ngambika rayat diau enggau lantang sereta bela meri sereta nyaup menua kitai nyadi menua ti maju jemah ila. Naka ke diatu menua kitai nyau ulih dilampat menua bukai ba Asia Tenggara nyau deka dalam semua bidang.
Manah bendar karang blog nuan tu, UT. Rindu amat aku macha pasal penaluk kitai siku-siku ke menua tu. Munyi ti deka nambah enggi nuan, penaluk kitai mayuh chara kitai 'nyukat'.
BalasPadamKitai meresi rampa menua, kampung enggau ai sungai pan siti ari chara kitai taluk ke menua diri.
Kitai bebasa ke pengelantang sesebengkah raban bansa (nyengkaum adat basa, gaya idup enggau pengarap sida) pan siti mega chara kitai taluk ke menua diri.
Kitai ti ngembuan juluk ati ngambi bagi ba sebarang pengawa ekonomi, ti tau dikena menua kitai ngemansangka penatai pemisi menua, pan siti mega chara kitai taluk ke menua.
Terima kasih ke penemu nuan nya unggal. Aku besetuju mih enggau penemu nuan nya. Lama aku udah deka ngenataika buah kenang aku senentang pekara tu. Bala Iban mayuh deka masuk nyadi soldadu tang mimit aja ke bulih. Aku enda mih nemu kebuah.
BalasPadam