Mayuh temuai ke datai ke Malaysia selalu meri komen ke manah senentang menua Malaysia tang komen nya enda nyengkaum agu rama enggau agu ke ba kedai makai. Taja pan mayuh kimpin udah dipejalaika tang lalu nadai udah tejapaika juluk ati ti deka meda agu ke beresi. Nya alai buah kenang pengarang sekali tu nya ngenangka pengamah agu rama sereta ulah ti enda nyaga pemeresi rayat Malaysia.
Bedau lama ti udah Local Government bisi ngaga pansik senentang agu rama. Pansik nya mandangka 51.6% ari 5,764 buah agu rama ke diperesa endang balat bendar kamah. Pekara tu ukai berita ke ngalitka ati kitai. Enti bula uji abas dini-dini agu rama lalu peda sereta kena. Tentu mayuh orang besetuju madahka agu rama kitai endang meruan kamah. Indah agu ke bisi ba kompleks pasar raya enda mih beresi taja pan pengguna diasuh mayar enti deka ngena agu sida; nama agi enti kitai ngagai restauran tauka kedai makai.
Kelimpah ari nya, agu rama ke bisi digaga ba palan alai ngetu ba lebuh raya mega kamah sereta enda tentu diintu enggau manah. Enti kitai matau ari Kuala Lumpur ngagai Melaka lalu singgah ba palan alai ngetu sereta ngabas agu rama tentu kitai keji meda pengamah agu rama ke bisi dia.
Besenutuk enggau nya mega bisi isu senentang raban bala pengguna agu ke enda nemu ngena agu rama enggau betul. Suah pengguna enggai ngena mangkuk agu enggau betul laban ku sida penuduk iya balat amat kamah. Ketegal ke enda tentu diintu enggau manah dia kitai meda sekeda mangkuk agu, kunchi pintu agu rusak lalu penyangkut gari lenyau ari endur nya.
Agi mayuh amat alai kitai ngubah sereta ngemanahka agi agu rama kitai. Semua tu bepanggai bendar ba hal ngintu agu, chara ngena sereta kelebih agi budaya pemeresi ba pengidup siku-siku kitai rayat Malaysia. Budaya pemeresi lebuh bekenaka agu rama patut bendar ditempa ba pengidup rayat Malaysia ngambika agu nya nyamai dikena semua orang.
Kitai patut ngubah chara kitai merati sereta bepikir senentang agu. Kitai mesti nyaga pemeresi agu sebarang maya taja pan iya endang dikena ngereja pengawa ke kamah. Kitai patut nyeliahka runding ti madahka agu nya endang endur ke kamah keba nya iya dikumbai agu.
Kitai endang besetuju madahka Malaysia sigi tebilang landik ngaga mayuh projek rumah ke manah-manah ti disikap enggau mayuh macham perengka. Tang lebuh datai ba maya ngintu rumah tauka sebarang palan dia kitai agi jauh bendar kurang lalu seruran agi enda tentu peduli nyaga iya.
Enti kitai bisi hari matau menua baikka iya ba pasar tauka menua pesisir ukai semina agu ke nyadika buah kenang tang nyengkaum pekara bukai baka parit, jalai, endur ba belakang kedai, palan alai engkah kerita rama, stesyen bas tauka teksi. Nyau deka semua endur tu enda tentu diintu enggau manah.
Nya alai udah chukup alai semua kitai nyengkaum Local Authority, agensi perintah, sektor prebet belematika pekara tu ari sukut pengelikun, servis enggau intu. Ngintu sereta servis enda kala nyadika pun pengawa taja pan menua Malaysia tebilang enggau pengawa pemansang infrstructure ti betikas dunya.
Ngangkatka pemanah imej menua ukai semina tanggung pengawa perintah, orang ke empu rumah enggau industri servis tang mega patut mega dilempai ba bau semua rayat peranak Malaysia. Semua peranak rayat ke diau mendam ba menua Malaysia patut ngena sereta nguna reta rama enggau penuh tanggung pengawa kelimpah ari ti ngintu pemeresi rampa menua.
Semua ulah ke manah tu patut diajar ngagai nembiak redak kenyau ari sida agi mit. Nya alai ketegal nya bala apai indai mih patut dulu ngemunka pemanah ulah ngintu pemeresi ngambika sida nyadika chuan sereta teladan bala anak.
Tiada ulasan:
Catat Ulasan