Sulu jaku 1Malaysia

Kurangka ngena sulu jaku tauka rambai jaku lalu lebihka pengawa bepikir tauka berunding ngulihka juluk ati polisi ti udah diperambuka baru ulih nyerakupka kaul semua rayat Malaysia sereta nentuka nadai orang ditinggalka pemansang. 

Kati bisi kitai meratika sulu jaku 1Malaysia nya dipandang ba semua endur?

Kenyau ari maya Menteri Besai Datuk Seri Najib bejadika konsep nya dalam taun 2009, jaku nya udah nyempulang mayuh bendar program perintah enggau produk tauka utai. Kitai diatu nyau bisi Kelinik 1Malaysia, netbook 1Malaysia, menu 1Malaysia, kedai 1Malaysia enggau lagu 1Malaysia. Nya semina sekeda ari mayuh produk ke nyumbuk ari konsep 1Malaysia. Mayuh bendar akronim tumbuh bejantil enggau 1Malaysia.

Kemaya hari tu kitai nyau bisi mega ninga BR1M tauka Bantuan Rakyat Satu Malaysia, ke alai perintah meri duit bantu RM500 ngagai sida ke penatai pemisi iya  RM3,000 tauka kurang. Tu siti ari mayuh skim 1Malaysia ke ditaburka perintah dalam Bajet 2012. Uji peratika akronim 1Malaysia ti nangkan ke tu.

KAR1SMA tauka Program Pengelantang Pendiau Rayat 1Malaysia (Kebajikan Rakyat 1Malaysia) diberi duit agih RM1.2 bil dikena nyediaka duit bantu RM300 sebulan ngagai orang tuai ke seranta, RM100 ngagai RM450 sebulan diagih ngagai nembiak seranta sereta elawin entara RM150 ngagai RM300 sebulan diberi ngagai orang ke timpang pendiau.

Udah nya kitai mega bisi ninga utai ke dikumbai PR1MA tauka Perumahan Rakyat 1Malaysia. Tu agensi ke ditumbuhka perintah dikena ngaga sereta ngemansangka rumah ti bekualiti ke ulih dibelika rayat ke ngembuan jelan penatai pemisi.

Dikena perintah meransangka pengawa inovasyen, siti ari langkah rapat ti diperambuka dalam Bajet 2012 iya nya nengkebangka program ti dikumbai Cipta 1Malaysia Award (CIPTA). Perais tu ila deka diberi ngagai nembiak sekula enggau nembiak bukai ke ulih ngasilka utai ti inovatif ba tikas menua. Pengawa tu deka dipejalaika raban gerempung ukai perintah (NGO) sambil dibantu Opis Menteri Sains, Teknologi enggau Inovasyen.

Kelimpah ari nya, dikena nambahka penatai pemisi sereta meransang sida ke bepenatai pemisi ke baruh besimpanka duit dia perintah udah ngelanggurka program ti dikumbai Skim Rakyat 1Malaysi tauka dikumbai SARA 1Malaysia). Program tu deka meri penguntung ngagai 100,000 pintu bilik ke begaji baruh ari RM3,000 sebulan. Nengah sekim tu, orang ulih minta loan duit RM5,000 lalu mayar pulai dalam timpuh lima taun. Sida tu dikearapka bulih untung maya pengujung taun kelima.

Nambahka nya mega, perintah udah merambuka program ti dikumbai SAY 1Malaysia tauka Strategic Action for Youth programme. Program tu deka nyediaka latih ngagai nembiak ke nadai agi nampung pelajar sekula sida. Latih tu deka dipejalaika ba mayuh bengkah institusyen baka kolej komuniti, Institut Kemahiran Mara, Institut Latihan Perindustrian enggau Giat Mara. Besenutuk enggau program nya, latih praktikal deka disediaka kompeni ke bisi kaul enggau perintah (GLC) enggau kompeni prebet mantu nyediaka pengawa ngaga bala pelatih tu.

Perintah mega bisi ati deka nambahka penyampau Kedai Rakyat 1Malaysia (KR1M) berengkah ari taun 2012. Kedai tu nyual 250 bengkah barang; nama agi enti ukai produk 1Malaysia lalu rega iya 40% baru ari rega barang ke dijual ba kedai selama.

Naka kediatu mayuh amat udah akronim 1Malaysia tu dikena. Ngembuan mayuh program, sekim enggau produk ke dilabel enggau 1Malaysia tau bendar ngujungka kitai nyau ngemaruhka konsep tu sereta tau mai empas ke nadai reti lebuh iya kaut bendar dikena. Uji tanya kitai rayat Malaysia berapa iku ari kitai ke amat ingatka reti 1Malaysia ke bendar? Tu munyi ku jaku Najib lebuh iya nerangka konsep nya ba blog website iya dalam bulan June 2009.

“1Malaysia is a concept to foster unity amongst the multi-ethnic rakyat of Malaysia, substantiated by key values that every Malaysian should observe. The approach is not independent of the Government’s thus far; instead it compliments them to further reinforce our solidarity in order to guarentee stability towards achieving higher growth and development for Malaysia and her people.”(http://1malaysia.com.my/)

Iya mega madahka 1Malaysia “values and respects the ethnic identities of each community in Malaysia, and proudly regards them as an asset or advantage. 1Malaysia underlines the value of ‘Acceptance’ amongst its multi-racial people, where one race embraces the uniqueness of other races, so that we may live with mutual respect for others as a nation. It is a distinct step above that of mere tolerance.

“The foundation for all this is the principle of justice for all, which means that the welfare of all Malaysians will be looked after, leaving no one behind.”

Jaku iya nya endang senaja enda dikalihka ngagai jaku Iban ngambika lenak agi dibacha sereta nadai pengirauka sekeda reti iya jauh rari enti dikalihka ngagai jaku Iban. 

Pulai ngagai pekara nya tadi, reti nya mayuh bengkah sekim 1Malaysia ke dirintaika dalam Bajet 2012 endang meruan bisi tuju dikena meri perati ngagai pengelantang pendiau semua rakyat Malaysia kelebih agi raban sida ke endang begunaka bantu sereta mega sida ke enda benasit manah.

Taja pia mayuh program ke dipejalai nya sekeda ari iya enda tentu dipejalaika enggau manah. Ambika banding baka pengawa besadungka BR1M; bisi ba sekeda endur nya enda diatur enggau lanchar. Mayuh bendar berita ke didinga sereta dibacha senentang bala orang mayuh ke berebut lebuh deka ngecheck status sida tauka lebuh ke deka ngambi bauchar; sida ke ba menua pesisir nya bisi penanggul deka ngerejistaka diri.

Kedua nya bekaul enggau KR1M. Kedai tu mega bisi penanggul kediri empu lebuh mayuh orang kelebih agi sida ke ari parti penyakal madahka utai ke dijual dia nya utai ke nadai kualiti sereta enda murah munyi ke disebut.

Taja pan prinsip 1Malaysia munyi ke diterangka Najib nya endang ngembuan pemanah tang atur ti dikena pejalaika konsep nya begunaka perambu sereta runding ti dalam; enda ulih dipejalaika sengapa-kada.

Nadai guna kitai beguai-guai bejalaika mayuh bengkah program enggau sekim enti semina deka bepelasar ba konsep 1Malaysia tang pengujung iya ngasuh rayat enda puas ati ketegal perambu ti enda chukup sereta enda dipejalaika enggau manah.

Nya alai, enti tuju iya deka nyerakupka rayat Malaysia sereta nadai ngelakka bisi orang tinggal kitai; patut ngurangka pengawa begunaka sulu jaku tu tang patut balat agi berundingka chara ngulihka tuju nya.