Court Rumah Panjai

Penyalah ti seruran nyadi kemaya hari tu ba nengeri besai jarang bendar bisi didinga kelia ba rumah-rumah panjai Iban. Penyalah ti suah nyadi maya nya suba semina penyalah mit ti bisi kaul enggau ruang bilik, belaki bebini lalu ketegal jaku petenah sekeda orang ba rumah panjai.

Orang ke beserebana nya suah agi madah ngagai tuai rumah ngambika pekara nya ulih diperundingka. Enti tuai rumah nya mujur ngumbuk kedua-dua piak ngasuh kes nya dikompaun nyangka penyalah nya enda ibuh dibai ke tengah. Taja pia, enti sema nyau enda ulih diperundingka agi entara seduai iya dia orang ke beserebana nya deka mai beranchau tikai ba ruai iya. Pengawa tu suah agi dipejalaika sepengudah badu makai lemai. Bisi orang diasuh bepadah ngagai genap pintu ba rumah panjai ngambika begelumu ba ruai orang ke bisi hal nya tadi.

Lebuh semua orang mayuh udah sampal datai, dia tuai rumah deka nanya orang ke beserebana nya tadi kebuah iya mai sida serumah begempuru ba ruai iya. Orang ke empu bilik nya lalu madahka cherita ke nyadi ari sukut runding iya. Udah iya tembu, nya baru orang ke dituduh iya nya pan lalu madah utai ke nyadi ari sukut iya empu. Enti orang ke beserebana nya bisi bukti iya diberi peluang mantaika bukti dikena nyukung serebana iya nya tadi. Nya alai bepanggai ba penau orang ke dituduh nya nyakal sebarang pekara ti nuduhka iya ngereja penyalah. Dalam hal tu, bala kaban belayan mega deka nanahka kedua-dua piak nya tadi. Enti semua orang ke diberi peluang bejaku nya udah mansutka jaku diri dia tuai rumah nya tadi deka minta runding sida ke tuai. Lebuh pekara tu udah tembuka dikerejaka dia tuai rumah nya empu deka meri pemutus runding iya senentang pekara nya lalu deka ngeletakka ukum ke dikumbai tunggu. Rintai unit ukum tunggu tu bepun ari menukul (sama enggau 50 sen) lalu ditangkanka enggau jabir (RM1), panding (RM2), rusa (RM4) tauka alas (RM8).

Enti kes nya enda ulih diputarka dia tuai rumah ulih ngiga jalai bukai. Ambika banding ba kes ngenchuri, tuai rumah ulih mansutka jaku munyi tu, “Kita udah ningaka serebana ari Unggal X nuduhka Z bisi ngambi kain pandak anak iya. Z udah nyangkal tuduh nya. Kita mega udah sama bela ninga jaku ari sida ke bukai senentang pekara tu. Aku ngasaika diri tusah bendar deka bepanggai ba saksi ari kedua-dua piak, nya alai aku enda ulih mutuska pekara tu. Taja pia, aku deka ngengkahka raga ba penama rumah panjai kitai tu lalu ngarapka orang ke ngambi kain nya mulaika utai ti diambi iya ngagai siti ari dua raga nya dalam timpuh tiga hari. Enti orang ke ngenchuri nya enda mulaika kain ti dichuri iya dalam timpuh ke udah diletakka nya dia iya deka ditinggang ukum”. Lebuh raga nya udah diengkah ke ba endur ti udah disediaka tuju pengawa nya, dia tuai rumah tauka pengari iya deka besampi ngagai petara minta orang ke ngenchuri utai nya diukum enti sema iya enggai ngemulaika utai ti diambi iya. Ketegal takut disumpah suah bendar orang ke ngambi utai orang bukai nya deka mulaika utai nya maya malam dalam timpuh ti udah diletakka tuai rumah.

Lebuh Rajah Putih iya nya bepun ari James Brooke udah merintah menua Sarawak dia siti kod adat bepelasarka adat Iban dipejalaika dikena nangkup tusun tunggu ti endang udah bisi.

Sistem ukum nya ngena kati enggau pikul nyadika chara ngeletakka ukum taja pan utai tu ukai bisi kaul enggau pemerat baka ke kala didingaka kitai. Ambika banding, satu kati tauka sekati nya sama enggau mata duit 72 sen lalu sepikul nya sama enggau 40 kati penyampau ukum nya kira dikalih ngagai mata duit nya RM28.80.

Tuai rumah bejalaika kuasa iya bepelasarka sistem kod nya tadi nitihka sistem tusun tunggu. Nambahka nya mega, tuai rumah bisi kuasa ngeletakka ukum datai ke lima kati baka ba kes butang, ngemaluka orang tauka kes ruang bilik ke bukai. Peranak tuai rumah taja pan baka nya agi ulih ngapil enti enda puas ati enggau pemutus pechara nya. Semua apil dibai ngagai court penghulu. Penghulu ke bekuasa ba atas beberapa buah rumah panjai semina ulih ngeletak ukum 20 kati lalu kuasa ke tinggi agi iya nya rekaya (suah agi disebut orang kaya) ulih ngeletak ukum datai ke 40 kati.

Ambika banding, kes ti tau dibai ngagai penghulu iya nya bekaul enggau orang indu ke ngandung sereta deka ngambu apai ke anak ke dikandung iya. Kes baka tu taja pan bisi tang jarang amat nyadi. Enti lelaki nya ditemu salah lalu enggai jadi enggau indu nya, dia iya tau diukum sepuluh kati (RM7.20). Kelia taja pan ukum nya enti dipeda ari perspektif kemaya hari tu chukup nadai nilai lalu baka ke ngemelika orang ke beserebana nya tang iya chukup ngemaluka orang ke bepenyalah nya. Sekayu rumah panjai tauka genturung menua dia deka bekenangka orang ke ngereja penyalah nya. Kemaya hari tu ketegal mayuh Iban ke udah ngembuan pelajar tinggi dia sida tebal agi ngagai lawyer sereta ngagai court sivil.