Tukuh Jaku Iban Standard Di Sekula

Panyun jaku

Dikelala buah ari langgu lalu dikelala jaku ari penyiru nya sulu jaku ke seruran didingaka kitai lebuh bekenangka jaku kelebih agi jaku Iban. Mayuh amat orang ke rinduka jaku Iban meri penemu senentang chara enggau gaya jaku tu patut dikemansangka sereta dikerembai. Nya alai ketegal pengeransing sekeda raban aktivis jaku Iban dia kitai meda jaku Iban tu udah entap dikena sereta dipelajarka nembiak ke ukai semina bebansa Iban. Ngambika semua nembiak bejaku jaku Iban ke sama dia raban komiti jaku Iban ba Opis Pelajar udah netapka standard jaku ke ulih dikena ba semua sekula ti bisi ngajar jaku Iban. Nya alai buah kenang ke sekali tu nguji belematika enggau lenak jaku Iban standard ke udah diperambu sereta dikena ba sekula.

Reti leka jaku Standard

Sebedau belemati enggau silik pekara tu aruh iya kitai meratika reti leka jaku standard tu ngambika ngemudahka kitai belematika pekara tu.

Standard dalam Kamus Dwibahasa Edisi Kedua (2002) madahka reti iya nya 1. biasa; lazim 2. yang diterima umum dan dianggap betul 3. tahap kualiti yang diharapkan 4. ciri yang diterima dan dianggap betul 5. Piawai. Enti dikalihka ngagai jaku Iban, standard nya mai reti pekara ke selama ti udah diterima mensia mayuh sereta dianggap betul. Iya mega mai reti tikas kualiti tauka tikas pemanah ti dikearapka; penteba tauka biuh ke diterima lalu dikira betul.

Dalam Oxford English Dictionary 3rd Edition (2002) nerangka reti leka jaku standard nya used or accepted as normal or average such as is regularly used or produced (of work, writer etc.) viewed as authoritative and so widely used.

Dalam Dictionary of Iban and English (Vinson and Joanne Sutlive:1994) nyebut standard nya  chunto kena nyukat kereja tauka utai bukai.

Nyadi lebuh dipansik leka jaku standard tu mega sebaka enggau leka jaku baku dalam jaku Melayu. Baku nya sesuatu yang (sudah) diterima umum sebagai betul dan sah (bentuknya, sifatnya, dll.) dan dapat dijadika asas perbandingan bagi bentuk dan sebagai nya yang lain berkenaan bahasa, sebutan, ejaan dsb. (Kamus Dewan Edisi Ketiga).

Nya alai ulih disimpulka ditu, leka jaku standard nya pekara ti udah diterima betul sereta diaku mensia mayuh ari sukut tukuh, gaya etb sereta ulih nyadika pelasar dikena manding pekara ti bekaul enggau jaku, chara nyebut, chara nyepil enggau ti bukai.

Mayuh Standard

Jaku Iban tu enti dipansik enggau lenak agi ngembuan mayuh standard.  Ujia peratika pemansang jaku Iban tu ke udah dikena genap raban ke nguji ngerembaika jaku tu.

Jaku Iban udah lama ngerembai nyadi jaku surat kenyau ari Sarawak dipegai perintah Rajah Brooke menya. Iya dikena ba pengawa ngerembaika pengarap kristian ngagai bala Iban ba menua pesisir. Lebuh Sarawak diserahka ngagai perintah koloni, jaku Iban mega berengkah dikena ba stesyen radio. Kelimpah ari nya, bup undang-undang Rajang Meluan (1936), Tusun Tunggu Sibu (1952), Tusun Tunggu Simanggang (1961) nya sekeda evidens dokumen ti ditulis dalam jaku Iban ke ngaraka adat enggau tusun tunggu bansa Iban. Maya nya mega ba Native Court, penghulu ti dichiri perintah ngatur pechara bekaul enggau ruang bilik, tanah buah, temuda rimba, reta tengkira enggau pesaka nembiak redak bansa Iban mega nulis pemutus pechara dalam jaku Iban. Dipelabaka maya tu standard sepil ke dikena nya balat agi engkabih chara nyepil ari sukut dilah jaku English.

Ba stesyen radio baka ba stesyen bagi Iban RTM enggau CATS FM endang ngembuan standard sida empu ari sukut chara nyebut enggau intonasyen. Radio Iban RTM mega mayuh agi bebida ari stesyen siti ngagai stesyen siti bepanggai ba pelilih menua ke alai stesyen radio nya.

Ba pemansang pengawa betulis dia kitai ulih meda mayuh amat chara nyepil siti-siti leka jaku ke bebida entara penulis. Dalam jeman 60an maya Borneo Literature Bureuau(BLB) ditubuhka dia mayuh amat bup dalam jaku Iban bisi ditulis. Bup ensera, bup cherita enggau adat asal raban bansa Iban bela bisi ditulis dalam jaku Iban. Taja pan bisi gerempung baka BLB tu meransang mensia mayuh nulis dalam jaku Iban tang nadai atur ti formal bisi udah dikeluarka dikena ngambika jaku Iban ti ditulis nya ulih ditulis dalam jaku Iban standard. Nya alai chara nyepil sereta jalai jaku nya balat bepanggai ba penulis nya empu.

Jaku Iban majak ngerembai nyentuk ke sehari tu. Kemaya hari tu kitai ulih macha berita dalam jaku Iban. Surat berita baka berita Iban Utusan Borneo enggau Utusan Sarawak nya chunto surat berita ke bisi ngeluarka berita dalam jaku Iban. Taja pia standard jaku ke dikena sida ba surat berita tu bisi nyelai mimit ari ke dikena ba sekula. Nya alai enti sema iya dikena nyadika kereban belajar enggau ngajar di sekula dia sekeda sepil, leka jaku enggau jalai jaku ke bisi dikena sida nya deka dikemetulka ngambika engkeman enggau standard ke dikena ba sekula.

Kelimpah ari surat berita, jaku Iban mega ngerembai nengah majalah. Sekeda majalah ke udah bisi sereta enggau ke bisi dikeluarka nya nyengkaum majalah Pegari, Senawah, Tebilang, Kenyalang, Bangka, Sempandai enggau Kesulai. Baka nya mega majalah ke bisi dijual ba pasar tu endang bisi standard iya kediri empu. Semina sekeda majalah aja ke bisi nitihka standard jaku Iban di sekula iya nya ari sukut atur sepil. Majalah tu nyengkaum majalah Pegari, Senawah enggau Sempandai. Patut dikeingatka endang bisi penguntung enti nitihka atur sepil jaku Iban di sekula laban sekula kadang-kadang sigi begunaka majalah nyadi sebagi ari kereban bacha; nya alai sida suah bendar meli dalam penyampau ke mayuh lalu tu tau bendar mai penguntung ngagai kompeni ke ngeluarka majalah nya kelimpah ke dijual ngagai mensia mayuh.

Tun Jugah Foundation mega ngembuan standard sida empu lebuh nulis artikel, bup adat asal, leka main enggau ti bukai. Enti diperatika sida balat ngena tanda glottal stop lebuh nulis sekeda leka jaku Iban ke ngembuan bunyi glottal ba ujung tauka ba tengah leka jaku. Rasional sida ngena chara nya laban sida ngarapka mayuh orang ari menua tasik ke rindu deka mansik budaya enggau jaku Iban ulih macha jaku nya nitihka chara nyebut ti bendar nitih dilah jaku Iban. Sigi bisi pengamatka rasional sida nya, ukai orang ukai Iban aja ulih macha lanchar ngena chara nya tang orang Iban empu mega ulih kelebih agi sida ke udah jauh bendar ninggalka jaku Iban. Semina praktikaliti ba sekula ke ngasuh chara tu deka mar mimit dipejalaika.

Jaku Iban mega enda ditinggal pemansang ubah dunya. Lebuh komputer ditengkebang sereta digaga mega internet, dia jaku Iban sama bela baka jaku bukai bisi ampit ruang nulis dalam jaku Iban. Kemaya hari tu kitai ulih meda mayuh amat blog ti ditulis dalam jaku Iban ngenang mayuh macham pekara ari sukut pengidup diri empu ngagai pekara ti bekaul enggau adat asal sereta budaya raban bansa Iban. Taja pia, laban ukai semua penulis blog tu bisi ngambi mata pelajar jaku Iban di sekula dia kitai ulih meda mayuh macham chara sida nyepil sereta nulis ayat dalam jaku Iban. Baka nya mega jaku Iban ke dikena facebook, twitter enggau whatsup. Jaku Iban ke dikena lebuh nulis pesan jaku pandak (SMS) ke ngembuan standard kediri empu. Semina orang ke masai ngena jaku ba telefon nemu chara nyepil leka jaku Iban lebuh sida bepesan enggau pangan diri.

Dayak Cultural Foundation (DCF) kala udah merambu sereta ngeluarka sistem sepil jaku Iban dalam taun 1997. Tuju ngeluarka sistem sepil tu ngambika iya tau nyadi malin raban penulis ke deka nulis dalam jaku Iban. Sekula ke maya nya bisi ngajar jaku Iban udah besetuju ngena atur sepil nya nyadika pelasar atur sepil ke dikena bala sekula. Enti diperatika ari asil tu tau dikira enda tentu mujur laban agi mayuh bala penulis ke nulis ngena chara diri empu. Semina sekeda ke apal bendar enggau atur sepil tu nyangka ketegal ke nyadi pengajar jaku Iban sereta Opis Pemadah ke bisi amat-amat ngena atur sepil ti udah dikeluarka DCF tu.

Pemayuh chara jaku Iban dikena ba surat mandangka jaku tu bedau tentu entap ari sukut standard. Nya alai enggau pemansang jaku Iban ke bisi dipelajar di sekula berengkah ari primari satu nyentuk ke pom lima deka mai impak ti positif ari sukut standard sereta pengentap jaku tu jemah ila.

Tukuh jaku Iban standard di sekula

Sebedau taun 2007  standard jaku Iban diterima guna di sekula nya bepelasarka atur sepil jaku Iban ti dikeluarka Dayak Cultural Foundation (DCF) dalam taun 1997. Evidens tu ulih diperatika dalam bup atur meri mark ngagai peresa jaku Iban ti bisi dikeluarka Lembaga Peperiksaan.

Dalam taun 2007, Opis Pemansang Kurikulum di baruh Opis Menteri Pelajar bisi ngeluarka bup Sistem Jaku Iban Di Sekula. Berindik ari nya jaku Iban ke bisi diajar ba sekula ngena standard jaku Iban ke udah dikeluarka nya nyentuk ngagai kemaya hari tu.

Sebedau nya, pekara ti patut dikeingatka kitai nya jaku Iban standard ke dikena ba sekula nadai madah penatai ari ai ni tauka ari menua ni. Amat mih jaku Iban maya taun 60an balat agi ngena jaku ari menua Saribas tang nya ketegal ke  penulis maya nya tebal agi datai ari menua nya. Sebaka mega enggau jaku Iban ti dikena ba radio Iban maya nya suba. Menya nyangka agi mayuh sereta balat bala Iban betalatka penatai jaku Iban ti patut dikena di sekula; tang kemaya hari tu jaku tu datai ari semua pelilih menua sereta iya ke masai agi dikena sereta teleba didinga nya ke balat agi dikena.

Tukuh jaku Iban standard ulih diperatika ari dua pekara; iya nya ari sukut jaku randau enggau jaku betulis.

Dalam jaku randau, jaku Iban ti dikena nya meras baka ti dikena lebuh berandau ruai, interview tauka lebuh besara penemu.  Iya mega ngembuan jaku alus, bebasa sereta kemerah. Jalai jaku ti dikena lebuh berandau enda ngemeratka guna jaku ti tegap sereta atur ti betul amat. Nembiak agi bisi diberi ruang ngena jaku puntang sereta jaku nitihka menua diri semadi mih lebuh diasuh macha teks berita tauka lebuh berandau maya pengawa formal baka maya ba seminar tauka bejaku ba mua mayuh.

Pengawa berandau entara nembiak enggau pengajar lalu entara nembiak enggau nembiak dipejalaika nengah pengelandik ti dikumbai pengelandik mending enggau bejaku.

Kelimpah ari ti diajar chara mending enggau bejaku ti betul dalam jaku Iban, bala nembiak mega ditisih dalam pengelandik nya. Tisih nya proses dikena ngulihka penerang senentang pengulih siku-siku nembiak. Tisih mega siti ari chara meratika standard jaku ke dikena nembiak. Ba pengelandik mending, nembiak ditisih nengah mayuh bengkah konteks baka ngenataika kenang, becherita, meri ripot enggau ti bukai. Langkah rapat dikena bejalaika tisih mending enggau bejaku mega mayuh nyengkaum nyaut tanya senentang teks ti didinga, berandau bebala mayuh tauka berandau betubuh dua.

Pekara ti diperatika lebuh bejalaika tisih mending enggau bejaku nya nyengkaum jalai jaku enggau pengelebat leka jaku ti dikena, sebut, intonasyen enggau entak sebut, pengelanchar ngenataika idea sereta idea ti dikenataika nya betul sereta nemban.

Dalam jaku betulis, jaku Iban betukuh formal. Iya terang bendar dipeda lebuh nulis karang. Jalai jaku, tanda bacha sereta sepil ti dikena nya nitihka sistem sereta bepelasarka bup Sistem Jaku Iban Di Sekula 2007. Jaku puntang baka ‘ku’, ‘ka’, ‘entu’ enggau ti bukai enda patut dikena lebuh nulis dalam jaku Iban. Jaku betulis mega dijaga ari sukut jalai jaku lalu ulih diedit tauka diseruri ari aspek sepil enggau struktur ayat. Karang mesti ditulis nitihka format baka atur nulis paragraf, jaku ke dikena, jaku penyambung sereta leka jaku ba pun ayat enggau ti bukai.

Kelimpah ari nya, tukuh jaku Iban standard di sekula mega dijaga belalauka standard pelajar ke udah dikemendarka opis menteri pelajar belalauka kurikulum kemaya hari tu setipak enggau pengawa transformasyen perintah.

Tikas pengelenak pelajar jaku Iban

Tikas pengelenak pelajar jaku Iban mega ulih diperatika ari tiga tikas; iya nya tikas kena nitihka guna sehari-sehari, tikas kena maya formal enggau tikas kena ba waris daya idup.

Ba tikas kena nitihka guna sehari-sehari dia jaku Iban ke dikena nya ba jaku jaku randau. Jaku tu dijaga standard iya ari sekeda sukut. Ambika banding lebuh macha teks berita radio tauka televisyen, lebuh belaban penemu sereta lebuh jaku be gempuru bebala mayuh.

Ba tikas kena maya formal, standard dijaga lebuh jaku nya dikena dalam karang baka ripot, jurnal, minit aum, artikel tauka tesis pandak tikas sekula.

Ba tikas kena ba waris daya idup mega bisi standard ke patut dikena sereta udah diterima. Jaku ba tikas ti dikena nitihka lalau pendiau raban bansa Iban. Iya mai leman rampa pendiau nitihka pekara ti deka dipansutkka, leman individu baik nya ari sukut dialek tauka ideolek. entak sebut ti alus sereta berurun lalu dikena enggau konsisten. Standard jaku tu ulih dipeda lebuh ngena jaku sebar, jaku karung, jaku sempama enggau ti bukai. Taja pan leka jaku tu leka jaku klasik tang ari atur sepil iya distandardka nitih sistem jaku Iban baka ke udah dirintai dalam bup Sistem Jaku Iban Di Sekula 2007.

Simpul penemu

Nya ke baka buah kenang senentang tukuh jaku Iban standard ti bisi dikena di sekula kemaya hari tu. Tu bebagi penemu senentang pekara tu ngambika pemacha ulih beratika bida entara jaku ke dikena ba luar kandang sekula enggau iya ke dikena ba sekula. Ngagai bala pemacha ke nadai kala ngambi mata pelajar jaku Iban sereta bisi ati deka belajarka sistem jaku Iban di sekula diperansang ngelawa website Bahasa Iban, Bahagian Pembangunan Kurikulum, Kementerian Pelajaran Malaysia. Baka nya mega ngagai bala Iban ke deka ngambi peresa SPM Bahasa Iban patut bendar macha bup tu mega ngambika ulih ngiring sereta ngembing sida ngena atur sepil enggau jalai jaku Iban ti betul sereta formal.

Penyanding Penemu

Vinson and Joanne Sutlive (1994), A Handy Reference Dictionary of Iban and English, Tun Jugah Foundation, Kuching

Kamus Dewan Edisi Ketiga (2002), Dewan Bahasa dan Pustaka, Kuala Lumpur

Kamus Dwibahasa Bahasa Inggeris-Bahasa Melayu, (2002), Dewan Bahasa dan Pustaka, Kuala Lumpur

Concise Oxford English Dictionary (2002), Oxford University Press, UK

Chemaline anak Osup, Padang anak Luna (2011), Morfologi Jaku Iban, Emeritus Publications, Perak

Sistem Jaku Iban Di Sekula (2007), Kementerian Pelajaran Malaysia